LUCAS 3
3
Juan se-ejjama' meshijo nequi
(Mt 3.1-12; Mc 1.1-8; Jn 1.19-28)
1Queashequiajahuisonee Roma dejja etii poani Tiberio bajjani ojjaña oja meshijo ba'ecacuana huoojeapoquiajji popoquiapoa. Ohuaya 15 shequiajame huiso etii nequiya pea dejjacuana nequimeecapoa oja ma meshicuiñajjicuana huoojeapoquiajji epojji jama ba'a: Poncio Pilato Judeacuiñajjicuana huoojeapoquiajji poa oja nequimee. Herodes ca Galileacuiñajjicuana huoojeapoquiajji poa oja nequimee. Oja dohue Felipe ca Itureacuiñajjicuana, Traconitecuiñajjicuana pea-ai huoojeapoquiajji poa oja nequimee. Lisanias ca Abiliniacuiñajjicuana huoojeapoquiajji poa oja nequimee. 2Anás, Caifás pea-ai Jerusalén meshijo nequiapoa Eyacuiñajjija equi-aijo echacochacopoquijji ebionei etii poani. Majoya aje ma shequiajajo Eyacuiñajjiya Juan, Zacariasja bacuaejja, esohui oja ehuohuijji quiacapoa oya se-ejjama' meshijo nequi. 3Jamajjeya Juanya ojjaña Jordán cueichipineijo ba'ecacuana Eyacuiñajjija esohui huohuicapoquiapoa. Jama huohuime cuana acapoa ba'a: —Pea jjashahuabaquime oe po'yocue miquianaja mimishijo. Eyacuiñajjinijje mimicue miquianaja mimishi cuijea'yojjijo. Majoya oe jjaiñajeanobiameequicue enaojjohuasijje ojjañaja ebajji miquiana pea jjashahuabaquime po'yonaje miquianaja mimishicuanajo.— 4Jamaya Juanya esohui huohuicanequiapoa cuana ma ecua Isaiasya, esohuihuohuijji poa dejjaa yahuajonei tehuecapoa jayojja. Isaiasya yahuajonei tehuecapoa esohui ojo jama ba'a:
—Oe dejja se-ejjama' meshijo nequi taaamajamajanequije ojjañacuanaja eshajja-ajjajji.
Jama ponequije ba'a:
“Jjashahuabaquicue quiana oe Emeshimesenei poejjijo.
Apoa pocue jiquio ecua ejeojji queapojjenee epijajinei chacome acani cuaa pea poejji,
jamaya oe pocue ojo queaja'a ejjashahuabaqui'yojji.
5Jiquio ecua ojjaña pejjapejja ohuajeyocani,
ojjaña emacoao aa-ama pomeecani,
ejeojji queacohuii jaa epijajinei pomeecani,
quecuapojjecani pea-ai queapojje epojji
jama jayojja pea-ai jjashahuabaquime pocue quiana Emeshimesenei poejjijo.
6Ojjañajaajjicuaa Eyacuiñajjija huoojea ojjaña nahue'yojji poani bacaje.”—
Jama tehuemeya acapoa Isaiasya yahuajonei.
7Queahuisocuana poecapoa Juanque jjaiñajeanobiameequiya. Jamajjeya Juanya tecueacapoa cuana jama ba'a: —Miquianaya peyo quease'nee jama. Jjashahuabaquiani jjaiñajeanobiameequimajje Eyacuiñajjija quiana queanee epomee'yojji pojjeama poso poaje miquianaja mimishijo. Chojja, jama pojjeama. 8Miquianaya ca oe queaja'anee ba'epoquicue joya ecua dejja e'ejojonei pea jjashahuabaquime po'yani oja mimishijo jama pea-aiya. Majoya quiana e'ejojonei poani bacaje cuaa. Miquianaya caca queaquehua jjashahuabaquiani jama ba'a: “Eyacuiñajjija eseya queaneenee epomee'yojji pojjeamatii poaje eseya Abrahamja osecuanei poanijojoya.” Eyaya quiana pea esohui huohuije. Eyacuiñajjiya jiquiojo ani meicuana Abrahamaja osecuacuana epojji pomeeca'yome oya jama sapomajje. 9Eyacuiñajjiya queaneenee pomeecaje'yo cuana oja mimishijo. Jiquio ecua dejjacuaa acui ebana mijjajjajo, jajajeaca'yani quijje edahuajea'yojji jama pea-aiya Eyacuiñajjiya acaje'yo cuana ojjaña joya queamimishitii ba'epoquinaje.— Jama tecueameya Juanya acapoa janobajjimanei.
10Majoya aje Juan huohuiajjacapoa cuaa jama ba'a: —¿Yajja ecuana pocajji pea jjashahuabaquime ecuanaja mimishijo po'yonaje peacuanaja ebajji?—
11Juanya saja-acapoa cuana jama ba'a: —Joya daqui beca poaniya, ojaya oe daqui quiacajji joya daquima' ani. Joya bobijjiya pea bobima'cuana ba'e oja bobi quiacajji.—
12Majoya aje pea judío dejjacuana poeapoa Juanque jjaiñajeanobiameequiya. Macuana Roma emeshimeseja yajji bejjo chichapoquiajji poa. Jama huohuiajjacapoa cuaa Juan ba'a: —¿Yajja ecuana pocajji pea jjashahuabaquime ecuanaja mimishijo po'yonaje peacuanaja ebajji?—
13Juanya saja-acapoa cuana jama ba'a: —Mahuisotii bejjo chichapoquiacue emeshimeseja esohui etehue huisojotii. A'a bejjo queahuiso jjeshejji ca miquianajanei yajji.—
14Majoya soldadocuaa pea-aiya Juan huohuiajjacapoa jama ba'a: —Ecuana pea-ai, ¿yajja ecuana pocajji pea jjashahuabaquime ecuanaja mimishijo po'yonaje peacuanaja ebajji?—
Ohuaya saja-acapoa jama ba'a: —A'a queamase pojji peacuananijje oja aquianacuana jjeshe'yojjijo. A'a siajje pojji peacuana queanee pomeejjijo, oja bejjo jjeshe'yojjijo pea-ai. Queabihui pocue miquianaja chaco sosejje bejjojo, mahuiso bejjojotiiya— jamaya saja-acapoa cuana.
15Ma meshijo queahuiso dejjacuana, eponacuana Quito Eyacuiñajjija huoojeajo e'ejojonei jjaishoaquitiipoquiapoa. Jamajjeya jjashahuabaquicapoa cuana jama ba'a: —¿A'a pojja'a quioya Quito Eyacuiñajjija huoojea poeyanaje?—
16Jamajjeya Juanya huohuicapoa cuana ja'anei jama ba'a: —Chojja ca iña, eya maya pojjeama. Eyaya e'ejojonei quiana enaojjojonei iñajeanobiaña. Pea dejjaa ma quijje equishishi poejeya ca quiana ca oe Edojjoshahuapame yamijji pomeecaje. Peacuana ca queaneeneetii eponequi'yojji ohuaya huoojeacaje'yo Cuaqui-aiyasijje. Oya ca ma quijje poeje queaca'aneetii poaje jiquio ecua eya nequi quiajja pojjeama. Jamajjeya eya jjabaquiani queapame pojjeama ojo echacochacopoquijji oya queapameneenee poanijojoya. 17Ohuaya huohuicaje'yo ache queamimishi poanaje ache queapame jiquio ecua dejjaa anosoaiso' shajeacani eso' queapame oopana echicha'yojji jama pea-ai acaje'yo. Anosoaiso' iyachichaca'yani equiyasijje. Eshaa ca dahuajeacani cuaquiyasijje. Jama pea-aiya ohuaya acaje'yo dejjacuana queamimishi, eponacuana pea-ai. Ohuaya huoojeanobiameecaje'yo cuana Cuaqui-aiyasijje, ma quijjo'yoajja jaa Cuaqui-aiyasijje queaneeneetii eponequi'yojji.—
18Jamaya Juanya queahuiso Eyacuiñajjija esohui queapame ma oque jjachichaquicapoa cuana huohuicanequiapoa. 19Ohuaya emeshimese Herodes ja'anei huohuicapoa oya queamimishi poani oja dohueja ehuanase Herodías bajjani ohua huanaca'yonajejojoya. Oya queamimishi ba'epoquianijo pea-ai huohuicapoa Juanya. 20Majoya aje Herodesya queamimishica'aneetii nequiya Juan jeanobiameequicapoa ejjajeanobiaquijji equiyasijje.
Juanya Jesosa iñajeanobiapea-aicapoa
(Mt 3.13-17; Mc 1.9-11)
21Juanya peacuana iñajeanobiacaquijotiiya aje Jesosa pea-aiya jjaiñajeanobiameequiapoa. Majotii nequi Jesosa Eyacuiñajjinijje mimiquijo eyatahuatahua jjaca'apejoquiapoa. 22Majoya aje Eyacuiñajjija Edojjoshahuapame huia' jayojja cuabesaoqueapoa oja yamibiajje aniñaa. Oe Eyajo nequi mimiani shajja-ajjacapoa cuaa jama ba'a: —Miya ecue Bacuaejja ecuea queajeanee, eya mijo queabihuinee poani.—
Jesosaja etiiquianaja ebajjanicuana
(Mt 1.1-17)
23Jesosaa 30 shequiajame huiso etii nequiya esohui ohuaya huohuicoocapoa cuana. Jesosa Joseja bacuaejjanei poso acapoa. José Elija bacuaejja poa. 24Elí Matatja bacuaejja poa. Matat Levija bacuaejja poa. Leví Melquija bacuaejja poa. Melquí Janaja bacuaejja poa. Jana Joseja bacuaejja poa. 25José Matatiasja bacuaejja poa. Matatías Amosja bacuaejja poa. Amós Nahumja bacuaejja poa. Nahúm Eslija bacuaejja poa. Esli Nagaija bacuaejja poa. 26Nagai Maatja bacuaejja poa. Maat Matatiasja bacuaejja poa. Matatías Semeija bacuaejja poa. Semeí Josecja bacuaejja poa. Josec Judaja bacuaejja poa. 27Judá Joananja bacuaejja poa. Joanán Resaja bacuaejja poa. Resa Zorobabelja bacuaejja poa. Zorobabel Salatielja bacuaejja poa. Salatiel Nerija bacuaejja poa. 28Nerí Melquija bacuaejja poa. Melquí Adija bacuaejja poa. Adí Cosamja bacuaejja poa. Cosam Elmadamja bacuaejja poa. Elmadam Erja bacuaejja poa. 29Er Jesusja bacuaejja poa. Jesús Eliezerja bacuaejja poa. Eliezer Jorimja bacuaejja poa. Jorim Matatja bacuaejja poa. 30Matat Levija bacuaejja poa. Leví Simeonja bacuaejja poa. Simeón Judaja bacuaejja poa. Judá Joseja bacuaejja poa. José Jonamja bacuaejja poa. Jonam Eliaquimja bacuaejja poa. 31Eliaquim Meleaja bacuaejja poa. Meleá Menaja bacuaejja poa. Mená Matataja bacuaejja poa. Matatá Natanja bacuaejja poa. 32Natán Davidja bacuaejja poa. David Isaija bacuaejja poa. Isaí Obedja bacuaejja poa. Obed Boozja bacuaejja poa. Booz Salaja bacuaejja poa. Sala Naasonja bacuaejja poa. 33Naasón Aminadabja bacuaejja poa. Aminadab Adminja bacuaejja poa. Admín Arnija bacuaejja poa. Arní Esromja bacuaejja poa. Esrom Faresja bacuaejja poa. Fares Judaja bacuaejja poa. 34Judá Jacobja bacuaejja poa. Jacob Isaacja bacuaejja poa. Isaac Abrahamja bacuaejja poa. Abraham Tareja bacuaejja poa. Taré Nacorja bacuaejja poa. 35Nacor Serugja bacuaejja poa. Serug Ragauja bacuaejja poa. Ragau Pelegja bacuaejja poa. Peleg Heberja bacuaejja poa. Heber Salaja bacuaejja poa. 36Sala Cainanja bacuaejja poa. Cainán Arfaxadja bacuaejja poa. Arfaxad Semja bacuaejja poa. Sem Noeja bacuaejja poa. Noé Lamecja bacuaejja poa. 37Lamec Matusalenja bacuaejja poa. Matusalén Enocja bacuaejja poa. Enoc Jaredja bacuaejja poa. Jared Mahalaleelja bacuaejja poa. Mahalaleel Cainanja bacuaejja poa. 38Cainán Enosja bacuaejja poa. Enós Setja bacuaejja poa. Set Adanja bacuaejja poa. Adán Eyacuiñajjija bacuaejja poa.
Dewis Presennol:
LUCAS 3: ESE
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Copyright Mision Nuevas Tribus, 2006