Zang Shonang Yeesɔ 9
9
Naa ɓɔɔ Shaawulu ráa zang Laa ɓɛɛ
(ZSY 22:6-16; 26:12-18)
1Bɛɛ gnvɔ yeti Shaawulu kà gň kpang, ka ɓɔɔ wu kasɛ nɛɛ wu nyɔkɔ rɛɛ zang ɓɔɔ ri mantɛ vuu ka bii Kpanti Yeesɔ vɔrɔ ɓɛɛ. Dàa ka bii kpanti zang ɓɔɔ ri dɔɔ vuu ka Gãa Laa ɓɛɛ, 2a gaa wu nɛɛ wu bee wu labeenang ɓɔɔ wu daa a zang ka rɛɛ gãa zɔɔ kpalɛnang ɓɔɔ ka gari Damasiku ɓɛɛ. Wu nɛɛ daa ĩi zang ɓɔɔ ri dũng Gbalang keɓe kagn nɔng, zang varɛ nɛɛ zang soro, wu yiki ri, wu mãlɛ naa ɓarɛ, wu a nɛɛ ri ka gari Urushalima.
3Daa kana gbalang, a naabm tɔ nɛɛ Damasiku, a nɔng yakɛ nɛɛ lapa, kiiri wu nyaa ka teteng. 4Watɛ ka tipi, a tãa yee kɔ̀ɔ́ wu nɛɛ, “Shaawulu, Shaawulu, mɔɔ dang m jĩng nɔngkɔ, ka ruu viya?”
5A Shaawulu hɛ̃ɛyi nɛɛ, “Mɔkɔ ɓu wiya, Kpanti?”
A yee keɓe kɔɔ wu tɔɔ, “Nkɔ Yeesɔ, ɓɔɔ mɔɔ dang wu jĩng ɓɛɛ.” 6“Yupaa ta mɔɔ daa ka yeti gari, zang daa kɔɔ mɔɔ vuu ɓɔɔ mɔɔ palɛ ɓɛɛ ditɔ.”
7Zang ɓɔɔ ri daa nɛɛ wu, ri shiiyi, ri zi vuu ɓɔɔ ri kɔɔ takpang. Ri tãa yee tɔ, a ri zi zang kaa tɔ̀ɔ́ gbete kpang. 8Shaawulu naa yupaa nɛɛ tipi, ɓɔɔ puu jĩng, a zi nɔng takpang. Zang yi wu kaa naa, zang daa nɛɛ wu ka Damasiku. 9Diki ɓiɓɛ taati zi nɔng kpang. Shaa vuu shaanang kpang, ti ɓoo mii kpang.
10Ka gari Damasiku, yɔɔ ɓɔɔ dũng Laa kagn, zang ɓaa wu nɛɛ Hananiya. Yeesɔ rang yee nɛɛ wu bɛ̀ɛ́ rɔ̃kɔ katɔ tɔɔ, “Hananiya.”
A kasɛ nyaa nɛɛ, “Wee n ɓee, Kpanti.” 11A Yeesɔ kɔɔ wu tɔɔ, “Yupaa mɔɔ daa ka gãa Yahuda ɓɔɔ ka gbalang ɓɔɔ zang ɓaa nɛɛ, ‘Gbalang ɓɔɔ shiiri katɔ’ ɓɛɛ, mɔ́ɔ daa hɛ̃ɛ nɔng yɔɔ gari Taasu, ɓɔɔ zang ɓaa wu nɛɛ Shaawulu ɓɛɛ. Kãntang keɓe, gaa Laa kana. 12Ɓɔɔ wu gaa Laa doo naa, a zi yɔɔ ɓɔɔ zang ɓaa wu nɛɛ Hananiya kaɓa ka yeti rɔ̃kɔnang. Hananiya arɛ naa shing wu naa ka yuu, a jĩng ɓiɓɛ zi nɔng kaa tɔkn.” 13A Hananiya kasɛ nyaa tɔɔ, “Kpanti, zang dɔɔli ri kɔɔ m ruu tɔ ka yuu yɔɔ keɓe, ka ruu vuu shi kpang ɓɔɔ wu palɛ zang ɓaaɓɛ ka Urushalima ɓɛɛ. 14Wee à ka Damasiku ɓee, ɓi rɛɛ zang bang bang zang ɓɔɔ ri dɔɔ vuu ka Gãa Laa, a wu naa nɛɛ wu naa yiki zang ɓɔɔ ri ɓaa nung ɓaaɓɛ ɓɛɛ nandon.”
15A Kpanti Yeesɔ kɔɔ wu tɔɔ, “Dita ka ruu ɓɔɔ n zɔ̃́ng wu tɔ, nɛɛ wu pàlɛ̀ m shonang ɓɛɛ. Wu daa kɔɔrɔ zang ɓɔɔ ri zang Isirela kpang, nɛɛ rɛɛ kpanti ɓarɛ, nɛɛ zang Isirela, ruu mɛɛ kati ɓɛɛ. 16Ń ti tusu wu naa ɓɔɔ wu naa dang jĩng dɔɔli, ka ruu mɛɛ ɓɛɛ.”
17A Hananiya daayi, daa hãa nyaa ka yeti gãa, shing naa ka yuu Shaawulu, a kɔɔyi tɔɔ, “Manzung Shaawulu, Kpanti Yeesɔ ɓɔɔ nwáng nyaa ka mɔɔ ka gbalang, ka ɓɔɔ mɔɔ a ka nihn ɓɛɛ, wukɔ shong m. Shong m nɛɛ tɔ̀ɔ, mɔɔ zi nɔng kaa tɔkn, nɛɛ tɔ̀ɔ, Suru Laa wu a kaa bii ɓaaɓɛ”. 18Nyaa kɔɔ doo naa ɓee, vuu naa koko bii jaazĩi nwang nɛɛ jĩng Shaawulu, a zi nɔng kaa tɔkn. A yupaa, zang palɛ wu batizima kati. 19A naa shaa vuu shaanang, a kaka ɓiɓɛ sɔɔ kati. Shaawulu nwang nɛɛ zang ɓɔɔ ri dũng Laa ɓɛɛ, ka Damasiku diki bee katɔ tɔkɔlɔng.
Shaawulu rang zang yee Laa ka Damasiku
20A yupaa tantɛnang daa ka gãa zɔɔ kpalɛnang, a gaa tɔɔsung ɓɔɔ wu rang zang ruu ka yuu Yeesɔ kati. Kɔɔ zang nɛɛ “Yeesɔ ɓi Jaa Laa.”
21Zang ɓɔɔ ri tãa vuu ɓɔɔ wu kɔɔyi, ri mã naa ka danggn, a ri hɛ̃ɛyi nɛɛ, “Wee ɓi yɔɔ ɓɔɔ nyɔ̀kɔ́ zang ɓɔɔ ri ɓaa nung Yeesɔ vɔrɔ ka Urushalima ɓɛɛ kpang ya? Ti a ka nihn ka ruu ɓɔɔ wu yiki ri, wu daa nɛɛ ri ka Urushalima, wu daa a rɛɛ zang bang bang zang ɓɔɔ ri dɔɔ vuu ka Gãa Laa kpang ya?”
22Shaawulu ti rang zang yee Laa kaa gbãng gbãng. Ruu ɓɔɔ kɔɔyi nɛɛ tɔ̀ɔ, zang zi kati nɛɛ Yeesɔ kɔ Kirisi, wu ruu ɓɔɔ mɔɔ làá nyaa kpang. Ka ruu nɔngkɔ, zang Yahudi ɓɔɔ ri ka Damasiku ri zi vuu ɓɔɔ ri kɔɔ wu takpang.
23Diki naa bee tɔ, a rɛɛ zang Yahudi ri tɔ̀ng zɔɔ ri kãa gbalang ɓɔɔ naa ri nyɔ Shaawulu vɔrɔ ɓɛɛ. 24Zang naa kɔɔ wu vuu ɓɔɔ ri mangnɛ nɛɛ ri palɛ ɓɛɛ. Ri gã nyaa gãa gari nɛɛ laagɛ̃ nɛɛ zĩi piti nɛɛ tɔ̀ɔ, ri nyɔ wu vɔrɔ. 25Ka ruu nɔngkɔ, zang ɓɔɔ ri dũng Shaawulu ri mã soo ka sàáng ri shing wu kagn nɛɛ zĩi, ri yaa wu naa nɛɛ hangka ɓɔɔ zang yaa ka bii gbang tapɔng, ɓɔɔ zang mã̀ayi zang kiiri gari nyaa nɛɛ mani ɓɛɛ.
Shaawulu kaa Urushalima
26Shaawulu daa Urushalima nɛɛ wu daa ɓakɛ yuu kaa nɛɛ rɛɛ zang ɓɔɔ ri dũng Laa ɓɛɛ. Ri kaa vɔrɔ ɓiɓɛ nandon, ri tɔɔ, wu ɓi gn zang ɓɔɔ dũng Laa niizang kpang. 27A Baranaba atɛ wu ka bii rɛɛ zang shonang Yeesɔ. Naa kɔɔ ri naa ɓɔɔ Shaawulu zi Kpanti Yeesɔ ka gbalang, a Kpanti rang wu yee ɓɛɛ. A ti kɔɔ ri náa ɓɔɔ rang zang ruu ka yuu nung Yeesɔ ka Damasiku, kaa vɔrɔ kpang ɓɛɛ.
28A Shaawulu nwang kaa nɛɛ ri, rakɛ ka Urushalima nandon. Kɔ̀ɔ́ zang ruu ka yuu nung Kpanti Yeesɔ ti kaa vɔrɔ kpang. 29Ti rang yee, a ri làa zɔɔ nyaa nɛɛ rɛɛ zang Yahudi ɓɔɔ ri ráng ɓarɛ nyaa Heleni ɓɛɛ. A zang Yahudi keɓe, ri kãa gbalang ɓɔɔ naa ri nyɔ wu vɔrɔ ɓɛɛ. 30Ɓɔɔ rɛɛ zang shonang Yeesɔ ri tãa nyaa, ri tuu Shaawulu ri daa nɛɛ wu ka gari Kayisariya. Ri daa shing wu nɛɛ wu dita ka gari Taasu. 31Ka diki kaɓa, zang ɓɔɔ ri dũng Laa ɓɔɔ ri ka tipi Yahudi, nɛɛ tipi Galili, nɛɛ tipi Samariya nandon, ri tãa tĩnang nwannang ɓarɛ kati. Suru Laa yi ri naa kagn, a mã ri danggn. Ri shang kaa jong ka ɓɔɔ ri nwangnɛ ri a Laa bannang ɓɛɛ.
Bituru ka rɛɛ Gari Liida nɛɛ Joopa
32Bituru rakɛ nɛɛ nɔng piti piti, a diki ɓɔɔgn daayi nɛɛ wu daa leng rɛɛ zang Laa ɓɔɔ ri ka gari Liida ɓɛɛ. 33Daa ĩi yɔɔ ɓɔɔ kagn nɔng, zang ɓaa wu nɛɛ Aniya ɓɔɔ bii ɓiɓɛ vɔ katɔ ɓɛɛ. Zunung ɓɔɔ wu yupaa nɛɛ latãng ɓiɓɛ kpang saa daa mantaati. 34Bituru kɔɔ wu tɔɔ, “Aniya Yeesɔ Kirisi masɛ mɔɔ tɔ. Yupaa mɔɔ palɛ latãng ɓaaɓɛ waasɛ̃.” A Aniya tantɛ paa yunang. 35Zang ɓɔɔ ri roo gãa ka Liida nɛɛ tipi Sharong ri zi wu katɔ nandon. Ri ti raa zang ɓɔɔ ri dũng Laa kaa nandon.
36Jaa soro ɓɔɔ kagn dũng Laa, ka gari Joopa zang ɓaa nung ɓiɓɛ nɛɛ Tabita (Tabita nɛɛ nyaa Heleni ɓi Dorika, nung ɓɔɔ zang ɓaa mákà ɓɛɛ). Jaa soro keɓe pálɛ̀ ɓi tɔ̃ɔ diki diki, ti yi zang ɓɔɔ vuu ka naa kpang, naa ka bii. 37Ka laa kaɓa, vuu palɛ wu, a vɔrɛ. Zang sɔ̀ɔ vɔrɔ ɓiɓɛ, a zang daa shing wu ka yeti gãa lapa 38Joopa nɛɛ Liida ri bee kpang. Ɓɔɔ rɛɛ zang ɓɔɔ ri dũng Laa ka Joopa ri tãa nyaa nɛɛ Bituru ka Liida, ri shong zang varɛ ziti ka bii ɓiɓɛ. Ri kɔɔ wu tɔɔ, “Ruu zɔ̃ɔrɔ mɔɔ katɔ, a ka bii ɓuru tantɛnang.” 39A Bituru kpalɛ bii a daa kaa nɛɛ rɛɛ zang ɓɔɔ zang shong ri ɓɛɛ. Daa shɛ̃ɛ nɔng tɔ, a zang vang nɛɛ wu ka gãa lapa. Rɛɛ suvɔ ri kpalɛ zɔɔ ka bii ɓiɓɛ nandon ri kaa nyavɔ. Ri ti tusu wu rɛɛ fɔ̃ɔrɔ ɓɔɔ Dorika haarɛ bɛ̀ɛ́ wu doo ningkãari ɓɛɛ. 40Bituru nwangsɛ ri nɛɛ yeti gãa nandon, a tang ka tipi, gaa Laa, a raa jĩng ka vɔrɔ, a kɔɔyi tɔɔ, “Tabita, yupaa ta.” A Tabita puu jĩng, ɓɔɔ zi Bituru, yupaa nwang doopaa. 41Bituru yì wu naa ka bii, a shii kaa nɛɛ doo. Bituru, ɓaa nyaa kaa rɛɛ zang ɓɔɔ ri dũng Laa, nɛɛ rɛɛ suvɔ a á ri Tabita kaa ningkãari. 42Ruu keɓe baa gari Joopa nandon, a zang dɔɔli ri shing danggn kaa bii Laa. 43Bituru nwáng ka Joopa ka gãa Siman, yɔɔ ɓɔɔ zaa koo vuu ɓɛɛ, diki ɓiɓɛ bee katɔ tɔkɔlɔng.
Dewis Presennol:
Zang Shonang Yeesɔ 9: mzmNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Revised edition © 2018 Wycliffe Bible Translators, Inc.and The Nigeria Bible Translation Trust First edition published by © 1994 International Bible Society and The Nigeria Bible Translation Trust