LUCAS 14
14
Jesosaa oe dejja eyami shejjee'yo shacuashacuameeca'yapoa
1Majoya aje oe ejomishocajji sábado epojjajo Jesosa poquiapoa oe fariseo etii poanija equiyasijje onijje ijjiaijjiaa. Pea fariseocuana ca jjajaadojoquinequiapoa Jesosajo ae o poaje ebajji. 2Majotii pea-ai Jesosa cojjaneijo oe dejja eyami shejjee'yo aniapoa. 3Jamajjeya Jesosaa Moisesja tehuehuohuijji poanicuana, fariseocuana huohuiajjacapoa jama ba'a: —¿A'a queapame ejomishocajji sábado epojjajotii dejja queamano poani jja-ajameequica'yojji, a'a jja-ajameequica'yoajja pojja'a?—
4Jamatii fariseo dejjacuana, pea etii poanicuana pea-ai Jesosa saja-ajjimatii aniapoa. Majoya Jesosaa dejja eyami shejjee'yo napamajje oja emeya oya shacuashacuameeca'yapoa, oya queapame ponana'yapoa. Majoya oya acapoa jama ba'a: —Poqui'yocue miquea equiyasijje.—
5Majotii nequiya aje Jesosaa fariseo dejjacuana, pea etii poanicuana pea-ai huohuiajjacapoa jama ba'a: —Miquianaja bacua jjaniyasijje oqueajo, mique macayahue pojja'a oqueajo, ¿a'a miquiaaya oya jjequisohuacuajije'yo jamatii ejomishocajji epojja poanijotii? ¡E'e poquije quiana!—
6Ojaya esohui shajja-ajjamajje yajja saja-ame yajji etii poanicuana jjabaquiapoa.
Jesosaa huohuicapoa esohui ebameesahuajji eiyaacuana bobi ojee ijjiajjijo
7Jesosaa baneicapoa ma fariseoja iyaacuana bobi ijjiaa oja equiyasijje poeje. Oja iyaacuana poemajje oyatii anioquenaje equii-anijji queapamenee nequijo jamatii equimeseja oya huohuijjima. Jamajjeya Jesosaa niñesheacapoa cuana jama ba'a: 8—Miquiana dejja jjahuanaquije baa bobi ijjiaa equiyasijje nobiquimajje, a'a jamatii anioqueñajji equii-anijji queapamenee nequiyasijje dejja jjahuanaquijechipineiyasijje. Pea oja iyaa miya jama pojjeama ojaya epeejjinei, etii poani pojja'a poepea-aije majo eanioqueñajji. 9Majoya miquiana iyaajji poanaje dejjaa poeje mi huohuiya jama ba'a: “Jiquio equii-anijji o aniñajji poanaje, mi anijji pojjeama. Oya mique ejjocojo jjeya anioqueje.” Majoya miya nequisohuamajje queabicho poquije queahuesha oe-ejjenei equii-anijji nequiyasijje ani'yohua. 10Jamajjeya miya iyaacajo, equiyasijje nobiquimajje dejja jjahuanaquije queahueshanee anioquequicue oe-ejjenei equii-anijji nequiyasijje. Majoya ma miya iyaacanaje dejja poeje mi huohuiya jama ba'a: “Epeejji, poecue jiquiacua equii-anijji queapamenee nequiyasijje dejja jjahuanaquijechipineiyasijje.” Majoya minijje ma mesajo anicacuaa esohui queapame mijo acani shajja-ajjacaje. 11Joya oyaneitii queaca'anee jjabaquiani dejja, comaya Eyacuiñajjiya ca'a-ama pomeecaje. Pea ca joya oyaneitii ca'a-ama jjabaquiani dejja, comaya Eyacuiñajjiya queaca'anee pomeecaje.—
Jesosaa huohuicapoa esohui ebameesahuajji bobi queahuiso ojee eijjiajjijo
12Jesosaa ebobimesecuana huohuipea-aicapoa jama ba'a: —Fiesta bobi ijjiajji ojee queahuisonee bobi apoa ameemajje, noe dahuajeyomeemajje, a'a iyaajji miquea epeejjicuana, mique dohuecuana, mique huapa pojjeamacuana, mipejjejo ba'ecacuana, dejjacuana quea-aquianahuisonee pea-ai a'a iyaajji. Macuaaya miya oja equiyasijje iyaapea-aicaje quijje esosejje oja bobi ijjiaa. 13Miyaya bobi queahuisonee apoa ameemajje, noe dahuajeyomeemajje ojee eijjiajji ca iyaacue aema'cuana, jeojjihuojjacuana, jeoajjacuana, cojjama'cuana pea-ai. 14Majoya miya queabihui poaje jamatii miyaya oya iyaanaje, esosejje pojjeama. Ojaya equiyasijje bobi queahuiso ijjiapea-aiya miya iyaajjima poaje comajaya. Jamajjeya Eyacuiñajjiya miya sosequiacaje ojjaña oja mimishima'yo epocuana emano'yo jaa shequimeecaje'yo epojja poeajo— huohuicapoa Jesosaa.
Esohui ebameesahuajji fiesta ejjahuanaquijjijo huohuipea-aicapoa Jesosaa
(Mt 22.1-10)
15Jesosaa esohui jama huohuicaje shajja-ajjamajje oe dejjaa oja mesapejjejo aniya Jesosa huohuicapoa jama ba'a: —¡Ojjaña joya nobiquijecuana Eyacuiñajjiya ojjañacuana huoojeacapoquianitii meshi Eyahuasijje bobi ojee ijjiaa queahuiso peacuananijje queabihuinee capo'yahua!—
16Majoya aje Jesosaa esohui ebameesahuajjijo huohuicapoa jama ba'a: —Oe dejjaa bobi queahuisonee apoa ameecaje, noe dahuajeyomeecaje ojee eijjiajji. Jamajjeya ohuaya ojo chacochacoani dejja huoojeacanaje queahuisocuana huohuiya bobi ijjiahuajji ojee. 17Majoya quijjepishana ojjaña bobi apoa'ya ani bamajje ebobimeseya ojo chacochacoani dejja huoojeacao'oyanaje ojjaña oja iyaacuana huohuiya jama ba'a: “Poecue, ojjaña bobi jjeya apoa'ya ani eijjiajji, noe edahua apoa'ya pea-ai.” 18Jamatii oja iyaacuana poesapo-ajja poanaje oja bobi ojee ijjiaa. Ebionei oja iyaa dejjaa esohui acanaje jama ba'a: “Jjeyanei eyaya meshi jjeshenaje, ma meshiya eya baquisa-aña. A'a enijje che queaquene pojji acue e oque mipoeajo.” 19Pea oja iyaa dejjaa ca esohui jama acanaje ba'a: “Eyaya 10 macayahue jjeshenaje ecue meshi chacopoquiajji, jamajjeya eya poquije so'o ecue meshi maca chacomeeya. A'a enijje che queaquene pojji acue e oque mipoeajo.” 20Pea oja iyaa dejjaa ca esohui jama acanaje ba'a: “Eya jjeyanei jjahuanaquinaje, jamajjeya eya epoejji pojjeama oque ijjiaijjiaa.” 21Jamajjeya ojo chacochacoani dejjaa poe'yomajje ebobimese dejja huohuicaña'yonaje yajjajje shai mipoeani cuana oque ojee ijjiaijjiaa. Oja esohui shajja-ajjamajje ebobimese dejja queaquenenee poanaje. Jamajjeya ojo chacochacoani dejja huohuicanaje jama ba'a: “Jjeyahuanei poquicue ciudadhuasijje majo ba'eca ejeojjiaijje, ejeojjisisijje pea-ai aema'cuana, jeojjihuojjacuana, jeoajjacuana, cojjama'cuana pea-ai ecuea bobi ojee eijjiajji iyaaa.” 22Quijjepishana ojo chacochacoani dejjaa oya huohuicaña'yonaje jama ba'a: “Ecuea etii, eyaya miquea esohui huohuiquinaje, apoa anaje. Jamatii peacuana anijji yani so'o ejjoco.” 23Jamajjeya ebobimese dejjaa ojo chacochacoani dejja huohuicao'oyanaje jama ba'a: “Queahuesha huohuiquicue ejjaba'echejjequi ba'eca ejeojjijo ecuea equiyasijje epoejji bobi ojee ijjiaa. Poeneineimeecue cuana ecue equi cuiojji. 24Eyaya huohuiaña che oema'neinei ma eyaya ebionei iyaameenaje cuana nobije ecue bobi ijjiaa.” Mahuisoya ebobimese dejjaa huohuicanaje.—
Queacamaja Jesosa Quito shajja-ajjajji epojji
(Mt 10.37-38)
25Queahuisoneeneecuaa Jesosa equijje acapoquiapoa, jamajjeya Jesosaa oque jjabajeaquimajje huohuicapoa cuana jama ba'a: 26—Shajja-ajjacue, dejjacuaa e shajja-ajjajji posapoaniya oja chii queajeapishana acajji ojaya eya queajeaneenee poanijojoya. Oja nae, oja huanase, oja bacuacuana, oja dohuecuana, oja jjo'icuana, ojaya eyami pea-ai queajeapishana acajji ojaya eya queajeaneenee poanijojoya. Joya eya queajeapishana ajji poanicuana e shajja-ajjajji pojjeama poaje. 27Ojjaña joya queanee posapo-ajja poanicuana ejo, jiquio ecua dejja acui ecuiata'apee o manomeecaje'yo meshiyasijje abosapo-ajja poani jayojja, comaya ca e shajja-ajjajji epojji pojjeama poaje. Ojjaña joya eya jayojja pea-ai jjashahuabaquime posapo-ajja poanicuana ca e shajja-ajjajji epojji pojjeama poaje. 28Pea esohui ebameesahuajji huohuije jama ba'a: Miquiaaya equi-aoao iyasohuasa-amajje, ¿a'a jamatii iyacuajije ache sosehuiso poaje eiyajeyojji bajjimajo? Chojja. Ebionei anioquemajje tehueje ache sosehuiso poaje ojjaña aquianacuana jjeshejji equi-aoao iyasohuajeyojji. Mahuiso miquea bejjo echicha bamajje equi-aoao iyaje. 29Peacuaa pojja'a equi-aoao jamatii iyasohuasa-acaje bejjo ojjañatii eiyajeyojji bajjimahuajo. Majoya quijje equi-ao-ao iyasohuapishanamajje chacochacopajeaje'yo bejjo eiyajeyojji chamajo. Jamajjeya ma equi-aoao eiyasohuapishana ejeana'yo nequi bamajje, soadojocaje cuaa ma dejja equi-aoao eiyasohua-aoajjajji poanaje. 30Jama poaje cuana ojo ba'a: “Joya dejjaa equi-aoao iyasohua-ajjacanaje, jamatii ojaya iyajeyojjima poanaje.” 31Pea esohui ebameesahuajji huohuipea-aije jama ba'a: Oe emeshimese pea emeshimesenijje jjaquecuaquisapomajje oja meshi nahuejo, ¿a'a jamatii oja soldadocuana sicojjimatii huoojeacame? Chojja. Ebionei oya anioquemajje jjashahuabaquije ojaya soldadocuana 10 mil huisome, a'a queaca'a poaje ejjaquecuaquijji pea emeshimeseja soldadocuananijje 20 mil huisonijjeya. 32Ma emeshimeseya ojaya soldadocuana, 10 mil huisome, oepojji nequi bacaje 20 mil huisome soldadocuananijje ejjaquecuaquijji. Jamajjeya pea emeshimese ma onijje ejjaquecuaquijji poaje queahueshatii nequijo ohuaya huoojeacaje dejja oque o jjabeimeequi'yohua, onijje jjaquecuaquijjima epojji. 33Oya jayojja miya jjashahuabaneiquicue e shajja-ajjajjitii epojjijo. Miya e shajja-ajjajjitii posapomajje mique aquianacuanajo jjashahuabapajeaquica'yojji.—
Jesosaa huohuicapoa sane jjaseseamaquianijo
(Mt 5.13; Mc 9.50)
34—Sane queapamenee poani bobi shicuijji. Jamatii sane jjaseseamaquiajo, ¿achajja queapame bobi shicuijji po-o'oyame? Achajjapishana. 35Peajja po'yani seseama pomajje, meshicuana queapame pomeejji pea-ai pojjeama poaje. Ebanacuana pohuameesahuajji peajja po'yani jjaseseamaquimajje. Jeajeacajji. Jamajjeya cua shajja-ajjasapoaniya jiquio esohui shajja-ajjaneicue.—
Dewis Presennol:
LUCAS 14: ESE
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Copyright Mision Nuevas Tribus, 2006