Luk 20
20
Jizọs Ḅe Nyana Kụrọ Na Gboloma Ḅẹrẹ Mị
(Mat 21.23-27; Mak 11.27-33)
1Gbọrị ene, Jizọs Ḅe Oputẹkẹwarị ḅie sime ye se tomonima ḍie se Iḅi Ḅẹrẹ mị ḅe ọkwẹịn nwọ kọn ini pịrịarị sịkị, tịḅịnị agbamịẹapụma na Oloko ḍieapụma na pịkị ama sẹnịapụma na ḅomẹ, 2se nwọse ọ̀ ḅẹmẹ, “Ḍuko wa pịrị, che kụrọ ị́ nwọ nyana se mayema mịẹ-ao? Tụḅọ ị́ se mayema mịẹarị kụrọ mị nwọse ị́ pịrị?”
3Jizọs Ḅe ini pẹkẹrẹmẹ, “Ye mịọkụ à gbọrị ḅẹrẹ nwọse ó gbela. Ó ḍuko ọkọmụ, 4Jọn ḅe se mengi se nweni sara kụrọ mị Tamụnọ ḅara anị ḅo mụnọ se tomoniḅọ ḅara anị ḅo?”
5Ini sakị inia ogboku ḅẹrẹ jineamẹ, “Cheye wa nwọ ḍuko ḅe? ‘Tamụnọ ḅara anị ḅomẹ’ wa nwọḅẹ ọkụma, Ọ̀ nwọ ḅẹḅịa, anị ọkụma, ‘Cheye ẹrẹchị ọ́ Jọn ḅe ḅerenika?’ 6Wa nemikase tomoniḅọ ḅara-ẹ nwọḅẹ ọkụma, ini bebe tomonikpo mị imgbele se wa gbinḅịa, anịatịḅị anị inia ḅụokoromẹ na Jọn ḅe ịkịankoroḅọ-ẹ.” 7Anị ini pẹkẹrẹye-ẹ, “Wa nemikẹ anị ḅo anga.”
8Se Jizọs Ḅe nwọse ini ḅẹmẹ, “Anị-ẹ ḅẹḅẹ ị̀rị̀ sọnị à seni mayema mịẹ kụrọ mị ḅo anga à ḍuko ọ́ pịrị-ẹkẹ.”
Irumịẹ Chịnmgbọlụ Ozu Ọkọapụ Kaḅo Mị
(Mat 21.33-46; Mak 12.1-12)
9Jizọs Ḅe mị kaḅo mị kọn tomonima pịrịmẹ, “Gbọrị owuḅọ gbọrị irumịẹ chịnmgbọlụ ozu nwọ ḍipimẹ, se anị seni ọkọapụ pịrịmẹ, se ḅọlọ sịkị ḅụ warị koroma somẹ. 10Arịa mgbọlụma kaịnḅịa sịkị ḅo lasịkị, ọ̀ gbọrị omoniḅọ nwọse ọkọapụma fịrịmamẹ, ọ̀ lalama mgbọlụma inia ḅara nwọ ọkịḅịa ẹrẹchị. Ọkụma ọkọapụma omoniḅọ ḅe fomu se papa ḅara ḅụ ò depịkịmẹ. 11Anị ọ̀ pịkị jịn omoniḅọ nwọse sẹịnye-ẹ, ọkụma ọkọapụma pịkị ò fomumẹ, ḅụgererema ḅara nwọse ọ̀ mịẹmẹ, se gbọrịye sọnị se ọ̀ pịrịka ḅara ḅụ ò depịkịmẹ. 12Se ọ̀ pịkị tẹrẹ karama omoniḅọ se sẹịnmẹ; ọkọapụma pịkị ye seni ori sọnị nwọ lama seni ò suma pakụmamẹ. 13Anịsịkị iru ozu nyanaḅọ ḅe nwọ ḅẹmẹ, ‘Cheye à nwọ mịẹ ḅe? Àrị ị̀ya tọkụ ị̀ ḅụ yelaḅọ ḅe seni sẹịnḅịa; pikipikiye ofori-ẹ, ini osi se ọ̀ pịrịḅịa!’ 14Ọkụma ọkọapụma ori ọrị sịkị, ini nwọse jịnḅọ jịnḅọ ḅẹmẹ, ‘Ḅe anị yema nyanaḅọ ḅe tọkụ-ẹ. Ó ye wa ọ̀ ḅaa se ọ̀ nyanayema mịnaye nwọsọ!’ 15Anị ini iru ozu mị ḅie ò suma pakụma, se ọ̀ ḅaaye-ẹ.”
Jizọs Ḅe nwọ gbelamẹ, “Cheye, anịsịkị iru ozu nyanaḅọ ḅe nwọse ọkọapụma mịẹ ḅe? 16Ò ḅo se inia apụma nwọ ḅaasinḅịa, seni iru ozu mị ọkị se jịn ọkọapụ pịrịḅịa.”
Tomonima mịn mị naa sịkị, ini nwọ ḅẹmẹ, “Ọkọ sime ye ofori-ẹ!”
17Jizọs Ḅe ini ḍiki se gbelamẹ, “Cheye, anị ọkụma, mị Tamụnọ ọkwẹịn mị nwọ fie?
‘Warị namapụma sịkị ḍụparị mị
vinpịkị ḅo yelatẹịn ḍụparị nwọ sọsam.’
18Ḅịkị anị ḍụparị mị ọgọnọ koroḅọ goyegoye iniḅọ kọsịḅịa; se anị ḍụparị mị ḅịkị nweniḅọ ọgọnọ koromẹ ḅẹḅẹ, anị iniḅọ gbẹịn fọn mịẹḅịa.”
Amaigbiki Ocho Gbẹịn Na Gboloma Ḅẹrẹ Mị
(Mat 22.15-22; Mak 12.13-17)
19Oloko ḍieapụma na tịḅịnị agbamịẹapụma na ḅụkụrọma anịnyọ mị ḅụ Jizọs Ḅe kunḅịa ḅara nwọ ḍọkịmẹ, anịatịḅị ini nemimẹ na ini gboloma kaḅo mị ọ̀ kọnye-ẹ, ọkụma ini tomonima ḍikiḅalafamẹ. 20Anịẹrẹchị ini ẹmbẹ ḍọkịmẹ. Ini dapụ na ọḅụ fịmẹ na ini gbẹịnma mun ọkwẹịn ḅụ Jizọs Ḅe ḅịpị wọkị, mịẹse ini Ọ̀ ḅọrọma kụrọ nyanapụma na pịkị Romapụ Gọvịna ḅe na pịrịḅịa ḅara. 21Mịna nweni ẹnyẹ apụma nwọ seni Jizọs Ḅe ḅẹmẹ, “Yeḍieḅọ, wa nemimẹ na ị́ ḍukoye na ị́ ḍieye na karakaraye-ẹ. Wa pịkị nemimẹ na ị́ nweniḅọ tọrụkụnkụnkẹ, ọkụma Tamụnọ Ḅe tomoniḅọ ḅara ḅiarị kọkọmaye mị ị́ nwọ ḍieḍiemẹ. 22Ḍuko wa pịrị, amaigbiki ocho Rom Amanyanaḅọ ḅe pịrị mị anị mịna Oloko mị na kura mụnọ se kuraka?”
23Ọkụma Jizọs Ḅe inia epele mị nwọ nemimẹ, se nwọse ini ḅẹmẹ, 24“Ọ́ gbọrị seleḅa igbiki se ị̀ ḍie. Tụḅọ tọrụ na ẹrẹ na anịa ḅụ omi?”
“Amanyanaḅọ ḅe-ẹ,” ini nwọ pẹkẹrẹmẹ.
25Anị Jizọs Ḅe nwọḅẹye-ẹ, “Iḅimẹ, anị-ẹ ḅẹḅẹ, sime Amanyanaḅọ ḅe pịrịye mị nwọse Amanyanaḅọ ḅe gbẹịn, pịkị sime Tamụnọ Ḅe pịrịye mị nwọse Tamụnọ Ḅe gbẹịn.”
26Ini ineda anịanga tomonima tọrọkọ ḅụ gbọrịye sọnị nwọse ori ọlọkẹ, anị ini yawụma simeye-ẹ, ọ̀ pẹkẹrẹye mị ijira se inia ḅụ saramẹ.
Fịḅụsịsẹ Gbolomaye Mị Ḅẹrẹ
(Mat 22.23-33; Mak 12.18-27)
27Da Sadusiapụ Jizọs Ḅe damaḅomẹ, ini mị ḅẹye-ẹ na tomoni fịḅụsịsẹ ẹkẹ, ini ò gbelamẹ, 28“Yeḍieḅọ, Moziz ḅe mị Oloko mị nwọ gịẹịn wa pịrịmẹ: ‘Owuḅọ nemikase awọ oforika ḅara ḅụ tarọ ma koroma fịmẹ ḅẹḅẹ, numbireowu ineda árị deḅọ koroma fịsa eremeniḅọ ma ọkị simeḅịa, mịẹse ini awọ nyanaḅo fịsa ḅọ ḅe pịrịḅịa ḅara.’ 29Gbọrị sịkị sọnọma owuapụ mịnapụ simemẹ inia ḅie tatarịḅọ ḅe ere simemẹ, se ma awọ nyanaka simeogbo fịmẹ. 30Anịsịkị maịn karama ḅọ ḅe eremeniḅọ ma na simemẹ, 31anịsịkị tẹrẹ karama ḅọ ḅe pịkị á simemẹ. Anị gbọrị ḅara mị anị anị paka ini sọnọma apụma pịrị ọkụ-ẹ, inimgba fịmẹ awọ nyanaka ḅara ḅụ. 32Yemamgba ḅe kuluma, eremeniḅọ ma sọ fịmẹ. 33Mịọkụ, fịapụma fịḅụsịsẹḅịa ene mị ḅụ tụḅọ ta á nwọsọ ḅe? Ini sọnọma apụ mamgba á sime ḅọrọsa sịkị.”
34Jizọs Ḅe nwọse ini pẹkẹrẹmẹ, “Mị ḅụọ ama na ere na sime omi-ẹ, 35ọkụma ḅoḅịa ḅụọ mị ḅie fịḅụsịsẹ gbẹịn apụma ini ama na ere na sime kọn ẹkẹ. 36Enjẹlapụ simeọkụ mị ini simeḅịa ọkụ-ẹ ini pịkị ḅarị fịẹkẹ. Ini ma anị Tamụnọ awọ-ẹ, anịatịḅị ini fịḅụsịsẹsam. 37Moziz ḅe ọ̀ pịkị anị mịẹ ḅelemamẹ na ini fịapụ nwọ sịsẹmasam. Kọrị sime piri ḅẹrẹ ḍuko ḍiri tọrụ mị ḅie, ọ̀ Nyanaḅọ Ḅe gbolomaye nwọ ḍukomẹ na ‘Ori Ebraham Tamụnọ-ẹ, Aịzịk Tamụnọ-ẹ, pịkị Jekọb Tamụnọ-ẹ.’ 38Mịn mị fiemẹ na ori anị ḍumo apụma Tamụnọ Ḅe-ẹ, fịapụ makẹ, anịatịḅị ọ̀ ḅụ inimgba ini ḍumo waraḅẹ.”
39Oloko ḍieapụma ḅie dapụ pụkọ deki ọkwẹịn se nwọ ḅẹmẹ, “Yeḍieḅọ, mịn mị ị́ pẹkẹrẹ ḅomẹ!” 40Anịatịḅị ini ineda ḅarị dadama gbọrị ḅẹrẹ sọnị seni ò gbelaḅịa ọkụ ofori-ẹ.
Mẹsaya Ḅe Gboloma Gbela Ḅẹrẹ Mị
(Mat 22.41-46; Mak 12.35-37)
41Jizọs Ḅe nwọse ini gbelamẹ, “Nde ó gose ọkọ ḅẹye na Mẹsaya Ḅe Devid furo ḅie ḅọ-ẹ? 42Anịatịḅị Devid ḅe na mịnaḅụ na Fịafịa nime ḍiri mị ḅie nwọ ḅẹmẹ.
‘Nyanaḅọ Ḅe nwọse ị̀ Nyanaḅọ Ḅe ḅẹmẹ:
Mịọ ị̀ya amaḅara anga ḅụ sime
43ọkịmun àrị ị́rị́ na tarakapụma se ị́ ḅụọ gbanamaye nwọ mịẹ sịkị la.’
44Devid ḅe anịsịkị, ‘Nyanaḅọ’; nwọse ọ̀ chịnmẹ, nde anị ọkụma Mẹsaya Ḅe Devid furo ḅie ḅọ nwọ sọḅịa ọkụ?”
Jizọs Ḅe Oloko Ḍieapụ Ma Gose Inia Ḅerijinemẹ
(Mat 23.1-36; Mak 12.38-40)
45Tomoni mamgba Ò poki àrị ogbo Jizọs Ḅe nwọse Oria ọḅụḍukoapụma ḅẹmẹ, 46“Oloko ḍieapụma ḅụ ómine ọ́ ḅụ ọbị, nangwọ ḅụchụaye chụa nwẹngị ma ḅọrọ ḅụḅẹlẹḅẹlẹ apụma, pịkị fẹ chiri ḅie osi ḅara se ini kereni mị ḅẹlẹma apụma tẹkẹwarịma ḅie ọrụtọnma wẹrị sime ayema nwọ sẹlẹ ọkịkị apụma pịkị alalị-a nyọma ḅie iḅitẹịn kirima sẹlẹ ọkịkị apụma; 47deapụ ma koroma fịsa eremeni ma ḅụbin se inia warịma nwọ inuma ọkịkị apụma, anịsịkị gbẹịnma nangwọ tẹkẹ nwọ kọnkọn apụma! Inia ḅụfụka ma sitẹịnḅịa!”
Dewis Presennol:
Luk 20: OBTP
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
The Bible Society of Nigeria