LUCAS 23
23
Emeshimese Pilatohua Jesosa a'a queamimishi poani ebajji huohuiajjacapoa
(Mt 27.1-2,11-14; Mc 15.1-5; Jn 18.28-38)
1Majoya aje ojjaña etii poanicuaa nequisohua'yomajje Jesosa dojomeecapoa emeshimese Pilatoque, Pilatoja oya a'a queamimishi poani ehuohuiajjajji. 2Majoya Pilatoque poquimajje oya jama huohuime acapoa cuaa ba'a: —Ecuaa jiquio dejja queatai mimiani shajja-ajjanaje. Ohuaya queahuiso ecuananijjejaajji queaquehuaneenee jjashahuabaquimeecani. Jama acanaje ba'a: “A'a Roma emeshimeseja yajji bejjo quiajji.” Jamaya acanaje pea-ai ba'a: “Eya Quito, Eyacuiñajjija huoojeanei miquianaja emeshimese epojji.”— Jama huohuimeya acañaquiapoa cuaa Jesosajo.
3Jamajjeya Pilatohua oya Jesosa huohuiajjacapoa jama ba'a: —¿A'a miya judiocuanaja emeshimese poani?—
Jesosaa saja-acapoa jama ba'a: —E'e, joya ecua miya huohuiajjanaje jama pea-aiya eya poani.—
4Majotii nequiya Pilatohua Eyacuiñajjija equi-aijo chacochacopoquiani etii poanicuana, queahuisonee ejjachichaqui anicacuana pea-ai huohuicapoa jama ba'a: —Ecuea oya bajjimanei ache oja mimishijo shai oya queanee ameecajji, ¡chama'!—
5Jamatii judío etii poanicuaa Pilato huohuineitiicapoa jama ba'a: —Esohui ohua queatainee huohuicajje ojjaña jiquio provincia Judea meshijo ba'eca shajjama' poani Roma emeshimeseja esohuijo. Ebionei ohuaya esohui huohuicoocanaje provincia Galilea meshijo nequiya. Majoya oya esohuitiiya queatai huohuicapoquianitii jjeya jiquiacua.—
Herodesya Jesosa a'a queamimishi poani ebajji huohuiajjapea-aicapoa
6Majoya judío etii poanicuanaja esohui shajja-ajjamajje Pilatohua huohuiajjacapoa cuana jama ba'a: —¿A'a jiquio dejja Galileacuiñajji poani?— 7Jesosa Galileacuiñajji poani bamajje Pilatohua oya Herodes dejja etii nequiyasijje huoojeacapoa Herodes Galileacuiñajjicuana huoojeapoquiajji poanijojoya. Oya Herodes Antipas bajjani Jerusalén meshiyasijje iyehuiso cahuime epoe aniapoa.#23.7 Nota: Jiquio Herodes Antipas bajjani dejja Ebionei Herodes bajjanija ebacua poa. Coma Ebionei Herodesya Jesosa cuayapoajo Belencuiñajjicuanaja ebacua dejjasho'ineicuana ojjaña quecuameejeyoca'yapoa.* 8Majoya Jesosa oque yecaje bamajje Herodes queabihuinee poa, queacahuihuisonee oya Jesosa basapoanajejjejojoya. Queahuisocuaa esohui Jesosajo huohuicani shajja-ajjacapoquinaje ohuaya, jamajjeya dejjaja ajjima'neinei a'a ohua acaje ebajji onijje mimisapoa. 9Jesosa oque yecajo Herodesya queahuisonee oya huohuiajjacapoa. Jamatii oya Jesosaa saja-ajjimanei acapoa. 10Majotii nequiya Eyacuiñajjija equi-aijo chacochacopoquiani etii poanicuaa, Moisesja tehuehuohuijjicuaa ma Jesosa Herodesque yejjicuaa pea-ai Jesosa queamimishinee poani huohuineineicanequiapoa janobajjimanei. 11Jamajjeya Herodesya oja soldadocuaa pea-ai Jesosa peajja poso amajje oya soadojocapoa. Majoya Jesosa daqui queanahuenee huoshomeecapoa oya onaja emeshimese nisho eajji, esoadojojji. Majoya aje Herodesya Jesosa Pilatoque huoojeacao'oyapoa huacuaya. 12Yahuajo Pilatoja Herodes botiamanei poa. Herodesja Pilato botiamanei pea-ai poa. Majoya Jesosa Herodesque yecanaje pojjajotii oya Pilatonijje jjapeequiapoa.
Pilatohua esohui tehuecapoa Jesosa manomee'yojji acui ecuiata'apeejo
(Mt 27.15-26; Mc 15.6-15; Jn 18.39—19.16)
13Majoya Pilatohua jjachichaquimeecapoa Eyacuiñajjija equi-aijo chacochacopoquiani etii poanicuana, pea judío etii poanicuana, pea Jerusalencuiñajjicuana pea-ai oque. 14Pilatohua jama huohuime acapoa cuana ba'a: —Miquiaaya jiquio dejja eque yemeenaje. Ohuaya shajjama' pomeecani cuana miquiaaya aña. Majoya eyaya oya huohuiajjaneinaje miquiana cojjaneijo nequiya. Jiquio miquiaaya huohuiaña oya queamimishinee poani caca oe ecuea oja mimishi bajjimaneinei. 15Herodesja oja mimishi bajjimaneinei pea-ai poani, jamajjeya ohuaya Jesosa eque huoojeacao'oyanaje. Jamajjeya oya bacue quiaa, chama'neinei oja mimishi o manomee'yojji. 16Jamajjeya eyaya oya daasa cuiasejjajeameeje jjono ejeapashajjajja sa' queashejjijjiya. Majoya oya pichojeameeje'yo epoqui'yojji— jamaya Pilato poa.
17Ojjaña shequiaja judiocuanaja fiesta eshahuaba'yojji ma yahuajonei Eyacuiñajjiya judío etiiquianaja bacuacuana nahuecapoajo poe'yajo, Pilatohua oe judiocuanaja babaca dejja ejeanobia ani huoojeacuayameecapoqui'yapoa. 18Pilatohua Jesosa huoojeacuayameecaje'yo huohuicajje ma Pilatoque ejjachichaqui nequicacuana taaacanequiapoa ojee jama ba'a: —¡Chojja! Coma dejja ca camanoqui'yahua. Barrabás oe huoojeacuayamee'yocue epoqui'yojji— jamaya poa cuana.
19Roma etii poanicuaa Barrabás bajjani dejja jeanobiacapoa ohua Jerusalén meshijo nequica queahuisocuana ojee romano soldadocuananijje jjaquecuaquimeecanajejojoya, ohua pea dejja quecuaca'yonajejojoya. 20Majoya Pilatohua Jesosa ehuoojeacuayamee'yojjijo nisho huohuiajjacao'oyapoa cuana. 21Jamatii ojjaña majo ejjachichaqui nequicacuana janobajjimanei taaacanequiapoatii jama ba'a: —¡Oya acui ecuiata'apeejo me cacajeameecue emano'yojji! ¡Oya acui ecuiata'apeejo me cacajeameecue emano'yojji!—
22Pilatohua oya esohuiya huohuiajjacao'oyapoa cuana jama ba'a: —¿Ajeo shai, ache oja mimishijo shai oya manomeeca'yojji? Oja mimishi chama'neinei o manomee'yojji. Jamajjeya eyaya oya daasa cuiasejjameeje jjono ejeapashajjajja sa' queashejjijjiya. Majoya huoojeacuayameeje'yo.—
23-24Jamatii ojjaña majo ejjachichaqui nequicacuana janobajjimanei taaacanequiatiiapoa queashajjaquijjoneenee jama ba'a: —Oya acui ecuiata'apeejo me cacajeameecue emano'yojji.— Jamajjeya Pilatohua tehuecapoa Jesosa manomee'yojji ona queahuisonee janobajjimanei taaamajamajacaquijojoya. 25Majoya Pilatohua Barrabás judiocuanaja babaca, ejeanobia ani, huoojeacuayameeca'yapoa. Oya ejeanobia aniapoa ohua Jerusalén meshijo nequica queahuisocuana ojee romano soldadocuananijje jjaquecuaquimeecanajejojoya, ohua pea dejja quecuaca'yonajejojoya. Majoya Pilatohua ma ojo ejjachichaqui nequicaja esohui Jesosa manomee'yojjijo shajja-ajjamajje oya soldadocuana quiacapoa.
Jesosa ba'ehuanasohuajeacapoa cuaa acui ecuiata'apeejo emano'yojji
(Mt 27.32-44; Mc 15.21-32; Jn 19.17-27)
26Majoya aje soldadocuaa Jesosa ejeojjijje queahuesha dojocaniya emanomee'yojji, oe dejja Simón bajjani ejeojjijje poeje bacapoa. Oya Simón Cirenecuiñajji dejja Jerusalén meshijo nequiapoa. Jamajjeya soldadocuaa Simón acui Jesosa me cacajeajji abomeecapoa Jesosaquiquishijji edojojji.
27Queahuisoneecuana, eponacuana pea-ai Jesosaquiquishijji poquiapoa. Eponacuana Jesosajo queayenoneenee paneineipoquiapoa iñapacapoquiapoa pea-ai janobajjimanei. 28Jamajjeya Jesosaa jjabajeaquimajje eponacuana huohuicapoa jama ba'a: —Jerusalencuiñajji eponacuana, a'a jja oe ejo pajji. Miquianajo, miquianaja bacuacuanajo pea-ai caca oe queayenonee pocue. 29Eyaya miquiana e'ejojonei huohuiaña, epojjacuana queacamajanee epo'yojji poeajo jama huohuime acaje cuaa ba'a: “Queabihuinee pocue cuana joya jjamejoquiajjatii poani eponacuana, joya oja bacua ecuaya chama'nei, joya oja bacua chama'nei etiimeejji pea-ai oja bacua queaneenee epojji pojjeama poajejojoya” jama poaje cuana. 30Ma epojjacuana queacamajanee epo'yojji poeajo macuiñajjicuana taaacaje jama ba'a: “¡Eyiyocuana, oquecue ecuanabiajje ecuana jja-aniquehuaquijji, ecuana jjaqueyaquijji!” jama poaje cuana. 31Jjeya oe dejja jamatii oja mimishi chama'nei nequi queaneenee aca'yani cuaa. Quijje ca ojjaña queamimishineecuana queaneeneetii nequije'yo, jiquio ecua dejja oja mimishi chama'nei nequi queaneenee aca'yani jama pojjeama, macuana queaneeneetii poaje'yo.— Jama huohuimeya eponacuana Jesosaa acapoa.
32Soldadocuaa beca dejja queamimishinee dojopea-aicapoa me cacajeaa acui ecuiata'apeejo ba'e manomee'yohua ojee Jesosapejjejotii. 33Majoya aje eyiyoiyeao “Sapajjii anijji meshi” bajjaniyasijje bañaquimajje, Jesosa acui ecuiata'apeejo me cacajeacapoa cuaa, oja jeojjijje pea-ai. Ma beca dejja queamimishinee pea-ai pea acui ecuiata'apeejo me cacajeapea-aicapoa cuaa oja jeojjijje pea-ai Jesosa ba'epejjejotii. Oe oja ebañeimijijje, pea ca oja shanimijijje ba'ehuanasohuacapoa cuaa. 34Majoya Jesosaa acui ecuiata'apeejo ba'e oja Chiinijje mimiapoa jama ba'a: —Ecue Chii, jiquio ejjachichaqui anicacuanaja mimishi cuijea'yocue jiquio eya manomeeca'yani ojaya bajjimaneijojoya.—
Majoya aje soldadocuaa hue'ecapoa ebajji aya Jesosaja daquicuana jjeshecaje'yo. 35Majotii nequiya Jesosa bacanequiapoa cuaa, etii poanicuaa pea-aiya. Jama soadojome oya acanequiapoa cuaa ba'a: —Ohuaya peacuana nahuecapoquinaje. Jamajjeya oya e'ejojonei Quito, Eyacuiñajjija huoojeanei ojjaña nahue'yojji epojji, Eyacuiñajjija babaca poani jjabaquimajje oyaneitii cajjanahuequi'yahua o mano'yojjijo.—
36Soldadocuaa soadojopea-aicapoa Jesosa. Majoya ohuaya uvajjajjana' queasesepase taposisijo jeasohuamajje oja nabachipineiyasijje Jesosa ishiajjameecapoa. 37Ma soldadocuaa huohuicapoa jama ba'a: —Miya e'ejojonei judiocuanaja emeshimese poanijo, ¡miyaneitii jjanahuequi'yocue emano'yo poanijje!—
38Jesosa sapa ba'e biacuapishana acuisisijo etehue jaapoa jama ba'a: —Jiquio dejja judiocuanaja emeshimese poani.—
39Majoya aje oe dejja queamimishinee ma onijje acui ecuiata'apeejo ba'eya Jesosa niñebacapoa jama ba'a: —Miya e'ejojonei Quito, Eyacuiñajjija huoojea ojjaña nahue'yojji poani jjabaquimajje miyanei jjanahuequi'yocue, ecuana pea-ai nahue'yocue emano'yo poanijje.—
40Majoya ma peamijijje dejja queamimishinee onijje acui ecuiata'apeejo ba'eya oya niñeshea-ajjacapoa jama ba'a: —¿A'a acuae miya meteama Eyacuiñajjijo? Eseya Jesosa jayojja pea-ai acui ecuiata'apeejo manomeeca'yani cuaa. 41Eseya queaneenee manopoqui'yani queamimishinee poanajejjejojoya, ma sosejjeya. Eseja mimishijo eseya manomeeca'yojji acui ecuiata'apeejo ba'e. Jiquio dejjaja caca oe oja mimishi chama'neinei o manomee'yojji.—
42Maneitii ohuaya Jesosa huohuicapoa jama ba'a: —Jesosa, eya shahuaba'yocue miya ojjañacuana huoojeapoquiajjitii nequi'yomajjeya.—
43Jesosaa oya saja-acapoa jama ba'a: —E'ejojonei eyaya miya huohuiaña, jiquio pojjajotii miya enijjetii nequije'yo meshi queapameneenee Eyahuasijje.—
Jesosa mano'yapoa
(Mt 27.45-56; Mc 15.33-41; Jn 19.28-30)
44Majoya aje eshequi biacojjajjanei nequijo ojjaña meshiyasijje quea-aaponee ponanapoa. Majoya quijje sinecuanei a las tres jjaja'aqui'yapoa. 45Ma sinecua quea-aapotii nequijo daquimoo, equecuayijjijji'ya Eyacuiñajjija equi-aijo ba'e, oyatii beca pea-ai epojji jjaisajeananaquiapoa meshiyasijjeyee. 46Majoya aje Jesosa janobajjimanei taaapoa Eyacuiñajjijo jama ba'a: —Ecue Chii, ecuea Edojjoshahua eyaya miya quiaña miquea e jaahuanajji.— Majoya Jesosa taaasajeamajje mano'yapoa, chama'yotii poa.
47Majotii nequiya soldadohuohuijji poani capitanya Jesosa manoje'yo bamajje, Eyacuiñajji bihuiacapoa. Jama acapoa ba'a: —E'ejojonei jiquio dejjaja mimishi chama'nei poanaje o manomee'yojji.—
48Ojjaña majo ejjachichaqui nequicacuaa Jesosa manoje'yo bamajje queayenoneenee poquije'yohua ese'o cuiaqueyacapoqui'yapoa o yenojo. 49Jesosaja epeejjicuana, eponacuana pea-ai joya provincia Galilea meshijje Jesosanijje poe ca queahueshapishana aniya Jesosa baca-aniapoa, poqui'yojjima poa so'o ca oma.
Jesosa huananobiacapoa cuaa meijjaniyasijje
(Mt 27.57-61; Mc 15.42-47; Jn 19.38-42)
50-51Oe dejja queapame, queajjashahuabaquija'a nequi José bajjani poa. Oya Arimateacuiñajji poa. Pueblo Arimatea meshi provincia Judea meshijo aniapoa. Ohuaya ishoacanequiapoa Eyacuiñajji ojjañacuana huoojeapoquiajjitii poani acheshono poeje o'oya. Oya judío etii poanicuana Junta Suprema bajjanicuananijje nequipea-aiapoa, jamatii José oya jayojja pea-ai jjashahuabaquime pojjeama poa Jesosa manomee'yojjijo. 52Ma dejja Joseya Pilatoque poquimajje Jesosaja eyami huohuiajjacapoa ehuananobiajji meijjaniyasijje. 53Pilatohua e'e oya acajje Jesosaja yami ohuaya jjequioqueameeca'yapoa. Majoya Joseya daquiosheai eyacuaneiya Jesosa bebocapoa. Oya bebomajje Joseya huananobiameecapoa meijjani ejajapejjahuasijje. Ma meijjani eyacua jaa poa, pea emano'yocuana huananobiajji ajjima'nei poa. 54Ma epojja sinepoquianijo judiocuana epojja sábado ejomishocajji mecahuajje epojjijo jja-aquicapoa.
55Eponacuana ma provincia Galilea meshijo ani Jesosanijje poecuana, poquiapoa meijjani baa, achajja Jesosaja eyami huananobiacanaje meijjaniyasijje baa. 56Majoya equiyasijje poqui'yomajje eponacuaa shiyeshiye quijje Jesosa yami shajji apoa acañaqui'yapoa. Majoya ejomishocajji sábado epojjajo eponacuana jomishocapoa ma ecua Moisesya yahuajonei tehuecapoa esohui jayojja.
Dewis Presennol:
LUCAS 23: ESE
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Copyright Mision Nuevas Tribus, 2006