Sɩngre 47
47
A Zozɛf kosgo
1A Zozɛf kẽngame n tɩ togs Faarõ yaa: «Mam kẽem-dãmbã ne m ba wã yii Kana tẽng n wa. B waa ne b rũm-bãoonego, la b rũm-bɛda, ne bũmb nins fãa b sẽn so wã, la b tɩ bee Gosɛn tẽngã pʋga.» 2A Zozɛf peega a ba-biisã sʋk neb a nu, n kẽng Faarõ nengẽ. 3Faarõ soka a Zozɛf ba-biisã yaa: «Yãmb tʋmda tʋʋm-bʋgo?» Bãmb leoka Faarõ yaa: «Tõnd sẽn yaa yãmb tʋmtʋmdbã yaa pe-kɩɩmb wa tõnd saam-dãmbã me sẽn dag n yaa pe-kɩɩmbã!» 4Bãmb leb n yeela Faarõ yaa: «Tõnd wa n na n zĩnda yãmb tẽngẽ wã, yamd sẽn ka leb n be tõnd rũm-bãoonegã yĩngã yĩnga. Bala, kom-kãsengã kẽe Kana tẽngã gilli. Dẽ wã, d kot-y lame tɩ y kõ-d noor tɩ d tɩ zĩnd Gosɛn tẽngã pʋga.» 5Faarõ yeela a Zozɛf yaa: «Fo ba wã ne f ba-biisã wa n pẽnega foom. 6Ezɩpt tẽngã yaa foom n so, zĩndg f ba wã ne f ba-biisã tẽngã zĩig ning sẽn yaa sõama n yɩɩdã. Bɩ b kẽng n tɩ zĩnd Gosɛn tẽngã pʋgẽ. La fo sã n mik tɩ nin-tɩrs bee bãmb sʋka, bɩ f yãk-b tɩ b get m rũmsã yelle.»
7A Zozɛf kɩtame tɩ b tall a ba a Zakoob n wa, la a tall-a lame n tɩ wilg Faarõ, la a Zakoob ninga Faarõ zug barka. 8Faarõ soka a Zakoob yaa: «Fo tara yʋʋm wãna?» 9A Zakoob leoka Faarõ yaa: «Yaa yʋʋm koabg la pis-tã la woto, mam sẽn gõod tẽng-tẽnga. La mam yʋʋmã sõor ka waoog ye, la a yɩɩ toogo. La yʋʋm-kãens sõorã ka ta mam saam-dãmbã yʋʋmã, b sẽn dag n wa n gõod tẽng-tẽngã ye.» 10A Zakoob leb n pʋʋsa Faarõ n ning-a barka, la a yi n looge. 11Dẽ, a Zozɛf maana wa Faarõ sẽn yeelã. Yẽnda yãka zĩig Ezɩpt tẽngã pʋgẽ n zĩnig a ba wã, ne a ba-biisã. Yaa zĩig sẽn yaa sõama n yɩɩda, n be Ramsɛs tẽngã pʋgẽ. 12A Zozɛf gesa a ba wã ne ba-biisã rɩɩb yelle, la ne a ba wã zak rãmb fãa yelle, wa sẽn zems a kambã sõore.
Tʋʋmd ning a Zozɛf sẽn maan komã wakate
13Komã yɩɩ toog hal wʋsg tɩ rɩɩb ka leb n be soolmã pʋgẽ ye. Komã yĩng kɩtame tɩ Ezɩpt tẽngã ne Kana tẽngã neb pãng sɛtẽ. 14A Zozɛf reega Ezɩpt soolmã ne Kana soolmã ligd zãnga. Bala, nebã rag n wat n daada koodã beenẽ. La yẽnda rɩka ligd-kãng n tɩ ning Faarõ yirã. 15Ezɩpt tẽngã ne Kana tẽngã ligd sẽn sɛ, Ezɩpt tẽng nebã fãa kẽnga a Zozɛf nengẽ n tɩ yeel yaa: «Kõ-y tõnd dɩɩb tɩ d rɩ! Tõnd na n kii yãmb taoor tõnd sẽn ka tar ligd yĩnga?» 16La a Zozɛf yeelame yaa: «Yãmb sẽn n ka leb n tar ligdã, wa-y ne y rũmsã, n tek n deeg n deeg koodo.» 17La bãmb talla b rũmsã n wa a Zozɛf nengẽ. La a Zozɛf kõo bãmb dɩɩb la a reeg b wiidã, ne b rũm-bãoonegã la b rũm-bɛdã, ne b bõensã. A Zozɛf kõo bãmb rɩɩb yʋʋm-kãnga, la a reeg b rũmsã fãa.
18La yʋʋm-kãng sẽn looge, nebã leb n waa a Zozɛf nengẽ yʋʋmd ning sẽn pʋglã n wa yeel-a yaa: «Tõnd ka na n solg d soaalã n ka togs-b ye. Tõnd ligdã sɛɛme, tõnd rũmsã me la d sẽn tall n wa kõ yãmbã. Dẽ, bũmb ning sẽn ket tõnd nengẽ d sẽn tõe n dɩk n kõ d soaalã, yaa tõnd mensã ne d pʋtã. 19Rẽ wã, bõe yĩng tɩ tõnd na n tar pʋto, la d kiid yãmb nifẽ? Ra-y tõnd ne d pʋtã, tɩ d paam dɩɩbo, la tõnd na n lebga Faarõ yembse, tɩ b soog tõnd ne d pʋtã, la y kõ-d bõn-buud tɩ d paam n põs n da ki tɩ d pʋtã wa lebg zĩ-vɩɩd ye.» 20Dẽ, a Zozɛf raa Ezɩpt tẽngã pʋtã fãa tɩ lebg Faarõ rẽnda. Bala, Ezɩpt tẽngã nebã ned kam fãa koosa a pʋʋgo, komã sẽn dag n namsd bãmbã yĩnga. Dẽ, tẽngã zãng lebga Faarõ rẽnda. 21A Zozɛf yiisa nebã n tegs b tẽmse, Ezɩpt soolmã tẽms fãa pʋse. 22La a ka ra maan-kʋʋdbã pʋt ye. Bala, Faarõ rag n yiisa tõog maan-kʋʋdbã sõngr yĩnga, la maan-kʋʋdbã rag n vɩɩ ne bõn-kãnga. Yaa rẽ n kɩte, tɩ maan-kʋʋdbã ka koos b pʋtã ye. 23A Zozɛf yeela nimbuiidã yaa: «Mam daa yãmb rũndã ne y pʋtã n kõ Faarõ. Reeg-y bõn-buudu, n tɩ bʋd y pʋtã. 24La tigsgã wakate, yãmb na n yãka y bõn-koaadlã sẽn pʋɩ zĩis a nu pʋɩɩr a yembr n wa kõ Faarõ, la yãmb tall pʋɩɩr a naasã sẽn kellã, n paam bõn-buud n bʋd y pʋtã, la y paam dɩɩb n dɩlg y mens ne y pagbã, la y kambã.» 25La bãmb yeelame: «Yãmb fãaga tõnd vɩɩm! Tõnd paamame tɩ d soaalã nong tõndo. Dẽ, tõnd na n yɩɩ Faarõ yembse.» 26La a Zozɛf gʋlsa bõn-kãng tɩ lebg tõog n kell n pa n tãag rũndã, sẽn kẽed ne Ezɩpt tẽngã nebã pʋt wɛɛngẽ. Bõn-koaadlã sẽn pʋɩ zĩis a nu pʋɩɩr a yembr yaa Faarõ rẽnda, la yaa maan-kʋʋdbã pʋt bal n ka Faarõ rẽnda.
A Israyɛll yaoolem koeese
27A Israyɛll zĩnda Ezɩpt soolmã, Gosɛn tẽngã pʋga. La bãmb soog-a lame. La bãmb paama rogem, n fɩɩg n lebg wʋsgo. 28A Zakoob zĩnda Ezɩpt soolmã pʋg yʋʋm piig la a yopoe. A Zakoob vɩɩmda yʋʋm koabg la pis-naas la a yopoe. 29#Sɩng 49.29-32, 50.6A Israyɛll vɩɩmã sẽn wa n dabd a sɛɛb zĩigẽ, yẽnda boola a biig a Zozɛf n yeel-a yaa: «Fo sã n nonga maam, mam kot-f lame tɩ f rɩk f nug n tik mam gerã, n wẽen tɩ f na n maan-m-la neere, la f na n maana sɩd ne maam, la f ka na n mum maam Ezɩpt tẽngã pʋg ye! 30Mam sã n wa n sak m saam-dãmba, bɩ f tall maam n yi Ezɩpt tẽngã n tɩ mum m saam-dãmbã yaadẽ.» La a Zozɛf yeelame: «Mam na n maana wa yãmb sẽn yeelã.» 31A Zakoob leb n yeela a Zozɛf yaa: «Wẽen tɩ f na n maana wa m sẽn yeel foomã.» La a Zozɛf wẽename. Dẽ, a Israyɛll wõgemda a gãagã zugẽ.
Dewis Presennol:
Sɩngre 47: MPBU
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Moore Bible © Bible Society of Burkina Faso, 2014.