LUCAS 13
13
Pea jjashahuabaquime poca'yojji miquianaja mimishijo
1Jesosa esohui huohuipoequijotii Galileacuiñajjicuana quecuameeca'yonaje bajji poanajecuana majotii ejjachichaqui anipea-aiapoa. Jesosa huohuicapoa cuaa jama ba'a: —Emeshimese Pilatohua Galileacuiñajji dejjacuana quecuameeca'yonaje ehuone enaa jehui'yo Eyacuiñajji quiapoequijo. Jamajjeya ma dejjacuanaja ena' cuayaqui'yonaje ehuonecuanaja enatejjeehua'.—
2Jama poaje shajja-ajjamajje Jesosaa huohuiajjacapoa cuana jama ba'a: —Miquiana jjashahuabaquiani joya Galileacuiñajji dejjacuana jjeya mano'yonaje oya queamimishica'anee poanajejjejojoya. Pea onijjejaajji queamimishipishana poanijojoya miquecuameeca'yonaje. 3¡Chojja de! majo pojjeama, miquianaya pea-ai manoje'yo pea jjashahuabaquime mipo'yomajje miquianaja mimishijo. 4Jjashahuabaquicue ma 18 israelita dejjacuanajo Jerusalén meshijo Siloé meshibisoneimijijje ba'e cuiaca'yonajejo equi quea-aonee nequiya jaabichaqui'yomajje. Miquiana jjashahuabaquiani ma dejjacuana queamimishica'a poanijojoya cuiaca'yonaje equi-aiya. Pea onijjejaajjicuana queamimishipishana poanijojoya micuiaca'yonaje. 5¡Chojja de! majo pojjeama. Jamajjeya miquianaya pea-ai manoje'yo pea jjashahuabaquime mipo'yomajje miquianaja mimishijo.—
Jesosaa esohui ebameesahuajji huohuipea-aicapoa acui higo jjajjama' nequijo
6Jesosaa pea esohui ebameesahuajjijo huohuicapoa cuana jama ba'a: —Oe dejjaja higo acui ebana oja quejo nequinaje. Jamajjeya oya poquinaje a'a oja higo jjajjanaje ba-ajjaa. Ma higo acui jjajjama'neinei nequi bacanaje. 7Jamajjeya ohuaya oja quejaahuanajji poani dejja huohuicanaje jama ba'a: “Eya tres shequiajame huiso poemajamajanequiani jiquiacua higo acui a'a oya jjajjanaje ba-ajjaa. Jjajja-ajjatii baña. Jamajjeya jajajea'yocue. ¿Apiojji jiquio higo acui jamatii nequije, jjajja-ajja?” 8Majoya aje oja quejaahuanajji poani dejjaa oya huohuicanaje jama ba'a: “Equemese, che jiquio eshequiajajo higo acui canequisahua. Eyaya meshi o nequiquibopejjejo jajachajjaje, macaja see iyaje o quibojo o jjajjameejji. 9Majoya pojja'a queapame jjajjaje. Majo mijjajjajo ca miyaya jajajeameeje'yo”.— Jama huohuimeya acapoa.
Jesosaa oe epona eshahuamase yamijji ani quea-aja pomeeca'yapoa ejomishocajji epojjajotii
10Majoya aje oe ejomishocajji sábado epojjajotii Jesosaa judiocuanaja equi-ai ejjachichaquijjijo aniya esohui huohuica-aniapoa cuana. 11Majo anipea-aiapoa oe epona eshahuamase yamijji. Dieciocho shequiajame huisotii eshahuamaseya oya epi nequisohuameejjimatii acapoquiapoa, ejjamo'aaqui'yotii oya animeecapoquiapoa. 12Jesosaa epona jama bamajje oya iyaacapoa oque epoejji. Oya poeajo Jesosaa jama acapoa ba'a: —Miquea eyami queapame pomee'yonaje, she. Epinei mi jjeya poaequije'yo.—
13Majoya Jesosaa epona oja emeya napacajeahuajo oya epi nequinana'yapoa, jjamo'piqui'yapoa. Jamajjeya ohuaya Eyacuiñajji bihuiacapoa. 14Jesosaa epona ejomishocajji sábado epojjajotii jja-ajameequica'yonaje bamajje ma judioja equi-ai ejjachichaquijji jaahuanajji etii poani dejja queaquenenee poa Jesosanijje. Jamajjeya ohuaya huohuicapoa majo ejjachichaqui anicacuana jama ba'a: —Seis cahuime huiso epojjajo chacochacocapoquijji. Ejomishocajji epojjajo ca chacochacoca-ajja. Joya queamano poani caca oe poecue jja-ajameequi'yohua ma seis epojja echacochacojjijotii. A'a majo poejji ejomishocajji epojjajotii.—
15Oya jama acajo Emeshimesenei Jesosaa tecueacapoa cuana jama ba'a: —Eyacuiñajjija epeejjinisho jja quiana coma, ¿a'a miquiaaya macayahuecuana, mapichisho'icuana pichojeaña ejomishocajji sábado epojjajo ena ishiya edojojji? E'e, pichojeaña. 16Bacue, ebionei eshahua Satanás eshahuameseya jiquio epona, Abrahamja osecua ejjamo'aaquitii, ejeyo'yo jayojja animeecapoquinaje queashequiajahuisonee, 18 shequiajame huiso. ¿A'a oya queapame pomeeca'yoajja jiquio ecua ejeyo'yo ani pichojeaca'yoajja jama acajji ejomishocajji epojja poanijojoya? Chojja, oya queapame pomeeca'yojji jamatii ejomishocajji epojjajo.—
17Jesosaa esohui jama huohuime acajje o botiamanei poanicuana queabicho pocapoa, peacuana ca queabihuinee poa Jesosaa dejjaja ajjima'neinei ohua acaje bamajje.
Jesosaa huohuipea-aicapoa cuana pea esohui ebameesahuajji mostaza eso'bisoneijo
(Mt 13.31-32; Mc 4.30-32)
18Jesosaa huohuipea-aicacuanapoa pea esohui jama ba'a: —¿Ae jayojja poani ma quijje Eyacuiñajjiya ojjaña huoojeacapoquianitiijo? Eyaya miquiana esohui ebameesahuajji huohuije miquianaja queaja'a ebajji ae jayojja poani. 19Eyacuiñajjiya ojjañacuana huoojeacapoquianitii jama poani ba'a: ma ecua dejjaa oenei eso' mostaza bajjani banacanaje oja quejo jamaya. Majoya pohua'yomajje queaquemonee tii-aonaje, pea acuicuana jama pojjeama. Jamajojoya aje cuichojjicuana anioquequiani oja aajo eja iyajji, ejomishocajji pea-ai.—
Jesosaa huohuitiicapoa pea esohui ebameesahuajji pahui shejjeemeejjijo
(Mt 13.33)
20Jesosaa huohuipea-aicapoa cuana jama ba'a: —¿Ae jayojja poani Eyacuiñajjiya ojjañacuana huoojeacapoquianitiijo? Pea esohui ebameesahuajjijo miquianaja queaja'a ebajji huohuije. 21Jama poaje ba'a: Jiquio ecua pahui shejjeemeejji poani jamaya. Eponaa oepojjinei pahui shejjeemeejji iyacani harina queahuiso aniyasijje pahui yajji. Jamatiiya oepojjineiya ojjaña harina eiñahuahuo ani shejjeemeejeyocani— jama huohuimeya acapoa cuana.
Jesosaa huohuicapoa pea esohui ebameesahuajji esecuejjanibisonei jayojjajo
(Mt 7.13-14,21-23)
22Majoya aje Jesosaa Jerusalén meshiyasijje ejeojjijje poquijeya sohuihuohuicanequiapoa queahuiso pueblojo ba'eca, queahuiso aldeajo ba'eca pea-ai. 23Jesosa esohui huohuipoequitii oe dejjaa oya huohuiajjacapoa jama ba'a: —Emeshimesenei, ¿a'a che oepojjineicuana Eyacuiñajjiya nahuecaje'yo?—
Jesosaa oya saja-acapoa jama ba'a: 24—Jamatii queacamajanee poanijo, nobicue esecuejjanibisoneijje. Eyaya quiana huohuiaña, queahuisoneecuana enobijji nisho po-ajjajo ijjianasicaje, jamajjeya nobijjimatii poaje cuana. 25Quijje equimeseya equidojjojo nequiya esecuejjani ca'acaje'yo. Miquianaya ca esecuejo taaamajamajanequije jama ba'a: “Emeshimesenei, esecuejjani che ca'apejocue ecuana nobiquijji.” Majoya ohuaya saja-acaje jama ba'a: “Ecuea miquianaya bajjimanei, achejje poe shai quiana.” 26Majoya miquianaya jama poneineije ba'a: “Ecuana minijje ijjiaijjianaje, enabiquia pea-ai ishinaje ojeeya. Ecuanaja equiquibocuanajo nequiya miyaya esohui huohuinaje.” 27Jamatii ohuaya saja-acaje cuana jama ba'a: “Ecuea miquianaya bajjima achejje poe shai. ¡Miquianaya queamimishinee jamajje queahueshatii nequi'yocue ejo!” 28Eyacuiñajjiya ojjaña huoojeacapoquianitii meshi Eyahuasijje Abraham, Isaac, Jacob, ojjaña pea Eyacuiñajjija esohuihuohuijji poacuana enobiqui'yo nequi baje quiaa. Majoya queayenoneenee paneineije, ese' ijjiayaije'yo pea-ai queaquenenee poaniyajjejojo ejeajea quea-ohueshatii enequi'yojji jjabaquimajje. 29Ojjaña peajaajjicuana queahuisonee poecaje. Poecaje eeno poeanimijijje ba'eca, eeno poquianimijijje ba'eca, eshequi jaasohuanimijijje ba'eca, eshequi oquequianimijijje ba'eca pea-ai. Queahuisoneecuana poecaje Eyacuiñajjiya ojjaña huoojeacapoquianitii meshi Eyahuasijje fiestajo bobi ojee ijjiaa eanioque aniya. 30Majoya becacuana joya ca'a-ama bacani cuaa, oe-ejjenei nequi jayojja, comacuanaya ma pojjajotiiya Eyacuiñajjiya ebionei ehuijo nequimeecaje. Peacuana ca queaca'anee jjabaquiani ehuijo nequi ma pojjajotiiya Eyacuiñajjiya comacuanaya oe-ejjenei nequimeecaje.—
Jesosa queayenonee poa Jerusalencuiñajjicuanajo
(Mt 23.37-39)
31Majo esohui huohuipoequiya fariseo dejjacuaa Jesosa huohuicapoa jama ba'a: —Jjeyahuanei emeshimese Herodesya miya quecuamee'yosa-acani. Jamajjeya poquicuajicue pea meshiyasijje.—
32Jesosaa oya saja-acapoa jama ba'a: —Miquiaa huohuiquicue emeshimese Herodes, peacuana dasiajji poani dejjaya jama ba'a: “Jesosaa miya jama acani ba'a: Bacue, jjeya jiquio pojjajo, mecahuajje pea-ai eyaya eshahuamase peacuanaja eyamijo nequi huoojeacuayajeaje'yo, emanocuana jja-ajaquimeeje'yo pea-ai. Majoya ma mecahuajje eya apoa poaje, ecuea echacojjicuana ajeyoje'yo.” Jama huohuime añaquicue oya Herodes.— 33Majoya Jesosaa huohuitiicapoa majo ejjachichaqui anicuana jama ba'a: —Eya Jerusalén meshiyasijje ejeojjijje poquiani jiquio pojjajo, mecahuajje pea-ai. Majoya ma mecahuajje Jerusalén meshi bañaquije. Queahuiso Eyacuiñajjija esohuihuohuijji poacuana Jerusalén meshijotii manocapoqui'yapoa, eya majo pea-ai manoje'yo Jerusalén meshijotii.
34—Jerusalencuiñajjicuaa, miquiaaya Eyacuiñajjija esohuihuohuijji poacuana cuiapoqui'yapoa. Oja huoojeacuana esohui yejji poa jajahuejjajea'yapoa quiaa. Eyaya quiana iyaa-ajjamajamajapoquianaje ejo ejjanahuemeequi'yojji nisho. Jiquio ecua cachinaa oja bacuacuana iyaaca'yani oja aaquimejjejje enequijji jama pea-ai epojji nisho quiana eyaya a-ajjamajamajanaje. Miquianaya ca poesapo-ajjatii poanaje eque. 35Bacue, jjeya miquianaja meshi miquiana anijji poani se-ejjama'yo poaje. Eyacuiñajjija miquianaya eba'emeesahuajji pojjeama poaje. Eyaya quiana esohui jama huohuime aña jjeya eya miquiaaya bapajeaje'yo so'o. Quijjepishana esohui ejo jama huohuime aje quiaa ba'a: “Emeshimesenei Eyacuiñajjiya queapamenee ca-acapoquiahua oja huoojea ese nahue'yojji poani.” Esohui ejo jama amajje eya baje o'oya quiaa— jama huohuime acapoa cuana Jesosaa.
Dewis Presennol:
LUCAS 13: ESE
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Copyright Mision Nuevas Tribus, 2006