Sɩngre 48
48
A Zakoob ninga a Zozɛf kambã barka
1Yel-kãensã fãa loogr zugẽ, b wa n yeela a Zozɛf t'a baaba ka keem ye. La a Zozɛf peega a kamb a yiibã: A Manaase ne a Efrayiim, n kẽng a Zakoob nengẽ. 2B togsa a Zakoob n yeel yaa: «Ad yãmb biig a Zozɛf n wa n na n ges-yã. Dẽ, a Israyɛll modgame n yik n zĩnd a gãagã zugu.» 3#Sɩng 28.13,14A Zakoob yeela a Zozɛf yaa: «Pãng-Soab a Wẽnnaam vẽnega b meng ne maam Luuzi, Kana tẽnga pʋga, la b ninga maam barka. 4Bãmb yeela maam yaa: Ad maam! Mam na n kõ-f-la rogem, la m na n kɩtame tɩ f fɩɩg n lebg wʋsgo, la m kɩt tɩ f lebg buud wʋsg ba. Fo loogr poore, mam na n kɩtame tɩ fo yagensã soog tẽn-kãngã wakat sẽn kõn sa. 5Moasã, fo kamb a yiibã fo sẽn dog Ezɩpt soolmẽ wã sẽn deng mam sẽn na n wa fo nengẽ wã na n lebga mam dẽnda. Yaa a Efrayiim ne a Manaase, wa a Rubɛn ne a Sɩmyõ. 6La fo sẽn yaool n dog kamb nins bãmb zugẽ wã na n yɩɩ fo rẽnda. Bãmb na n naaga b ba-biisã n paam pʋɩɩre. 7#Sɩng 35.16-19Mam sẽn wa n yi Kana n watẽ wã, fo ma a Rasɛll tek n kii mam sɛɛgẽ, tõnd sẽn wa n be sorẽ n kolg Efratã. La mam mum-a-la beenẽ, Efrat sorã kɩrenga, zĩig ning b sẽn boond tɩ Betlehɛmã.»
8A Israyɛll gesa a Zozɛf kom-dibli wã n sok yaa: «Yaa ãnda rãmb la woto?» 9La a Zozɛf leoka a baaba n yeel tɩ yaa kom-dibli nins Wẽnnaam sẽn kõ yẽnda Ezɩpt tẽngã. A Israyɛll yeelame tɩ b tall kambã n kolg-a t'a ning-b barka. 10A Israyɛll rag n kʋʋlame t'a ninã pãng boog t'a ka leb n neẽ ye. Dẽ, a Zozɛf kɩtame tɩ kambã kolg a Israyɛlle, la a Israyɛll mobg-b lame n mok-ba. 11A Israyɛll yeela a Zozɛf yaa: «Mam dag n ka tagsd tɩ mam na n leb n yãnda foom yɛs ye. La ade, Wẽnnaam kɩtame tɩ mam yãnd fo kamba!» 12A Zozɛf taka a kambã n yiis a ba wã rũmẽ, la a wõgemd n fõgen a neng tẽnga. 13A Zozɛf peega kamb a yiibã, n gãd a Efrayiim ne a rɩtg n ning a Israyɛll goabga, la a gãd a Manaase ne a goabg n ning a Israyɛll rɩtgo, n kɩt tɩ b yiibã fãa kolg a Israyɛlle. 14La a Israyɛll pɩʋʋga a nusã taaba, n dɩk a nug-rɩtgã n tik a Efrayiim sẽn yaa yao wã zugu, la a rɩk a nug-goabgã n tik a Manaase sẽn yaa kãsma zugu. 15A Zakoob ninga a Zozɛf zug bark n yeele:
«Bɩ Wẽnnaam ning mam yaab a Abrahaam
ne m ba a Izak sẽn dag n tũudã,
soab ning sẽn yɩ-a mam pe-kɩɩm hal
m dogmã daar n tãag rũndã wã,
16malɛɛk ning sẽn fãag-a maam wẽng
buud fãa pʋgẽ wã,
ning kom-bãmbã zut barka.
La bɩ b boond kom-bãmbã ne mam yʋʋre,
la ne m yaab a Abrahaam la m ba a Izak yʋʋre.
Bɩ b fɩɩg n lebg wʋsg tẽng ning pʋg
b sẽn be wã.»
17A Zozɛf sẽn yãnd t'a baaba tika a Efrayiim ne a nug-rɩtgã a sũurã ka yɩ noog ye. Dẽ, a Zozɛf gãda a baaba nugã n yãk n na n ning a Manaase zugu. 18A Zozɛf yeela a baaba yaa: «Ka woto ye m baaba! Bala, yaa ada soabã n yaa kẽema! Ning-y y nug-rɩtgã yẽnda zugu.» 19La a baaba zãgsame n yeele: «M biig sõngo, mam miime. Mam mii sõama! Yẽnda me na n lebga buud wʋsg ba, la yẽnda yao wã na n yɩɩ kãseng n yɩɩg yẽnda. La yẽnda yagensã na n yɩɩ buud wʋsgo, n zĩnd zĩig fãa.» 20#Ebr 11.21Badaare, a Zakoob ning-b-la bark n yeele:
«Yãmb maasem yĩnga, Israyɛll nebã na n
ningda nebã bark n yetẽ:
‹Wẽnd na kɩt tɩ f yɩ wa a Efrayiim,
la wa a Manaase!› »
Yɩɩ woto, t'a Zakoob reng n bool a Efrayiim yʋʋre, n yaool na n bool a Manaase yʋʋrã. 21A Israyɛll yeela a Zozɛf yaa: «Ade, mam yẽ na n kiime! La Wẽnnaam na n zĩnda ne yãmba, la b na n kɩtame tɩ y lebg n leb y yaab-rãmbã tẽngẽ. 22Mam kõta foom pʋɩɩr n yɩɩd f kẽem-dãmbã. Yaa bũmb ning mam sẽn dag n zab ne sʋʋg la tãp n deeg Amoor-dãmbã nengẽ wã.»
Dewis Presennol:
Sɩngre 48: MPBU
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Moore Bible © Bible Society of Burkina Faso, 2014.