Luka 6
6
Ruu Diki Ɔ̃sɔnang
(Mat 12:1-8; Mar 2:23-28)
1Ka Diki Ɔ̃sɔnang ɓɔɔ kagn, Yeesɔ sɔ̀ɔ gbalang ɓɔɔ tɛɛ yeti jaa zee, a zang ɓɔɔ ri mantɛ vuu ka bii ɓiɓɛ, ri lɔɔrɔ yuu zee, ri shaatɛ ka naa ɓarɛ, ri shaayi. 2Ɓɔɔ zang Farisi ri zi naa weɓe, ri hɛ̃ɛyi, ri tɔɔ, “Nɔɔ ɓá nyaa ɓɔɔ Laa dang ka ruu vi, nɔɔ palɛ shonang ka Diki Ɔ̃sɔnang viya?”
3A Yeesɔ kasɛ ri nyaa tɔɔ, “Nɔɔ gã vuu ɓɔɔ Dawuda palɛ ka diki ɓɔɔ nyɔkɔ nyɔ wu, nɛɛ zang ɓɔɔ ri dũng wu ɓɛɛ gngn kpang ya? 4Naa ɓɔɔ daa ka yeti Gãa Laa, daa tuu borodi ɓɔɔ zang dang nyaa nɛɛ zang ɓɔɔ ri dɔɔ Laa vuu ka Gãa Laa kɔ ri shaa shɛ̃ɛning. A shaa nɛɛ zang ɓɔɔ ri nɛɛ wu kpang ya?”
5A hangsɛ nyaa ruu tɔɔ, “Jaa shɔnzang kɔ kpanti Diki Ɔ̃sɔnang.”
Yeesɔ masɛ zang ɓɔɔ naa ɓakɛ katɔ ɓɛɛ
(Mat 12:9-14; Mar 3:1-6)
6Ka Diki Ɔ̃sɔnang ɓɔɔ kagn, Yeesɔ tusu zang vuu ka yeti gãa zɔɔ kpalɛnang ɓarɛ. Ka yeti gãa kaɓa, zang ɓɔɔ naa nakn ɓiɓɛ ɓakɛ katɔ kagn nɔngkɔ. 7Zang Farisi nɛɛ zang ɓɔɔ ri tusu zang vuu, ri tɛ̃̀ɛ wu jĩng ka bii, nɛɛ tɔ̀ɔ, ri zirɛ naa masɛ zang katɔ ka Diki Ɔ̃sɔnang ya. Tɔ̀ɔ, ri walɛ gbalang ɓɔɔ ri naa jɛ̃ɛ wu ruu ɓɛɛ kati. 8Yeesɔ ti zi vuu ɓɔɔ ri rɛ̃rɛ ka yeti ɓarɛ ɓi tɔ. A kɔɔ yɔɔ ɓɔɔ naa ɓakɛ katɔ tɔɔ, “Arɛ mɔɔ shii ka nihn.” A yɔɔ seepaa a ka bii Yeesɔ. 9A Yeesɔ kɔɔ zang tɔɔ, “Ń hɛ̃ɛ nɔɔ karɛ, ‘Ruu Laa ɓɔɔ Musa beeyi, kasɛ katɔ nɛɛ ruu pàlɛ̀ zang tɔ̃ɔ ka Diki Ɔ̃sɔnang ya, kɔ nɛɛ ruu palɛ vuu shi kpang? Nɛɛ ruu masɛ zang ya, kɔ nɛɛ ruu nyɔ zang vɔrɔ katɔ kɔ jong?’ ” 10A Yeesɔ pɛ̃ɛrɛ zang ɓɔɔ ri kiiri wu nyaa ka teteng ɓɛɛ nandon, a kɔɔ yɔɔ ɓɔɔ naa ɓakɛ katɔ tɔɔ, “Dĩi naa ɓaaɓɛ ta.” A yɔɔ dĩi naa, a naa ɓiɓɛ nwang tɔ̃ɔ kaa nɔng tɔkn.
11Gnvɔ shaa rɛɛ Farisi nɛɛ zang ɓɔɔ ri tusu zang vuu, ri daa hɛ̃ɛlɛ zɔɔ naa vuu ɓɔɔ ri palɛ Yeesɔ ɓɛɛ.
Zang shonang kopi tu ziti ɓɔɔ Yeesɔ shɛ̃ɛrɛ ɓɛɛ
(Mat 10:1-4; Mar 3:13-19)
12Ka diki kaɓa, Yeesɔ naa daa Laa gaanang ka kɔpɔ. Yeesɔ gàa Laa nɛɛ zĩi sasak, nɔng gãntɛ nɛɛ mani. 13Nɔng naa gãntɛ tɔ, a naa ɓaa nyaa ka zang ɓɔɔ ri mantɛ vuu ka bii ɓiɓɛ, a shɛ̃ɛrɛ zang kopi tu ziti a tɔɔ nɛɛ ri ɓarɛ kaa zang shonang ɓiɓɛ. Zang shonang ɓɔɔ Yeesɔ shɛ̃ɛrɛ kaɓa, zang ɓaa ri nɛɛ, 14Siman ɓɔɔ Yeesɔ naa a wu nung nɛɛ Bituru ɓɛɛ, nɛɛ jaa niiɓɛ Anduru. A ɓɔɔ Yakub nɛɛ Yɔhana nɛɛ Filibu, nɛɛ Batolomi, 15nɛɛ Matiyu, nɛɛ Tooma, nɛɛ Yakub jaa Alifaya, nɛɛ Siman ɓɔɔ kasɛ nɛɛ tipi ɓarɛ wu gbãayu nɛɛ knti kpang ɓɛɛ 16nɛɛ Yahuda jaa Yakub, a ɓɔɔ Yahuda Isikariyoti ɓɔɔ naa nyɔ yuu Yeesɔ ɓɛɛ.
Yeesɔ tusu zang vuu, a ti masɛ ri
(Mat 4:23-25)
17Yeesɔ shooro tɔ nɛɛ kɔpɔ nɛɛ zang ɓɔɔ wu shɛ̃ɛrɛ ri, a daa shii ka nyɛlɛ. Zang ɓɔɔ ri mantɛ vuu ka bii ɓiɓɛ dɔɔli, nɛɛ zang dɔɔli ɓɔɔ ri alɛ nɛɛ tipi Yahudi, nɛɛ gari Urushalima, a ɓɔɔ zang ɓɔɔ ri alɛ nɛɛ gari Taya nɛɛ Sidong ɓɔɔ ka nyaa waapo ɓɛɛ. Ri arɛ nɛɛ ri naa tãa yee Laa ɓɔɔ wu rangnɛ, nɛɛ wu ti màsɛ̀ ri kɔnang ɓarɛ. 18A Yeesɔ ti masɛ zang ɓɔɔ suru shi kpang ka bii ɓarɛ kaa jong. 19Zang ɓɔɔ ri kpalɛ zɔɔ ɓɛɛ ri kasɛ nɛɛ ri lee Yeesɔ naa ka bii, ka ruu ɓɔɔ, naa zang masɛnang nwangkɛ nɛɛ bii ɓiɓɛ, masɛ zang ɓɛɛ.
Tĩnang tãanang nɛɛ nyaa kunang
(Mat 5:1-12)
20Yeesɔ tuu jĩng pɛ̃ɛrɛ zang ɓɔɔ ri mantɛ vuu ka bii ɓiɓɛ, a kɔɔ ri nɛɛ:
“Tĩnang tãanang ɓi ɓɔɔ manɛ, ɓɔɔ vuu ka naa manɛ kpang ɓɛɛ. Ka ruu ɓɔɔ, Laa naa a nɔkɔ vuu tɔ̃ɔ ɓɔɔ wu a zang ɓɔɔ ri ta wu nɛɛ wukɔ Kpanti ɓɛɛ. 21Tĩnang tãanang ɓi ɓɔɔ manɛ, ɓɔɔ nyɔkɔ nyɔ nɔɔ katɔ kãntang keɓe ɓɛɛ, Laa naa a nɔɔ vuu shaanang ɓɔɔ yi nɔɔ buru ɓɛɛ ditɔ.
“Tĩnang tãanang ɓi ɓɔɔ manɛ ɓɔɔ nɔɔ kaa nyavɔ kãntang keɓe ɓɛɛ, ka ruu ɓɔɔ, nɔɔ naa laarɛ ditɔ ɓɛɛ. 22Tĩnang tãanang ɓi ɓɔɔ manɛ kɔ, naa zang kasɛ ruu manɛ kpang, zang bɛ̃ɛ nɔɔ, zang dãa nɔɔ, zang kɔɔ nɛɛ nɔɔ shi kpang, ka ruu Jaa Shɔnzang. 23Zang nɛɛ palɛ nɔɔ tɔ naa weɓe, nɔɔ dɔɔ bii katɔ. Nɔɔ ti tãa tĩnang, ka ruu ɓɔɔ, Kpanti Laa shing nɔɔ vuu ɓɔɔ kagn bang ka lapa ɓɛɛ. Daa ɓarɛ pàlɛ́ zang nyaa shonang Laa doo nɔngkɔ ka tĩng. 24Jĩng dannang kagn yuu manɛ, ɓɔɔ vuu naa manɛ kagn ɓɛɛ, ka ruu ɓɔɔ, nɔɔ walɛ tĩnang tãanang manɛ tɔ ɓɛɛ. 25Jĩng dannang kagn yuu manɛ, ɓɔɔ buru manɛ puu katɔ kãntang keɓe ɓɛɛ, nyɔkɔ naa nyɔ nɔɔ ditɔ.
“Jĩng dannang kagn yuu manɛ ɓɔɔ nɔɔ laarɛ katɔ kãntang keɓe, ka ruu ɓɔɔ, yeti manɛ naa lasɛ ditɔ gbãng gbãng, nɔɔ ti naa kaa nyavɔ ditɔ dɔɔli ɓɛɛ.
26“Jinang dannang kagn yuu ɓaaɓɛ, naa zang piti rang yee tɔ̃ɔ ka yuu ɓaaɓɛ, ka ruu ɓɔɔ, ri rang yee tɔ̃ɔ doo nɔngkɔ ka yuu zang ɓɔɔ ri nwãarɛ zang nɛɛ ri zang nyaa shonang Laa ɓɛɛ.
Kasɛ zang ɓɔɔ shing jĩng nɛɛ mɔɔ kpang katɔ
(Mat 5:38-48; 7:12a)
27“N kɔ̀ɔ́ nɔɔ, ɓɔɔ nɔɔ tãa ruu kɔ n rang ɓɛɛ katɔ ɓɛɛ. Nɔ́ɔ kasɛ ruu zang ɓɔɔ nɔɔ shing jĩng nɛɛ ri kpang katɔ. Nɔɔ ti palɛ zang ɓɔɔ ri kasɛ ruu manɛ kpang tɔ̃ɔ katɔ. 28Nɔɔ gaa Laa ka ruu zang ɓɔɔ ri rang yee shi kpang ka yuu manɛ, nɛɛ zang ɓɔɔ ri dang nɔɔ jĩng ɓɛɛ. 29Zang ɓɔɔ nɛɛ nyɔ nɔɔ ka kashoo dang gbete, nɔɔ raa wu dang gbete, wu ti nyɔrɛ. Zang ɓɔɔ nɛɛ ti ta fɔ̃ɔrɔ bang ɓaaɓɛ, ɓɔɔ mɔɔ hãa nɛɛ biling, mɔɔ ti zãa wu ɓɔɔ tɔkɔlɔng ɓɔɔ mɔɔ hãa nɛɛ tĩng kpang. 30Zang ɓɔɔ nɛɛ gaa vuu ka naa ɓaaɓɛ, mɔɔ zãa wu kpang. Zang ɓɔɔ nɛɛ ti tuu vuu ɓaaɓɛ, mɔɔ hɛ̃ɛyi nɛɛ zang sɔɔrɔ mɔɔ kpang. 31Vuu ɓɔɔ nɔɔ kasɛ nɛɛ zang ri palɛ nɔɔ, nɔɔ pàlɛ̀ ri doo nɔngkɔ.
32“Naa nɔɔ kasɛ ruu zang ɓɔɔ ri kasɛ ruu manɛ kɔ shɛ̃ɛning, nɔɔ naa walɛ ɓu vi ka bii Kpanti Laa viya? Ka ruu ɓɔɔ, zang ɓɔɔ ri dũng Kpanti Laa kpang, ri kàsɛ́ ruu zang ɓɔɔ kasɛ ruu ɓarɛ katɔ ɓɛɛ. 33Naa nɔɔ pàlɛ̀ zang ɓɔɔ pàlɛ́ nɔɔ tɔ̃ɔ kɔ tɔ̃ɔ shɛ̃ɛning, nɔɔ naa walɛ vi ka naa Laa viya? Zang ɓɔɔ ri dũng Laa kpang ri palɛ doo nɔngkɔ. 34Naa nɔɔ a zang ɓɔɔ nɔɔ zi tɔ nɛɛ ri naa sɔɔrɔ nɔɔ vuu manɛ katɔ kɔ, nyaa kɔ́pɔ́ shɛ̃ɛning, nɔɔ naa walɛ vi ka naa Kpanti Laa viya? Zang ɓɔɔ dũng Laa kpang, ri a zang ɓɔɔ ri dũng Laa kpang kɔ doori nyaa kɔ́pɔ́, nɛɛ tɔ̀ɔ, ri naa ta kaa doo nɔngkɔ tɔkn. 35Nɔɔ kasɛ ruu zang ɓɔɔ ri shing jĩng nɛɛ nɔɔ kpang katɔ. Nɔɔ palɛ ri tɔ̃ɔ. Nɔ́ɔ ti a zang vuu nyaa kɔ́pɔ́ nɛɛ zang wu naa sɔɔrɔ nɔɔ tɔkn kpang. Tɔ̀ɔ, nɔ́ɔ naa walɛ vuu ɓɔɔ Laa shing nɔɔ ɓɛɛ kati. Nɔ́ɔ ti naa nwáng wujɛ Kpanti Laa kati. Ka ruu ɓɔɔ, gn zang ɓɔɔ zãa wu kpang, nɛɛ zang ɓɔɔ yeti ɓarɛ shi kpang kɔng wu katɔ ɓɛɛ. 36Gn zang wu kɔng nɔɔ katɔ, naa ɓɔɔgn zang kɔng Daa manɛ ɓɛɛ.
Nɔɔ jɛ̃ɛ zang ruu kpang
(Mat 7:1-5)
37“Nɔ́ɔ jɛ̃̀ɛ zang ruu kpang, Kpanti Laa wu ti naa jɛ̃ɛ nɔɔ ruu kpang kɔ doori. Nɔ́ɔ kɔɔ kpang nɛɛ zang keɓe palɛ vuu shi kpang tɔ kpang. Tɔɔ Kpanti Laa wu ti naa kɔɔ kaa takpang nɛɛ nɔɔ palɛ vuu shi kpang tɔ kpang. Nɔɔ yaa zang gbalang vuu shi kpang ɓɔɔ zang palɛ nɔɔ ɓɛɛ katɔ, tɔ̀ɔ Laa wu ti naa yaa nɔɔ gbalang vuu shi kpang ɓɔɔ nɔɔ palɛ ɓɛɛ. 38Nɔɔ a zang vuu katɔ, Laa naa a nɔɔ ditɔ jong. Ɓɔɔ nɔɔ ta ka naa Laa, naa yi nyaa waka katɔ tɔ̃ɔ tɔ̃ɔ, zang naa zĩiti, zang ĩi naa kagn. Zang wu ti tɛ̃ɛ ɓɔɔ tɔkn wu kãng ka tipi, tɔɔ zang wu a nɔɔ kati. Ka ruu ɓɔɔ, waka ɓɔɔ nɔɔ mã zang vuu nɛɛ mani, Laa naa mã nɔɔ doo nɛɛ wukɔ ɓɛɛ.”
39A Yeesɔ ti rang ri yee nɛɛ nyaa vuu jeenang tɔɔ, “Zang jĩng ringtang, yi zang jĩng ringtang labalang ɓɔ̀ɔ ri ya? Ri dàa gɔlɔ zɔɔ ka yeti too kpang ya? 40Zang ɓɔɔ mantɛ vuu, ɓa zang ɓɔɔ tusu wu vuu ɓi kpang. Nɛɛ mantɛ vuu tɔ piti, naa nwang ɓi kaa doo naa zang ɓɔɔ tusu wu vuu kɔ.
41“Mɔɔ shíng jĩng ka zũng laa ɓɔɔ ka jĩng ɓaazung kɔ shɛ̃ɛning, mɔɔ yee laa ɓaa ka lawaa bang ɓɔɔ ka jĩng ɓaaɓɛ kpang ka ruu viya? 42A mɔɔ kɔɔ ɓaazung ɓu kaa biya nɛɛ, ‘Manzung, n kaaɓi, n sha mɔɔ zũng laa tɔkɔlɔng kɔ ka jĩng ɓaaɓɛ ɓi.’ A mɔɔ ti zi lawaa bang ɓɔɔ ka jĩng ɓaaɓɛ ɓi kpang viya? Zang ɓɔɔ nwãarɛ zang nɛɛ vuu palɛnang ɓɛɛ, nwangsɛ lawaa bang ɓɔɔ ka jĩng ɓaaɓɛ gbongkarɛ, tɔ̀ɔ, mɔɔ zi nɔng kaa tɔ̃ɔ, mɔɔ sha zũng laa ɓɔɔ ka jĩng ɓaazung kati.
Láa nɛɛ zɔ̃ng jaa ɓɔɔ wu ra ɓɛɛ
(Mat 7:16-20; 12:33-35)
43“Láa ɓɔɔ tɔ̃ɔ ra jaa ɓɔɔ shi kpang ɓi kpang. A laa ɓɔɔ shi kpang ti ra jaa ɓɔɔ tɔ̃ɔ ɓi kpang kɔ doori. 44Zang zi laa nung ɓi ka jaa ɓɔɔ wu ra ɓɛɛ. Zang hãa mangɔrɔ ɓɔɔ ka laa kaashiyaawo ya? Zang ti hãa jaa sĩiri katɔ ka bii kɔkɔ gbantang ya? 45Shɔnzang ɓi doo nɔngkɔ. Zang tɔ̃ɔ nwangsɛ ɓi doo vuu tɔ̃ɔ ɓɔɔ ka yeti ɓiɓɛ kɔ. A zang shi kpang ti nwangsɛ ɓi doo vuu shi kpang ɓɔɔ ka yeti ɓiɓɛ kɔ. Ka ruu ɓɔɔ, vuu ɓɔɔ nwang nɛɛ nyaa shɔnzang piti, a ɓi nɛɛ yeti ɓiɓɛ ɓɛɛ.
Zang ziti ɓɔɔ ri mãa gãa ɓɛɛ
(Mat 7:24-27)
46“Ka ruu vi, nɔɔ ɓaarɛ m nɛɛ ‘Kpanti, Kpanti,’ a nɔɔ palɛ vuu ɓɔɔ n kɔɔ nɔɔ kpang viya? 47Zang piti ɓɔɔ a ka bii mɛɛ, ɓaa shoo ka yee ɓɔɔ n rangnɛ, a ti palɛ vuu ɓɔɔ n kàsɛ̀, ń tusu nɔɔ naa ɓɔɔ zang kaɓa nwang ɓɛɛ. 48Zang kaɓa nwang naa zang ɓɔɔ tɔɔ wu mãa gãa, a shu too, loo doo gãa ka yuu pɛngkɛ tɔ̃ɔ tɔ̃ɔ ɓɛɛ. Diki ɓɔɔ mii rang kpayi, nyɔ ka bii gãa, palɛ gãa vuu ɓɔɔ kpang, ka ruu ɓɔɔ, zang mãa tɔ̃ɔ tɔ̃ɔ ɓɛɛ. 49A zang ɓɔɔ tãa yee mɛɛ, a palɛ vuu ɓɔɔ n kɔɔ ɓɛɛ kpang, nwang naa zang ɓɔɔ shu too gãa ka takpang ɓɛɛ. Loo doo gãa ɓiɓɛ ka tipi waati. Diki ɓɔɔ mii rang kpayi nyɔ ka bii gãa, gãa kaɓa tantɛ watɛnang. Watɛnang ɓiɓɛ shing baabii kagn kɛɛm.”
Dewis Presennol:
Luka 6: mzmNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Revised edition © 2018 Wycliffe Bible Translators, Inc.and The Nigeria Bible Translation Trust First edition published by © 1994 International Bible Society and The Nigeria Bible Translation Trust