Matiye 19
19
Tar lə dɛnɛ̂n kə dingaw
1 Jeju pa tarje le tunga a, ɔtu Galile aw nangə tə̂ kə̂ Jude, tura Jurdɛn tə̂. 2Dəwje kə̂ banya unnje goe arə najide rɔ-to tə̂ ləde lo tə̂ənn.
3Marə Parijinyɛje ddeeje rɔɛ̂ tə̂ ta nɛɛ̂n. Yeenn bba n̂-dujeje nan: «Ndu arə ddəw dingaw karə bbo nɛ̂n kə̂ to kə dɔgɔlɛ̂ ang njaa dɛnɛ̂n laa le dda a, n̂-tubbɛ̂ wa?» 4Nilade tə̂ nan: «Ə-turaje tar kə̂ n̂-dda Makəturu tə̂ lə Lubba le ang wa? Tar le nan: ‹Kunn-kutu nɛ̂n tə̂, Lubba kə̂ nje-dda nɛ̂nje tɔyn dda dingaw kə dɛnɛ̂n.› 5Lubba pa nan: ‹Mba yeenn bba, dingaw a kinya bɔɛ̂je kə kɔɛ̂nje ta nayn kə dɛnɛ̂n laa ngaâ dede joo kəm dâ ddeeje to da-rɔ kə̂ kâra baa ngaa.› 6Yeenn a, deeje joo ang ngaa, n̂-ddeeje to da-rɔ kə̂ kâra baa. Nɛ̂n kə̂ Lubba mbɔn naan tə̂ a, maji karə dəw kayn hore ang.» 7Dilɛ̂je tə̂ nan: «Mba ddi bba Mɔyijə unn ndu karə bbo dingaw tubba dɛnɛ̂n laa a, maji karə narɛ̂ makəturu kə̂ a tɔju to ninyɛ̂ mban wa?» 8Nilade tə̂ nan: «Mba mə-kətərə ləse â Mɔyijə arəse ddəw karə ə-tubbaje nɛ̂n dɛnɛ̂nje ləse. A kunn-kutu nɛ̂n tə̂, tarɛ̂ to tokə baann ang. 9M-pa marəse: Bbo dɛnɛ̂n dda kaya ang ddəm a ngawɛ̂je tubbɛ̂ ngaâ taa marɛ̂ a, dingaw le dda lo-to-majang.»
10 Njê-njaje goe tə̂ le paje nan: «Bbo to tokə baann a, taa dɛnɛ̂n ang â maji.» 11Jeju ilade tə̂ nan: «Dəwje tɔyn a kasəje ta ndiki tə̂ kə tar nəənn ang, njê kə̂ Lubba arəde singa ta karə ndikije tə̂ bba. 12Marə nɛ̂nje nya ɔkuje ddəw dingawje karə mbɔnje naan kə dɛnɛ̂n. Marɛ̂je duju nɛ̂n de to kuju tokə baann, a marɛ̂je dɔkude ddəwe mba n̂-ddade to enukuje, a marɛ̂je dede njaa n̂-ddaje rɔde to enukuje mba Bbe-kɔn kə̂ darâ. Dəw kə̂ asə ta ndiki tə̂ kə tar nəənn a, maji karə n̂-ndiki tə̂.»
Jeju taa ngannje kə̂ mbatə kə rɔɛ̂ tə̂
13Dəwje ddeeje kə ngannje rɔ Jeju tə̂ karə nila jia dɔde tə̂, ta n̂-duju Lubba dɔde tə̂. Njê-njaje go Jeju tə̂ le aw inje kə dəwje le. 14A Jeju pa arəde nan: «Inyaje ngannje kə̂ mbatə arəje ddeeje rɔm tə̂ bbo ɔkujede ddəw ang. Mba Bbe-kɔn kə̂ darâ to mba dəwje kə̂ toje tokə dede.» 15Nila jia dɔde tə̂ ngaâ nɔtu lo tə̂ənn.
Tar lə basan kə̂ to nje-nɛ̂n-kinga
16Marə dingaw ddee duju Jeju nan: «Nje-nɛ̂n-tɔju, ddi kə̂ maji â mâ dda bba ta kinga nɛ̂n təbbə kə̂ to kə ndɔ kə ndɔ wa?» 17Jeju ilɛ̂ tə̂ nan: «Mba ddi bba ə-dujum ta gərə nɛ̂n kə̂ maji wa? Lubba kâra baa â maji. Bbo ə-ndiki ta kinga təbbə a, ə-dda nɛ̂n kə turu nduje lə Lubba.» 18Basan le təl duju Jeju nan: «Nduje kə̂ dda wa?» Jeju ilɛ̂ tə̂ nan: «Ə-tɔl dəw ang, ə-dda lo-to-majang ang, ə-bboko ang, ɔru naji ngəm dɔ dəw tə̂ ang. 19Ə-bbəəl bɔije kə kɔinje. Ə-ndiki nje-mari tokə da-rɔi njaa.» 20Basan le ilɛ̂ tə̂ nan: «M-ngəm ndujeenn tɔyn mban. Ddi â dum bbay wa?» 21Jeju ilɛ̂ tə̂ nan: «Bbo ə-ndiki ta ddee maji tɔyn a, aw labbə nɛ̂nje kə̂ inga ta ə-kayn narɛ̂ dangətəje a, â kinga dam narɛ darâ. Goe tə̂ a, ə-ddee unn gom!» 22Basan le oo tar le a, rɔɛ̂ nəəle ang ngaâ ɔtu mba nɛ̂n-kingaje laa banya nya.
23 Jeju pa arə njê-njaje goe tə̂ nan: «Tɔkɔrɔ, m-pa marəse, a to ngəng nya kə nje-nɛ̂n-kinga karə andə Bbe-kɔn tə̂ kə̂ darâ. 24M-təl m-pa marəse bbay, ta karə jambal andə buwa suwa tə̂ ngəng ang wa? Yeenn a, a ngəng nya karə nje-nɛ̂n-kinga andə Bbe-kɔn tə̂ lə Lubba.» 25Tar le dum dɔ njê-njaje go Jeju tə̂ le ngaâ paje nan: «Bbo baann a, nân bba a kasə kinga kaji wa?» 26Jeju aade ngaâ pa arəde nan: «Nɛ̂ɛnn, to nɛ̂n kə̂ nya dəwje. A Lubba asə ta dda nɛ̂n tɔyn.» 27Piyɛr pa arɛ̂ nan: «Oo, jinya nɛ̂nje tɔyn, a junn goi. Tar kə̂ dɔje tə̂ a to tokə baânn wa?» 28Jeju pa arəde nan: «M-pa tar kə̂ tɔkɔrɔ marəse, ndɔ kə̂ nɛ̂nje tɔyn a turuje tokə siki, kar tə̂ kə̂ Ngonn lə dəw a kisi ngende-mbay tə̂ kə̂ to nɛ̂n-piti, sese kə̂ unnje gom kara â kisije dɔ ngende-mbayje tə̂ dɔku gire joo, mba gangə sariya dɔ gəl-kuju ngann Ijarayɛlje tə̂ kə̂ dɔku gire joo tɔ. 29A dəwje tɔyn kə̂ inyaje kəy ləde, ngakɔnde kə̂ dingaw kə ngakɔnde kə̂ dɛnɛ̂n, bɔdede kə kɔndede, ngannde wase ndɔɔje ləde mbam, dâ kinga nɛ̂n gɔl dɔdɔku uta yeje kə̂ kete ddəm dâ kinga təbbə kə̂ to kə ndɔ kə ndɔ ddəm. 30Nya lə dəwje kə̂ toje to dəwje kə̂ dɔngɔr bbasinɛn nəənn, a toje to dəwje kə̂ dɔ guku. A nya lə dəwje kə̂ dɔ guku bbasinɛn nəənn, a toje to dəwje kə̂ dɔngɔr.»
Dewis Presennol:
Matiye 19: KabbaDkS
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2020, ACOTBA