Sɩngre 43
43
A Zozɛf kẽem-dãmbã leb n kẽnga Ezɩpte
1Kom-kãsengã rag n ket n tara pãng soolmã pʋga. 2A Zakoob ne a yirã rãmb sẽn dɩ kood ning b sẽn tɩ tall Ezɩpt n wa wã n sɛ, a Zakoob yeela a kambã yaa: «Lebg-y n leb-y Ezɩpt tẽng n tɩ ra kood n wa.» 3La a Zʋʋda yeela a ba a Zakoob yaa: «Ade, Ezɩpt soolmã naab keooga tõnd vẽeneg n yeele: yãmb yao wã sã n ka tũ yãmba, mam ka na n deeg yãmb ye. 4Dẽ wã, yãmb sã n sak n na n bas tɩ tõnd yao wã tũ tõnd n kẽnge, d na n lebg n lebame n tɩ ra koodã n wa kõ-yã. 5La yãmb sã n ka na n sak t'a tũ tõndo, tõnd ka na n kẽng ye. Bala, raoã yeelame tɩ tõnd yao wã sã n ka tũ tõnd n wa, yẽnda ka na n deeg tõnd ye.» 6Dẽ, a Israyɛll yeelame: «Bõe yĩng tɩ yãmb maan wẽng woto, n togs raoã tɩ yãmb tara yao a to?» 7Bãmb leokame: «Raoã soka tõnd d yirã rãmb kibar ne pẽdgre. A soka tõnd d mensã yelle, la a sok tɩ tõnd ba wã ket n vɩɩme bɩ, tɩ tõnd tara yao a to bɩ. Dẽ, tõnd leoka a sokdsã. Tõnd dag n ka tõe n bãng t'a na n yeelame tɩ d tɩ tall d yao wã n wa ye.»
8A Zʋʋda yeela a ba a Israyɛll yaa: «Bas-y-yã a Benzame t'a tũ maam. Tõnd na n yikame n kẽnge, n da wa ki ye. Yaa yãmb ne tõnd kambã, la tõnd mens yĩnga. 9Yaa mam meng n dɩkd sard n na n yɩ a Benzame gũuda. Mam na n lebg n tall-a lame n wa lebs yãmba. Mam sã n ka tall-a n wa lebs-yã, la m kɩt t'a yals yãmb taoor ka, bɩ mam kell yɩ koangd yãmb taoor m yõor tɛka. 10Tõnd sã n dag n ka kaoosẽ, woto tɩ tõnd dag n kẽngẽ lame n lebg n wa, n lebg n leb naoor a yiibẽ soab n leb n lebg n wa.» 11Bãmb ba a Israyɛll yeela bãmb yaa: «Sã n yaa woto, ad yãmb sẽn na n maan bũmb ninga: Bao-y tẽngã bõn-sõama wã n sui y yondẽ wã n tall n tɩ kõ raoã. Yãk-y tɩdar bilfu, sɩɩd bilfu, wisdu, kaam sẽn tar yũ-noogo, Pistaas biisi, ne Amand-dãmba. 12Zã-y ligd tɩ yɩɩg yãmb sẽn zã pĩndã naoor a yiibu, la y rɩk ligd ning b sẽn lebs yãmb yondã pʋsã n zã. Bala, tõeeme tɩ yɩɩ tudgri. 13Yik-y n peeg-y y yao wã n lebg n leb raoã nengẽ. 14Bɩ Pãng-Soab a Wẽnnaam kɩt tɩ raoã zoe yãmb nimbãaneg n bas tɩ yãmb ba-biig a yembrã ne a Benzame tũ yãmb n wa. La sã n mikame tɩ mam na n konga m kambã, bɩ kong-ba!»
15Dẽ, bãmb dɩka kũunã, la b bao ligdã b sẽn tarã naoor a yiibu n zã, la b peeg a Benzame ta tũ. La bãmb loogame n ta Ezɩpt tẽnga, n kẽng a Zozɛf nengẽ. 16A Zozɛf sẽn yãnd a Benzame sẽn tũ bãmb n wa wã, a yeela a zakã naab yaa: «Tall nin-bãmb n tɩ kẽes mam zakẽ wã, la f bao rũms n kʋ n segle, tɩ mam na n dɩɩ ne bãmb rũndã!» 17Raoã maana wa a Zozɛf sẽn yeelã, n tall-b n kẽng a Zozɛf yirã. 18B sẽn tall bãmb n kẽng a Zozɛf zakẽ wã, rabeem kãseng yõka bãmb tɩ b gom ne taab n yeele: «Yaa tõnd sẽn wa pĩnd tɩ b lebs ligdã tõnd yondã pʋsã yĩng la b sẽn wa ne tõnd ka wã. Bãmb dat n yõga tõnd n modg-d n kẽes yembdo, la b rees tõnd bõensã.» 19Dẽ, bãmb kolg a Zozɛf zakã naab sẽn yas zakã noorã n gom ne-a. 20Bãmb yeelame: «Y kabre, m soaala! Tõnd dag n zoe n waa ka n wa ra koodo. 21La tõnd sẽn ta toandbã sik zĩigẽ wã, tõnd loka d yondã n mik tɩ ned kam fãa ligd saga a yolgẽ. La ligdã sõor kell n yaa wa tõnd sẽn dag n zã wã bala. Dẽ, tõnd talla ligdã n lebg n wa. 22La tõnd leb n zãa ligd a to me n wa n dat n da koodo. Tõnd ka mi sẽn yaa ned ning n lebg n dɩk tõnd ligdã n lebs tõnd yondã pʋs ye.»
23Yẽnda leokame: «Bɩ y paam laafɩ, la y da yɛɛs ye! Yaa yãmb Wẽnnaamã sẽn yaa yãmb ba wã Wẽnnaamã n ning arzɛkã yãmb yondã pʋse. Mam deega yãmb ligdã.» La a kɩtame tɩ b tɩ yiis a Sɩmyõ n tall n wa ne bãmb nengẽ.
24Raoã talla bãmb n kẽ a Zozɛf zakẽ wã, la a kõ-b koom tɩ b waas b nao, la a bao yamd n kõ b bõensã. 25Woto, bãmb segla b kũunã n gũud t'a Zozɛf sã n wa wĩntoogã bɩ b kõ-a. Bala, bãmb dag n wʋmame tɩ b gomd tɩ bãmb na n dɩɩ beenẽ. 26La a Zozɛf sẽn wa yiri, bãmb kẽe roogã pʋg n kõ yẽnda kũun ning b sẽn tarã, la b wõgemd yẽnda taoore. 27A Zozɛf pʋʋs-b lame n sok b keelem, n yeele: «Yãmb ba wã, sẽn yaa nin-kẽem ning yãmb sẽn dag n gom ne maam a yellã keemame? Bãmb ket n vɩɩme bɩ?» 28La bãmb leokame: «Yãmb tʋmtʋmdã sẽn yaa tõnd ba wã keemame, la b ket n vɩɩme.» La bãmb leb n sulgame n wõgemde. 29La a Zozɛf sẽn zẽk a neng n yãnd a yao a Benzame sẽn yaa yẽnda ma-biigã, a yeelame: «Yaa yãmb yao ninga yãmb sẽn dag n gom ne maam a yellã la yõwã bɩ?» La a leb n yeele: «M biig sõngo, Wẽnd na ning f zug barka!» 30A Zozɛf maana koɛɛg-koɛɛga, tɩ bala, yẽnda rag n dat n yãbame. Yẽnda paama yĩn-sidg hal wʋsg a yao wã yĩnga. La a Zozɛf kẽe a roogẽ n yãbe. 31La yẽnda sẽn widga a neng n sɛ, a lebg n yiime, la a modg n gãda a menga, n yeele: «Ning-y rɩɩbã.» 32La b ninga a Zozɛf rɩɩbã toore, la b ning a kẽem-dãmbã rẽnd toore, la b ning Ezɩpt neb nins sẽn mi n dɩt ne yẽnda wã me toore. Bala, Ezɩpt tẽng nebã ka tõe n naag Ebre rãmbã n dɩ ye. Bala, bõn-kãng yaa yel-beed ne Ezɩpt nebã. 33La a Zozɛf kẽem-dãmbã zĩnda ne yẽnda n na n dɩ. La b zĩndga bãmb kãsem-pʋgdg fãa ne a zĩiga, n tɩ tãag yao-zʋʋgã. Bõn-kãng yɩɩ lingr ne bãmb ned kam fãa t'a gomd ne a yaka. 34A Zozɛf kɩtame tɩ b yãk rɩɩbã yẽndã taoorã n kõ-ba, la b kõo a Benzame n yɩɩg bãmb fãa rẽndã naoor a nu. Bãmb naaga a Zozɛf n yũ n tɩg tɩ b nensã yilme.
Dewis Presennol:
Sɩngre 43: MPBU
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Moore Bible © Bible Society of Burkina Faso, 2014.