Jɔɔŋ 6
6
Yesu pɩ nɩaa bʋɩ banɔŋ kʋdiilee
Mat. 14.13-21; Maak 6.30-44; Luuk 9.10-17
1Ʋ ŋɩɩ harɩŋ nɛ Yesu mɩɩra chol mʋgʋ-bal kʋbala baa yɩrɛ Galilii mʋgʋ-balɩŋ, ʋ yɩrɩŋ dɔŋɔ ma nɛ Tabiiras. 2Nɩaa yʋga a tuto ʋ harɩŋ, bɛɛ wɩaa ba fa na ʋ sɩ ŋaa wʋmagɩla-la a vaarɛ nyanyal tɩŋŋaa nɛ. 3Ŋɩɩ nɛ Yesu arɩ ʋ harɩ-tooroo mʋ jɩl peeliŋ nyuŋ a hɔŋ nɩmɛ. 4Dɩ Juu tɩŋŋaa dɩɩsɩŋ kiele bal gbiele-la ma kpaga. 5Ba sɩ hɔŋ nɩmɛ nɛ, Yesu na dɩ nɩ-daŋ nɩɩ kɔ ʋ teeŋ ŋɩɩ. Ʋ pɩɛsɛ Fɩlɩp, “Nɩɩ nɛ la jaŋ na kʋdiilee a yɔɔ pɩ nɩaa deemba kala dɩ ba dii?” 6Yesu tɩtɩa fa jɩŋ wɩɩ-la ʋ sɩ jaŋ ŋaa nɛ, ama ʋ ta bʋl ŋɩɩ dɩ ʋ magɩsɛ Fɩlɩp nɛ. 7Ŋɩɩ nɛ Fɩlɩp bʋla pʋ, “Dɩ la nɛ yɔɔ boroboro a yi warɩpʋla zɔɔ-balɩa ma, ʋ bɩ nɩaa deemba wɩɩkala wuo ŋaa, mʋa mʋa nɛ ba kʋŋkala jaŋ na.” 8Ŋɩɩ nɛ ʋ harɩ-tooroo dɔŋɔ ba sɩɩ yɩrɛ Anduru, ʋ fa ŋaa Saamɔŋ Pɩɩta naambie nɛ, ʋ bʋla pɩ Yesu, 9“Bii-bie kʋbala nɛ hɛ la tʋɔŋ a kɛŋ boroboroba banɔŋ arɩ chenfilee balɩa. Ɛɛ nɛ saa kɩaa deemba jaŋ wuo ŋaa nɩ-daŋ deeŋ?” 10Ŋɩɩ nɛ Yesu bʋl, “Má leŋ dɩ nɩalɩŋ hɔŋ.” Dɩ yaŋ hɛ lee-la, ŋɩɩ nɛ nɩalɩŋ hɔŋ. Ba tʋɔŋ baalaa fa ŋaa bʋɩ banɔŋ nɛ. 11Ŋɩɩ nɛ Yesu laa boroboroba-la a lɔllɛ Wɩa, aŋ kaa chɔgɔ kpaa nɩalɩŋ sɩ hɔnɔ. Ŋɩɩ nɛ ʋ kɛŋ chenfile-la ma kpaaba. Ba kʋŋkala dii a vɔgɛ. 12Ba sɩ dii a vɔgɛ ŋɩɩ, ʋ bʋla pɩ ʋ harɩ-tooroo, “Má mʋ paa boroboroba-la sɩ ka dɩ kʋŋkala sɩ́ pɩna ta.” 13Ŋɩɩ nɛ ba paa kʋkaana-la nɩalɩŋ sɩ die aŋ ka, a su sinsiŋ fii arɩ balɩa.
14Nɩalɩŋ sɩ hɛ nɩmɛ a na Yesu sɩ ŋaa wʋmagɩlɩŋ deeŋ, ba bʋl, “Wʋtɩtɩɩ, baala deeŋ nɛ sɛnɛ ŋaa Wɩa wʋlaabʋllʋ-la ba sɩ sɩ ʋ jaŋ kɔ dʋnɩa.”
15Ŋɩɩ nɛ Yesu jɩŋ arɩ ba kɛŋ ba tɩtɩa hɛ dɔŋɔ nɛ dɩ ba kʋ fʋgʋ dɩ ʋ dii ba kuoruŋ. Ŋɩɩ nɛ ʋ mʋ faa peeliŋ nyuŋ.
Yesu vɛŋ lɩɩŋ nyuŋ
Mat. 14.22-33; Maak 6.45-52
16Dɩdaanɩŋ, Yesu harɩ-tooroo tuu mʋga 17a jʋʋ lɩɩŋ daboro, a bɩra duoroo chol mʋga a mʋmʋ Kapɛnam. Taŋ bire dɩ Yesu ha bɩ ba teeŋ kɔ. 18Bʋa-la lɛ dɩ pel-duo kʋbala maa lu a kɛŋ lɩɩ-la kala vuvuugi. 19Dɩ ʋ harɩ-tooro-la ma duoro a mʋ yi meel-daasɩŋ batori koo banɛsɛ, aŋ na Yesu dɩ ʋ vɛŋ lɩɩŋ nyuŋ a kʋkɔ daboro-la teeŋ. Ba sɩ naʋ ŋɩɩ, fawʋllʋŋ kɛmba. 20Ŋɩɩ nɛ Yesu bʋla pɩba, “Má sɩ́ leŋe dɩ fawʋllʋŋ kɛmma, mɩ-na nɛ.” 21Ŋɩɩ nɛ ba tʋɔŋ tɔrɛ, ba joŋu hɛ lɩɩŋ daboro-la tʋɔŋ, lɩɩŋ daboro-la guu yi lɩɩŋ niiŋ lee-la ba fa sɩɩ mʋ.
Nɩaa yʋga aa chɛ Yesu
22Taŋ sɩ pʋla, nɩ-daŋ-la fa sɩ chɩŋ mʋga-la cholo sɛmɛ dɔŋɔ jɩma arɩ lɩɩŋ daboro kʋbala nɛ fa chɩŋ nɩmɛ. Ba jɩma arɩ Yesu harɩ-tooroo dʋndʋŋa nɛ jʋʋ lɩɩŋ daboro-la. Yesu tuo ba tʋɔŋ. 23Ba sɩ chɩŋ nɩmɛ ŋɩɩ, lɩɩŋ daborusuŋ dɔnsʋŋ lɩɩ Tabiiras kɔ lee-la, a kpagɛ lee-la Yesu fa sɩ lɔllɛ Wɩa aŋ joŋ boroboro pɩba ba dii. 24Nɩalɩŋ sɩ na dɩ Yesu tuo, ʋ harɩ-tooroo ma tuo, ba sii jʋʋ lɩɩŋ daborusu-la a mʋ Kapɛnam aa chɛʋ.
Yesu sɩ ʋ nɛ boroboro-la sɩɩ pɩ nɩaa mɩɩsɩŋ
25Nɩalɩŋ sɩ na Yesu mʋga-la cholo dɔŋɔ, ba pɩɛsʋ, “La kʋhɩaŋ, bʋa bɛɛ lɛ nɛ ŋ kɔ daha?”
26Ŋɩɩ nɛ Yesu bʋla pɩba, “Wʋtɩtɩɩ nɛ mɩ bʋlaa pɩma, maa chɛmɛ a tɩŋ boroboro-la ma sɩ dii vɔgɛ wɩaa nɛ, ama wʋmagɩla-la ma sɩ na dɩ mɩ ŋaa wɩaa dee. 27Má sɩ́ ma doluŋ kala hɛ a chɛ kʋdiile-la sɩ jaŋ chei, ama má tɩma chɩchɛ kʋdiile-la sɩ jaŋ pɩma mɩɩsɩ-la sɩ bɩ dɛrɛ. Kʋdiilee deemba mɩ-na Nuhuobiine Bie nɛ jaŋ pɩma, bɛɛ wɩaa mɩ Nyɩmma Wɩa joŋ doluŋ hɛ mɩ lɛ nɛ dɩ mɩɩ ŋaa ŋɩɩ.”
28Ŋɩɩ nɛ ba pɩɛsʋ, “Wʋbɛɛ nɛ Wɩa chɛ dɩ la ŋaa?”
29Ʋ bʋl, “Tɩntɩmɩɩ-la Wɩa sɩ cho dɩ maa tɩŋ nɛ ŋ-la: Má laa mɩ-na nɩɩ-la ʋ sɩ tɩma wɩaa dii.”
30Ŋɩɩ nɛ ba pɩɛsʋ, “Wʋmagɩl bɛɛ nɛ ŋ jaŋ ŋaa dɩ la na a laa ŋ wɩaa dii? Wʋbɛɛ nɛ ŋ jaŋ ŋaa? 31La naabalɩmaba dii kʋdiilee nɛ tintee-hɩlɩŋ lɛ baa yɩrɛ Mana. Wɩalɩŋ ba sɩ ŋmʋnsa Wɩa teniŋ tʋɔŋ nɛ ŋ-la: ‘Ʋ joŋ boroboro-la sɩ lɩɩ Wɩa-jaŋ nɛ a pɩba dɩ ba dii.’ ”
32Ŋɩɩ nɛ Yesu bʋl, “Mɩ bʋl wʋtɩtɩɩ nɛ a pɩpɩma, kɩalɩŋ Mosis sɩ pɩma, ʋ dee bɩ ma pa, Wɩa nɛ pɩma. Kʋdiile-la bɩ ma mɩɩsɩ-la sɩ bɩ dɛrɛ ka pa. Mɩ Nyɩmma nɩɩ pɩ nɩaa boroboro tɩtɩɩ-la sɩ lɩɩ Wɩa-jaŋ. 33Boroboro-la Wɩa sɩ ta, ʋ lɩɩ Wɩa-jaŋ nɛ a kʋ tuu. Ʋ nɛ pɩ dʋnɩa nɩaa mɩɩsɩŋ.” 34Ŋɩɩ nɛ ba bʋl, “La Tɩɩna, ŋɩɩ-na vɛnɛ joŋ boroboro deeŋ pɩpɩla.”
35Ŋɩɩ nɛ Yesu bʋla pɩba, “Mɩ nɛ ŋaa kʋdiile-la sɩɩ pɩ nɩaa mɩɩsɩŋ. Nɩɩ-la kala sɩ kɔ mɩ teeŋ, losuŋ bɩra bɩ jaŋ kɛnʋ. Nɩɩ-la ma sɩ laa mɩ wɩaa dii, lɩɩnyʋasʋŋ bɩra bɩ jaŋ kɛnʋ. 36Mɩ bʋla pɩma arɩ ma namɛ nɛ, ama ma ha bɩ mɩ wɩaa laa dii. 37Nʋʋkala mɩ Nyɩmma sɩ joŋo pɩmɛ, ʋ jaŋ kɔ mɩ teeŋ. Nɩaa deemba kala sɩ kɔ mɩ teeŋ, mɩ bɩ jaŋ kɔ dɩ mɩ kiriba ta, 38bɛɛ wɩaa mɩ lɩɩ Wɩa-jaŋ kʋ tuu dɩ mɩ ŋaa wɩalɩŋ nɩɩ-la sɩ tɩmmɛ sɩɩ chɛ nɛ, mɩ tɩtɩa tʋɔtɔrɛ wɩaa dee. 39Ŋ-la nɛ nɩɩ-la sɩ tɩmmɛ chɩchɛ dɩ mɩɩ ŋaa: Dɩ mɩ sɩ́ leŋe dɩ nɩalɩŋ ʋ sɩ joŋo pɩmɛ kʋŋkala lɛl, ama dɩ mɩ chɩsɛ ba kala dʋnɩa dɩdɛrɩŋ dɩ ba kɛŋ mɩɩsɩŋ. 40Wɩalɩŋ mɩ Nyɩmma sɩɩ chɛ nɛ ŋ-la: Dɩ nʋʋ na-kala sɩ na mɩ-na ʋ Bie a laa mɩ wɩaa dii, dɩ ʋ kɛŋ mɩɩsɩ-la sɩ bɩ dɛrɛ. Dʋnɩa dɩdɛrɩŋ ma, mɩ jaŋ chɩsʋ sʋʋŋ lɛ dɩ ʋ kɛŋ mɩɩsɩŋ.”
41Ŋɩɩ nɛ Juu tɩŋŋaa suomo gʋgʋrɩmɛ wɩaa, a tɩŋ ʋ sɩ sɩ, “Mɩ-na nɛ ŋaa kʋdiile-la sɩ lɩɩ Wɩa-jaŋ kʋ tuu.” 42Ŋɩɩ nɛ ba pɩɛsɛ: “Baala deeŋ dee Josɛf bie Yesu? La jɩŋ ʋ nyɩmma arɩ ʋ naaŋ kala nɛ. Ɛɛ nɛ saa lɛɛlɛ ʋ sɩ dɩ ʋ lɩɩ Wɩa-jaŋ nɛ a kʋ tuu?”
43Yesu bɩra bʋla pɩba, “Má leŋ ma wɩalɩŋ gʋrʋmʋŋ. 44Nʋʋkala bɩ jaŋ wuo kɔ mɩ teeŋ, see dɩ mɩ Nyɩmma-la sɩ tɩmmɛ nɛ kɛŋ ʋ tɩɩna kaa kɔ mɩ teeŋ, dɩ mɩ chɩsʋ sʋʋŋ lɛ dʋnɩa dɩdɛrɩŋ. 45Ba ŋmʋnsɛ ŋ-la nɛ Wɩa wʋlaabʋllaa teniŋ tʋɔŋ. Ba sɩ, ‘Wɩa jaŋ dagɛ nɩaa kala.’ Nʋʋkala sɩ kɛŋ ʋ tɩtɩa hɛ dɔŋɔ dɩ ʋ jegile nɩɩ wɩalɩŋ mɩ Nyɩmma sɩɩ dagʋ a gʋnnɛ ʋ teeŋ, ʋ nɛ jaŋ kɔ mɩ teeŋ. 46Ʋ ŋɩɩ ma saa bɩ nagɛ arɩ nʋʋkala na mɩ Nyɩmma Wɩa nɛ, see mɩ-na Nɩɩ-la sɩ lɩɩ Wɩa teeŋ. Mɩ dʋndʋŋa nɛ naʋ. 47Wʋtɩtɩɩ nɛ mɩ bʋlaa pɩma, nɩɩ-la kala sɩ laa mɩ wɩaa dii, ʋ jaŋ kɛŋ mɩɩsɩ-la sɩ bɩ dɛrɛ. 48Mɩ nɛ ŋaa kʋdiile-la sɩɩ pɩ nɩaa mɩɩsɩŋ. 49Ma naabalɩmaba dii kʋdiile-la ba sɩɩ yɩrɛ ‘Mana’ nɛ tintee-hɩlɩŋ lɛ, arɩ ŋɩɩ kala ba-na ha sʋba nɛ. 50Ama kʋdiile-la sɩ lɩɩ Wɩa-jaŋ kʋ tuu, dɩ nʋʋ nɛ diiba, ʋ bɩ jaŋ sʋʋ. 51Mɩ-na nɛ ŋaa kʋdiile-la sɩ kɛŋ mɩɩsɩŋ a lɩɩ Wɩa-jaŋ kʋ tuu. Dɩ nʋʋ nɛ dii kʋdiilee deemba, ʋ jaŋ kɛŋ mɩɩsɩ-la sɩ bɩ dɛrɛ. Mɩ yaraa nammɩa nɛ ŋaa kʋdiile-la mɩ sɩ jaŋ joŋo pɩ dʋnɩa nɩaa dɩ ba kɛŋ mɩɩsɩŋ.”
52Yesu sɩ bʋl ŋɩɩ, Juu tɩŋŋaa suomo kɛŋ wɩɩ-la lɩlɛrɛ a bʋl, “Ɛɛ nɛ baala deeŋ jaŋ wuo ŋaa a joŋ ʋ yaraa nammɩa pɩla dɩ la chaŋ?”
53Ŋɩɩ nɛ Yesu bʋla pɩba, “Wʋtɩtɩɩ nɛ mɩ bʋlaa pɩma, dɩ ma nɛ bɩ mɩ-na Nuhuobiine Bie yaraa nammɩa chaŋa, a nyʋa mɩ chalɩŋ ma, ma bɩ jaŋ kɛŋ mɩɩsɩŋ. 54Nɩɩ-la kala sɩ chaŋ mɩ yaraa nammɩa, a nyʋa mɩ chalɩŋ ma, ʋ jaŋ kɛŋ mɩɩsɩ-la sɩ bɩ dɛrɛ. Dɩ dʋnɩa nɛ dɛrɛ, mɩ jaŋ chɩsɛ ʋ tɩɩna sʋʋŋ lɛ dɩ ʋ kɛŋ mɩɩsɩŋ, 55bɛɛ wɩaa mɩ yaraa nammɩa sɛnɛ ŋaa kʋdiilee nɛ, mɩ chalɩŋ ma sɛnɛ ŋaa lɩɩ-nyʋalʋŋ. 56Nɩɩ-la kala sɩ chaŋ mɩ yaraa nammɩa-la a nyʋa mɩ chal-la, ʋ jaŋ hɛ mɩ lɛ, dɩ mɩ ma hɛ ʋ lɛ. 57Mɩ Nyɩmma-la sɩ kɛŋ mɩɩsɩŋ a tɩmmɛ ŋɩɩ, ʋ nɛ leŋe mɩ kɛŋ mɩɩsɩŋ. Ŋɩɩ tɩtɩa nɛ nɩɩ-la ma sɩ chaŋ mɩ yaraa nammɩa ma jaŋ kɛŋ mɩɩsɩŋ a tɩŋ mɩ wɩaa. 58Kʋdiile-la sɩ lɩɩ Wɩa-jaŋ kʋ tuu nɛ ŋɩɩ. Ʋ bɩ naga kʋdiile-la ma naabalɩmaba sɩ die aŋ ha sʋʋ nɛ. Nɩɩ-la kala sɩ dii kʋdiilee deemba, ʋ jaŋ kɛŋ mɩɩsɩ-la sɩ bɩ dɛrɛ.” 59Yesu bʋl wɩaa deemba dɩ ʋ hɛ Kapɛnam tinteeŋ lɛ nɛ a dɩdagɛ nɩaa Wɩɩchʋɔlɛ dɩa lɛ.
Wɩalɩŋ sɩ jaŋ pɩ nɩaa mɩɩsɩ-la sɩ bɩ dɛrɛ
60Nɩaa yʋga a faa to Yesu harɩŋ, a nɩɩ wɩalɩŋ ʋ sɩ bʋla. Ba sɩ, “Wɩaa deemba ʋ sɩɩ dagʋ, ba hɛyɛ kɩŋkɛŋ nɛ. Kʋbɛɛ nɛ jaŋ wuo sɛɩba?”
61Ba bɩ wɩɩkala bʋla, ka Yesu jɩŋ arɩ ʋ harɩ-tooro-la ka gʋrɩmɛ wɩaa nɛ a tɩŋ wɩalɩŋ ʋ sɩ bʋla. Ŋɩɩ nɛ ʋ pɩɛsɛba, “Wɩɩŋ deeŋ leŋe ma na baanɩŋ nɛɛ? 62Ka dɩ ma nɛ saa fa na mɩ-na Nuhuobiine Bie dɩ mɩ mɩɩraa mʋ lee-la mɩ sɩ lɩa? 63Wɩa Dɩŋ-zɔmʋŋ nɩɩ pɩla mɩɩsɩŋ. Nuhuobiine yaraa doluŋ-na ŋaa pɛɩ nɛ, ʋ bɩ mɩɩsɩ-la sɩ bɩ dɛrɛ wuo pa. Wɩa Dɩŋ-zɔmʋŋ wɩaa nɛ mɩ bʋla pɩma. Ba jaŋ pɩma mɩɩsɩŋ. 64Ama ma dɔnsʋŋ bɩ mɩ wɩaa laa dii.” Bumbuŋ kala Yesu fa jɩŋ nɩalɩŋ sɩ bɩ ʋ wɩaa laa dii nɛ arɩ nɩɩ-la sɩ jaŋ joŋu yallɛ. 65Ŋɩɩ nɛ Yesu bɩra bʋl, “Wɩɩŋ deeŋ wɩaa nɛ tɩɩ mɩ bʋla pɩma arɩ nʋʋkala bɩ jaŋ wuo kɔ mɩ teeŋ, see dɩ mɩ Nyɩmma pɩ ʋ tɩɩna wombiiŋ.”
66A tɩŋ ŋɩɩ wɩaa nɩ-daŋ-la fa sɩɩ to ʋ harɩŋ, ba mɩɩrɛ. 67Ŋɩɩ nɛ Yesu pɩɛsɛ ʋ harɩ-tooroo fii arɩ balɩa-la, “Ma ma cho dɩ ma mɩɩrɛ mɩ harɩŋ nɛɛ?” 68Saamɔŋ Pɩɩta bʋl, “La Tɩɩna, kʋbɛɛ teeŋ nɛ saa la ma jaŋ mʋ? Wɩalɩŋ ŋ sɩɩ bʋl nɩɩ pɩ nɩaa mɩɩsɩ-la sɩ bɩ dɛrɛ. 69Lɛɛlɛ la laa dii a jɩŋ arɩ ŋ nɛ ŋaa Wɩa tʋɔpʋl Tɩɩna.”
70Ŋɩɩ nɛ Yesu pɩɛsɛba, “Ma nɩaa fii arɩ balɩa dee mɩ lɩɩsɛɛ? Ama ma dɔŋɔ ŋaa dʋndɔŋ nɛ a ŋaa Sɩtaanɩ nʋʋ.” 71Judas sɩ ŋaa Saamɔŋ Ɩsɩkarɔt nanʋala wɩaa nɛ ʋ faa bʋl ŋɩɩ. Ʋ fa hɛ ʋ harɩ-tooro-la fii arɩ balɩa tʋɔŋ nɛ, ama ʋ nɛ fa jaŋ joŋ Yesu yallɛ.
Dewis Presennol:
Jɔɔŋ 6: SIS
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
©Ghana Institute of Linguistics Literacy and Bible Translation 1984, 2014