Sɩngre 42
42
A Zozɛf kẽem-dãmbã waa Ezɩpt tẽnga
1La a Zakoob mikame tɩ kood bee Ezɩpt soolmẽ wã. Dẽ, a Zakoob yeela a kom-dibli wã yaa: «Yaa bõe tɩ yãmb zĩ n get taab woto?» 2#Tʋʋm 7.12La a yeel-b lame yaa: «Mam wʋmame tɩ kood bee Ezɩpt tẽnga, kẽng-y beenẽ n tɩ ra kood n wa, tɩ d paam n põs n da ki ye.» 3A Zozɛf kẽem-dãmb piigã kẽnga Ezɩpt n na n tɩ ra koodo. 4La a Zakoob ka bas t'a Zozɛf yao a Benzame tũ bãmb ye. Bala, a Zakoob tagsame tɩ yẽnda sã n bas t'a tũ, bũmb tõe n tek n maan-a lame. 5La a Israyɛll kom-dibli wã tũu neb a taabã n wa n na n da kood wa nebã fãa. Bala, komã rag n kẽe Kana soolmã gilli.
6La mikame tɩ yaa a Zozɛf n dag n yaa Ezɩpt soolmã balem-naaba. La yaa yẽnda n kõt noor tɩ b koosd koodã ne nebã fãa. Dẽ, a Zozɛf kẽem-dãmbã wa n wõgemdame, n fõgen b nens tẽng yẽnda taoore. 7A Zozɛf sẽn yãnd a ba-biisã, a bãng-b lame, la a maana a meng wa yẽnda ka mi-b ye, n gom ne bãmb ne nen-keglem n yeele: «Hey! Yãmba! Yãmb yita yɛɛnẽ?» La b leokame: «Tõnd yii Kana soolem n wa n na n da koodo.» 8A Zozɛf bãnga a kẽem-dãmbã, la bãmb ka bãng yẽnda ye. 9#Sɩng 37.5-10A Zozɛf tẽega zãmsd nins yẽnda sẽn dag n zãms bãmb wɛɛngẽ wã. La a yeel-b lame yaa: «Yãmb yaa tẽn-gũusdba! Yãmb wa n na n bãnga tẽngã pãn-komsem zĩiga.» 10Bãmb leokame: «Ayo! D soaala, ka woto ye! Yãmb yembsã wa n na n daa koodo! 11Tõnd fãa yaa ned a yembr kom-dibli. Yaa sɩd la tõnd sẽn togsdã! Yãmb yembsã ka tẽn-gũusdb ye.» 12La a Zozɛf yeel-b lame: «Ka sɩd ye. Yãmb wa n dat n bãnga tẽngã pãn-komsem zĩiga.» 13Bãmb leokame n yeele: «Tõnd yaa yãmb tʋmtʋmdba! Ade, tõnd ba wã roga tõnd piig la a yiibu. Tõnd fãa yaa rao a yembr sẽn be Kana tẽngã kamba. La tõnd yao a yembr n pa yir ne tõnd ba wã, la a yembr n ka be.» 14A Zozɛf yeel-b lame yaa: «Yaa wa mam sẽn yeel yãmbã bala. Yãmb yaa tẽn-gũusdba. 15Ad makr ning mam sẽn na n mak yãmb n gese: ‹Ne Faarõ yʋʋre, tɩ yãmb yao-zʋʋgã sã n ka wa ka, yãmb kõn yi ka ye.› 16Bɩ y tʋm yãmb ned a yembr t'a tɩ peeg yãmb yao wã n wa. La yãmb neb nins sẽn ketã na n kẽe bi-bees roogo. Tõnd na n maka yãmb goamã n ges yãmb sã n togsda sɩda. La sã n ka rẽ, mam wẽenda ne Faarõ yʋʋr tɩ yãmb yaa tẽn-gũusdba.» 17La a Zozɛf kɩtame tɩ b kẽes b fãa bi-bees roog rasem a tãabo.
18Rasem a tãabã daar sẽn ta, a Zozɛf yeela bãmb yaa: «Ad yãmb sẽn na n maan bũmb ning n paam n vɩɩmde. Mam zoeta Wẽnnaam! 19Yãmb sã n yaa sɩd dãmba, bɩ yãmb ned a yembr kell n pa bi-bees roogã pʋg ka, tɩ sẽn ket-bã tall koodã n kuil n tɩ kɩs yãmb yirã rãmba, komã yĩnga. 20La y tall y yao wã n wa mãm nengẽ, tɩ tõnd tõe n bãng yãmb goamã sã n yaa sɩda, tɩ yãmb tõe n paam n vɩɩmde.» 21Dẽ, bãmb sɩd maana woto, n gom ne taab n yeele: «Sɩdã, tõnd maana d yao wã wẽnga. Bala, tõnd yãnda a sũ-sãangã, yẽnda dag n kosa tõnd tɩ d zoe yẽnda nimbãanega, la tõnd ka kelg-a ye. Yaa rẽ yĩng n kɩt tɩ yel-pak-kãngã paamd tõndo.» 22#Sɩng 37.21,22A Rubɛn goma ne bãmb n yeele: «Mam dag n ka reng n togs yãmb sɩda? Mam ka yeel tɩ d ra maan biigã wẽnga? La yãmb ka kelg maam ye. La moasã, ade, yẽnda zɩɩmã yell bee tõnd zugu.» 23La bãmb dag n ka mi t'a Zozɛf wʋmda bãmb goamã ye. Bala, no-rɛɛs n dag n deesd a Zozɛf goamã n togsd bãmba. 24A Zozɛf sergame n bas bãmb n tɩ yãbe. La a lebgame n wa gom ne bãmba, la a yiisa a Sɩmyõ bãmb sʋk n tɩ kẽes bi-bees roog bãmb nifẽ.
A Zozɛf kẽem-dãmbã lebg n leba Kana
25A Zozɛf kõo noor n yeel tɩ b sui bãmb yondã ne kood tɩ pidi, la b lebs ned ka fãa ligd a yolgẽ, la b bao rɩɩb n kõ bãmb b kẽnda yĩnga. La b sɩd maana bãmb woto. 26A Zozɛf kẽem-dãmbã rɩka b koodã n zɩlg b bõens n yi beenẽ n dɩk sor n looge. 27La bãmb sẽn ta sik zĩigẽ wã, bãmb ned a yembr sãrga a yolg n na n yãk ki n kõ a bõanga, la a mikame tɩ yẽnda ligdã be a yolgã noore. 28La a yeela a ba-biisã: «B lebsa maam m ligdã. Ad ligdã sẽn be yolgã noore!» La bãmb pelensã yɩkame, tɩ bãmb fãa rigda. La b soka taab yaa: «Yaa bõe tɩ Wẽnnaam maand tõnd a woto?»
29Bãmb sẽn ta b ba a Zakoob nengẽ Kana tẽnga, bãmb togsa yẽnda bãmb sẽn paam yɛl ninsã fãa. 30Bãmb yeelame yaa: «Rao ning sẽn so soolmã goma ne tõnd ne nen-keglem, a yeela tõnd tɩ d wa n na n gũusa tẽngã. 31La tõnd yeela yẽnda tɩ tõnd yaa sɩd dãmba, la d ka tẽn-gũusdb ye. 32La d yeel-a lame me tɩ tõnd yaa tõnd piig la a yiibu, la tõnd fãa yaa ned a yembr kamba, la tõnd yao a yembr n ka leb n be ye. La d yeel-a t'a yembr n pa ne tõnd baaba wã Kana tẽnga. 33Dẽ, rao ning sẽn yaa tẽngã soaalã yeelame: ‹Ad bũmb ning sẽn na n wilg tɩ yãmb yaa sɩd dãmba. Bas-y yãmb ba-biig a yembr ne maam ka, tɩ sẽn ket-bã tall koodã n tɩ kɩs yirã rãmba, tɩ komã yaa wʋsgo. 34La y sã n kẽng bɩ y tall y yao-zʋʋgã n wa mam nengẽ. Dẽ, mam na n bãngame tɩ yãmb ka tẽn-gũusdba, la y yaa sɩd dãmba. Rẽ, mam na yaool n lebs yãmb y ba-biigã, tɩ y saag soolmã pʋg n manes y yɛla.› »
35La bãmb sẽn zuk b yondã, b mikame tɩ bãmb ned kam fãa korg ne a ligd saga a yolgẽ. Bãmb ne b baaba wã fãa sẽn yãnd ligdã rabeem kãseng yõka bãmba. 36Dẽ, bãmb ba a Zakoob yeel-b lame: «Yãmb kɩtame tɩ mam kong m kambã fãa! A Zozɛf ka be ye, a Sɩmyõ me ka be ye, tɩ yãmb leb n dat n deeg a Benzame yɛsa. Woto fãa yaa yɛl sẽn lʋɩt mam zug bala!» 37La a Rubɛn yeela a baaba yaa: «Mam sã n ka tall a Benzame n lebg n wa, bɩ y kʋ mam kom-dibli a yiibã. Bas-y-yã-a ne maam, la mam na n lebg n tall-a lame n wa kõ-fo.» 38A Zakoob yeelame: «Mam ka na n sak tɩ m biigã tũ yãmb n kẽng ye. Bala, yẽnda kẽema kiime, tɩ kell yẽnda a yembre. Yãmb sẽn na n dɩk sorã tɩ bũmb sã n tek n maan-a, yãmb na n kɩtame tɩ mam sig kɩɩm-kulg ne m zoob-peendã la ne sũ-sãanga.»
Dewis Presennol:
Sɩngre 42: MPBU
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Moore Bible © Bible Society of Burkina Faso, 2014.