JUAN 20
20
Jesosa emano'yo jaa shequi'yapoa
(Mt 28.1-10; Mc 16.1-8; Lc 24.1-12)
1Majoya aje quijje epojja domingojo mecajjeahuanei quea-aapojotii María Magdalena poquiapoa meijjani jaahuasijje. Mei-ai meijjani enaba cuiaca'ajji'ya enequiashiña ani bacañaquiapoa ohuaya. 2Majoya mei-ai jama nequi bamajje María huacuaya cuajicuajipoqui'yapoa Simón Pedro nequiyasijje, pea Jesosa shajja-ajjajji, ma Jesosaja queajeanee poanaje dejja nequiyasijje pea-ai o huohuiya. Jama huohuime eponaa oya acañaquiapoa ba'a: —Emeshimeseneija oja eyami meijjanijo jaa dojoca'yonaje cuaa. Chama'. Bajjima achacua shai oja yami huananobiaca'yonaje cuaa.—
3Jamajjeya Pedro, pea Jesosa shajja-ajjajji poanaje dejja pea-ai poquicuajinanapoa meijjani jaahuasijje. 4Becatii ojee cuajicuajipoquiapoa. Oe dejja queacuejipashinee cuajicuajipoquiapoa, jamajjeya ohuaya Pedro jiñayeecapoa. Ohuaya meijjani ebionei bacoocañaquiapoa. 5Ohuaya meijjani bañaquimajje yeeajjacapoa ebajji. Jesosa bebojji'ya daquioshe ani bacañaquiapoa. Oya ca nobiquijjima nequiñaquiapoa so'o. 6Majoya aje Pedrohua meijjani bapea-aicañaquiapoa oquiquishijji poquijeya. Pedro ca nobiquiñaquiapoa meijjanidojjohuasijjeyee. Ohuaya daquioshe bapea-aicañaquiapoa. 7Pedrohua daqui ma Jesosa sapa bebojji'ya, pea daqui o yami bebojji'ya ojee pojjeama ani bacapoa. Jesosa sapa bebojji'ya eiyacocua'yo ani bacapoa pea-ai. 8Majoya pea Jesosa shajja-ajjajji poanaje dejja, ma ebionei meijjani bañaquijji poanajeya, nobipea-aiquiapoa. Ma Pedrohua bacanaje huisotiiya bapea-aicapoa. Jamajjeya Jesosa e'ejojonei shequi'yonajejo jjashahuabaquiapoa. 9Jamatii ma beca dejjaja queaquehuatii poa so'o ma yahuajo Eyacuiñajjija esohui tehuecapoa cuaa Jesosajo jama ba'a: “Jesosa emano'yo jaa shequije'yo.” Ma esohuiya ojaya queaquehuatii poa. 10Majoya ma beca Jesosa shajja-ajjajji poanaje dejja poqui'yapoa oja equiyasijje.
Jesosa jjabameequi'yapoa María Magdalenajo
(Mc 16.9-11)
11María poqui'yojjimatii ani meijjani esecuepejjejo pa-aniapoa. Majoya oya pa-anitii jjacuiajaanaquiapoa meijjaniyiye yeeajjajji. 12Ohuaya beca ángel daquioshejji Jesosaja eyami ehuananobia jaanajejo ani bacapoa. Oe o sapa jaanajejje aniapoa, pea o jeojji jaanajejje aniapoa. 13Ma beca angelya María jama huohuiajjame acapoa ba'a: —¿Ajeo acuae mi pani?—
Mariaa saja-acapoa jama ba'a: —Ecue Emeshimesenei Jesosaja eyami dojoca'yonaje cuaa. Ecuea oya bajjima achacua shai oya huananobiaquica'yonaje cuaa.—
14Ohuaya jama mimime pojeahuaa Jesosa o ani jacajjajje nequi bajeacapoa, jamatii ojaya bajjima poa oya Jesosanei poani. 15Majoya Jesosaa oya jama acapoa ba'a: —¿Ajeo acuae mi pa-ani? ¿A'ya acuaeya sa-ajjaña?—
Mariaa Jesosa ma shashacuana ebana meshijaahuanajji poani poso acapoa, jamajjeya oya saja-acapoa jama ba'a: —Miyaya oja yami dojo'yonajejo mo huohuicue achacua miyaya huananobiaqui'yonaje. Eyaya oja yami jjeshe'yosa-aña.—
16Jesosaa oya jama acapoa ba'a: —¡María!—
Ohua jama acajje María jjanequijeapajjaquiapoa Jesosa nequiyasijje. Mariaa Jesosa judiocuanaja esohui jama acapoa ba'a: —¡Rabuni!— (Ma esohui jama poanijje ba'a: Ecuea esohuihuohuijji.)
17Majoya Jesosaa María jama acapoa ba'a: —¡A'a mo nahuejji epoqui'yojji! ¡Eya poqui'yojjima nequi so'o ecue Chiique! Jjeya huohuiquicue ecuea epeejjicuana e shajja-ajjajji poanajecuana eya jjeya poquije'yo ecue Chii aniyasijje. Oya miquianajaya Chii-ai pea-ai poani. Oya ecuea Eyacuiñajji poani, miquianaja Eyacuiñajji pea-aiya— jamaya poa Jesosa.
18Jamajjeya María Magdalena poqui'yapoa oja epeejjicuana huohui'yohua ma Jesosaa o acanaje huisotii esohuiya, ma ohua Jesosa eshe nequi'yo baca'yonajejo pea-ai.
Jesosa jjanequija'aqui'yapoa o shajja-ajjajji poanajecuanajo
(Mt 28.16-20; Mc 16.14-18; Lc 24.36-49)
19Ma epojja domingo sinepoquianijo aje Jesosa shajja-ajjajji poanajecuana jjachichaquiapoa. Esecuejjani ca'acapoa cuaa judío etiicuana yajjajo. Majoya Jesosa oya ejjachichaqui aniyiyesamaneijje jjanequija'aqui'yapoa. Jama acapoa cuana ba'a: —Miquiana queaquijijjijajinee pocue.—
20Jama pomajje Jesosaa oja eme, dojjojjanijji pea-ai huohuica'yapoa cuana oja oya queaja'a eba'yojji. Majoya queabihuinee po'yapoa cuana Emeshimesenei ba'yomajje. 21Majoya quijjepishana Jesosaa huohuicao'oyapoa cuana jama ba'a: —Miquianaya queaquijijjijajinee po'yocue. Jiquio ecua eya ecue Chiiya huoojeacapoa jama pea-aiya quiana huoojeaje.—
22-23Jesosaa o shajja-ajjajji poanajecuana aniyasijje sipojeamajje huohuicapoa cuana jama ba'a: —Canobiquiahua Edojjoshahuapame miquianaja eyamidojjohuasijje. Ojjaña cua miquiaaya peacuana huohuiquije jama ba'a: “Miquianaja mimishicuana chama'yo, ecuijea'yo” macuana miquianaja huohui huisotii cuanaja oja mimishi chama'yo poaje. Cua miquianaja jama huohuime ajjima'cuana mimishijjitii poaje, oja mimishi ecuijea'yojji pojjeama poaje.—
Jesosa eshequi'yo nequi Tomasya baca'yapoa
24Jesosaja babaca dejjacuana doce huisome poa. Oe oja babaca dejja Tomás bajjani poa. Oya bajjani beca poa, Becajaa bajjani pea-ai. Jesosa pea oja babaca dejjacuanajo jjanequija'aqui'yapoajo aje oe Tomás chama' poa. Oja ca ba'yojjima poa Jesosa ecojjaja. 25Majoya aje oya pea Jesosaja babaca poanajecuaa jama acapoa ba'a: —¡Ecuaa Jesosa eshe nequi'yo ba'yonaje!—
Tomás ohua jama acani shajja-ajjamajje jama poa ba'a: —E'e pojja'a, ecuea ecojjaja ojaya eme baacojjaja cacahuejja bajjimajo eya o shequi'yonajejo ejjashahuabaqui'yojji pojjeama poaje. Ecue emeja oja dojjojjanijji si huosojjimajo pea-ai eya o shequi'yonajejo ejjashahuabaqui'yojji pojjeama poaje.—
26Majoya aje quijje, ocho cahuime huiso poajo, Jesosa shajja-ajjajji poanajecuana jjachichaquio'oyapoa oya equiyasijje. Tomás pea-ai aniapoa onijje. Esecuejjani eca'a nequiapoa cuanaja. Majoya Jesosa jjanequija'aquio'oyapoa macuana ejjachichaqui aniyiyesamaneijo. Oya jama poa ba'a: —Miquianaya queaquijijjijajinee po'yocue.—
27Majoya Jesosaa Tomás jama huohuime acapoa ba'a: —Bacue jiquio ecuea eme equecuahuejja. Miquea emesisi jeanobiacue ecuea eme equecuahuejjajje. Miquea eme jeaamajje ecue dojjojjanijji si huosocue pea-ai. ¡A'a eya emano'yotii jaa poso ajji! Ejo jjashahuabaqui'yocue eya shequi'yonaje.—
28Jesosa jama poajo Tomás jama mimime poa onijje ba'a: —Miya ecuea Emeshimesenei, ecuea Eyacuiñajji pea-ai poani.—
29Jesosaa Tomás huohuipea-aicapoa jama ba'a: —Miya e ba'yomajje ecojjaa ejo jjashahuabaqui'yonaje. Ojjaña joya ejo jjashahuabaquica'yanicuana jamatii ecuea eyami bapojjima'tii poanicuana Eyacuiñajjiya comacuanaya queabihuinee pomeecaje— jamaya acapoa Jesosaa.
30Yahuajo Jesosaa dejjaja ajjima'neineicuana queahuisonee acapoquiapoa o shajja-ajjajji poanicuanaja cojjaneijo. Jamatii jiquio papenijo ecuea ojjañatii oja acuana tehuejeyojjima poanaje. 31Jiquio esohui eyaya tehuenaje miquiana jjashahuabaqui'yojji Jesosajo, oya Eyacuiñajjija huoojea ojjaña nahue'yojji poani, Eyacuiñajjija Bacuaejja. Jamajjeya ojjaña joya ojo jjashahuabaquica'yanicuana ba'etiitiije'yo Eyahuasijje.
Dewis Presennol:
JUAN 20: ESE
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Copyright Mision Nuevas Tribus, 2006