Juanasiup Aglangit 2
2
Kainami Katititaujuqarninga
1Ulluit pingajunganni Kainami Galiliamiittumi katititaujuqalauqpuq, Jiisusiup anaananga tavvaniippuq; 2Jiisusittauq qaiqujausimagivut katititaujuungnut, ilinniaqtingillu. 3Uainiit nungummata, anaanangata Jiisusi uqautivaa, “Uainimik nungurutivut.”
4Jiisusiup uqautivaa, “Arnaaq, qanuiliuqulunga uqariaqanngilatit, piviksara suli nalliutisimanngimmat.”
5Tavva Jiisusiup anaanangata pijiit uqautivait, “Qanutuinnaq piqujikpat malingniaqpasi.”
6Juutit maligaqarmata ukpirusituqarmiktigut sunatuinnait salummaqsataugiaqarninginnik, taimaimmat pingasuujuqtunik imiqautinik tavvaniittuqaqpuq, atunit imaqarunnaqtunik atausiq 20-mit 30-mut qallutinik. 7Jiisusiup pijiit uqautivait, “Ukua imiqautiit imirmik immiqsiuk.” Tavva immiqpait tatallugit. 8Uqautivait, “Tavvanngat qalusilusi, nirivigjuaqtut angajuqqaangannut aatsilirissi.” Tavva aatsivut taassumunga, 9nirivigjuaqtut angajuqqaangatta imiq uukturamiuk uainiuliqtuq, qaujimalaunngilaq nakit pingmangaat pijilli imirmik qalusiqqaujut qaujimavut, nirivigjuaqtut angajuqqaangatta uiksaq qaiquvaa 10uqautillugu, “Piusirijausuunguvuq uaini mamarniqpaaq sivulliutillugu; nirijaqtuqsimajulli imiriiqsimaliqpata, kinguliutillugu uaini mamannginniqsaq atuinnaruqtausuunguvuq; ivvilli uaini mamarniqpaaq kingulliutingaaqpat.”
11Tamajja Jiisusiup nalunaikkutangita sivulliqpaangat, piniarnirilauqtanga Kainami Galiliamiittumi, tavvani niqturnarnirjuani saqqitilauqpaa; ilinniaqtingitalu ukpirivaat.
12Tamatuma kinguningagut Jiisusi, anaanangalu, qatanngutingillu ilinniaqtingillu Kapiirniamuaqput; tavvaniippullu ullunik ununngittunik.
Jiisusiup Tuksiarvigjuarmuarninga
Maatiusi 21:12-13; Maakusi 11:15-17; Luukasi 19:45-46
13Juutit Qaangiqtauvingmik nalliunniqsiurvingat qaglilirmat, Jiisusi Jiruusalimmuaqpuq. 14Tuksiarvigjuarmilu inungnik takuvuq immuksiugait pangninginnik siipiniglu aqiggiujaaqtuniglu niurrutiqaqtunik, kiinaujaniglu tauqsiijiit pinasuaqtillugit pinasuagarmingnik. 15Aktlunaamik tiigarutiliurami, tavvaniittulimaat anitippait, siipiillu immuksiugaillu pangningit, tuksiarvigjuamit; kiinaujaniglu tauqsiijiit saangit urrutippait kiinaujaillu naavillutik namutuinnaq. 16Aqiggiujaniglu niurrutiliit uqautivait, “Ukua tavvanngat anitilauqsiuk; Ataatama iglunga niuvirviutitaksarinngilasi.” 17Tavva ilinniaqtingit iqqaivut titiraqsimajuqarmat, “Iglungnut ilungiqsuutiqarnirma aksuruqtiliqpaanga.”#2:17 Inngirut 69:9
18Tavva Juutit angajuqqaangita uqautivaat, “Qanuq nalunaikkutarmik saqqititsijunnaqpit uvattinnut taimailiurunnarnirnut?”
19Jiisusiut kiuvait, “Una tuksiarvigjuaq asirurussiuk, ulluniglu pingasunik nappaqtittumaaqpara.”
20Tavva Juutit uqaqput, “Unaa tuksiarvigjuaq sanajausimajuq arraagunik 46-nik, nappaqtittunnaqpiuk ullunik pingasunik?”
21Jiisusili tuksiarvigjuarmik uqausiqaqpuq timiminik. 22Taimaimmat tuqungajunit makisimalirmat, ilinniaqtingita Jiisusiup uqausirilauqtangit iqqalauqpait; Aglait ukpirivait Jiisusiullu uqausirilauqtangit.
Jiisusiup Qaujimaninga Inuup Piusinganik
23Jiisusi Jiruusalimmiitillugu Qaangiqtauvingmik nalliunniqsiuqtillugit, amisut ukpiliqput taassumunga nalunaikkutarnik takugamik pinasuaqtanginnik. 24Jiisusili nangminiq ilaliutimmarilaunngilaq inungnut, 25inulimaat qaujimatsiaramigit inungnut nalliannulluunniit nalunaiqsiviujariaqalaunngilaq; qaujimatsiarami inuup ilumiutarijanginnik.
Dewis Presennol:
Juanasiup Aglangit 2: EAIBR
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Eastern Arctic Inuktitut Bible (Romanized) © Canadian Bible Society, 2022-2023.