Matiye 18
18
Dəw kə̂ bo mə Bbe-kɔn tə̂ kə̂ darâ
1Kar tə̂ənn, njê-njaje go Jeju tə̂ ddeeje rɔɛ̂ tə̂ dujeje nan: «Nân bba to dəw kə̂ uta marɛ̂je tɔyn mə Bbe-kɔn tə̂ kə̂ darâ wa?» 2Jeju bbar marə ngonn undɛ̂ horode tə̂ dannâ 3ngaâ pa nan: «Tar kə̂ tɔkɔrɔ â maw pa marəse. Bbo ə-turuje məse arə ddee tokə mə ngannje kə̂ ngaji nəənn ang a, â kandəje mə Bbe-kɔn tə̂ kə̂ darâ ang. 4Dəw kə̂ dda rɔɛ̂ tɛn tokə ngonn nəənn to dəw kə̂ bo mə Bbe-kɔn tə̂ kə̂ darâ. 5Dəw kə̂ taa ngonn kə̂ ngaji tokə be kə rɔɛ̂ tə̂ mbam a, əman njaa â n̂-taam kə rɔɛ̂ tə̂ənn.»
Nɛ̂n kə̂ a dda karə dəw oso mə majang tə̂
6«Dəw kə̂ dda arə marə dəw horo ngannje tə̂ kə̂ ngaji kə̂ unnje məde arəm oso mə majang tə̂ a, maji ta tɔ tɔkə biri gɔsɛ̂ tə̂ kilɛ̂ mə ba-katə tə̂ bəər karə noy. 7To ndoo nya arə dəwje kə̂ duninya tə̂. Nɛ̂n kə̂ a dda karə dəw oso mə majang tə̂ banya nya. Tɔkɔrɔ, nɛ̂n kə̂ a dda karə dəw oso mə majang tə̂ a to kə ndɔ tɔyn. A to ndoo nya karə dəw kə̂ a dda karə njê-marɛ̂je osoje mə majang tə̂. 8Bbo jii wase gɔli a ta dda karə oso mə majang tə̂ a, ə-gangə ungu kɔrɔ̂. Mba kinga təbbə kə jii wase gɔli kə̂ nayn kâra baa maji uta ngəm jii joo kəm wase gɔli joo kəm karə dilai nɛ̂n kəm puru tə̂ kə̂ aw ɔn kə ndɔ kə ndɔ. 9Bbo kəmi a ta dda karə ə-dda majang a, maji karə ɔru ila kɔrɔ̂. Kinga təbbə kə kəmi kə̂ nayn kâra baa maji uta ngəm kəmi joo kəm karə dilai nɛ̂n kəm puru tə̂ kə̂ aw ɔn kə ndɔ kə ndɔ.»
Gusu-tar dɔ batə tə̂ kə̂ nayn kɔrɔ̂
10«Aaje kə majɛ̂! Dang bba ə-yabbəje marə dəw kâra horo dəwje tə̂ kə̂ tɛn nəənn ang. M-pa marəse, anjəje ləde aw arje kə ndɔ tɔyn nɔn Bɔmje tə̂ darâ. [11Mba Ngonn lə dəw ddee ta kaji dəwje kə̂ naynje kə kɔrɔ̂.] 12Ddi â əjəje dɔ tar tə̂ nəənn wa? Bbo marə dəw kə̂ batəje laa kɔr kâra, marɛ̂ kâra nayn a, nâ kinya kəseje kə̂ dɔjikara gire jikara le dɔ ddingiri tə̂ ta təl kaw sangə ye kə̂ kâra le kingɛ̂ ang wa? 13Bbo ningɛ̂ a, tɔkɔrɔ, m-pa marəse, rɔɛ̂ a nəəle mba batə kə̂ kâra le nya uta rɔɛ̂ kə̂ nəəle mba batəje kə̂ dɔjikara gire jikara kə̂ naynje kɔrɔ̂ ang le. 14Ddəw kâra baa, Bɔsese kə̂ isi darâ ndiki karə marə dəw kâra horo dəwje tə̂ kə̂ tɛn nəənn nayn kɔrɔ̂ ang.»
Ddəw gɔl tar lə njê-mə-kunnje
15«Bbo ngokɔin dda nɛ̂n kə̂ maji ang səi a, aw ingɛ̂ kə karɛ̂, ə-pa arɛ̂. Bbo noo tar ləi a, nayn to təl â ə-təl saa ddəw tə̂ kə̂ maji. 16Bbo noo tar ləi ang a, ə-bbar dəw kâra wase joo ungude dɔi tə̂. Yeenn bba karə tar kə̂ Makəturu lə Lubba pa le ddee to nɛ̂n tɔkɔrɔ. Tar le nan: ‹Dâ gɔl tar nɔn njê-tar-najije tə̂ joo wase mota.› 17Bbo n̂-mbətə ta koo ndəjə ləde a, ə-pa tarɛ̂ arə Egilisi. Bbo n̂-mbətə ta koo ta Egilisi tɔ a, maji karə ooe to dəw kə̂ gərə Lubba ang wase tokə lə nje-taa narɛ lambo.
18«Tɔkɔrɔ m-pa marəse, nɛ̂n tɔyn kə̂ ə-tɔje nangə̂ nəənn, n̂-tɔ darâ mban. Nɛ̂n tɔyn kə̂ ə-tutuje nangə̂ nəənn, n̂-tutu darâ mban.
19«Tɔkɔrɔ, m-təl m-pa marəse, nɛ̂n tɔyn kə̂ dəwje joo horose tə̂ ddaje mə-kâra dɔ nangə tə̂ nəənn mba duju ji Bɔmje tə̂ kə̂ isi darâ, nâ karəde. 20Mba lo kə̂ dəwje joo wase mota uwaje dɔ naan tə̂ kə rim, mee horode tə̂.»
Tar kɔru tar dɔ naan tə̂
21Yeenn ngaâ Piyɛr ddee rɔ Jeju tə̂, duje nan: «Əbbəmje, Bbo ngokɔnʼm dda səm nɛ̂n kə̂ maji ang a, mâ kɔru tar dɔɛ̂ tə̂ gɔl baânn wa? Gɔl siri wa?» 22Jeju pa arɛ̂ nan: «M-pa mari, ɔru tar dɔɛ̂ tə̂ gɔl siri baa ang. Ɔru tar dɔɛ̂ tə̂ gɔl dɔsiri ndərəng gɔl siri. 23Mba yeenn bba tar Bbe-kɔn kə̂ darâ to tokə tar lə marə mbay kə̂ ndiki ta gərə kɔr nɛ̂n laa kə̂ to dɔ njê-kulaje tə̂ laa. 24Nunn kutu tura nɛ̂nje le a, n̂-ddee kə marə nje-kula laa kə̂ narɛ laa to dɔɛ̂ tə̂ kandə narɛ doro doro. 25Nje-kula laa le ee kə narɛ ta kuka nɛ̂n bbangə le ang ngaâ əbbeeje unn ndu karə n̂-labbɛ̂, n̂-labbə dɛnɛ̂n laa kə ngannɛ̂ kə nɛ̂n-kingaje laa mba kuka nɛ̂n bbangə kə̂ dɔɛ̂ tə̂ le. 26Nje-kula le oo baann a, ɔsu məkəjə-gɔlɛ̂ nangə̂ nɔn əbbeeje tə̂ le, pa nan: ‹Ə-tɔ wuri a, mâ kuka bbangə ləi le tɔyn!› 27Əbbeeje le oo kəm-to-ndoo laa ngaâ ɔru bbangə kə̂ dɔɛ̂ tə̂ le a inyɛ̂ arə nɔtu. 28Kar tə̂ kə̂ nje-kula le tee ddaka a, oo marə nje-kula marɛ̂ kə̂ bbangə laa to dɔɛ̂ tə̂ kandə narɛ dɔdɔku. Nuwa gɔsɛ̂ n̂-tɔ naan tə̂, n̂-pa narɛ̂ nan: ‹Uka bbangə ləm!› 29Nje-marɛ̂ le ungu məkəjə-gɔlɛ̂ nangə̂ nɔɛ̂n tə̂, dda rɔɛ̂ to ndoo nan: ‹Ə-tɔ wuri a, mâ kuka bbangə ləi le tɔyn njaa!› 30A Nje-kula le mbətə ngaâ uwɛ̂ ilɛ̂ kəy-kula tə̂ karə n̂-nayn tə̂ənn ndərəng ta nuka bbangə laa le tɔyn bba ta dinyɛ̂. 31Kəsə njê-kula marɛ̂je ooje baann a, ddade ndoo ngaâ daw dɔru gəl nɛ̂njeenn le tɔyn darə əbbədede le. 32Yeenn bba, əbbədede le ula bbarɛ̂ ngaâ pa arɛ̂ nan: ‹Əi, nje-kula kə̂ maji ang! Mɔru bbangə ləm kə̂ to dɔi tə̂ tɔyn, mba rɔi kə̂ ə-dda to ndoo arəm. 33A əi, asə ta koo kəm-to-ndoo lə nje-mari tokə moo kəm-to-ndoo ləi le tɔ ang wa?› 34Wungu ɔn əbbeeje le nya. Nuwɛ̂ nilɛ̂ kəy-kula tə̂ karə dula kəmɛ̂ ndoo ndərəng ta nuka bbangə kə̂ dɔɛ̂ tə̂ le tɔyn bba.» 35Ta kutu nɛ̂n dɔɛ̂ a, Jeju pa nan: «Bbo ɔruje tar dɔ ngokɔnse tə̂ kə məse tɔyn ang a, Bɔy kə̂ isi darâ a dda kə se tokə baann tɔ.»
Dewis Presennol:
Matiye 18: KabbaDkS
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2020, ACOTBA