Lyfr y Psalmau 29
29
1O moeswch nerth i’r Arglwydd Ion,
Chwi gedyrn feibion, moeswch;
2Ar dafod pur a pheraidd dant
Ei lân ogoniant cenwch.
Gogoniant Enw ’r Arglwydd Dduw
Mewn agwedd wiw mynegwch;
Addolwch Dduw ar dant a chân
Ynghafell lân ei harddwch.
3Lleferydd Duw yn nyfroedd nef
Sy daran gref gogoniant;
Ei amnaid yn gostegu sydd
Leferydd chwyrn lifeiriant.
4Yr Arglwydd Ior pan roddo ’i lef,
Mae honno ’n gref a nerthol;
Mewn prydferth ardderchowgrwydd gwiw
Mae llef ein Duw ’n rhagorol.
5Lleferydd Duw a blyga i lawr
Y cedrwydd mawr yn fuan;
Ein Duw â’i lef a ddryllia ’n rhwydd
Gadarnaf gedrwydd Liban.
6Wrth lais ein Duw y bryniau ’n syn,
Fel llo neu fynn, a neidiant;
Liban a Sirion uchel frig,
Fel iwrch neu ewig llammant.
7Gyrrir y tân, gan drwst ei lef,
Yn fellt trwy ’r nef yn saethu;
8Pair llef ein Duw i’r anial maith,
A Chades ddiffaith, grynu.
9Ei lef a bair i ’r ewig wan,
Gan ofn y daran, lydnu:
Trŷ prennau ’r coed yn noeth a gwyw
Wrth lais ein Duw ’n llefaru.
Ond yn ei Deml yn fwyaf clir
Y clywir llais ei eiriau;
Yn honno pawb a’i molant Ef
A grymmus lef ei enau.
YR AIL RAN
10Yr Arglwydd eistedd, er eu maint,
Ar y llifeiriaint rhuthrol;
Ac eistedd Ef, i’w dal i lawr,
Yn Frenhin mawr trag’wyddol.
11Yr Arglwydd i’w ffyddloniaid cu
Rhydd allu, nerth a mawredd;
Fe ddyry ’r Ion i’r union rai
Ei fendith a’i dangnefedd.
Dewis Presennol:
Lyfr y Psalmau 29: SC1850
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Y Psallwyr gan y Parch. Morris Williams (Nicander). Cyhoeddwyd gan H. Hughes, Llundain 1850. Cafodd y testun ei ddigideiddio gan Gymdeithas y Beibl yn 2021.