Ilu̍uku 18
18
Wɔ̄chīije yī onyōkū ɔha̍ ba̍la olihiyo ɔha̍
1Iji̍sɔ̄ɔsi wā ge̍ chā wɔ̄chīije ɔha̍ de wa̍ bɛ̍ɛ̄nɛ̄. Wɔ̄chīije nīi ge̍ē ngū wā lɛlā yī ɔhā ojōji de Ɔwɔ myɛ̄grāa-myɛ̄grāa i̍ ē diya gee ni̍ ma̍ nɛ. I̍ngɛ̍ɛ̄nɛ̄ nīi o̍ ka de wa̍ a̍nɛ: 2“Ala̍ ma̍ ko̍ō! Olihiyo ɔha̍ hɔ̄ abɔ̍ɔ la ipwo̍gra ɔha̍. O̍ i̍ ē ya̍ otūlichō yī Ɔwɔ ni̍, o̍ i̍ ē chī gbɛri̍ya̍ tū ɔ̄chɔ̄chɛ ni̍ lachi̍lachi̍. 3Onyōkū ɔha̍ chī hɔ̄ abɔ̍ɔ la ipwo̍gra ɔla̍ā pi̍i̍. O̍ ē gɔ̄gɔ̄gāā dikpo̍ ē ba̍ olihiyo ɔla̍ā ge̍ē ra̍ābɔ̄ de ɔ̍ ka ɔ̍lɔ ge̍ chu̍chu̍u; ɔ̍lɔ ge̍ hɛ̍ anu̍ ta̍ hī oluji yī anu̍! 4Olihiyo ɔla̍ā i̍ chɛ̄ tū ɔ̄ wɔbɔ̄ ni̍ i̍ngɔ̍ɔ kpɛɛ. I̍chi̍chɛ ɔha̍ bɛ̍ɛ̄nɛ̄, olihiyo ɔla̍ā ka de iyī nū hīka, anɔ̍lɔ jo̍ōkū hīka anɔ̍lɔ i̍ ya̍ otūlichō yī Ɔwɔ kɛ̄ɛ ē gbɛri̍ya̍ tū ɔ̄chɔ̄chɛ ni̍. 5Wu̍chē yī i̍mɛ̄nyɛ̄ nīi ɔnyā nūma̍ ɔ̍lɔ chī yɛ ma̍ ē de ē de anu̍ ma̍, anɔ̍lɔ ge̍ē hɛ̍ ɔ̍lɔ ta̍ hī oluji yī ɔ̍lɔ ɔ̍lɔma̍ ji. Nɛ̄ni̍, ɔ̍lɔ ge̍ē yɛ amu ē wɔ̄wɔ̄wā i̍ngi̍ngi̍ngɔ̍ɔ, kpɛɛ nīi ibi̍īyē ɔ̍lɔ ē de ē pra̍a anu̍ wɔ̍gba.”
6Bū la ɛbɛ ɔla̍ā, Ādā Iji̍sɔ̄ɔsi ka de wa̍ bɛ̍ɛ̄nɛ̄ hīka, “Je̍ka aa̍ ala̍ plɛ̍ɛ̄lā nīi olihiyo ɔdwɔ̄bi̍ ɔ̄chɛ ɔla̍ā ka ma̍! 7Aa̍ nīi Ɔwɔ i̍ ge̍ē hlɛ̍ɛ̄pɔ̄ ba̍ de āchɛ yī nū nīi ē drɛ̄ɛgba ē hī ɔ̄ ɛra̍ myɛ̄grāa-myɛ̄grāa ma̍ ni̍ a̍nɛ? Aa̍ nīi Ɔwɔ ge̍ē ya̍ irwɛ o̍bū tū wā wɔbɔ̄ a̍nɛ? 8Lēchi̍-lēchi̍, n ā koko̍o de ala̍! Ɔwɔ ge̍ē hlɛ̍ɛ̄pɔ̄ ba̍ de wa̍ bāa ɔpa̍pa̍ ma̍. Bɛ̍ɛ̄nɛ̄ ma̍, o̍ re̍ka yɛ̄grāa nīi Ɔyi̍ yī Ɔngrɔ̄ɔ ge̍ē wā ma̍, o̍ ge̍ ma̍ ɔtū ode che ɔ̍ ochōche ɔha̍ amu la ajɛyɛ̄ɛchɛ dɛdɛ?”
Wɔ̄chīije yī ɔ̄chɛ yī Ifa̍rasīi ba̍la oli̍kpa̍da̍ ɔha̍
9Iji̍sɔ̄ɔsi gba̍a chā wɔ̄chīije ɔha̍ de āchɛ nīi de ɔtū che iyī wā ka aɛ̍lɛ hwɔhi hwɔhi, ē chi̍hi̍ya̍ yī āchɛ ɛha̍ ma̍. I̍ngɛ̍ɛ̄nɛ̄ nīi o̍ ka de wa̍ a̍nɛ: 10“Ala̍ ma̍ gɛ ko̍ō! Āchɛ ɛpa ɛha̍ ga u̍nu̍ yī Ɔwɔ ge̍ē jɔhā. Ɔha̍ - Ɔ̄chɛ yī Ifa̍rasīi, ɔha̍ - oli̍kpa̍da̍. 11Ɔ̄chɛ yī Ifa̍rasīi ɔla̍ā hɛ̍ ja̍a̍ ge̍ rɛ, jɔhā hīka, ‘Ɔwɔ, n da wɔ o̍be kpɛ̍ɛji nīi n i̍ lɛ bāa āchɛ ehēhī ni̍ ma̍! Aa̍ ma̍ ē ya̍ ānyānyi; e̍ ē ya̍ āchɛ ɔyɔ̍ɔ̄ya̍, e̍ ē la̍ anyā yī āchɛ ji. N de wɔ o̍be gba̍a̍ nīi n i̍ lɛ bāa anu̍ oli̍kpa̍da̍ ɔla̍ā ni̍ ma̍. 12N ē kū iyī u ē chā lɛmiyɛ igbɛpɛpa lipu̍ obri̍īhī wu̍chē yī lɛlā yī wɔ. N ē de ɔjā nīi n lɛ ma̍ ē kɔ̄ la ɛbɛ igwo̍ ē de ūkpo̍he ē kɔ̄ de wɔ.’ 13Anu̍ oli̍kpa̍da̍ ɔla̍ā ma̍ hɛ̍ rɛ abɔ̍ɔ hwɛɛ. O̍ i̍ hōhu eyī hwa̍a̍ ga ichō ni̍. O̍ kpo̍ abɔ̄ ɛpɛpa ba̍ ɔkɔ jɔhā hīka, ‘O̍ō Ɔwɔ, mlɛ̍ha̍ yī u! Ami - ɔ̄chɛ ɔdwɔ̄bi̍ nɛ.’ ” 14Iji̍sɔ̄ɔsi ka de wa̍ bɛ̍ɛ̄nɛ̄ hīka, “Lēchi̍-lēchi̍, n ā koko̍o de ala̍! Ɔngrɔ̄ɔ ogwīihi nūma̍ lɛ kpakpa ba̍la Ɔwɔ nīi o̍ pīya yī wɔlɛ̍ ma̍ a̍nɛ; i̍ Ɔ̄chɛ yī Ifa̍rasīi ɔla̍ā ni̍. Wu̍chē oji̍ nɛ, ɔ̄chaha̍-ɔ̄chaha̍ nīi ge̍ nāa iyī nū ke̍ke̍ni̍, e̍ ge̍ē nāa anu̍ tɛ̍bɛ̍lɛ̍. Ɔ̄chaha̍-ɔ̄chaha̍ nīi ge̍ chī nāa iyī nū tɛ̍bɛ̍lɛ̍, e̍ ge̍ nāa anu̍ ke̍ke̍ni̍.”
Iji̍sɔ̄ɔsi de ɔpiyɛ de aɛ̍pɛ̄ enīchi̍chɛ̍
(Ima̍tiyu 19:13-15; Ima̍aki 10:13-16)
15Āchɛ ɛha̍ bī aɛ̍pɛ̄ yī wā wā ge̍ de Iji̍sɔ̄ɔsi hɛ̄ɛbɛ nīi o̍ ge̍ē de abɔ̄ che wa̍ lɛhu̍. A̍chi̍kpo̍ yī Iji̍sɔ̄ɔsi ma̍ wā ma̍, e̍ ka alābi̍ tāa aa̍. 16Iji̍sɔ̄ɔsi hī aɛ̍pɛ̄ ɛla̍ā ɛra̍ du̍mɔ̍, ka hīka, “Ala̍ ā pi̍ye̍mā nīi aɛ̍pɛ̄ enīchi̍chɛ̍ ge̍ yewā dikpo̍ba̍ u! Ala̍ e̍e ku̍ wa̍ chi̍yɛ ni̍! Wu̍chē oji̍ nɛ, Ɔchwɔ̄lɛ̍ Oro̍ōre̍ yī Ɔwɔ - iyī ita āchɛ bāa aa̍ enūma̍ ma̍ nɛ. 17Lēchi̍, n ā koko̍o de ala̍! Ɔ̄chɛ nīi i̍ ge̍ nāa Ɔchwɔ̄lɛ̍ Oro̍ōre̍ yī Ɔwɔ bɔ̄ɔkɔ nīi ɔɔ̍pɛ̄ onīchi̍chɛ̍ ē ya̍ ma̍ ni̍, ɔlɔjā i̍ ge̍ē tū la anu̍ ni̍.”
Lɛlā yī ɔlwɔdu ɔha̍
(Ima̍tiyu 19:16-30; Ima̍aki 10:17-31)
18Ɔlɛhu̍ yī Iju̍u ɔha̍ che Iji̍sɔ̄ɔsi ikpo̍ bɛ̍ɛ̄nɛ̄ hīka, “Ɔngūlɛ̄lā be̍e! Awɔ - ɔ̄chɛ ɔnɛ̄ɛhɛhi nɛ! Oji̍ nīi n ge̍ē ya̍ o̍bū nīi n ge̍ē nāa ɔhɔ̄leyī i̍mɔ̄mɛni̍ ma̍/?”
19Iji̍sɔ̄ɔsi da ɔ̍ hīka, “Oji̍ - ohu̍ nīi a hī um ka ɔ̄chɛ ɔnɛ̄ɛhɛhi ma̍? Ɔ̄chɔ̄chɛ i̍ hwɔhi ohōhi ni̍; ɔ̍chi̍kpa̍kpa̍ Ɔwɔ lōri̍īnū. 20Je̍ka aa̍ a je̍ Lihɔ yī Ɔwɔ: ‘A ā la̍ ɔnyā yī ɔ̄chɛ ni̍. A ā ngmo̍ ɔ̄chɛ ni̍. A ā wūwī ni̍. A ā warīmɛ̄ ni̍. Tū a̍dā yī wɔ ba̍la ɛ̍nɛ̍ yī wɔ lichō.’ ”
21Ɔngrɔ̄ɔ ɔla̍ā hīyɔkɔ hīka anɔ̍lɔ ē de lihɔ ɛla̍ā gbō i̍ngɔ̍ɔ bū la lɛɛ̍pɛ̄ɛ̍pɛ̄ɛ̍pɛ̄.
22Iji̍sɔ̄ɔsi po̍ i̍ngɔ̍ɔ ma̍, o̍ da ɔ̍ hīka, “Ɔjā ūkpo̍he e̍e hōhī nīi a ge̍ē ya̍! Kpo̍ ɛjā nīi a lɛ wa̍a̍ ma̍ ra̍ nīi a ā de okpo yī nū kɔ̄ de alyeklo̍, ma̍a a ge̍ē gbwɔdu abɔ̍ɔ la ichō! O̍bū nīi a ā pīya wā ge̍ yɛ tāa ami!” 23Ɔngrɔ̄ɔ ɔla̍ā plɛ̍ɛ̄lā nūma̍ ma̍, o̍ he̍ēyīwɔnɔ kpɛ̍ɛji; wu̍chē oji̍ nɛ, o̍ gbwɔdu gba̍a̍.
24Iji̍sɔ̄ɔsi ma̍ hīka ɔngrɔ̄ɔ ɔla̍ā ɔ̍lɔ yɛ ē he̍ēyīwɔnɔ gba̍a̍ ma̍, o̍ ka bɛ̍ɛ̄nɛ̄ hīka, “Ala̍ ma̍ ko̍ō! O̍ lichi̍ kpa̍a o̍bū nīi ɔlwɔdu ge̍ē chɛ̄ ga ɛbɛ yī Ɔchwɔ̄lɛ̍ Oro̍ōre̍ yī Ɔwɔ. 25O̍ ge̍ē lɛnyɛnya ē de ɛbɛ̍ obīho̍ ogbigū la ɔga la a̍rɛ̍pa̍ yī ɔnya̍ hi̍ ɔlwɔdu ɔgatū ga ɛbɛ yī Ɔchwɔ̄lɛ̍ Oro̍ōre̍ yī Ɔwɔ.”
26Bū la ɛbɛ ɔla̍ā, āchɛ nīi po̍ i̍ngɔ̍ɔ ma̍ chikpo̍ hīka, ɔ̄nyɛ kpɛ̍ɛ ɔ̍lɔ chī ge̍ē lɛ ɔhɛ̍ta̍ mɛ bɛ̍ɛ̄nɛ̄ ma̍?
27Iji̍sɔ̄ɔsi hīya aa̍ ɔkɔ hīka, “Ɔjāha̍-ɔjāha̍ nīi ɔ̄chɛ̄ɛchɛ i̍ ē ya̍ mɛ ni̍ ma̍, Ɔwɔ ē ya̍ mɛ.”
28Ipi̍ta ka hīka, ɔ̍lɔ ge̍ ma̍ gɛ! Aa̍ nīi ɔ̍lɔ chī pīya hī wɔlɛ̍ yī aa̍ wa̍a̍ wā ge̍ ku ɔ̍lɔ ma̍ bɛ̍ɛ?
29Iji̍sɔ̄ɔsi ka de wa̍ hīka, “Ala̍ ma̍ ko̍ō! Ɔ̄chaha̍-ɔ̄chaha̍ nīi ge̍ pīya hī wɔlɛ̍, kɛ̄ɛ ɔnyā, kɛ̄ɛ aɛ̍nɛ̍, kɛ̄ɛ āchɛ nīi ma ɔ̍ ma̍, kɛ̄ɛ ayi̍ yī nū, wu̍chē yī Ɔchwɔ̄lɛ̍ Oro̍ōre̍ yī Ɔwɔ, 30ɔlɔjā ge̍ē chōo̍chē nāa ɛjā ɛla̍ā wa̍a̍ chɔba la yɛchɛ nūma̍. O̍ ge̍ē gba̍a ā nāa ɔhɔ̄leyī i̍mɔ̄mɛni̍ la yɛchɛ nīi ge̍ē wā ma̍.”
Iji̍sɔ̄ɔsi kɛlā o̍mgbo̍mɛta̍ ku̍ ɔpīyaku̍ yī nū
(Ima̍tiyu 20:17-19; Ima̍aki 10:32-34)
31Iji̍sɔ̄ɔsi bī a̍chi̍kpo̍ yī nū āchɛ igwo̍lɛpa ɛla̍ā ga ɛkū ge̍ koko̍o de wa̍ hīka, “Ala̍ ma̍ ko̍ō! Alɔ pīya yɛ amu yɛ gāa Ijɛru̍sālɛm mɛ̍. Lɛlāha̍-ɛlāha̍ wa̍a̍ nīi āchɛ ɔkɛrɔ̄ yī Ɔwɔ mwɔ̍ɔmu ku̍ Ɔyi̍ yī Ɔngrɔ̄ɔ ma̍ ge̍ē de pīya ichɛ̄ɛhi abɔ̍ɔ. 32E̍ ge̍ē ku̍ ɔ̄, wa̍ābɔ̄ la anu̍ de Ɛchɛkɔcha. E̍ ge̍ē bī ɔ̄ ya̍, ē cha̍ ɔ̄ ɛcha̍, ē ta̍arɛ ē kla̍ anu̍. 33E̍ ge̍ē gwō ɔ̄ lijē la a̍grɛ̄chi̍. E̍ ge̍ē de ɔ̍ ngmo̍. Ɔ̄chī ɔmɛta̍, o̍ chī ge̍ē hye̍ēyī la okū wā la ɔhɔ̄leyī.”
34A̍chi̍kpo̍ yī nū i̍ po̍ ochi̍chi̍ yī lɛlā nūma̍ wa̍a̍ ni̍. Ochi̍chi̍ yī nū trɛ̍ba hī wā. E̍ i̍ je̍ ɔjā nīi Iji̍sɔ̄ɔsi yɛ ē ka ma̍ ni̍ kpɛkpɛ.
Iji̍sɔ̄ɔsi nyiya opriyī ɔha̍ nīi ē bɔjā ma̍
(Ima̍tiyu 20:29-34; Ima̍aki 10:46-52)
35Yɛ̄grāa ɔla̍ā, Iji̍sɔ̄ɔsi yɛ ē tu̍ bla̍a Ijɛ̍rīko ma̍. Ɔngrɔ̄ɔ ɔha̍ nīi priyī ma̍ hɔ̄ abɔ̍ɔ la oko̍o yī ɔpɔ̄pū ē bɔjā. 36O̍ po̍ ojiya yī āchɛ yɛ̄mɛ̄mɛ̄ nīi yɛ ē ga ma̍, o̍ chikpo̍ ka ɔ̍lɔ - oji̍ nɛ?
37E̍ ka de ɔ̍ hīka Iji̍sɔ̄ɔsi yī Ina̍jārɛ̄ɛti ɔ̍lɔ yɛ ē ga a̍nɛ.
38O̍ tɔ̍ɔna bɛ̍ɛ̄nɛ̄ hīka, “Iji̍sɔ̄ɔsi, Ībī yī Ide̍bīidi! Chu̍chu̍u, mlɛ̍ha̍ yī u oo!”
39Āchɛ nīi yɛ la iyɔ̄bū ma̍ ka tāa anu̍ ka ɔ̍lɔ ge̍ cho̍cho̍ la ojiya! Ɔla̍ā kpɛ̍ɛ nīi o̍ e̍e tɔ̍ɔna gbōō we̍ a̍nɛ. “Ībī yī Ide̍bīidi, mlɛ̍ha̍ yī u oo.”
40Iji̍sɔ̄ɔsi ku̍ jīyarɛ bɛ̍ɛ̄nɛ̄ ka hīka ɛ̍lɛ ge̍ bī ɔ̍lɔ wā! O̍ gbajɛ wā bla̍a Iji̍sɔ̄ɔsi bɛ̍ɛ̄nɛ̄ ma̍, Iji̍sɔ̄ɔsi che ɔ̍ ikpo̍ hīka, 41oji̍ nīi ɔ̍lɔ chikpo̍ nīi anɔ̍lɔ ge̍ē ya̍ de ɔ̍lɔ ma̍?
Ɔngrɔ̄ɔ ɔla̍ā ka ɔ̍lɔ ge̍ Ādā, anɔ̍lɔ chikpo̍ ge̍ē de ē myɛ̍ma̍.
42Iji̍sɔ̄ɔsi da ɔ̍ bɛ̍ɛ̄nɛ̄ hīka, “De myɛ̍ma̍ gɛ! Ɔtū ode chōche yī wɔ ya̍ nīi a de lɛ cha̍cha̍ mɛ̍!”
43Ɔpɔ̄ɔpɛ̄, ɔngrɔ̄ɔ ɔla̍ā de myɛ̍ma̍ ke̍e̍. O̍ pīya ku Iji̍sɔ̄ɔsi yɛ abɔ̍ɔ ē da Ɔwɔ o̍bo̍bo̍o̍be. Āchɛ ɛla̍ā wa̍a̍ ma̍ lɛlā nūma̍ ma̍, aa̍ titi kā Ɔwɔ ɔkɔ̄kā kpɛ̍ɛji.
Dewis Presennol:
Ilu̍uku 18: YBASR
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2020 Bible Society of Nigeria (second edition)