Yokhana 11
11
Mu̱ti ɓu̱ Liazaru
1Khuski nggur a nje mbu̱ gure Betani dlu̱man za Liazaru, yang varan mu̱n ɓa. Betani ke ghai ɓu̱ Maryam ndu̱ khachinkir ɓaran Marta. 2Yang Liazaru nu̱ke varan mu̱n ɓa ndang ɗya khachin Maryam. Nang ke Maryam nu̱ puki mor nu̱ke zhiran mu̱nkandi ye Zhinerem gwaanji tu̱ pasha saaran ndu̱ ghosi ɗyinanang. 3Tu̱ yang nusuku nu̱ke a khachinkir ku nang ru̱k ye Yesu za, “Zhinerem gwaanji, njif nu̱ke ta ndola nda nang varan mu̱n ɓa.”
4Nu̱ Yesu tu̱kki wanang tu̱ zu̱ za, khaati nang ɓu̱ tlagha nda ɓa, yang Magham ndu̱ Yi ɓaran ka gwa zhaaji mban. 5Ji Yesu a ndola Maryam ndu̱ khachin Marta ndu̱ Liazaru. 6Yang kap ndu̱ nu̱ke wa tu̱k labar khaati ɓu̱ Liazaru, tu̱ shaata qaandi rap dong ye maa nu̱ke a sang.
7Qu̱rsan tu̱ ze nu̱ mburindakwang za, “Gaɓ mi nu̱ Yakhudiya.” 8Tu̱ nu̱ mburindakwang ze nda za, “Maalu̱m, ba mbu̱ qaandiku nang Yakhudekwang shimki ku̱ mbuk nda ro, yang ta ma gaɓti nu̱ nje tu̱k?”
9Tu̱ Yesu tlogha za, “Awe gwaanggu̱m rap kya mbu̱ piti da ɓa goma? Yang kap njif nu̱ke a yir nu̱ fu̱ɗari ɓu̱ ji saaran ɓa, ku̱me a na yarang ɓu̱ larji nang. 10Yang njif nu̱ke a yir nu̱ virkiri wa ka ji saaran ku̱me yarang nje she nda ɓa!”
11Nu̱ Yesu woɗaki zu̱ ɗyiku nang, tu̱ ze wor tu̱k za, “Rapterem Liazaru wa zhi ɗyeni, yang nga yir ma nakha nda mbe ɗyenirang.”
12Tu̱ nu̱ mburindakwang ze nda za, “Zhinerem gwaanji, mbu̱ ɗyenir wa da nda, ai, ka shaana.” 13Yesu a shikya ɓalar mu̱ti ɓu̱ Liazaru, yang nu̱ mburindakwang taman za a shikya ba ɗyeni a maasi.
14Tu̱ Yesu ze wor ye dalangi za, “Liazaru wa mu̱ɗi. 15Yang nga kashar ku̱me tunu nu̱ke shi ɗyinang nga njig ɓa, ma ku̱ maita nu. Yang ɗyem ba she nda.”
16Tu̱ yang Toma, nu̱ka qaki nda za, “Mugɗa” ze nyeezan nu̱ mbu Yesu kwang za, “Ɗyem tu̱k, chem a mu̱t su̱yen ndu̱ chin.”
Yesu ke Jiiri mbe Mu̱ti ndu̱ Nyifi
17Nu̱ Yesu khu̱lki nje, tu̱ tu̱k za, Liazaru wa shi qaandi vat mbu̱ ku̱jipi gaanje mu̱ti ɓaran. 18Yang ghai Betani a bing ndu̱ Urshalima nu̱ke nu̱ peeta kilomite kunung ɓa. 19Yakhudeku khang a ɓa she Marta ndu̱ Maryam ma qaandi mu̱ti khachindang ye wora. 20Nu̱ Marta tu̱kki za Yesu a ɓari tu̱ njig Maryam nu̱ kaari, tu̱ ɗu̱ ma gaɗa Yesu.
21Tu̱ Marta ze Yesu za, “Zhinerem gwaanji, mbu̱ ta nje tu̱ga khata nu̱ mu̱t ɓa. 22Yang nga zu̱n aa leendang Magham ka vu̱r aa nyi tun no khuɗki she nda.”
23Tu̱ Yesu ze nda za, “Khato ka ji tu̱k.”
24Tu̱ Marta tlogha yenda za, “Nga zu̱n ka ji sarchi jiiri ɓu̱ mu̱tiku fu̱ɗar wuri.”
25Tu̱ Yesu ze nda za, “Ai, nga ke jiiri mbe mu̱ti, nga ke nyifi tu̱k. Njif nu̱ maitaki nga, aa wa mu̱ɗi, ka ji. 26Njif nu̱ke a nje nu̱ nyifi, tu̱ yang ki maita nga, ɓu̱ mu̱t sar da ɓa. Ta maita nang mu?”
27Tu̱ Marta tlogha za, “I, Zhinerem gwaanji, nga maita to ke Masiya yi ɓu̱ Magham nu̱ke a ɓar larji.”
Yesu wa Shi Ghoori
28Nu̱ zu̱ki wanang, tu̱ Marta ɗu̱ tu̱ ɗa qa khachin Maryam nu̱ konggol tu̱ ze nda za, “Maalu̱m a ɓa yang a qa ro.” 29Nu̱ tu̱kki wanang, tu̱ ji ɗyin wakho tu̱ ɗu̱ she Yesu. 30Yang Yesu nu̱ ɗa vi nu̱ mbu̱ ghayang dong ɓa. Ba a nje ye maa nu̱ Marta gaɗaki ndang. 31Nu̱ Yakhudeku nu̱ke a su̱yen ndu̱ Maryam mbu̱ rafti a du̱ng memu̱naranang naki wa ji tu̱ vi nu̱ dam ɗyin wakho, tu̱ mbu gaanje nda ku, a tamandan ku za a yir kya she ku̱jipang ma ghoori.
32Nu̱ Maryam khu̱lki ye maa nu̱ke Yesu a si, tu̱ na nda tu̱ nggu̱ɗ nu̱ gume nda tu̱ ze nda za, “Zhinerem gwaanji, ai mbu̱ ta nje tu̱ga mu̱dla nang nu̱ mu̱t ɓa.”
33Nu̱ Yesu naki a ghoori, yang Yakhudeku nu̱ ɗa ɓa ki ndu̱ chin a ghoori ku tu̱k, tu̱ ɗya damta Yesu mbu̱ memu̱naran maɗyi. 34Tu̱ ze wor za, “Tun pa nda nu̱ fu̱na?”
Tu̱ ze nda ku za, “Zhinerem gwaanji a ɓo to na.”
35Tu̱ Yesu shi ghoori.
36Nar nang, tu̱ Yakhudekwang zu̱ za, “Na ma pooni ndolar nu̱ke a shiran yenda ka!”
37Tu̱ yang ɓeenan shi ɓalar chele ɓaanda a zu̱ran ku za, “Chin qu̱nki yiti pugumang. Mbu̱ a shimndan nu̱m saki nu̱ nggu̱tl ku̱ khuski nang mu̱t ɓa?”
Yesu wa Nakha Liazaru mbe Mu̱ti
38Nu̱ Yesu gaɓki tu̱ damta mbu̱ memu̱naran, tu̱ ɗu̱ she ku̱jipang. Yang ku̱jipang ɗya gulang ndooga, ndu̱ ndogdi nggur nu̱ zaki me ku̱jipang si. 39Tu̱ Yesu zu̱ za, “Tu̱pa ma ndogdang ɓara.”
Tu̱ yang Marta khachin mu̱tang ze Yesu za, “Zhinerem gwaanji, ai, leendang wa shi ɗu̱ng, ku̱me qaandi ɓaran vat meeni nje.” 40Tu̱ Yesu ze nda za, “Nang zu̱ yor nga za mbu̱ ta maita to ka na zhaaji ɓu̱ Magham de?”
41Tu̱ tu̱pa ndogdang ɓar ku. Tu̱ Yesu da yitan nu̱ viɗi tu̱ zu̱ za, “Aba, nga kuna no tu̱kki nga. 42Aa nu̱ke nga zu̱n ta ka tu̱kti nga, yang nga zu̱ wanangang ku̱me ku̱ nduki nu̱ke a nje chingndan ye maa nang maita za ta ru̱kki nga.”
43Nu̱ zu̱ki wanang tu̱ da su̱quran nu̱ viɗi tu̱ zu̱ za, “Liazaru, a vi nu̱ dam!” 44Tu̱ mu̱tang a vi nu̱ dam, saaran ndu̱ kharan kap gu̱ndan ndu̱ lawanyi linen, mbu̱ yitan maiɗaran ndu̱ ɓeeni lawanyi nu̱ paki nda si. Tu̱ Yesu ze wor za, “Kol ma nda nu̱ gha, tu̱ ɗu̱ varan.”
Yakhudekwang wa Daasa ku ma Tlagha Yesu
45Ku̱me nang tu̱ Yakhudeku khang nu̱ ɗa ɓa ki ye Maryam na ɗyi nu̱ Yesu shiki, tu̱ maita nda ku. 46Tu̱ yang ɓeenan ɗu̱ she Parisekwang tu̱ ɗa zu̱ ɗyi nu̱ Yesu shikyang ye wora. 47Tu̱ kuruku rututundi ndu̱ Parisekwang qa tabar ɓaanda. Tu̱ zham yen ku za, “Chem a shikya nu̱m ɗo? Wonji khuski nang a nje a shi ɗye saiduku khang! 48Mbu̱ chem wa njigti nda tu̱ ki shi ɗyiku nang nduki kap ka maita nda. Kom Romekwang kaɗa ɓa tu̱ lawa maa ɓaarem ɓar khaarem tu̱ gu̱ɗa Rafti ɓu̱ Maghamang yerem nu̱gha!”
49Tu̱ yang da chele ɓaanda nu̱ka qaki nda za Kayafa nu̱ke chin ke gorkir ɓu̱ kuruku ye sonyiranang, ze wor za, “Tun nang nun zu̱n aa nu̱m ɓa! 50Nun da mban de, ai, wa duk ku̱ nduk da mu̱t ku̱me nduki khang, ye ku̱ nduki kap su̱ya.”
51Ɓalar nu̱ Kayafa shiki nang ɗya kwaari ɓaran ɓa, yang nu̱ke chin ke gorkir ɓu̱ kuruku ye sonyiranang, wa shi ɓalar nu̱ke Magham kya zu̱ran mbe nda nu̱ ɗyine Yesu ka mu̱t ku̱me nduki nu̱ Yakhuda. 52Yang ku̱me Yakhudeku ɗyenda ɓa, ku̱me ku̱ ɗa taba ɗyin qusonggi ɓu̱ Magham nu̱ke lakhtaran aa fu̱n tu̱ kha da ku. 53Yang ma ji ye fu̱ɗaranang, tu̱ ku̱s sawari ɗyi nu̱ke wor ka shiki ma tlagha Yesu.
54Ku̱me nang Yesu nu̱ shi yir chele ɓu̱ Yakhudeku ye dalang tu̱k ɓa, tu̱ yang njig ye maaranang, tu̱ mbu ghai nu̱ke a bing ndu̱ me gaari, tu̱ vi nu̱ mbu̱ ghai nggur nu̱ka qaki za Ifraimu. Tu̱ kha gha ku nje ndu̱ nu̱ mburindakwang.
55Nu̱ tabar Peetar ɗyin ɓu̱ Yakhudekwang shiki bing, tu̱ nduki khang na viki mbu̱ gure ɗu̱ ku Urshalima ma shiɓti khar shakhshakh me ku̱ tabarang shi. 56Tu̱ ki laɓ Yesu ku, a nje ku ching ching mbu̱ Rafti ɓu̱ Maghamang, a zham yen ku za, “Tun nakya nu̱ma? Ka ɗa ɓa mbu̱ tabar nang shoɗa?” 57Ku̱me kuruku rututundi ndu̱ Parisekwang wa woɗa zu̱ran za, Kap njif nu̱ zu̱nki ye maa nu̱ke Yesu a si, ku̱ ɗa ɓa tu̱ zi a ku̱s nda nda.
Dewis Presennol:
Yokhana 11: ttrNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016