Lyfr y Psalmau 36
36
1Anwiredd yr annuwiol sydd
Yn d’weyd i’m calon nos a dydd,
Nad ydyw arswyd Arglwydd nef
Na ’i ofn o flaen ei lygaid ef.
2Gwenhieithia iddo ’i hun nad yw
Ei bechod oll yngolwg Duw,
Nes cael o’r diwedd fesur llawn
Ei anwireddau ’n atgas iawn.
3Anwiredd yw ei eiriau i gyd,
Llawn twyll a ffuant yw ei fryd;
Ac mwyach nid yw ’n arfer chwaith
Gallineb at ddaionus waith.
4Pan ar ei wely ’r nos y bydd
Ei ddyfais ar ryw ddrwg a rydd;
Ac at anwiredd hwylia ’i daith,
Nid ffiaidd gantho bechod chwaith.
YR AIL RAN
5Dy drugareddau, Arglwydd Ner,
Sy ’n cyrraedd uchod hyd y ser;
A’th wirioneddau sydd uwchlaw
Uchelder y cymmylau draw.
6Mae ’th wir fel creigiau cedyrn, Ior,
A’th farnau fel dyfnderau ’r môr;
Dyn ac anifail, Arglwydd Rhi,
Eu Crëwr mawr, a gedwi Di.
7Mwy gwerthfawr yw ’th drugaredd fawr
Na dim a fedd y ddaear lawr;
Am hynny byth hyderwn ni
O dan dy dadol adain Di.
8O’th frasder, Ion, y’n gwneir yn llawn,
O wledd dy Dŷ digonedd cawn;
Ac i’n dïodi llifa’th ras
Yn afon beraidd iawn ei blas.
9Gyd â Thydi, O Arglwydd Dduw,
Mae ffynnon bur y dyfroedd byw;
Ac yn dy lân oleuni clir
Y gwelwn ni oleuni ’n wir.
Y DRYDEDD RAN
10O estyn dy drugaredd rad
I bawb a’th edwyn, Arglwydd mad;
A dangos dy gyfiawnder llawn
I bawb a’r sydd o galon iawn.
11Y balch i’m herbyn byth na ddoed
I sathru i lawr fy mhen â’i droed;
A byth o’m gobaith ynot Ti
Na syfled llaw ’r annuwiol fi.
12Yno gweithredwŷr drwg i lawr
Syrthiasant oll, a’u cwymp oedd fawr;
Ac yno i lawr y gwthiwyd hwy
Na ’s gallant byth gyfodi mwy.
Dewis Presennol:
Lyfr y Psalmau 36: SC1850
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Y Psallwyr gan y Parch. Morris Williams (Nicander). Cyhoeddwyd gan H. Hughes, Llundain 1850. Cafodd y testun ei ddigideiddio gan Gymdeithas y Beibl yn 2021.