MATEO 15
15
Soto choone’majaicho
1Yaawä Jesuuquidiito döiña cöneejoto anejjacoomo jaadiseeo, judhío owaanomannamo mmaja, Jeduusadén ñancomo we’a’como. Tönwanno cönä’döa’to:
2—¿Ane’que’nei onoowanoomadö ei’cha naicho jenaado’jocoomo wätunnäichomo nönge? Tönwanno tamäädöcoomo amoichadööjo’da töwääwashinchä weneeneto; quee cönä’döa’to.
3Jesuuquidiito cönä’döaacä chäwwäiñe:
—¿Änwanno ’na? ¿Ane’que’nei Wanaadi waanontädö tömja’do’jo määnetääne dea änwanno äwäätunnäichomo mma tödöödö wetä? 4Wanaadi yääje cönaanontäi: “Oomo aashicha tödööca, aanö mmaja. Ñäädä tumö eunei, senö eunei mmaja, tämaane emaatäcä ñäädä;” quee Wanaadi waanontädö na. 5Änwanno mmaane edääje äwä’dödööcomo: Yääje soto ä’döjai ña tumö wwä, senö wwä jeiñe mma: “Ä’wa’täjai’cha wa; tameedä önnödö Wanaadi wwä tu’e na;” quee äwä’dödööcomo. 6Mädääje soto wä’döa’jäcä yuumö ani’wa’täjo’da maato yaawä chäwwä, yeenö ani’wa’täjo’da mmaja. Mädääje ema’jödööje Wanaadi waanontädö mödööato, äwäätunnäichomo mma tödöödö wetä. 7Yääjönö wa’co’como wäänejoodö änwanno. Chäänönge yääje Isaía cömmennäi äjääcäiñe:
8Canno soto aashicha jääcä töwa’deuwe weneeneto,
chö’tajäätödööcomo mmaane amoinche na jääcä.
9Töwäädämma wa’deme’tä weneeneto.
Tönwanno tönoowanooma weneeneto soto wätunnäichomo que mma; quee cömmennäi Isaía;
quee cönä’döaacä Jesuuquidiito jaadiseeo wwäiñe.
10Yääje mma yaawä Jesuuquidiito cöna’dejjaicho ñanno soto; cönä’döaacä chäwwäiñe:
—Aashicha cätaatäcä. 11Jönaawono womongaja soto choone’majai’cha na. Mänööne, yo’tacaano weja’caajääne töncone’ma; quee cönä’döaacä Jesuuquidiito.
12Yaawä ñoowanoomadö cöneejoto; chäwwä cönä’döä’to:
—Jaadiseeo dajaane cone’da naato yääje äwä’dö’jödö weijäcä; quee cönä’döa’to.
13Jesuuquidiito cönä’döaacä chäwwäiñe:
—Tameedä Jaaja caju ñano niñaatö’tädööjönö nätu’caja’de imiichö jadäädä. 14Mädääje nei’ña’to. Tönwanno tänuuque’da naato, tänuuquemjöncomo mmaja ne’se’taato. Tänuuquemjönö wwä tänuuquemjönö mmaja adääa’jäcä, a’nädä ejuccajai ñaato yaawä sö’jato aca; quee cönä’döaacä.
15Peedhodo cönä’döaacä yaawä:
—Ñaa wwä ecammajä’cä mädä yö’seeno jäcä; quee cönä’döaacä.
16Jesuuquidiito cönä’döaacä:
—¿Änwanno jadä’jödöödä äntö’tammecö’da maato dea? 17¿Odhoowanääcäiñe’da nai tameedä soto ntaiño womongajä iwenwaca iichädö, wecaanawä töweeja’caamöje? 18Soto do’tacaano weja’caajä mmaane chö’tajäätödö jonno ne’a. Mädääne yää soto cone’manei. 19Soto tö’tajäätödö acaano weja’caajääne conemjönö weiyajä, yää cone’da tö’tajä’nä, soto emaadö mmaja, anejja jiñamo ajoojodö mmaja, masuuduichanä mmaja, wemeenönnä mmaja, jönaawä soto ementädö mmaja, wätunnä dha’me weiñä mmaja. 20Mädääne yää soto cone’manei. Tamäädö anaamoicha’da wääwashinchänä mmaane soto oncone’ma’da na; quee cönä’döaacä Jesuuquidiito.
Jesuuquidiito ecamjö’jödö wodi Canaanea ñano wwä
21Yäätonno Jesuuquidiito cönääma’täi yaawä. Tiido ña cöntämä, Sidhón ña mmaja. 22Yääje mma yaawä wodi Canaanea ñano, yää jataawono, Jesuuquidiito cöna’dejjai, cönä’döaacä:
—Cajiichaana, Dawí nnedö, wentumje cäneecä. Önnedö wodi’chä näntunaanö’a jooje; odo’sha ’je na; quee cönä’döaacä.
23Jesuuquidiito aneccujäätö’da cöneiyaacä. Yaawä ñoowanoomadö cöneejoto chäwwadäädä; cönä’döa’to Jesuuquidiito wwä:
—Enno’jacä mä’dä wodi. Cöjaanaquiimaato; quee cönä’döato.
24Yääje mma yaawä töwö Jesuuquidiito cönä’döaacä:
—Oweeja sadiijanga’como jäcäinchädäiñe Wanaadi yaanontäne, ñanno iisadaaediitacoomo mma; quee cönä’döaacä Jesuuquidiito tönoowanoomadö wwäiñe.
25Yaawä ñäädä wodi cöneejä. Tä’mudhe cönä’döi ije’taca.
—Cö’wa’täcä, Cajiichaana; quee cönä’döaacä.
26Jesuuquidiito cönä’döaacä chäwwä:
—Cone’da mudeeshi’chä cataadöcoomo utuudu sö’na’cä wwäiñe; quee cönä’döaacä.
27Ñäädä wodi cönä’döaacä yaawä:
—¿Yääjönca? Yääje yeichaame sö’na’cä mmaja tönäu’cwe weneeneto meesa o’nä tädhaamo uduucomo wä’me’jödö; quee cönä’döaacä.
28Jesuuquidiito cönä’döaacä chäwwä:
—Jooje mecaanö’a. Äjääcä neja’däto’ñojo ämjummadö nönge; quee.
Yaawä dea ñäädä wodi nnedö cönaadoncai.
Jooje soto adonca’jocoomo
29Yääje mma yaawä Jesuuquidiito cönääma’täi yäätonno. Caadideea cu’jäi jacääcä cönäämannä’acä; cöntämä yaawä jöö de’cäi. Yäätä cönaatajiimai. 30Jooje soto cönä’döicho yaawä yöiña. Tönwanno cönnejooto secumja’como, tänuuquemjöncomo mmaja, ta’deudemjöncomo mmaja, töwe’tamonga’como mmaja, anejjacoomo cädäija’como mmaja. Jesuuquidiito dö’tä cönnöicho. Töwö cönaadoncaicho yaawä tameedä. 31Ñanno soto cönääcatoncaicho yaawä, töwwäiñe eneea’jäcä ta’deudemjöncomo wa’deutadööcomo, töwe’tamonga’como waadoncadööcomo mmaja, secumja’como sheecuncadööcomo mmaja, tänuuquemjöncomo enu’tädööcomo mmaja. Aashicha cöna’deuwa’to yaawä iisadaaediitacoomo Wanaadiyö jäcä.
Aacäichea miide soto ewanshincho’jocoomo
32Yääje mma yaawä Jesuuquidiito tönoowanoomadö cöna’dejjaicho; cönä’döaacä:
—Wentumje canno soto wene’maato. Aaduwaawä anooto nä’döi eduuwa jaadä yeichöcoomo; tönwanno chääwanshiñööcoomo ’je’da na. Ämiije enno’ja’se’daiñe wa ijaatacäiñe, ääma taawä mma a’su’ta’noto; quee cönä’döaacä Jesuuquidiito.
33Ñoowanoomadö cönä’döa’to yaawä:
—¿Äsha mmaja sadä caneejodöötädö deaade’ canno jooja’como soto ewanshiñööcomo, jata ’jemjönö aca mmädä?
34Jesuuquidiito cöneecamma’joicho:
—¿Ä’waasa uu nai äwwäiñe? quee cönä’döaacä.
Tönwanno cönä’döa’to:
—Aacä amoojato i’yaca’jödö, aacä’cä na’cwacaano’cä mmaja.
35Yaawä Jesuuquidiito soto cönaajimaajoicho nono jo. 36Yää aacä amoojato i’yaca’jödö cönannäjöi yaawä, na’cwacancomo’cä mmaja. Töwa’deuwödö’jo yää cöni’yajäätöi. Tönoowanoomadö wwäiñe cuntui yaawä. Tönwanno cöneecamoicho soto wwäiñe. 37Tameedä cönääwashinchöicho yaawä töwensu’tädööcomo wa’cä. Yäädetö’jödö cönancuicho yaawä, aacä amoojato wöwa. 38Ñanno töwääwashinchaamo cönä’ja’to aacäichea miide dhanwaacomo, wodiiñamo töme’cu’tä’da mma, mudeeshi’chä töme’cu’tä’da mmaja. 39Soto enno’jadööcomo’jo Jesuuquidiito cönä’täi yaawä cudiiyada aca. Maacada ña cöntämä yaawä.
Dewis Presennol:
MATEO 15: MCH
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2014 Reservados todos los derechos