LUCAS 4
4
Edosiquiaa Jesosa queamimishi epomeejji nisho a-ajjacapoa
(Mt 4.1-11; Mc 1.12-13)
1Majoya aje Jesosa Jordán cueisahuajo Edojjoshahuapame yamijji nequi Edojjoshahuapameya oya dojocapoa se-ejjama' meshijabohuasijje. 2-3Cuama aniya Jesosa 40 cahuime huiso epojja, meca pea-ai ijjiaijjiajjimanei aniapoa. Jamajjeya 40 cahuime huiso bobima'tii animajje oya queashoenee poani jjabaquiapoa. Majotii o anijoya edosiquiana Jesosa queamimishi pomeeya nisho jjanequichipiquiapoa oque. Ohuaya Jesosa jama acapoa ba'a: —Miya e'ejojonei Eyacuiñajjija Bacuaejjanei poani jjabaquimajje jiquio ani meicuana pahui pojji acue.—
4Jesosaa oya saja-acapoa jama ba'a: —¡Chojja de! Eyacuiñajjija esohui etehue jaa jama poani ba'a: “Dejjacuana caca oe bobijoneitii pojjeama eshe ba'ecapoquiani.”—
5Majoya aje edosiquiaa Jesosa dojosohuaquicapoa eyiyojamacoo quea-aonee nequiyasijje. Majo nequiya edosiquiaa Jesosa ojjaña meshicuana ecuiña se-ejjajji, ojjaña aquianacuana pea-ai bameejeyocapoa queapamenee queaquemonee ani. 6Ojjaña meshicuana bameejeyomajje edosiquiaa jama acapoa oya ba'a: —Ojjaña jiquio miya baña huisotii eyaya miya quiaje. Ojjaña meshi, ojjaña meshijo ani equicuana, aquianacuana pea-ai queaca'anee queapamenee ecuea poani. Yahuajoneinei eyaya jiquio jjeshe'yapoa. Jamajjeya ecueaneitii poani. Cua miya baña huisotii eyaya quiasa-amajje quiaje ecueajojoya. 7Jamajjeya ecuioshajjajo nequimajje e bihuiajji ojjaña jiquio miya baña huisotii miquea poaje.—
8Jesosaa oya saja-acapoa jama ba'a: —¡Chojja de! Eyacuiñajjija esohui etehue jaa jama poani pea ba'a: “Emeshimesenei, mique Eyacuiñajji oya oenei ecuioshajjajo nequiya bihuiapoquiacue, ojoneitii jjashajja-ajjaquipoquicue.”—
9Majoya aje edosiquiaa Jesosa dojocapoa Jerusalén meshiyasijje. Ohuaya Jesosa dojosohuaquicapoa Eyacuiñajjija equi-aijamacoo quea-aonee aniyasijje. Majo nequiya edosiquiaa Jesosa jama acapoa ba'a: —Miya e'ejojonei Eyacuiñajjija Bacuaejjanei poani jjabaquimajje jiquiojo nequi tohua'yocue meshiyasijje. 10-11Eyacuiñajjija esohui etehue jaa jama poani ba'a:
“Eyacuiñajjiya oja angelcuana huoojeacuajicaje mi jaahuananeineiya.
Miya oqueajo iñacajjequije angelcuaa oja emeya.
Jamajjeya miya emano'yojji pojjeama poaje.
Miya ejjajeojjiquecuasajaquijji pojjeama poaje joya anica meicuanajo che bisonei cuanama'.”—
12Jesosaa oya saja-acapoa jama ba'a: —Eyacuiñajjija esohui etehue jaa jama poani pea ba'a: “A'a Eyacuiñajji queaca'aneetii poani ebajji, a'a ohuaya jaahuanacaje ebajji, ¡a'a Eyacuiñajji miquea Emeshimesenei jama ajji!”—
13Majoya aje edosiquiaa Jesosa queaca'aneetii nequi ojo queamimishi mijjapomeequiajo oya jiñaca'yapoa so'o.
Jesosaa oja echacojji acoocapoa provincia Galilea meshijo nequiya
(Mt 4.12-17; Mc 1.14-15)
14Majoya aje Jesosa provincia Galilea meshiyasijje poe'yapoa Edojjoshahuapame yamijjitii queaca'anee nequi. Ojjaña ma meshichipineijo ba'ecacuana queahuiso mimimimiapoa ojo. 15Jesosa ojjaña provincia Galilea meshiyasijjeyee poquinequiapoa. Cua o poquije meshicuanahuasijje Jesosaa judiocuanaja equi-aicuana ejjachichaquijjiyasijje nequiya sohuihuohuicapoquiapoa cuana. Jamajjeya queahuisocuaa oya bihuiacapoa.
Jesosa Nazaret meshiyasijje poquio'oyapoa
(Mt 13.53-58; Mc 6.1-6)
16Majoya Jesosa poquio'oyapoa pueblo Nazaret meshiyasijje, ma o tiiapoa meshiyasijje. Ojjaña ejomishocajji sábado epojjajo Jesosa poquinequiapoa judiocuanaja ejjachichaquijji equi-ai anicahuasijje. Jamajjeya ejomishocajji epojjajo Nazaret meshijo nequi oya nobiquiapoa judioja ejjachichaquijji equi-ai aniyasijje. Ma equi-aijo ani oya nequisohuapoa Eyacuiñajjija esohui etehue jaa ajji. 17Isaías Eyacuiñajjija esohuihuohuijji poaja tehue, ma ohuaya yahuajonei tehuecapoa esohuiya esohuijaahuanajji dejjaa Jesosa quiacapoa ojaya eajji. Jamajjeya esohui papenijo jaa pichojjojjomajje Jesosaa acapoa ma esohui etehue jaa jama ba'a:
18“Emeshimeseneija Edojjoshahuapame ecue yamidojjojo nequi.
Ohuaya eya babacacanaje oja esohui queapame ehuohuipoquiajji aema'cuana.
Eya babacacanaje ejeanobia jaacacuana ehuohuipoquiajji o cuayaqui'yojjijo,
cojjama'cuana jjabameequi'yojjijo,
queacamajanee ba'ecacuana nahue'yojjijo pea-ai.
19Eya babacacanaje ojjañajaajjicuana huohuipoquiajji epojji
jiquio eshequiajajo Eyacuiñajjiya ojjañacuana queapamenee acaje.”
Mahuisojoya esohui acapoa.
20Majoya aje Jesosaa esohui ajeyomajje papeni bebo'yomajje esohuijaahuanajji dejja quiaca'yapoa. Majoya oya anioque'yapoa. Ojjaña majo anicacuaaya ishoa-ajjacapoa Jesosa yajja poanijje ma esohui oja ehuohuijji nisho. Jamajjeya oya Jesosa baneineicapoa cuaa. 21Majotii aniya aje Jesosaa huohuicapoa cuana jama ba'a: —Jjeyanei jiquio pojjajotii jiquio Eyacuiñajjija esohui etehue jaa miquiaa shajja-ajjanaje esohuiya apoa ejo, eyaya maya ajeyopoquiaña— jamaya huohuicapoa Jesosaa.
22Majo anicacuana Jesosajo queapamenee mimimimicapoa. Oja huohui esohui queapameneejo jjabaneineiquiapoa ojaya queabotinee poajojoya. Jamajjeya majo anicacuana jjahuohuiajjaquiapoa oopana jama ba'a: —¿Achajjajo ohuaya ma esohui ajeyocaje? Oya caca Joseja bacuaejja poani.—
23Jesosaa saja-acapoa cuana jama ba'a: —Miquiaaya pojja'a esohuiquepenei aje eya jama ba'a: “Eshicuijjibajji, miyatii jjashicuiquicue.” Jama mimimeya quiana poani dejjaja ajjima'neinei ecuea jiquiojo ecueanei meshijo nequiya eajjijo ma ecua eyaya pueblo Capernaúm meshijo nequiya anaje jama pea-aiya.—
24Jesosaa huohuipea-aicapoa cuana jama ba'a: —E'ejojonei esohui huohuiaña. Chama'nei esohuihuohuijji oja meshineiyasijje poe'yajo onijjejaajjicuanaja oya queapamenee eja'ajjequi'yojji. 25Yahuajonei Elías dejja esohuihuohuijji eshe nequiahuajo ojjaña meshiyasijje ba'ecacuana bobima'neinei pocapoa, queashoeneenee. Tres y medio shequiajame huiso ena po'yojjimatii poa. Ma shequiaja Israel meshijo queahuisonee eahuemano'yocuana anicapoa. 26Jamatii Eyacuiñajjija Elías majo ani eahuemano'yocuana aniyasijje huoojeajjima poa. Oya ca huoojeacapoa oe epona eahuemano'yo Sareptacuiñajji aniyasijje, ciudad Sidón meshipejjeneijo ba'e. 27Yahuajonei pea-ai Eliseo dejja esohuihuohuijji eshe nequiahuajo queahuiso Israelcuiñajjicuana queamanonee jaacapoa lepra emanomeejjijo. Jamatii Eliseoja Israelcuiñajji dejja che oema'nei jjajeameequi'yojjima poa. Ohuaya oenei dejja peajaajji Siriacuiñajji Naamán bajjani jjajeameequica'yapoa leprajo maya oenei.— Jamaya Jesosaa huohuicapoa cuana.
28Majoya Jesosa esohui jama huohuime poani shajja-ajjamajje queaquenenee pocuajicananapoa ojjaña judiocuanaja equi-ai ejjachichaquijjijo anicacuana Jesosanijje. 29Jamajjeya Jesosa iñaca'ajeamajje oya dojocuayaquicapoa cuaa equicuana ojee ani iyehueshahuasijje. Macuiñajjicuanaja equicuana eyiyoiyeao nequi aniapoa. Majoya Jesosa dojocuayaquicapoa cuaa eyiyocueihue quea-aonee nequiyasijje o jeaoqueajeaa nisho emanojea'yojji. 30Jamatii Jesosa ona ejjachichaqui nequijjetii jjayejjequimajje poquiapoa, macuanaja oya jeaoqueajeajjimatii.
Dejja eshahuamase yamijji poa
(Mc 1.21-28)
31Majoya aje Jesosa provincia Galilea, pueblo Capernaúm meshiyasijje poquio'oyapoa. Ojjaña ejomishocajji sábado epojjajotii ohuaya sohuihuohuicapoquiapoa cuana. 32Jesosaa queaja'anee esohui huohuicani shajja-ajjamajje majo ejjachichaqui anicacuana jjabaneineiquicapoa ojo. Jama poa ojo ba'a: —Ohuaya Jesosaa queaja'aneenee esohui huohuicani pea esohuihuohuijjicuaa jama pojjeama, ojaya ebaneinei.—
33Majoya aje dejja eshahuamase yamijji judiocuanaja equi-ai ejjachichaquijjijo ani taaapoa janobajjimanei jama ba'a: 34—Jesosa Nazaretcuiñajji dejja, ¡poqui'yocue miya! ¿Ajeo acuae mi ecuananijje ani? ¿A'a mi ecuana chama'yotii pojeamee'yohua poeyanaje? Ecuea miya ebanei. Miya Eyacuiñajjija huoojea e'ejojonei queapamenee poani mimishima'nei.—
35Majoya Jesosaa eshahuamase tecueacapoa jama ba'a: —¡A'a mimijji! ¡Cuayaqui'yocue miya coma dejjaja eyamijo nequi!—
Jesosa jama pojeahuajotii eshahuamaseya ma dejja niñepoquimeecao'oyapoa ojjaña majo anicacuanaja ecojjaneijo. Majoya oya cuayaqui'yapoa oja dejja queanee pomeejjimanei. 36Jesosaa dejja jama aca'yonaje bamajje ojjañacuana jjabaneineiquiapoa ojo. Jama mimime poa cuana ojo ba'a: —¡Oya queasohuipojaneenee! Emeshimeseya peacuana huoojeacani jama ohuaya queaca'aneeya huohuicani. Jamajjeya ohuaya eshahuamasecuana dejjaja eyamijo nequi huoojeacuayaca'yani.—
37Jamajjeya ojjaña ma meshijo ba'ecacuaa shajja-ajjacuajicapoa Jesosajo ma ohua dejja shahuamase yamima'yo pomeecanajejo.
Jesosaa Pedroja eanomese huoecameeca'yapoa
(Mt 8.14-15; Mc 1.29-31)
38Majoya aje Jesosa judioja equi-ai ejjachichaquijjijo ani cuayaqui'yomajje nobiquiapoa Simonja equiyasijje. Ma equijoya Simonja eanomese queaquiyoneenee jaapoa. Jamajjeya Jesosa huohuiajjacapoa majo ba'ecacuaa o huoecamee'yojjijo. 39Majoya Jesosa jjacuiajaanaquimajje o jaahuasijje mimiapoa o huoecamee'yojji. O jama mimime pojeahuajo oya huoecanana'yapoa, yejjecananapoa quiyohua. Majoya aje Pedroja anohua nequisohuanana'yomajje ma oque poecuana bobiacapoa.
Jesosaa queahuisonee emanocuana jja-ajameequica'yapoa
(Mt 8.16-17; Mc 1.32-34)
40Ma pojjajotii eshequi oquequianijo queahuiso emano jaacuana yecapoa oja huapa pojjeamacuaa Jesosaque. Jesosaa ma onaja ye emano jaacuanaja eyamibiajje oja eme ohua huanacajo jja-ajaquica'yapoa cuana ojjañatii. 41Eshahuamase yamijjicuana queahuiso yecajo, Jesosaa eshahuamase huoojeacuayajeaca'yapoa oja yamijo nequi. Eshahuamase queahuisocuana Jesosajo taaapoa jama ba'a: —¡Miya Eyacuiñajjija Bacuaejja!—
Jamajjeya Jesosaa oya tecueacapoa o mimima' epojjijo. Ojaya eshahuamaseja ebatii poa oya Eyacuiñajjija huoojea e'ejojonei poani.
Jesosaa sohuihuohuicapoquiapoa cuana judiocuanaja equi-ai ejjachichaquijji queahuiso anicajo nequiya
(Mc 1.35-39)
42Majoya aje mecajjeahuanei jjapojjaquianijo Jesosa shequimajje poquiapoa se-ejjama' meshiyasijje. Queahuisocuaa Jesosa sa-ajjanei'yomajje oya baca'yapoa. Majotii onijjetii Jesosa animeesa-acapoa cuaa, oya poqui'yojjima epojji. 43Jesosaa ca huohuicapoa cuana jama ba'a: —Eyaya peacuiñajjicuana esohui queapame ma Eyacuiñajjiya ojjañacuana huoojeacapoquianitii esohui huohuiquisa-aña pea-ai. Majoya eya Eyacuiñajjiya jiquio meshiyasijje huoojeacapoa queahuisocuana sohuihuohuipoquiajji epojji.—
44Jamajjeya Jesosa provincia Galilea meshijo nequiya sohuihuohuicanequiapoa cuana judiocuanaja equi-ai ejjachichaquijji anicuanajo nequiya.
Dewis Presennol:
LUCAS 4: ESE
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Copyright Mision Nuevas Tribus, 2006