Luk 21
21
Deḅọ Koroma Fịsa Eremeniḅọ Ma Ḍiepịrịye Mị
(Mak 12.41-44)
1Jizọs Ḅe nyọ ḍiki kelema se ngọ kọn apụma inia ḍiepịrịye ma se Oputẹkẹwarị mị ḅe igbiki koko akpa mị ḅie chụarị ọkụ na, 2pịkị deḅọ fịsa eremeniḅọ ma arịa mama kọbọ ma se chụarị ọkụ na nwọ ọrịmẹ. 3Ọ̀ nwọ ḅẹmẹ, “À ḍuko ọ́ pịrịaḅẹ na ma igwein deḅọ fịsa eremeniḅọ ma se chụa ye mị ḅakatẹịn inimgba se chụa yema nwọ nẹngịmẹ. 4Anịatịḅị ísíapụma ini nyana ngọma ḅie inia ḅụḅẹlẹye nwọ sin, kọn aye se chụamẹ, ọkụma árị árị igwein la-ọkụ mị ḅụ á nyanaye mamgba á nwọ pịrịmẹ.”
Jizọs Ḅe Oputẹkẹwarị Mị Kanḅịa Nwọḅẹ Ye Ḍukomẹ
(Mat 24.1-2; Mak 13.1-2)
5Ọḅụḍukoapụma ḅie dapụ Oputẹkẹwarị mị ḍikitọrụ gbẹịn ḅara mị na, ini se anị nama iḅi ḍụparịma na pịkị anịa ḅie ini se Tamụnọ Ḅe pịrịarị ḍiepịrịayema gbolomaye ḍukoarị sịkị. Jizọs Ḅe nwọ ḅẹmẹ, 6“Ọ́ nwọ mịanga ọrịarị ye mamgba, sịkị ḅoḅịa mịnyọ ḅụ gbọrị ḍụparị sọnị anịa kiri ḅụ ḅarị sime ẹkẹ; àrịmgba ini suma gbinḅịa.”
Ḅụfụka Ma Na Tọrụsiọrị Ma Na
(Mat 24.3-14; Mak 13.3-13)
7Ini gbelamẹ, “Yeḍieḅọ, nde sịkị mịn mị mịẹ ḅe? Cheye paka ḅe se ḍiepakụma na anị mịẹḅịa sịkị mị lasam?”
8Jizọs Ḅe nwọ ḅẹmẹ, “Ómine ọbị, ó ḅereni se ini oḅori se ọ́ chịnma. Anịatịḅị tọn apụ ị̀ya ẹrẹ ḅụ ḅo se nwọ ḅẹḅịa, ‘Ị̀rị̀ ori-ẹ!’ na, ‘Sịkị mị lasam!’ Ọkụma ómine ini ḍukoma. 9Ọ́ ḅalafama ómine ọmụ na amafiema na gbolomaye naaḅịa sịkị; ọkọ sime ayema tatarị pakaḅịa, ọkụma anị ọkọ fiekẹ na kuluma mị kpekisam.”
10Ọkụma ori ọkwẹịnma mun se nwọ ḅẹmẹ, “Sẹ ma jịnye jịnye na owu sọḅịa; amanyanakiri ma owu se jịnye jịnye pakaḅịa. 11Kiri ḅalafama ḅara se jikeḅịa, ḅuruḅaa na, fin fin obi na nyọ mamgba simeḅịa; sotọrụ ḅụ ḅalafamaye na opu elekima na simeḅịa. 12Maye mamgba ma kiri ọkịka simeogbo, anị simeọkụ simeọkụ sọnị ini ó kun se ọ́ tọrụsiọrịmaḅịa; ini ḅẹrẹkọn ọ́ pịrị sose ọ́ ḅọrọma tẹkẹwarịma pịrịḅịa se ini ó se ikoli ḅie chuḅịa; ini ómine ọkị amanyanapụ na ḅẹrẹtọn apụ na tọrọkọ munḅịa ị̀ tịḅị gose. 13Iḅi Ḅẹrẹ mị ḍuko ḅụ mị ọ́ nyana sịkị mị-ẹ. 14Sịkị ma laka simeogbo ómine ọ́mịna kuḅie ma karakarama se ómine ọ́ ḅụ ḍụaḅịa ḅara gose ḅụḅalaḅala se ọ́ ḅụ pịrịma, 15anịatịḅị à seni ọ́ pịrịḅịa ọkwẹịn na nemi na, ómine na tarakapụma ineda àrị da ẹkẹ, pịkị ó ḍukoḅịaye na tụḅụrụ ẹkẹ. 16Ómine yiapụ ma na, ọ́mịna mịnapụ ma na, ómine na pakụmapụ ma na, pịkị ọ́mịna ikiapụ sọ, ómine se ịba fịḅịa, se ini ọ́mịna ḅie dapụ ḅọrọma fịḅie chuḅịa. 17Ị̀ gose ḅẹḅọ ḅẹḅọ taraka se ọ́ wẹrịmaḅịa. 18Ọkụma ọ́mịna tịḅị gbọrị inime sọnị faẹkẹ. 19Ọ́ kụrọma chịẹ anịatịḅị mị ọ́ wẹrị ọ́mịna ḅụ ḍụaḅọrọmaḅịa ọkụ mị-ẹ.
Jizọs Ḅe Jerusalẹm Kanḅịa Ḅẹrẹ Ḍukomẹ
(Mat 24.15-21; Mak 13.14-19)
20“Ómine ọrị na owuni Jerusalẹm mị gbori kelemasam nwọ ḅẹḅẹ, anị ó nemi na ḅọlọ ẹkẹ ini anị kanḅịa. 21Anịsịkị Judia ḅie sime apụma mangị so chịngịma ọgọnọ mun ye opu ama mị ḅie sime apụma anị koromaso, paka ama ḅie munsa apụma ḅarị vinpịkị opu ama mị ḅie munma. 22Anịatịḅị ma ‘Ene ma ḅụfụka pịrị ene-ẹ,’ mịẹse Fịafịa Ḍiri mị ḍuko ayema ḅo kọkọmaye sọḅịa ḅara. 23Àrị enema ḅalafamaye sọ fura eremeni na ndo se awọ pịrịarị nyengi apụ na pịrịḅịa ọkụ ḍiki! Ḅalafama tọrụsiọrị sime mị ama mị pịrịḅịa, Tamụnọ opu ịganị pịkịḅo mịnapụma ọgọnọ gbanaḅịa. 24Ini okola-agiji seni dapụ ḅaaḅịa, ísíapụma ini ọmụ ḅie ini kun se sẹ mamgba munḅịa se oru ḅẹrẹ nemi apụma ḅụọ seni Jerusalẹm mị nangaḅịa ọkịmun inia sịkị mị kara sịkị laḅịa.
Tomoniḅọ Tọkụ Ḅe Ḅo Mị
(Mat 24.29-31; Mak 13.24-27)
25“Kịrịye ịrụa mị na, akalụ mị na, pịkị loliama na ḅụ pakaḅịa. Tomonikiri ḅie sẹ mamgba ḅarị kụrọ kuḅie nyana ẹkẹ, tọrụ mị ekerearị ḅara mị na ọnụngọ ma ịganịarị ḅara mị na ḅe ḅalafa gose. 26Tomoni ḅalafa ḅụ wẹrị fụmụḅịa, ini ḅo bebe tomonikiri mị laḅịa aye nwọ koruarịogbo, anịatịḅị sotọrụ sime kụrọ ma arịa kirima ḅụ ini àrị desinḅịa. 27Anịsịkị mị Tomoniḅọ Tọkụ Ḅe tolupakaḅịaye-ẹ, soḅuno ḅie opu kụrọ na boma na ḅụ. 28Mayema sakị pakaḅịa sịkị, ọ́ sịsẹ chịẹ se ọ́mịna tịḅị ma nwọ deki chịẹma, anịatịḅị ọ́mịna ḍụaḅọrọma mị anị kpekisam.”
Figi Chịn Mị Ḅe Ḍawọye Mị
(Mat 24.32-35; Mak 13.28-31)
29Anịsịkị Jizọs Ḅe mị kaḅo mị nwọ kọn ini pịrịmẹ: “Ó figi chịn mị na ísí-a chịn mamgba na nwọ seni ḅiekoroma. 30Anịa ịnyanyama sakị pakaḅoarị sịkị, ó nemimẹ na ịrụa kpoin kpekisam. 31Anị gbọrị ḅara mị ḅụ, mayema paka se ómine ọrị sịkị, ó nemiḅịa na Tamụnọ Amanyanakiri mị anị ḅo-ẹ tọn aḅẹ.
32“Ọ́ mịn mị se ḅiekoroma! Maye mamgba mịẹḅịa, mịọkụ ḍumo sime apụ mamgba ma fị soka simeogbo. 33So na tomonikiri na ḅọrọḅịa, ọkụma ị̀ya ọkwẹịnma àrị ngịsị ḅọrọ-ẹkẹ.
Ọbị Nyana Gose Ḅụpalịmaye
34“Ómine ọ́ ḅụ ọbị! Ómine opuma ọ́ ḅụ seni opu alalị fị ḅụ na kụrọ iruḅu na pịrịma, pịkị mị ḍumo mị ḅie sime ḅụḅalaḅala na, anị Ene mị ḅofa ḅụnemika ḅụ ḅo ọ́mịna ọgọnọ gbana. 35Anịatịḅị anị ḍẹịn ḅara nwọse ḅo bebe tomonikiri ḅie sime apụ mamgba ọgọnọ gbanaḅịa. 36Ọ́ sịkịmamgba ọbị ḅụ sime se pịkị tẹkẹ, mịẹse ómine ịnyọ nyana se deinma pakaḅịa aye mamgba ḅụ toluḅọrọḅịa ḅara, se pịkị Tomoniḅọ Tọkụ Ḅe tọrọkọ chịẹḅịa ọkụ.”
37Jizọs Ḅe Oputẹkẹwarị mị ḅie enekaka se arịa enema ḅụ sime yeḍie-ḍiemẹ, se saso sọ sịkị ò so mun ḍin mị se Oliv Tụndụ mị ọgọnọ simesimemẹ. 38Tomoni mamgba dede mị nwọ seni Tamụnọ Oputẹkẹwarị mị munmunmẹ ò pokiḅịa ẹrẹchị.
Dewis Presennol:
Luk 21: OBTP
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
The Bible Society of Nigeria