Yokhana 2
2
Gu̱ndi Ɓu̱rti nu̱ Shiki Kaana mbu̱ Dlar Ghai Galili
1Ye fu̱ɗar nu̱ kunung, tu̱ gu̱n ɓu̱rti Kaana nu̱ke a mbu̱ dlar ghai Galili, yang man Yesu a nje ye maaran. 2Yesu ndu̱ nu̱ mburindakwang wa ɗu̱ ku nje tu̱k ku̱me wa qa wor ma ɓu̱rtang. 3Nu̱ ɗyim anapang woɗaki, tu̱ man Yesu ze nda za, “Ɗyim anapang wa kata wora.”
4Tu̱ Yesu tlogha yenda za, “Nana, ta ɓa sha ma nu̱ma? Sarchi ɓang nu̱ shi dong ɓa.”
5Tu̱ man Yesu ze nu̱ tlu̱narkwang za, “Kap ɗyi nu̱ zu̱ki ye nu tun shi.”
6Yang zhir ndogdiku a nje wor njong du̱ngndan nu̱ke aa nyi da ka ɗu̱ma da ɗyim duuli ɗyirap ma yir ɗyin kunung. Nang ke pooni zhiirku nu̱ka shiki boote si ma me ghai shiɓti ru̱knar ɓu̱ Yakhudekwang.
7Tu̱ Yesu ze nu̱ tlu̱narkwang za, “Nyel ma zhirkwang nu̱gha ndu̱ ɗyimi.” Tu̱ nyel zhirkwang nu̱gha ndu̱ ɗyim tlu̱p tlu̱p.
8Kom tu̱ ze wor za, “Shokhla ma tun ɗu̱ si ye nu̱ gume ɓu̱rtang.” Tu̱ shokhla ku tu̱ ɗu̱ si. 9Ni nu̱ gume ɓu̱rtang darki ɗyim nu̱ gaɓki si ma ɗyim anapang, nu̱ zu̱n ye maa na gwaki si ku ɓa, aa nu̱ke nu̱ tlu̱narkwang wa zu̱ni. Tu̱ yang qa nu̱ zhin ɓu̱rtang nu̱ konggol 10tu̱ zu̱ za, “Aaki ka vu̱rkya ɗyim anap mu̱nkandi ɓar gumapaali, mbu̱ nduki wa za, kom tu̱ ɗa ɓa ndu̱ nu̱ke mu̱ndan kata. Yang ɓa to du̱ng ɗyim anap mu̱nkandang gha kope leendang!”
11Nang ke ɗye lazham nu̱ khaki ma ɗye saidu nu̱ gumapaali nu̱ Yesu shiki, yang shir nda Kaana nu̱ke a mbu̱ dlar ghai Galili. Wa wuɗ zhaaji ɓaran, tu̱ nu̱ mburindakwang maita nda.
12Qu̱rsan tu̱ Yesu gaɓ nu̱ Kaparnakhum, chin ndu̱ man ndu̱ khachinku ndu̱ nu̱ mburindakwang. Tu̱ kha gha ku nje me qaandi koɗomma.
Yesu wa Komba nu̱ Gomarku ɓara mbu̱ Kib ɓu̱ Maghamang
(Mat 21:12-13; Mar 11:15-17; Luk 19:45-46)
13Nu̱ sarchi tabar peetar ɗyin ɓu̱ Yakhudekwang shiki bing, tu̱ Yesu ɗu̱ Urshalima. 14Ve dalang Rafti ɓu̱ Maghamang tu̱ gwa ndukikwang masa dleeku ɓara, ndu̱ ndu̱ɓangku, ndu̱ mbooleku, kom ndu̱ nu̱ paatar mu̱zhindiku kharan gha. 15Tu̱ Yesu lu̱m kurpi ndu̱ zoori tu̱ komba wor ɓar mbu̱ dalang rafti ɓu̱ Maghamang kap ndu̱ ndu̱ɓangku ndu̱ dleeku ɓaandang. Tu̱ tumbula tebu̱rku ɓu̱ nu̱ paatar mu̱zhindikwang ye ghai, tu̱ wos mu̱zhindang ye wor gha. 16Tu̱ ze nduki nu̱ masar mbooleku ɓara za, “Ghar ma ɗyikunang ɓar fan! Gaɓ nu ni rafti ɓu̱ Zhinkir ɓang ma goma ɓa!”
17Tu̱ nu̱ mburindakwang kor ɗyi nu̱ bu̱laki mbu̱ ɓalar ɓu̱ Magham za, “Zhiri ɓu̱ rafti ɓa wa zu̱m memu̱nara.”
18Tu̱ dlegumeku ɓu̱ Yakhudekwang zham Yesu za, “Yang to ka wuɗkya nyi pooni ɗye lazham yerem ma nami nu̱ si chem zu̱n ɗyi nu̱ saki to shi ɗyi no shiki ku nanga na?”
19Tu̱ Yesu tlogha ye wor za, “Gu̱ɗa ma Rafti ɓu̱ Magham nang nu̱gha, ngga du̱n nu̱gha mbu̱ qaandi kunung.”
20Tu̱ Yakhudekwang tlogha yenda za, “Wa shi sonyi ɗyin vat qu̱m njong a ɗyine du̱n Rafti ɓu̱ Magham nang! Yang no za to ka du̱n mbu̱ qaandi kunung ya?” 21Yang Rafti ɓu̱ Magham nu̱ke Yesu a ɓalaranang, a ve man varan. 22Qu̱rse Yesu wa ji mbe mu̱ti, tu̱ nu̱ mburindakwang kor ɗyi nu̱ Yesu zu̱ki, tu̱ maita ɓalar ɓu̱ Magham bu̱lakandi kom ndu̱ ɗyi nu̱ Yesu zu̱kyang.
Yesu wa Zu̱n Memu̱na Aaki
23Sarchi nu̱ke Yesu a Urshalima ma tabar peetar ɗyinang, tu̱ nduki khang na ɗye lazhamku nu̱ shiki tu̱ maita dlu̱man ku. 24Yang Yesu nu̱ maita wor ɓa, ku̱me wa zu̱n aa nyi nduku. 25Yang nu̱ shim ku̱ nduk saida nduk yenda ɓa, ku̱me wa zu̱n ɗyi nu̱ke a mbu̱ memu̱na aa nyi nduku.
Dewis Presennol:
Yokhana 2: ttrNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016