Ilu̍uku 19
19
Ijaki̍yɔ̄si ɔlɛhu̍ yī i̍kpa̍da̍
1Iji̍sɔ̄ɔsi yɛ gbajɛ ga Ijɛ̍rīko bɛ̍ɛ̄nɛ̄ yɛ ē gɔ̄ga ē pīya. 2Ɔlɛhu̍ yī i̍kpa̍da̍ ɔha̍ hɔ̄ abɔ̍ɔ la ipwo̍gra ɔla̍ā re̍ka Ijaki̍yɔ̄si. O̍ gbwɔdu kpɛ̍ɛji. 3O̍ yɛ ē chikpo̍ ge̍ē ma̍ Iji̍sɔ̄ɔsi ē je̍ ɔ̄. Ɔ̄chɛ obi̍hi gba̍a̍ nɛ ma̍, o̍ i̍ ma̍ Iji̍sɔ̄ɔsi mɛ ni̍, wu̍chē yī āchɛ nīi de yɛ̍ɛ̄mɛ̄mɛ̄ ma̍. 4Wu̍chē yī ɔla̍ā, o̍ rɛ̄ɛnya yɔbū de āchɛ wa̍a̍ gāa ge̍ tū ichō yī ɔchi̍ ɔha̍ nīi re̍ka isikamɔ̄ɔn ma̍ hɛ̄ɛbɛ ge̍ē ma̍ Iji̍sɔ̄ɔsi yɛ̍yɛ̍. Wu̍chē oji̍ nɛ, Iji̍sɔ̄ɔsi ge̍ē ga abɔ̍ɔ pi̍i̍. 5Iji̍sɔ̄ɔsi yɛ ge̍ gbajɛ la ɛbɛ ɔla̍ā ma̍, o̍ hu eyī hwa̍a̍ ga ichō, ka grāa Ijaki̍yɔ̄si hīka, “Ijaki̍yɔ̄si! Hrāajɛ wā pa̍pa̍, ma̍a n ge̍ē tū wɔ wɔga i̍chɛ.”
6Ijaki̍yɔ̄si hrāajɛ ɔpɔ̄ɔpɛ̄ ge̍ bī ɔ̄ ga wɔlɛ̍ la ɔwɔ̄wīyā ɔlamu-ɔlamu. 7Āchɛ ɛla̍ā wa̍a̍ ma̍ lɛlā nūma̍ ma̍, e̍ ta̍ Iji̍sɔ̄ɔsi iru; Ɔ̍lɔ ge̍ yii̍s! Ɔngrɔ̄ɔ nūma̍ ɔ̍lɔ pīya ge̍ē tū ɔ̄chɛ ɔdwɔ̄bi̍ ɔla̍ā wɔga!
8Ijaki̍yɔ̄si nīichō yarɛ ka de Ādā Iji̍sɔ̄ɔsi hīka, “Ma̍ ko̍ō, Ādā! N ge̍ de ɛjā nīi lɛ wa̍a̍ ma̍ ē kɛ̄ɛpa, n ge̍ē de wāā ūkpo̍he ē kɔ̄ de alyeklo̍. N ge̍ ya̍ ɔ̄chɛ ɔha̍ re̍ je̍ mɛ̍, n ge̍ē ku̍chē kla̍ ɔ̄chɛ ɔla̍ā ure̍ igbɛnɛ yī ɔla̍ā.”
9Iji̍sɔ̄ɔsi ka de ɔ̍ bɛ̍ɛ̄nɛ̄ hīka, “Ɔhɛ̍ta̍ wā la wɔlɛ̍ nūma̍ i̍chɛ mɛ̍! Je̍ka ɔngrɔ̄ɔ nūma̍ titi bū la wɔma yī A̍brahāam? 10Wu̍chē oji̍ nɛ, Ɔyi̍ yī Ɔngrɔ̄ɔ wā ge̍ē gāla̍ āchɛ ɔpīyabi̍ hɛ̄ɛbɛ ge̍ē hɛ̍ wā ta̍.”
Wɔ̄chīije yī okpo ɔha̍ nīi - igo̍olu ma̍
(Ima̍tiyu 25:14-30)
11Iji̍sɔ̄ɔsi chā wɔ̄chīije ɔha̍ de āchɛ ɛla̍ā nīi gblāa abɔ̍ɔ ē plɛ̍ɛ̄lā ɔla̍ā ma̍. E̍ tu̍ bla̍a Ijɛru̍sālɛm mɛ̍ ma̍, e̍ gbɛri̍ya̍ ka Ɔchwɔ̄lɛ̍ Oro̍ōre̍ yī Ɔwɔ ɔ̍lɔ yɛ aa̍ ge̍ē gbajɛ bɛ̍ɛ̄nɛ̄ a̍nɛ. 12Wu̍chē yī ɔla̍ā, Iji̍sɔ̄ɔsi ka de wa̍ hīka, “Ɔngrɔ̄ɔ ɔha̍ nīi bū la wɔma yī ɔchwɔ̄lɛ̍ ma̍ pīya ga ɔcha ɔha̍ hwɛɛ hɛ̄ɛbɛ nīi e̍ ge̍ē de ɔ̍ ē ku̍ ɔchwɔ̄lɛ̍ o̍bū nīi o̍ ē cha. 13O̍bū nīi o̍ pīya ma̍, o̍ hī a̍chɛ̍ yī nū āchɛ igwo̍ ɛra̍ ge̍ de okpo yī igo̍olu ūkpo̍he-ūkpo̍he de ɔnyɔnyɛ. O̍ ka ɛ̍lɛ ge̍ bī pīyabɔ̄ la ɔ̍hi̍ ɔtɔ̍ɔ̄ta̍ kpɛɛ nīi anɔ̍lɔ ge̍ē ku̍chē cha. 14Ɔngrɔ̄ɔ ɔla̍ā i̍ hi alɔcha yī nū ɔtū ni̍. Wu̍chē yī ɔla̍ā, e̍ tū āchɛ ɛrɔ̄ ku ɔ̍ la u̍tu̍tu: Ɛ̍lɛ ge̍ gāa ge̍ ka hīka, aɛ̍lɛ i̍ chikpo̍ nīi ɔ̍lɔ ge̍ē re̍ ɔchwɔ̄lɛ̍ yī aa̍ ni̍.
15“E̍ de ɔngrɔ̄ɔ ɔla̍ā re̍ ɔchwɔ̄lɛ̍ nīi o̍ cha bɛ̍ɛ̄nɛ̄ ma̍, o̍ hī a̍chɛ̍ yī nū ɛla̍ā nīi o̍ de okpo ba̍ wā ɔ̍hi̍ ma̍ ɛra̍, hɛ̄ɛbɛ ge̍ē jo̍ōkū lɔkɔ nīi ɔnyɔnyɛ lɛ ɛpiyabuna ma̍. 16Ɔ̄chɛ ɔrāarāa bīyɛchɛ ge̍ rɛ, ka hīka, ‘Ādā! Okpo ūkpo̍he ɔla̍ā nīi ā de de u ma̍, n bī pīyabɔ̄ nīi o̍ de lɛ okpo igwo̍ mɛ̍.’ 17Abā yī nū da ɔ̍ bɛ̍ɛ̄nɛ̄ hīka, ‘A ya̍ yɛ̍yɛ̍ kpɛ̍ɛji! Awɔ - ɔ̍chɛ̍ ɔnɛ̄ɛhɛhi nɛ. Wu̍chē lɔkɔ nīi a ya̍ yɛ̍yɛ̍ la ɔjā onīchi̍chɛ̍ ma̍, n ge̍ē de ipwo̍gra igwo̍ ē tū wɔ la abɔ̄.’ 18Ɔ̄chɛ ɔ̍mɛpa wā ge̍ ka iyī nū hīka, ‘Ādā, okpo ūkpo̍he ɔla̍ā nīi a de de um ma̍, n bī pīyabɔ̄ nīi o̍ de lɛ okpo ɛrwɔ̄ mɛ̍.’ 19Anu̍ nūma̍, abā yī nū ka ɔ̍lɔ ge̍ē deyīrɛ ipwo̍gra ɛrwɔ̄. 20Ɔha̍ wā ge̍ ka bɛ̍ɛ̄nɛ̄ hīka, ‘Ādā! Okpo ūkpo̍he ɔla̍ā nīi a de de um ma̍ hɔ̄ ma̍! N de wɔ̄wā la ɔ̄pa̍ trɛ̍ba abɔ̍ɔ ke̍e̍. 21N yɛ ē tūuhwi yī wɔ; wu̍chē oji̍ nɛ, awɔ - ɔ̄chɛ ɔmyɛ̍ma̍ yī lɛlā krīkrī nɛ. A ē nāa ɔjā nīi i̍ awɔ de lā ni̍ ma̍. A ē chī kpo̍ ɛjāyɛ̄rɔ̄ nīi i̍ awɔ nyi ni̍ ma̍.’ 22Abā yī nū da ɔ̍ bɛ̍ɛ̄nɛ̄ hīka, ‘Awɔ ɔ̍chɛ̍ ɔdwɔ̄bi̍ ɔla̍ā! N ge̍ē bī lɛlā yī oko̍o yī awɔ ɔlɔjā de lɛpɔ̄ ku̍ wɔ! A ka amɔ̍lɔ - ɔ̄chɛ ɔmyɛ̍ma̍ yī lɛlā krīkrī nɛ? Amɔ̍lɔ ē nāa ɔjā la ɛbɛ nīi i̍ amɔ̍lɔ de lā ni̍ ma̍? Amɔ̍lɔ ē kpo̍ ɛjāyɛ̄rɔ̄ la ɛbɛ nīi i̍ amɔ̍lɔ nyōnyi ni̍ ma̍? 23Oji̍ chī ohu̍ nīi a i̍ nāa okpo yī u ɔla̍ā ge̍ tū la ɛbɛ ogbōokpo, hɛ̄ɛbɛ nīi n ge̍ cha mɛ̍ nīi n nāa okpo yī u chɔba la ɛpiyabuna yī nū ni̍ ma̍?’ 24Bū la ɛbɛ ɔla̍ā, abā yī nū ka de āchɛ ɛha̍ nīi rɛ abɔ̍ɔ ma̍ ka ɛ̍lɛ ge̍ nāa okpo ɔla̍ā hī ɔ̍lɔ abɔ̄; ɛ̍lɛ ge̍ de de ɔ̄chɛ nīi - ɔ̍lɔ lɛ okpo igwo̍ ma̍. 25Āchɛ ɛla̍ā ka hīka, je̍ka iyī ɔ̍lɔ lɛ igwo̍ mɛ̍? 26Ādā ɔla̍ā hīya aa̍ ɔkɔ hīka, ‘Ala̍ ma̍ ko̍ō! Ɔ̄chaha̍-ɔ̄chaha̍ nīi ge̍ lɛ ɔjā o̍bū, e̍ ge̍ē de ē ba̍ ɔ̄ de ɔ̍ chɔba-chɔba. Ɔ̄chɛ nīi i̍ lɛ ni̍ ma̍, onīi o̍ lɔ̄lɛ ma̍, e̍ ge̍ē de ē nāa ē hī ɔ̄ abɔ̄. 27Aluji yī u ɛla̍ā nīi i̍ chikpo̍ ka amɔ̍lɔ ge̍ re̍ ɔchwɔ̄lɛ̍ de aa̍ ni̍ ma̍ bɛ̍ɛ! Ala̍ ā bī wā wā ma̍ la iyɔ̄bū yī u nīi ala̍ ge̍ de wa̍ kpo̍ ngmo̍!’”
Iji̍sɔ̄ɔsi chɛ̄ ga ipwɔ̍ɔ̄lɛ̍ yī Ijɛru̍sālɛm bāa Ɔchwɔ̄lɛ̍ ma̍
(Ima̍tiyu 21:1-11; Ima̍aki 11:1-11; Ijɔ̍ɔn 12:12-19)
28Iji̍sɔ̄ɔsi kɛlā nūma̍ ma̍, o̍ wu̍ ɛyɛ ta̍ pīya yɛ gāa Ijɛru̍sālɛm bɛ̍ɛ̄nɛ̄. Anu̍ yɔbɔ̄ɔbū de wa̍ a̍nɛ. 29O̍ gbajɛ gāa Ibɛ̍fāaji ba̍la Ibɛ̍tāni, abɔ̍ɔ la Yɛwu yī O̍līifu ma̍, o̍ de a̍chi̍kpo̍ yī nū āchɛ ɛpa ɛha̍ tɛ̄rɔ̄ ga iyɔ̄bū. 30O̍ koko̍o de wa̍ hīka, “Ala̍ ā ga ipwo̍gra nīi hɔ̄ aa̍ la iyɔ̄bū ma̍. Ala̍ ge̍ē gbajɛ ē gāa ɔpɔ̄ɔpɛ̄ ma̍, ala̍ ge̍ē ma̍ ɔ̍drɔ̄ yī ɛbɛ̍ obīho̍ ɔha̍ nīi hlo̍ōrī tū abɔ̍ɔ. Ɔ̄chɔ̄chɛ i̍ che la anu̍ je̍ ni̍. Ala̍ ā wī orī hī ɔ̄ nīi ala̍ ge̍ bī wā. 31Ɔ̄chɛ ɔha̍ ge̍ che ala̍ ikpo̍ ka ala̍ ɔ̍lɔ ē wī orī hī ɔ̍lɔ ge̍ē ya̍ oji̍? Ala̍ ka de ɔ̍ hīka, ‘Ādā chikpo̍ yī nū a̍nɛ.’ ”
32Āchɛ ɛpa ɛla̍ā wā ge̍ pīya gāa bɛ̍ɛ̄nɛ̄. E̍ ma̍ ɔjāha̍-ɔjāha̍ i̍ngɔ̍ɔ ke̍e̍ lɔkɔ nīi Iji̍sɔ̄ɔsi koko̍o de wa̍ ma̍. 33E̍ yɛ ē wī orī hī ɛbɛ̍ obīho̍ ɔla̍ā bɛ̍ɛ̄nɛ̄ ma̍, ɛlɛjā yī nū che wa̍ ikpo̍ hīka ɛ̍lɛ ē wī orī hī ɔ̍lɔ ge̍ē ya̍ oji̍?
34E̍ ka de wa̍ hīka, Ādā ɔ̍lɔ chikpo̍ yī ɔ̍lɔ a̍nɛ. 35E̍ de ɛbɛ̍ obīho̍ ɔla̍ā bī pīya ge̍ de Iji̍sɔ̄ɔsi bɛ̍ɛ̄nɛ̄. Āchɛ de aru̍ yī wā chīyēkla̍ ɛbɛ̍ obīho̍ ɔla̍ā la okwi̍ihi. E̍ tū Iji̍sɔ̄ɔsi wɔbɔ̄ nīi o̍ hɛ̍ che la anu̍ bɛ̍ɛ̄nɛ̄. 36O̍ che la anu̍ yɛ ē ga ma̍, āchɛ de aru̍ yī wā chīyēkla̍ la ɔpɔ̄pū pɛ̍pɛ̍pɛ̍ de ɔ̍.
37O̍ wā ge̍ tu̍ bla̍a Ijɛru̍sālɛm bɛ̍ɛ̄nɛ̄. Bū abɔ̍ɔ la ɔhlāatū yī Yɛwu yī O̍līifu ɔla̍ā, a̍chi̍kpo̍ yī nū ɛla̍ā wa̍a̍ kū la ɔkā Ɔwɔ ɔkɔ̄kā bɛ̍ɛ̄nɛ̄. E̍ chu̍chuwi̍i, da Ɔwɔ o̍be wu̍chē yī lɛlā ɔnɔ̄kɔ̄kū ɔla̍ā wa̍a̍ nīi e̍ ma̍ ma̍. 38E̍ ka hīka, “Ɔwɔ ge̍ de ɔpiyɛ de ɔchwɔ̄lɛ̍ nīi yɛ ma̍ yewā la riyī yī Ādā ma̍ oo! Ogbodɔ̍dɔ̍ hɔ̄ abɔ̍ɔ la ichō! Rīgā ɔnɔ̄kɔ̄kū ge̍ iyī Ɔwɔ la ichō oo!”
39Āchɛ yī Ifa̍rasīi ɛha̍ yɛ abɔ̍ɔ lipu̍ yī ɔgbādu ɔla̍ā. E̍ da Iji̍sɔ̄ɔsi hīka, “Ɔngūlɛ̄lā, ka ta̍ a̍chi̍kpo̍ yī wɔ nīi e̍ ge̍ cho̍cho̍ lɛlā ɔla̍ā gɛ/.”
40Iji̍sɔ̄ɔsi hīya aa̍ ɔkɔ hīka, “Lēchi̍, n ā koko̍o de ala̍! Aa̍ ge̍ cho̍cho̍ u̍ma̍ama, lɛchɔ̄ ge̍ē kū la u̍chuwi̍i la ɔchɔ̄chɛ̄ ɔpɔ̄ɔpɛ̄!”
Iji̍sɔ̄ɔsi drɛ̄ɛgba tū ipwɔ̍ɔ̄lɛ̍ yī Ijɛru̍sālɛm
41Iji̍sɔ̄ɔsi tu̍ bla̍a Ijɛru̍sālɛm yɛ ē ma̍ ɔ̄ ma̍, o̍ drɛ̄ɛgba tū ɔ̄. 42O̍ ka hīka, “Ijɛru̍sālɛm! Ɔ̄chɛ pīya ka a jo̍ōkū yī ɔjā nīi ē bī ogbodɔ̍dɔ̍ ē wā ma̍ i̍chɛ nūma̍ ma̍! U̍ma̍ama nūma̍, a ā chī ge̍ē ma̍ ɔ̄ gɛ ni̍. 43Ɔ̄chī ɔdwɔ̄bi̍ ɔha̍ ge̍ē wā dikpo̍ba̍ wɔ. Aluji yī wɔ ge̍ē ta̍kaka ē tū wɔ; e̍ ge̍ē hɛ̍ wɔ ē tū la oe̍ ɔha̍lɔha̍ wa̍a̍. 44E̍ ge̍ē de awɔ ba̍la āchɛ nīi gblāa la lipu̍ yī wɔ ma̍ ē chāajɛ tɛri̍tɛri̍. Lɛchɔ̄ yī wɔlɛ̍ yī wɔ ūkpūkpo̍he i̍ ge̍ē hōhī che la ichō yī ɔ̍nyīnū ni̍. Wu̍chē oji̍ nɛ, yɛ̄grāa nīi Ɔwɔ wā la ɔhɛ̍ wɔ ta̍ ma̍, a i̍ pīyeyī ma̍ ɔ̄ ni̍.”
Iji̍sɔ̄ɔsi ga U̍nu̍ yī Ɔwɔ
(Ima̍tiyu 21:12-17; Ima̍aki 11:15-19; Ijɔ̍ɔn 2:13-22)
45Iji̍sɔ̄ɔsi chɛ̄ ga u̍nu̍ yī Ɔwɔ bɛ̍ɛ̄nɛ̄. O̍ gāa ge̍ kū abɔ̍ɔ ē nū āchɛ nīi ē ri̍īhī abɔ̍ɔ ma̍. 46O̍ da wa̍ hīka, “Je̍ka e̍ ta̍ tū la Īpū yī Ɔwɔ ka Ɔwɔ ɔ̍lɔ ka hīka, ‘Wɔlɛ̍ yī u re̍ka ɛbɛ ɔjɔhā!’ Ala̍ chōo̍chē ge̍ē de ɔ̍ ē pīya ɛbɛ ɔtrɛ̍ba yī ebu̍ūwī?”
47Iji̍sɔ̄ɔsi ngū āchɛ lɛlā mɔ̄chīmɔ̄chī abɔ̍ɔ bɛ̍ɛ̄nɛ̄. Alɛhu̍ aligbe ba̍la āchɛ ongū Lihɔ yī Iju̍u ba̍la ɛgabɔ̄ yī Iju̍u wa̍a̍ yɛ ē chikpo̍ ge̍ē de ɔ̍ ē ngmo̍. 48Ɔpɔ̄pū ɔha̍lɔha̍ i̍ chī hɔ̄ de wa̍ ni̍, wu̍chē oji̍ nɛ, āchɛ ji wa̍a̍ gblāa abɔ̍ɔ ē plɛ̍ɛ̄lā yī nū. E̍ i̍ chikpo̍ nīi lɛlɛ̄lā yī nū ge̍ hɛ̍ wā ga la opo̍ōpo̍ ni̍.
Dewis Presennol:
Ilu̍uku 19: YBASR
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2020 Bible Society of Nigeria (second edition)