Matta 12
12
Zhamndi ɗyine Fu̱ɗar Maasi ɓu̱ Yakhudeku (Nang ke fu̱ɗar Su̱bji)
(Mar 2:23-28; Luk 6:1-5)
1Ye sarchi nang, tu̱ Yesu mbu mbu̱ damku fu̱ɗar Su̱bji nang ke Fu̱ɗar Maasi ɓu̱ Yakhudeku. Yang ku̱me nu̱ mburindakwang a tu̱k meeri, tu̱ zha ɗyin ɗyi kaɓkandiku nu̱ mbu̱ damang a njiiranku.
2Nu̱ Parisekwang naki wanang, tu̱ ze nda ku za, “No nu̱ mburokwang a tlu̱na ɗyi nu̱ woparang nggu̱tlki ku̱ nduk shi ye Fu̱ɗar Maasi.” 3Tu̱ Yesu tlogha ye wor za, “Alapa nun na ɗyi nu̱ bu̱laki ɗyine Dauda ndu̱ nduki ɓaran sarchi nu̱ tu̱kki meeri ku ɓa? 4Nu̱ viki nu̱ mbu̱ Rafti ɓu̱ Magham ta da ɓu̱rti tolir wakakandang tu̱ nji ku, aa nu̱ke nu̱ shipa ku̱ aaki nji ɓa kope kurukwang ɗyenda. 5Shwat nun na bu̱laran mbu̱ wopar ɓu̱ Musa za, kurukwang wa shi ɗyi nggur nu̱ woparang nggu̱tlki gha mbu̱ Rafti ɓu̱ Magham Fu̱ɗar Maasi, yang tu̱ kha nu̱ shi zop ku ɓa goma? 6Yang nga zu̱ran ye nu wonji njif nu̱ dukki Rafti ɓu̱ Magham fan. 7Yang mbu̱ tu̱ga tun wa da mbu̱ ɗyi nu̱ lagarkatang zu̱ki za, ‘Nang shim sadka ɓa, nga shimkya nar zhiyaye,’ tu̱ga nun na zop ɓu̱ nduki nu̱ke nu̱ shi zop ku ɓa. 8Ku̱me Yi ɓu̱ nduk ɗya Zhinkir ɓu̱ Fu̱ɗar Maasi.”
Nu̱ Zurɗar Khari
(Mar 3:1-6; Luk 6:6-11)
9Nu̱ Yesu njigki ye maaran, tu̱ vi nu̱ mbu̱ kib tabar ɓaanda. 10Yang khuski nggur a nje nu̱ke kharan zurɗaran. Nu̱ke a shim ku̱s Yesu ku ndu̱ zop, tu̱ zham nda ku za, “Woɗye wopar ɓu̱ Musa wa njig za ku̱ nduk shaana nu̱ khaati Fu̱ɗar Maasi mu?”
11Tu̱ tlogha ye wor za, “Mbu̱ ndu̱ɓang a nje kha nduk da chele ɓaanu tu̱ yang nggu̱ɗ nu̱ gwa Fu̱ɗar Maasi, alapa nu̱ ndu̱ɓang am ɓu̱ fed nda nu̱ dam ɓa? 12Nduk wa duk ndu̱ɓang ndu̱ zhaaji ɓakh maɗyi. Nu̱ke wanang, nu̱ nggu̱tl tlu̱nar mbarkandi gha ye Fu̱ɗar Maasi ɓa.”
13Tu̱ ze khuskyang za, “A shorɗo khaarang.” Nu̱ shorɗaki, fan ndu̱ fan tu̱ khaaranang shaana tu̱ kha wa dandang. 14Tu̱ yang parise kwang vi nu̱ dam tu̱ shi sawari ku ɗyine ɗyi nu̱ke wor ka shiki ma tlagha nda Yesu.
Nyedli ɗyi nu̱ Annabi Yishaya zu̱ki
15Nu̱ Yesu daki mbu̱ ɗyi nu̱ke a nje, tu̱ njig ye maaranang tu̱ nduki khang mbu gaanje nda, tu̱ shaana wor mbe khaatiku ɓaanda kap. 16Tu̱ wu wor za ku̱ zu̱ za chin ke ki ye nduki ɓa. 17Ɗyi nang shi ma ku̱ nyel ɗyi nu̱ zu̱ki ku̱n she annabi Yishaya za, 18“Wonji maavi ɓang nang datki, chin ke ndolar ɓanga, ngaa tu̱k mu̱ndi ɓaran maɗyi. Ngga nyel nda ndu̱ Jiimbi ɓanga, ka shi kumar zhirekandi ye dlar maaku zum zum. 19Ɓu̱ shi keele ɓa, yang ɓu̱ da su̱quran nu̱ viɗ ɓa, nduk ɓu̱ tu̱k su̱quran yiti njivku ɓa. 20Ɓu̱ zha aa ghofi nu̱ shiki bing ma zhar nu̱ gha ɓa, ɓu̱ piita ɓai nu̱ shiki bing ma mu̱ti nu̱ gha ɓa, kope wa sa zhire tu̱ zu̱m loobo. 21Nduki nu̱ larji ka sa memu̱na wor nu̱ mbu̱ dlu̱man.”
Yesu ndu̱ Ba'alzabul
(Mar 3:20-30; Luk 11:14-23)
22Tu̱ ɗa ɓa ndu̱ khuski nggur yenda nu̱ke a su̱yen ndu̱ khu̱kheeti, yang ɗya meɗum, wonji puguman tu̱k. Nu̱ Yesu shaanaki nda nu̱ gha, tu̱ shi ɓalari a na maari. 23Tu̱ ndukyang shi lazham a zu̱ran ku za, “Woɗye nang ɗya Yi ɓu̱ Dauda shot ɓa goma?”
24Yang nu̱ Parisekwang tu̱kki wanang, tu̱ zu̱ ku za, “A komba khu̱kheetikwang ɓar ndu̱ zalale ɓu̱ Baalzabul kuji ɓu̱ khu̱kheetiku.”
25Nu̱ Yesu zu̱nki kwaari ɓaanda tu̱ ze wor za, “Aa nyi kwaaɗa shakki san rap a zhang yen ku, kwaaɗarang ɓu̱ ching ɓa. Yang tu̱k aa ghai aa rafa zhangki dlu̱ yen gha ku, ji aa ghayang aa raftang ɓu̱ ching ɓa. 26Mbu̱ Sheɗan a komba Sheɗan, kwaaɗar ɓaran ka ching gha kikimnda, nu̱ke Sheɗan a dakhla ɗyinan? 27Yang mbu̱ke ngaa komba khu̱kheetikwang ɓar ndu̱ zalale ɓu̱ Baalzabul, nu̱ mburonukwang ɗa, ɓaanda ka komba ndu̱ nyi zalalya. Nu̱ mburonukwang ka ɓa kumaki nu ɗyine nang. 28Yang mbu̱ ngaa komba khu̱kheetiku nang ɓar ndu̱ zalale ɓu̱ Jiimbi shakhshakhndi, na wa wuɗ za kwaaɗar ɓu̱ Magham a ɓa ye nu ɗo.
29“Sar da nduk ɓu̱ ɗu̱ma viri nu̱ kaa ɓu̱ njif nu̱ke du̱mbu̱ran tu̱ yang ghar ɗye varan ɓar ɓa, kope wa gu̱n njif du̱mbu̱rkandang nu̱gha dong, kom tu̱ ɗu̱ma ghar ɗye varanang ɓar mbu̱ rafti ɓaran.
30“Njif nu̱ke a su̱yen ndu̱ nga ɓa, ɗya nu̱ zhangndi ɓanga, yang tu̱k njif nu̱ke nu̱ shaata nga tabaran ɓa, a shikya lakhtaran nu̱gha. 31Ku̱me nang nga zu̱ran ye nu, ka ɗu̱ ma ndu̱m aa nyi zop ndu̱ ɓalar ndu̱mndi nu̱ nduki shiki ye Magham, yang njif nu̱ shiki ɓalar ndu̱mndi nu̱ ve Jiimbi shakhshakhndi ɓu̱ ndu̱m yenda sarda ɓa. 32Aaki zu̱ki ɓalar ndu̱mndi nu̱ ve Yi ɓu̱ nduku, ka yaapa yenda, yang aaki zu̱ki ɓalar ndu̱mndi nu̱ ve Jiimbi shakhshakhndi ɓu̱ ndu̱m yenda ɓa, aa mbu̱ qaandi virkirku nang aa fu̱ɗar wuri.
Qu̱fa ndu̱ Khar Yen
(Luk 6:43-45)
33“Qu̱far mbarkandi ka khakya yen mbarkandi, qu̱far malkandi ka khakya yen malkandi. Nduk ka zu̱n qu̱fa nu̱ ku̱nshe khar yen. 34Tun su̱ti ghu̱ɓtiku, tun ka zu̱ ɗyi mbarkandi kikimnda nu̱ke tun mu̱naranang? Ai ɗyi nu̱ke a memu̱na nduk nang ke ɗyi nu̱ka viki mbu̱ men. 35Nduk mbarkandi ka fedkya ɗyi mbarkandi mbu̱ du̱ngndi nu̱ke a nje mbe nda, yang nduk malkandi ka fedkya ɗyi malkandi mbu̱ du̱ngdi malkandi nu̱ke a nje mbe nda. 36Ngaa zu̱ran ye nu, nduki ka shiga su̱ aa nyi maatli ɓalar nu̱ wor shiki fu̱ɗar wuri. 37Ka kuma viɗ ɗyine ɓalar no zu̱ki, bai to kha ndu̱ zop bai to kha waare zop.”
Maalu̱m Taurete ku ndu̱ Pariseku a shim na ɗye Lazham
(Mar 8:11-12; Luk 11:29-32)
38Tu̱ ɓeeni Maalu̱m Taurete ku ndu̱ Parisekwang ze nda za, “Maalu̱m, chem a shim shi na ɗye lazham nu̱ke ka wuɗki za ta ɓa she Magham.”
39Tu̱ yang tlogha ye wor za, “Nduki nu̱ qaandi virkir meeni mu̱naranku nu̱ka sawa Magham ɓa. A shim na shipar ku, yang ɓu̱ wuɗ shipar nggur ye wor ɓa kope shipar ɓu̱ annabi Yunana. 40Ku̱me ba wa nu̱ Yunana shiki qaandi kunung, virkir ndu̱ fu̱ɗar mbe yurvi gwaanji, wanang tu̱k Yi ɓu̱ nduk ka shi qaandi kunung, virkir ndu̱ fu̱ɗari paran vu̱ghai. 41Fu̱ɗar wuri, nduki nu̱ Nineva ka ji ku su̱yen ndu̱ nduki nu̱ qaandi virkir meeni, tu̱ wuɗ ye nduki nu̱ qaandi virkir meeni za nu̱ shi ɗyi mbarkandi ku ɓa. Ku̱me ɓaanda wa nggoɗ ku nu̱ ku̱nshe wopar ɓalar ɓu̱ Magham nu̱ Yunana shiki. Yang wonji njif nu̱ dukki Yunana fan. 42Fu̱ɗar wuri, kuji nusukandi Sheba ka ji su̱yen ndu̱ nduki nu̱ qaandi virkir meeni tu̱ wuɗ ye wor za nu̱ shi ɗyi mbarkandi ku ɓa, ku̱me chin a ji ye maa ɓakhndi chin ɗu̱ ma tu̱k pooni kaɗari ɓu̱ kuji Solomon. Yang wonji njif nu̱ dukki Solomon fan.
Gaɓti ɓu̱ Khu̱kheeti Malkandi
43“Mbu̱ khu̱kheeti malkandi wa vi ɓar mbe nduku, ka ki baara maaku nu̱ke ɗyim nje si ɓa, a laɓ maa nu̱ke chin ka maski nu̱ nje. Yang mbu̱ nu̱ gwa ɓa, 44kaa zu̱ za, ‘Ngga gaɓ nu̱ ye ma nanga njigkyang.’ Mbu̱ aa gaɓ tu̱ gwa raftang kooran shakhshakh koɗmaran yang aaki nje mban ɓa, 45kaa gaɓ tu̱ ɗa qa khu̱kheetiku nggur wor mut nu̱ dukki nda ndu̱ maatli, ku̱ ɗa ɓa ku tu̱ khan nje. Gana fan, khar viti ɓu̱ njifang ka duk nu̱ guma maatli. Nduki nu̱ qaandi virkir meeni ka ɓa kha maatlin ku ba wanang.”
Khachinkirku ɓu̱ Yesu ndu̱ man
46A mbu̱ ɓalarang ye tabar ndukyang, tu̱ man ndu̱ khachinku a ɓa tu̱ ching vaanda gha dam a shim shi nda ɓalar ndu̱ chin. 47Tu̱ njif nggur ze nda za, “Wonji mo ndu̱ khatoku chingndan dam a shim shi nda ɓalar yoro.”
48Tu̱ yang tlogha ye njif nu̱ shiki ɓalarang yenda za, “Ki ke nana ndu̱ khatakwang na?” 49Tu̱ Yesu wuɗ nu̱ mburi nda kwang tu̱ zu̱ za, “Wonji nana ndu̱ khataku fan. 50Ku̱me kap njif nu̱ shiki ɗyi nu̱ke Zhinkir ɓang nu̱ mbu̱ viɗi a shimndan, chin ke khata aa khusku aa nusu, ndu̱ mankir ɓang tu̱k.”
Dewis Presennol:
Matta 12: ttrNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016