Luka 5
5
Zang jaazĩi yinang ɓɔɔ Yeesɔ ɓaa ri nyaa ɓɛɛ
(Mat 4:18-22; Mar 1:16-20)
1Diki ɓɔɔ kagn, Yeesɔ shii ka nyaa mii waapo Janesara, a zang ɓɔɔ ri kpalɛ zɔɔ ri màasɛ́ wu, ri kasɛ nɛɛ ri tãa yee Laa. 2A Yeesɔ raa jĩng zi tonsi ziti ɓɔ̀ɔ́ zang jaazĩi yinang ka nyaa mii waapo. Zang jaazĩi yinang kaɓa, ri nwang tɔ nɛɛ yeti tonsi, ri sɔɔ kaa jang jaazĩi ɓarɛ. 3A Yeesɔ shɛ̃ɛ ka yeti tonsi ɓɔɔ gbete. Tonsi ɓɔɔ wu shɛ̃ɛ ka yeti ɓiɓɛ kaɓa, ɓi ɓɔɔ Siman. A Yeesɔ kɔɔ Siman tɔɔ, wu dɔ̃ tonsi nɛɛ nyaa rang, wu daa nɛɛ mani ka yeti mii tɔkɔlɔng. A Yeesɔ nwang ka yeti tonsi, tusu zang ɓɔɔ ri kpalɛ zɔɔ vuu kana nɛɛ nɔngkɔ.
4Ɓɔɔ Yeesɔ hangsɛ nyaa yee rannang tɔ, a kɔɔ Siman tɔɔ, “Zaa tonsi ta, mɔɔ daa nɛɛ mani ka nɔng ɓɔɔ mii bee katɔ ɓɛɛ. Nɔɔ tɛ̃ɛ jang jaazĩi ka mii, tɔɔ nɔɔ yi jaazĩi kati.”
5A Siman kasɛ Yeesɔ nyaa tɔɔ, “Dabang, ruu dang jĩng tɔ nɛɛ zĩi sasak, ruu walɛ vuu kpang, n tɛ̃ɛ jang keɓe, ka ruu ɓɔɔ, mɔkɔ kɔɔyi ɓɛɛ.” 6Ɓɔɔ ri tɛ̃ɛ jang jaazĩi tɔ, ri raa jaazĩi kaa gaagaa, jang ɓarɛ nɛɛ wu lɔɔsɔ kaa tɔ. 7A ri ɓaa nyaa ka rɛɛ ɓeesang ɓɔɔ ri ka yeti tonsi ɓɔɔ gbete, nɛɛ ri naa yi ri naa kaa jong bii. A ri arɛ ri naa see jaazĩi. Jaazĩi bìí wisi nyaa tonsi ziti kaɓa kaa nandon. Tonsi ɓarɛ yaa tɔkɔlɔng nɛɛ wu ɔ̃ɔ kaa yeti mii. 8Ɓɔɔ Siman Bituru zi naa weɓe, tang nɛɛ gutu ka tĩng Yeesɔ tɔɔ, “N zɔ̃ɔrɔ mɔɔ katɔ Kpanti, daa ɓaa ta, mɔɔ yaa m, ka ruu ɓɔɔ, n m zang ɓɔɔ palɛ vuu shi kpang ɓɛɛ.”
9Ka ruu ɓɔɔ, Siman nɛɛ zang ɓɔɔ ri nɛɛ wu, ri mã naa ka danggn ka ruu jaazĩi ɓɔɔ ri yi ɓɛɛ. 10Rɛɛ Siman ɓeesang, rɛɛ Yakub nɛɛ Yɔhana wujɛ Zebedi, ri mã naa ka danggn doo nɔngkɔ. A Yeesɔ kɔɔ Siman tɔɔ, “Mɔ́ɔ kaa vɔrɔ kpang, kãntang keɓe mɔɔ nwang ɓaa tɔ̀ɔ́ zang ɓɔɔ yi jaazĩi kpang, mɔɔ nwáng ɓaa kaa zang ɓɔɔ ɓaa zang nyaa nɛɛ ri a ka bii mɛɛ ɓɛɛ.”
11Ri nwangsɛ tonsi tɔ ka nyaa gãnggãng, a ri yaa vuu ɓarɛ piti, ri dũng Yeesɔ.
Zang vuu bii ɓɔɔ Yeesɔ masɛ ɓɛɛ
(Mat 8:1-4; Mar 1:40-45)
12Diki ɓɔɔgn, Yeesɔ daa yeti gari ɓɔɔ ɓɛɛ, a yɔɔ ɓɔɔ vuu bii shaa wu dɔɔli kagn nɔngkɔ. Ɓɔɔ zi Yeesɔ hn, arɛ naa tang ka tĩng ɓiɓɛ, a gaa wu tɔɔ, “Dabang, naa mɔɔ kasɛ katɔ, mɔɔ masɛ m katɔ.”
13A Yeesɔ dĩi naa ɓiɓɛ lee wu, a kɔɔ wu tɔɔ, “N kasɛ tɔ, vuu bii ɓaaɓɛ wu waa nyaa ta.” A vuu bii yaa yɔɔ nɔng kaa tantɛnang. 14Yeesɔ shaarɛ wu nyaa tɔɔ, “Mɔɔ daa kɔɔ zang ɓɔɔ kpang. Daa sasak, mɔɔ daa tusu zang ɓɔɔ dɔɔ Laa vuu bii ɓaaɓɛ. Mɔɔ ti dɔɔ Kpanti Laa vuu ɓɔɔ Musa dang nyaa ɓɛɛ, tɔɔ zang ri zi kagn nɛɛ vuu bii ɓaaɓɛ waa nyaa tɔ.”
15A nyaa Yeesɔ sãlɛ nɔng ɓi doo nɛɛ mani. Zang kpalɛ zɔɔ ka bii ɓiɓɛ gaagaa nɛɛ zang naa tãa yee ɓiɓɛ, nɛɛ tɔ̀ɔ, wu ti màsɛ̀ ri kɔnang ɓarɛ. 16A Yeesɔ naa yaa nɔng kaɓa daa ka jĩngti, daa gaa Laa naa ɓasidi ɓɛɛ.
Yeesɔ masɛ zang ɓɔɔ bii vɔ katɔ ɓɛɛ
(Mat 9:1-8; Mar 2:1-12)
17Diki ɓɔɔ kagn, Yeesɔ tusu zang vuu kana, a zang Farisi nɛɛ zang ɓɔɔ ri zi labeenang Laa dɔɔli ɓɔɔ alɛ nɛɛ gari piti ɓɔɔ ka tipi Galili, nɛɛ Yahudi, a ɓɔɔ gari Urushalima nandon, ri nwáng kagn nɔngkɔ. A Laa a Yeesɔ naa ɓɔɔ wu màsɛ́ zang kɔnang nɛɛ mani kati. 18Ka diki kaɓa, zang ri tuu zang ɓɔɔ bii vɔ katɔ ɓɔɔ ri ta ka laa nɛɛ ri atɛ wu ka tĩng Yeesɔ, 19a ri walɛ gbalang ɓɔɔ ri daa nɛɛ wu ka bii Yeesɔ kaa takpang, ka ruu zang ɓɔɔ ri kpalɛ zɔɔ gaagaa ɓɛɛ. A ri vangnɛ, ri puu nɔng ka yuu sãa lapa, ri yaa wu naa kaa nɛɛ laa ɓɔɔ ri ta wu kagn, ri shing wu ka teteng zang ɓɔɔ ri kpalɛ zɔɔ ɓɛɛ, ka tĩng Yeesɔ. 20Ɓɔɔ Yeesɔ zi naa ɓɔɔ zang kaɓa ri shing danggn ka bii Kpanti Laa, a kɔɔ zang ɓɔɔ bii vɔ katɔ tɔɔ, “Masang, n yaa mɔɔ gbalang vuu shi kpang ɓaaɓɛ tɔ.”
21A zang ɓɔɔ ri tusu zang vuu, nɛɛ zang Farisi ri gaa tɔɔsung ruu hɛ̃ɛlɛnang kaa naa ɓarɛ tɔɔ, “Yɔɔ kɔ rang yee shi kpang ka yuu Laa ɓee ɓu wiya? Ɓi Laa kɔ gbete yaa zang gbalang vuu shi kpang ɓɔɔ zang palɛ ɓɛɛ.”
22Yeesɔ ti zi vuu ɓɔɔ ri rɛ̃rɛ ka yeti ɓarɛ ɓi tɔ. A hɛ̃ɛ ri tɔɔ, “Nɔɔ rɛ̃rɛ nɔngkɔ, ka ruu viya? 23Ɓɔɔ zang kɔɔ nɛɛ, ‘Zang yaa mɔɔ gbalang vuu shi kpang ɓaaɓɛ tɔ.’ Nɛɛ ɓɔɔ zang kɔɔ nɛɛ, ‘Seepaa ta mɔɔ rarɛ.’ Ɓu wi kpãa kpang ka teteng yee ziti keɓe wiya? 24N masɛ yɔɔ keɓe ditɔ, tɔ̀ɔ, nɔ́ɔ zi kati nɛɛ, zang a Jaa Shɔnzang naa tɔ ka koo keɓe, nɛɛ wu yaa zang gbalang vuu shi kpang ɓarɛ.” A kɔɔ yɔɔ ɓɔɔ bii vɔ katɔ tɔɔ, “N kɔɔ mɔɔ, seepaa ta mɔɔ tuu laa ɓɔɔ zang ta mɔɔ kagn mɔɔ daa gãa.”
25A yɔɔ ɓɔɔ bii vɔ katɔ, seepaa kaa tantɛnang ka jĩng zang, a see laa ɓɔɔ zang tà wu kagn, a daa gãa kati. Dɔɔ Laa kana gbalang. 26Zang piti ri mã naa ka danggn, a ri dɔɔ Laa kati. Bii kaa ri vɔrɔ, ri tɔɔ, “Ruu zi vuu ɓɔɔ naa ɓɔɔgn lɛ̀ɛ́ tɔ.”
Yeesɔ ɓaa Leevi nyaa
(Mat 9:9-13; Mar 2:13-17)
27Yeesɔ masɛ zang ɓɔɔ bii vɔ katɔ tɔ, a seepaa daanang kati. Daa kana, a zi yɔɔ ɓɔɔ ta saka tipi ɓɔɔ zang ɓaa wu nɛɛ Leevi nwang tɔ ka yeti gãa saka tipi tanang. A kɔɔ wu tɔɔ, “Dũng m ta.” 28A Leevi yaa vuu piti seepaa, dũng wu kati.
29Leevi daa palɛ vuu shaanang ka zɔ̃ng zɔ̃ng, ka gãa ɓiɓɛ, ka ruu Yeesɔ. Ka teteng zang kɔ shaa vuu shaanang ɓa, zang saka tipi tanang kagn nɔngkɔ gaagaa. Ri shaa vuu shaanang kana nɛɛ Yeesɔ. 30Zang Farisi nɛɛ zang ɓɔɔ ri tusu zang vuu, ɓɔɔ ri doo zang Farisi kɔ, ri hɛ̃ɛlɛ zang ɓɔɔ ri mantɛ vuu ka bii Yeesɔ kana nɛɛ, “Ka ruu vi, nɔɔ shaa vuu shaanang nɔɔ ti ɓooro vuu nɛɛ zang saka tipi tanang nɛɛ zang ɓɔɔ ri dũng nyaa ɓɔɔ Laa dang ɓɛɛ kpang kɔ doori viya?”
31A Yeesɔ kasɛ ri nyaa tɔɔ, “Zang ɓɔɔ bii kɔ̀ng ri kpang, ri daa bii zang ɓɔɔ pàlɛ́ zang kɔnang ɓi kpang. Ɓi zang ɓɔɔ bii kɔng ri katɔ kɔ ri daa shɛ̃ɛning. 32N arɛ nɛɛ n naa ɓaa nyaa ka zang tɔ̃ɔ nɛɛ ri kɔ̃sɔ yeti ɓarɛ kpang. N arɛ nɛɛ n naa ɓaa nyaa m ka zang ɓɔɔ ri dũng nyaa ɓɔɔ Laa dang kpang ɓɛɛ, tɔ̀ɔ, ri yaa vuu shi kpang, ri kɔ̃sɔ yeti kati.”
Ruu nyaalaa sennang
(Mat 9:14-17; Mar 2:18-22)
33A zang kaɓa ri ti hɛ̃ɛ wu tɔɔ, “Zang ɓɔɔ ri mantɛ vuu ka bii Yɔhana, nɛɛ ɓɔ̀ɔ́ zang Farisi, ri seng nyaalaa ɓarɛ katɔ nɛɛ Laa gaanang piti, a ɓɔɔ ɓaaɓɛ ri sèng ɓarɛ kpang, ka ruu viya?”
34Yeesɔ kasɛ ri nyaa tɔɔ, “Sinyɛ ɓeevɛ ɓeesang ri seng nyaalaa ka diki ɓɔɔ sinyɛ ɓeevɛ doo nɛɛ ri ɓɛɛ ya? Ri sèng kpang. 35Diki ɓɔɔ zang naa tuu sinyɛ ɓeevɛ a doo naa, tɔ̀ɔ, ri naa seng nyaalaa kati.”
36A ràng ri nyaa vuu jeenang kati tɔɔ, “Zang lɔɔsɔ fɔ̃ɔrɔ shɔɔ ɓi jong, zang lu fɔ̃ɔrɔ ɓɔɔ gbaala nɛɛ mani kpang. Ka ruu ɓɔɔ, naa zang palɛ nɔngkɔ, zang làsɛ́ fɔ̃ɔrɔ shɔɔ ɓi katɔ ɓɛɛ. Sɛ̃ɛ fɔ̃ɔrɔ ɓɔɔ shɔɔ kaɓa naa daa zɔɔ ɓi tɔ nɛɛ fɔ̃ɔrɔ ɓɔɔ gbaala kaɓa kpang. 37Zang ti tɛ̃ɛ saa shɔɔ ɓi jong ka yeti zàáng gbaala ɓɔɔ zang palɛ nɛɛ koo ɓɛɛ kpang. Naa zang tɛ̃ɛyi, sãa zàáng ɓi katɔ. Saa ti tɛ̃ɛ ka tipi. Koo bìí ti làsɛ́ katɔ. 38Zang tɛ̃ɛ saa shɔɔ ɓi doo ka zàáng ɓɔɔ shɔɔ kɔ doori. 39Zang ɓɔɔ nɛɛ ɓoo saa gbaala ɓi tɔ, kasɛ ɓɔɔ shɔɔ ɓi takpang. Kɔ̀ɔ́ ɓi nɛɛ, ‘Ɓɔɔ gbaala kɔ tɔ̃ɔ.’ ”
Dewis Presennol:
Luka 5: mzmNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Revised edition © 2018 Wycliffe Bible Translators, Inc.and The Nigeria Bible Translation Trust First edition published by © 1994 International Bible Society and The Nigeria Bible Translation Trust