Juanasiup Aglangit 1
1
Uqausiq Inuusiujuq
1Pigiarnirmi Uqausiq tavvaniilauqpuq, Uqausirlu Guutimiilauqpuq, Uqausirlu Guutiuvuq. 2Taanna pigiarnirmit Guutimiilauqpuq; 3sunalimaatsiat taassumuuna pinnguqtitaulauqsimavut; taassumalu asiagut pinnguqtitausimajuqanngilaq pinnguqtitausimajunik. 4Inuusiq taassumaniilauqpuq, inuusirlu inungnut tamainnut qaummaqqutaulauqpuq. 5Qaumajuq qaummaivuq taaqtumik, taaqtuullu qamilaunngilaa.
6Guuti tilisilauqpuq inungmik, Juanasimik atilingmik, 7taanna tikilauqpuq uqausiqariaqturluni, qaumajumik nalunaiqsijaqturluni, iluunnatik taassumuuna ukpiliqtitauqullugit. 8Nangminirli Juanasi qaumajuunngilaq, tikilauqpurli nalunaiqsijaqtuqtluni qaumajumik. 9Sulijumigli qaumajuuvuq taanna silarjuarmut tikittulimaanik inungnik qaumaksaijuq.
10Qaumajuq silarjuarmiilauqpuq, silarjuarlu taassumuuna pinnguqtitausimavuq, silarjuarmiulli qaujimanngilaat. 11Nunaminut nangminirminut tikippuq, inuqutingitali nangminingita ilaliunngilaat. 12Taassumingali ilaliurijulimaat, ukpilirlutiglu taassuma atinganut, taakkua qiturngataarijaujunnaqsitippait Guutimut; 13taakkua irnianguvut, angummit pinatik timiulluunniit pijumajanganit, inuullu pijumajanganit pingminatik, Guutimilli irnianguvut.
14Uqausiq timitaalauqpuq inuuqatigililauqpavullu, niqturnarnirjuanga takulauqpavut, niqturnarnirjuaq Ataatamit pisimajanga Irnituangunirminut; pitsiarningata pijunnaqtitsininganik sulitsiarnirmiglu tatattuq.
15Juanasiup nipiqquqtulluni nalunailauqpaa uqarluni, “Taannauvuq uqausirilauqtara, ‘Kingunikkut qainiaqpuq uvannit ajunnginniqsaujuq, inuulilauqtinnanga inuusimajuq.’”
16Taassuma pitsiarningata pijunnaqsititsininga angijuunikunganut saimmaqtitausimajumik inuusiqaqtippaatigut pitsiarviunirmut saimmaqtitauvallianginnarlutalu. 17Piqujat Muusisikkut tunijaulauqput; pitsiarviunirli sulitsiarnirlu Jiisusi Christuusikkut pivuuk. 18Guutimik takusimajuqanngilaq; Irnitualli Ataataup sarliaqtangata, taassuma Guuti qaujijautippaa.
Juanasi Paaptitsirijiup Ajuriqtuininga
Maatiusi 3:1-12; Maakusi 1:1-8; Luukasi 3:1-18
19Juutit angajuqqaangit Jiruusalimmiittut tunirrusiqtitsijinik Livaitiniglu Juanasimik apirijaqtuqujivut, imaak “Kinauvit?”
20Juanasili saglunani, imminik uqausirivuq, uqarluni, “Christuusiunngilanga.”
21Taakkua apirivaat, “Kinaugavilli? Ilaijjauvit?”
Kiuvuq, “Tainnaunngilanga.”
“Nalauttaijuuvit?”
Kiuvait, “Aakka.”
22Taakkua uqaqput, “Kinauvit? Kiulauqtigut uvattinnik tilisijunut uqarunnaqulluta. Qanuq ilingnik uqausirijunnaqpit?”
23Juanasiup kiuvait,
“Tainnauvunga, ‘Nipi qaigalaaqtuq tusaqsaujuq inuqanngittumi;
Ataniup aqqutiksanga tukiliaqsitisiuk,’
Nalauttaijup Aisaiasiup uqausirisimajanga.”
24Taakkua Paarisikkunnit tilijausimalauqput, 25apirilirivut, “Sungmalli paaptitsiqattaqpit? Christuusiunak, Ilaijjaunaglu, Nalauttaijuunaglu.”
26Juanasiup kiuvait, “Imarmut paaptitsivunga; akunnassinnili nangiqtuqaqpuq qaujimanngitassinnik, 27taanna kingunikkut qainiaqtuq, naluqqutivunga aglaat itigagutinginnik singiijjaaqsijariaksaq.”
28Tamanna piniarniulauqpuq Pitanimi Kuup Juartaniup taliqpiani, Juanasiup paaptitsivingani.
Guutiup Nurraujaqutinga
29Qautillugu Juanasiup Jiisusi miksimut qailiqtuq takugamiuk, uqaqpuq, “Takugit, tavva Guutiup Nurraujaqutinga, nunarjuarmiut ajurninginnik piijaijuq! 30Tavva uqausirilauqtara uqaqtillunga, ‘Angut kingunikkut qainiaqpuq uvannit ajunnginniqsaujuq, inuulauqtinnanga inuusimagami.’ 31Nangminirli qaujimalaunngilara; taimaimmat imarmut paaptitsirijaqtulauqpunga, ilitarijauliqullugu Isarialimiunut.”
32Juanasi nalunaiqsilauqpuq imaak, “Anirniq qilangmit aqqaqtuq takulauqpara tingmiatut tuuvitut, taassumaniilirluni. 33Uvangali nangminiq qaujimalaunngilara; tilijimali imarmut paaptitsirijaqtuqullunga uqautilauqpaanga, ‘Angummut Anirnirmik aqqaqtumik takuguvit tavvaniiliqtumik, taannauvuq Anirnirmut Ijjurnaittumut paaptitsiriji.’ 34Uvangalu nangminiq takulauqpara, uqautivassi taannauvuq tavva Guutiup Irninga.”
Jiisusiup Ilinniaqtitaangit Sivulliqpaat
35Qautillugu Juanasi nangiqatiqalauqpuq ilinniaqtiminik marruungnik; 36Jiisusi tauvuna pisuktuq takunaaramiuk, uqaqpuq, “Takugit, tavva Guutiup Nurraujaqutinga!”
37Ilinniaqtingiktali taimaak uqaqtuq tusaramikkuk, Jiisusi maliliqpaak. 38Jiisusi qiviarami, takuvuq maliktuungnik, uqautivaak, “Sunamik qiniqpisik?”
Kiuvuuk, “Raappai (tukiqaqpuq Ilisaiji), naniiqattaqpit?”
39Jiisusiup uqautivaak, “Qailusik takujaqturissik.” Tavva maliliqpaak qaujillutiglu nanimiutaungmangaat; ullumi tavvani najuutivuuk, unnusaulilaurmat immaqaa 4-qanigijaani.
40Taakkuak Juanasi uqaqtillugu tusalauqtuuk, Jiisusimik maliksalauqtuq aippanga Aanturuunguvuq Saimuuni Piitturuusiup nukanga. 41Sivulliqpaamik angajuminuaqpuq Saimuunimut, uqautillugu, “Misaia nanivavut.” (Tukiqaqpuq “Christuusi.”) 42Anturuup Saimuuni Jiisusimuarutivaa.
Jiisusiup takugamiuk, uqautivaa, “Saimuuniuvit Juanasiup irninga? Siipasimik atiqarnialiqputit.” (Siipasi tukiqaqpuq Piitturuusi uvvalu “Qaiqtuq.”)
Jiisusiup Qaiqujininga Pilippuusimik Naatanaimiglu
43Qautillugu Jiisusi Galiliamuarumaliqpuq. Katisigami Pilippuusimik uqautivaa, “Malinnga.” 44Pilippuusili Pitsaitamiutauvuq, Aanturuukkuk Piitturuusikkuk nunanganit. 45Pilippuusiup Naatanai katigamiuk uqautivaa, “Katisivugut Muusisiup piqujanginni nalauttaijullu titirausirilauqtanganik, Jiisusi Naasariitimiumik, Juusipiup irninganik.”
46Naatanaip apirivaa, “Naasariitimit piujumik saqqittuqarunnaqpa?” Pilippuusiup kiuvaa, “Qailutit takujaqturit.”
47Jiisusiulli Naatanai miksimut qailiqtuq takugamiuk, uqausirivaa, “Takugit, tavva Isarialimiutallarik, taassumanilu sulinginniqtaqanngilaq!”
48Naatanaip apirivaa, “Qanuq qaujimavinga?”
Jiisusiup kiuvaa, “Pilippuusimut qaiqujaulauqaaqtinnak, napaaqtuup paurngaliksaup ataani iksivatillutit takulauqpagit.”
49Naatanaip kiuvaa, “Raappai, Guutiup Irnirivaatit! Isarialimiut Angajuqqaarjuangat!”
50Jiisusiup kiuvaa, “Ukpiliqpit uqaqqaunira pillugu takulaurnirarlutit napaaqtuup paurngaliksaup ataaniitillutit? Takuqattarniaqputit tamatumanngat anginiqsanik.” 51Uqautillugillu, “Sulitsiaqtumik uqautivassi, qilak angmaqtuq takujumaaqpasi, Guutiullu aingilingit majuraqtut aqqaqtiqtullu Inuup Irninganut.”
Dewis Presennol:
Juanasiup Aglangit 1: EAIBR
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Eastern Arctic Inuktitut Bible (Romanized) © Canadian Bible Society, 2022-2023.