Matta 13
13
Ku̱rti ɓalar ndu̱ nu̱ kaɓti
(Mar 4:1-9; Luk 8:4-8)
1Ba ye fu̱ɗaran, tu̱ Yesu njig mbu̱ raftang, tu̱ ɗu̱ tu̱ ɗa kha gha me ɗyim chitndang. 2Tu̱ tabar nduki khang maɗyi kara nda nu̱ke tu̱ ji tu̱ vi varan nu̱ mbu̱ du̱mbu̱l ɗyim tu̱ kha gha tu̱ njig tabar ndukyang chingndan me ɗyimang. 3Tu̱ yang zu̱ ɗyiku ye wor khang ndu̱ ku̱rti ɓalar za, “Nu̱ ghuti nggur ɗu̱ki mbu̱ dam ɓaran ma kaɓti, 4a mbu̱ wos ye poonang, tu̱ ɓeenan nggu̱ɗ nu̱ yiti njivang, tu̱ ɗyikhtiku ɗu̱m ɓara. 5Tu̱ ɓeenan nggu̱ɗ nu̱ ye maa nu̱ke ɗya tandal, yang ghai nje ye maaran maɗyi ɓa. Tu̱ ye poonang a ɓana ɗau nu̱ke ghayang khang ɓa. 6Nu̱ fu̱ɗar a viki ɓwa, tu̱ su vaanda tu̱ ghwari, ma nu̱ke dlu̱dlarsi ve wor maɗyi ɓa. 7Tu̱ ɓeenan nggu̱ɗ nu̱ ye maa nu̱ke njekhtiku a si, tu̱ njekhtikwang gori tu̱ nggu̱tl wor gwaari. 8Tu̱ yang ɓeenan nggu̱ɗ nu̱ mbu̱ ghai mbarkandi, tu̱ nja woi ɓeenan won won mbu̱ yen, ɓeenan ɗyin njong ɗyin njong mbu̱ yen, ɓeenan ɗyin kunung ɗyin kunung mbu̱ yen. 9Nu̱ dlu̱mndi tu̱kti maa ku̱ tu̱ki.”
Ɗyi nu̱ saki tu̱ zu̱ Labar ɓu̱ nu̱ Kaɓtang
(Mar 4:10-12; Luk 8:9-10)
10Tu̱ nu̱ mburi nda kwa ɗu̱ she Yesu tu̱ zham nda ku za, “Nu̱m saki to ki ɓalar ye nduki mbe ku̱rti ɓalara na?”
11Tu̱ Yesu tlogha ye wor za, “Wa vu̱r ye nu ku̱ zu̱n nu ɗyi tukakandi nu̱ke a mbu̱ kwaaɗar ɓu̱ Magham, yang ɓaanda nu̱ vu̱r na ye wor ɓa. 12Ku̱me njif nu̱ke tun kha nda, ka shaata yenda nu̱ si tu̱ gama nda maɗyi, yang njif nu̱ke aa nu̱m khanda ɓa, aa ɗyi koɗommandi nu̱ke a kha ndang ka dlu̱ ɓara. 13Ngaa ɓalar ye wor ndu̱ ku̱rti ɓalarang ku̱me,
‘Aa wa nggu̱t ku ɓu̱ na ku ɓa,
aa wa ngga dlu̱mndi wora
ɓu̱ tu̱k ku ɓa, yang ɓu̱ da mban ku ɓa.’
14“Ɗyi nu̱ annabi Yishaya zu̱kyang wa nyel nu̱ ɗyin wora, ku̱me wa zu̱ za,
‘Tun ka ki ba tu̱ktan yang
sar da tun ɓu̱ da mban ɓa,
tun ka ki ba nggu̱tan tu̱k,
yang sar da tun ɓu̱ na ɓa.
15Ku̱me memu̱na nduki nang
wa shi kaaku̱ɗakh!
Dlu̱mndi wor nu̱ka tu̱k maa ɓa,
wa za yiti wor nu̱gha,
ma ku̱ na ku ndu̱ yiti wor ɓa,
ku̱ tu̱k ku ndu̱ dlu̱mndi wor ɓa.
Ma ku̱ memu̱na wor da mban
tu̱ ɗa mbu̱m ku nu̱ sha
ma shaana nga wor ɓa.’
16Yang barkya ve yitonu ku̱me a na maari, ndu̱ dlu̱mndonu tu̱k ku̱me a tu̱k maari. 17Zhire Nga zu̱ran ye nu, annabiku ndu̱ nu̱ dambi ku khang wa shim na ɗyi nun nakyang yang nu̱ na ku ɓa, tu̱ shim tu̱k ɗyi nun tu̱kkyang, yang nu̱ tu̱k ku ɓa.
Zu̱r mbu̱ Labar ɓu̱ nu̱ Kaɓtang
(Mar 4:13-20; Luk 8:11-15)
18“Wonji zu̱r mbu̱ ku̱rti ɓalar ɓu̱ nu̱ kaɓtang. 19Mbu̱ nduk wa tu̱k ɓalar kwaaɗarang yang nu̱ da mban ɓa, Sheɗan ka ɗa ɓa tu̱ lawa ɗyi nu̱ kaɓki nu̱ mbu̱ memu̱naranang ɓara. Nang ke pooni nu̱ nggu̱ɗki nu̱ yiti njivang. 20Pooni nu̱ nggu̱ɗki nu̱ ɗyin tandalang, a khar wa njif nu̱ tu̱kki ɓalar ɓu̱ Magham, tu̱ dlu̱ ndu̱ kasha. 21Yang nu̱ke nu̱ shi dlu̱dlarsi ɓa, nu̱ shoɓ maɗyi ɓa. Sarchi nu̱ bonye a ɓa ki ku̱me ɓalar ɓu̱ Maghamang, tu̱ gaɓ varan nu̱ gana. 22Pooni nu̱ nggu̱ɗki nu̱ mbu̱ njekhtikwang yang, a khar wa njif nu̱ tu̱kki ɓalar ɓu̱ Magham, yang damtar nu̱ke a mbu̱ larji ndu̱ shimndi gu̱na tu̱ nggu̱tl ɓalarang gwaari nu̱ke nu̱ kha ndu̱ boota ɓa. 23Nu̱ nggu̱ɗki nu̱ ye maa mbarkandang, a khar wa njif nu̱ ka tu̱kki ɓalar ɓu̱ Magham tu̱ da mban, tu̱ vu̱r boota. Ɓeenan won won mbu̱ yen, ɓeenan ɗyin njong ɗyin njong mbu̱ yen, ɓeenan ɗyin kunung ɗyin kunung mbu̱ yen.”
Gululu mbu̱ Dam
24Tu̱ Yesu gaɓ tu̱ zu̱ ku̱rti ɓalar nggur ye wor tu̱k za, “Kwaaɗar mbu̱ viɗi wa shipa khuski nggur nu̱ kaɓki pooni mbarkandi nu̱ mbu̱ dam ɓaran. 25Sarchi nu̱ke aaki a ɗyeni, tu̱ nu̱ zhangndi ɓaran ɗu̱ tu̱ ɗa kap gululu yenda nu̱ mbu̱ dam alkamyang, tu̱ ɗu̱ varan. 26Nu̱ kaɓtang gorki tu̱ vi ɗyin, tu̱ gululang tu̱k gori.
27“Tu̱ maaviku ɓu̱ nu̱ damang a ɓa she nda za, ‘Nu̱ rafa, woɗye to kaɓkya pooni mbarkandi nu̱ mbu̱ dam ɓaarang ɓa goma? Yang gululang a vi fu̱na?’
28“Tu̱ tlogha ye wor za, ‘Nu̱ zhangndi ɓang shiki.’
“Tu̱ maavikwang tlogha za, ‘Ta shim ɗyem chem a ɓu̱ɗ gululang nu̱ gha mu?’
29“Tu̱ ze wor za, ‘O, o, bai mbu̱ tun a ɓu̱ɗ gululang tun ka ɓu̱ɗ ɓar su̱yen ndu̱ pooni alkame mbarkandang. 30Njig ma wor tu̱ gorku su̱yen kope sarchi ku̱mndi, ye sarchi nang, ngga ze nu̱ ku̱mndikwang ku̱ nggaasan ndu̱ ku̱mndi gululang ɓar dong, tu̱ gu̱n nu̱gha ma ku̱ ɓaa va nu̱ gha. Kom tu̱ taba pooni alkame mbarkandang tu̱ zu̱n mbu̱ gatle ɓanga.’ ”
Ku̱rti ɓalar ndu̱ ye Pooni Mastad
(Mar 4:30-32; Luk 13:18-19)
31Tu̱ Yesu zu̱ ku̱rti ɓalar nggur ye wor za, “Kwaaɗar mbu̱ viɗi wa shipa ye pooni mastad nu̱ khuski nggur daki tu̱ kaɓ nu̱ mbu̱ dam ɓaran. 32Aa nu̱ke wa duk aa nyi ye pon koɗomme, yang mbu̱ wa gori, tu̱ ka kha gori tu̱ duk ɓeena ye qu̱farku kap, tu̱ ɗyikhtiku nu̱ viɗi shi pugdi ɓaanda nu̱ me bu̱n qu̱farang.”
Ku̱rti Ɓalar ndu̱ ye Pooni Yis
(Luk 13:20-21)
33Tu̱ Yesu gaɓ tu̱ zu̱ ku̱rti ɓalar nggur ye wor tu̱k za, “Kwaaɗar ɓu̱ Magham wa shipa yis, nu̱ nokhzi nggur lokhɓaki nu̱ mbu̱ buɗuki du̱ɓ zhiiri kunung, tu̱ yisang dlu̱ mbu̱ buɗukyang ɓar kap.”
Yesu wa shi Boote ndu̱ Ku̱rti Ɓalarku
(Mar 4:33-34)
34Yesu zu̱ ɗyikunang ye tabar ndukyang kap mbu̱ ku̱rti ɓala. Nu̱ zu̱ aa nu̱m ye wor ɓa kope ndu̱ ku̱rti ɓala. 35Shi wanang ma ku̱ nyel ɗyi nu̱ annabi Yishaya zu̱ki za, “Ngga shi ɓalar mbu̱ ku̱rti ɓalarku. Ngga zu̱ ɗyiku tukakandi ma nu̱ shiki larji.”
Dlar mbu̱ Ɓalar ɓu̱ nu̱ Kaɓtang
36Nu̱ Yesu njigki tabar ndukyang tu̱ vi nu̱ kaari, tu̱ nu̱ mburindakwang ɗu̱ she nda tu̱ ze nda ku za, “Dlo mbu̱ ku̱rti ɓalar ɓu̱ gululu nu̱ke a mbu̱ damang yerem nu̱ gha.”
37Tu̱ Yesu tlogha ye wor za, “Njif nu̱ kaɓki ye pooni mbarkandang ɗya Yi ɓu̱ nduku. 38Damang ɗya larji, pooni mbarkandang ɗya qusa kwaaɗarang, gululang ɗya qusonggi ɓu̱ nu̱ mu̱narang. 39Nu̱ zhangndi nu̱ kaɓki gululang ɗya sheɗan. Sarchi ku̱mndang ɗya lauɗarsi larji nu̱ ku̱mndikwang ɗya nu̱ ru̱kti ku ɓu̱ Magham.
40“Ba wa nu̱ka tabaki gululang tu̱ va nu̱ gha, ka kha wanang ve lauɗarsi larji. 41Yi ɓu̱ nduk ka ɓa ru̱k nu̱ ru̱ktiku ɓaran tu̱ taba nduki nu̱ka saki nduki ma solari ndu̱ nu̱ tlu̱na ɗyi malkandiku kap, tu̱ komba wor ɓar mbu̱ kwaaɗar ɓaran. 42Tu̱ mbuk wor nu̱ mbu̱ giɗim ɓai gu̱rgu̱rndi, ye maa nu̱ke ka shiki ghoori ndu̱ ku̱ti dliindi. 43Ye sarchi nang nu̱ dambi ku ka kha yarang wa fu̱ɗa mbu̱ kwaaɗar ɓu̱ Zhinkir ɓaanda. Nu̱ dlu̱mndi tu̱kti maa ku̱ tu̱kki.
Gu̱nar Tukakandi
44“Kwaaɗar viɗi wa shipa gu̱nar nu̱ tukaki nu̱ mbu̱ dami, nu̱ njif nggur gwaki, tu̱ gaɓ tu̱ yang tuka gha yang ku̱me wa kasha maɗyi tu̱ ɗu̱ tu̱ ɗa masa ɗye varan ɓar kap tu̱ masa damang.
Ndogdi nu̱ Zhaaji
45“Yang tu̱k, kwaaɗar ɓu̱ Magham wa shipa nu̱ gomar nu̱ke a laɓ ndogdi nu̱ zhaaji. 46Nu̱ gwaki ndogdi nggur nu̱ zhaaji maɗyikandi, tu̱ ɗu̱ tu̱ ɗa masa ɗye varan ɓar kap tu̱ masa ndogdang.
Ɗye ku̱si Yurvi
47“Wanang tu̱k, kwaaɗar viɗi wa shipa lem nu̱ woski nu̱ mbu̱ ɗyim chitndi ta ku̱s yurviku zu̱m zu̱m. 48Nu̱ nyeelki, tu̱ nu̱ dumndang ɗa duti nda nu̱ me gu̱mndang tu̱ kha gha ku tu̱ ɗu̱m yurvi mbarkandi kwa nu̱ mbu̱ kangku, tu̱ wos malkandikwang gha. 49Ka shi wanang ve lauɗarsi larji, nu̱ ru̱ktiku ɓu̱ Magham ka ɗa ɓa tu̱ shakh chele ɓu̱ nduki nu̱ mu̱narku ndu̱ nduki nu̱ jeembu ku. 50Tu̱ mbuk nduki nu̱ mu̱narkwang nu̱ mbu̱ giɗim ɓai gu̱rgu̱rndi, ye maa nu̱ke ka shiki ghoori ndu̱ ku̱ti dliindi.”
Khure Du̱ngndi ndu̱ Mewar Du̱ngndi
51Tu̱ Yesu zham wor za, “Tun wa da mbu̱ ɗyiku nang kap?” Tu̱ tlogha yenda ku za, “I, Zhinerem Gwaanji.”
52Ku̱me nang tu̱ ze wor za, “Kap Maalu̱m Taurete nu̱ dlu̱ki shogar ɓu̱ kwaaɗar mbu̱ viɗi, wa shipa nu̱ rafti nu̱ka fedki du̱ngndi mewakandi ndu̱ gu̱makandi mbu̱ gu̱nar ɓaran.”
Wa Zhang Yesu gha Nazaret.
(Mar 6:1-6; Luk 4:16-30)
53Nu̱ Yesu woɗaki zu̱ ku̱rti ɓalarku nang, tu̱ njig ye maaranang. 54Tu̱ Yesu ɗu̱ mbu̱ ghai ɓaran tu̱ nggaasi shogar ye nduki mbu̱ kib tabar ɓaanda, tu̱ shi lazhamku a zu̱ran ku za, “Khuski nang gwa pooni kaɗari ndu̱ zalale shir ɗye lazhamku nang fu̱na?” 55“Chin ke woi ɓu̱ kafinte nang de? Maryam ke dlu̱m man ɓa goma, Yaqub ndu̱ Yusufu ndu̱ Siman ndu̱ Yakhuda ke khachinkirku ɓaran de? 56Ɓeeni khachinku nusukandang ba a su̱yen ndu̱ chem ɓa goma? Yang a gwa ɗyiku nang kap fu̱na?” 57Tu̱ shi shokhnar ndu̱ chin ku maɗyi. Tu̱ yang Yesu ze wor za, “Annabi nu̱ka gwa zhaaji mbu̱ ghai ɓaran ndu̱ rafti ɓaran ɓa.”
58Yang ku̱me song maito ɓaanda, Yesu nu̱ ɗu̱ma shi ɗye lazham khang far ɓa.
Dewis Presennol:
Matta 13: ttrNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016