Luuk 13
13
Gil wichɔgaa ɛɛi ka dɔɔ miibɔɔ
1Nɛra baŋhina du de, di bagli Yeesu gunla Pailɔt n faa kpu Galilii hina baŋhina saŋa la baŋ faa kpu sela ra lizi mbusuzi ra tɛɛ Kɔraawiizi la. 2Yeesu bir ŋɔ ba be, “Amɔ, Galilii hina naa faa ɛɛ wichɔgɛɛraa kaali ba dɔŋa Galilii hina la wiarɛ wia naa wa ɛɛ baa gɛɛ? 3Ií gil n ŋɔ ii be. Guŋ lɛi. Di ii ge wàá gil ii biine chɔgi dikuu ii wichɔgaa wia di gilaa ha, ii gba daŋ siuzi.
4Nɛra fidiŋmantannaazi la diijaŋ la chiŋ werge la n du Silɔam n chol ba ni di kpu la, ii ra binnuu lugɔ ba nii faa ɛɛ wichɔgɛɛraa kaali ba dɔŋahina la maa n du Jɛrusalɛm labuu gɛɛ? 5Ií gil n ŋɔ ii be. Guŋ lɛi. Di ii ge gba wàá gil ii biine chɔgi dikuu ii wichɔgaa wia di gilaa ha, ii gba daŋ siuzi.”
Fig daa la n waa nɔŋ sɛɛlii wia
6U ta sɛɛlii bɛl, di ŋɔ, “Baal bɛllɛ faa du de, di dɔɔ fig daa bɛl u kambol biini di ba ú wa tɔrgi u nɔna, ka waa nɔna nawɛɛ. 7U ŋɔ u kambol binni la be, ‘Binni ahoroo keŋ am ba wa nyiŋŋi nɔna daa naa ni, ka maa na. Teŋuu ha. U tɔ bɔttɛ.’ 8U ŋɔ, ‘N dɔɔri, gil u du de dɛɛnnaa, ń ki u zɛɛ bar, di duu kuna bina yá na. 9Di bina kaa wa hel di u nɔnnɔ, too. Di waa nɔnnɛ ge, n daŋ teŋuu ha.’ ”
Yeesu n chaa hahgbɛrii bɛl Heezaa Hɔpizii wia
10Ba Heezaa Hɔpizii bɛl, Yeesu du jaamaa dia bɛl biini ra bagli baa. 11Haaŋ bɛl ge du de. Tinnanchɔgii bɛl faa ɔɔ ra izuubuu binni fidiŋmantannaazi, di ɔɔ faa gil u gur ra vol, wàá wer deŋli. 12Yeesu n wa nau u yiruu, u ba u be. U ŋɔ, “N maa, i wiila hiŋ tunnɔɔ, a wàá ka ba maa.” 13U kpa u nonee sag u ni. Kakpaŋ, u deŋli. U jaa ra chɔli Kɔraawiizi.
14Ka jaamaa dia la nabɔma baaŋ fuuh, dikuu Yeesu n chaa haaŋ la ba Heezaa Hɔpizii la biini wia. U ŋɔ nɛra la be, “Hɔpizaa anumbɛllɛ du de yaa kpa ra hum huma. Ií ɔɔ ba a hɔpizaa biini ú chaa ia. Ií gilɛɛ kaa ba a Heezaa Hɔpizii biini.”
15Yeesu ŋɔ u be, “Nɛfugzee ia! Di ii dɔɔ ii nau gɛɛ ii kawee, ii waa ɔɔ puruu Heezaa Hɔpizii la, di lawuu la ú ga nyɔɔ niia? 16Too. Haaŋ naa n ɛɛ Abraham naana bɛllɛ, Sitaani n vɔɔwɛ binni fidiŋmantannaazi n puruu Heezaa Hɔpizii biini naa, u guŋ waa weraa?”
17Uŋ wa ŋɔ kennaa, hiihzi kpu banla n faa ra diu hɔɔzi la. Ka nɛra la n faa ra hiŋuu lawaa maa bɔra sɔɔni baa, dikuu wizenaa la Yeesu n ɔɔ ra ɛɛ la wia.
Mastad bii sɛɛlii wia
(Mat 13:31-32; Maak 4:30-32)
18Yeesu ŋɔ, “Ii zum gunla Kɔraawiizi Kora n duwɛɛ? Bɛɛ ń kpau mɛgzɛi? 19Baal bɛllɛ faa du de di kpa mastad bii duu u kambol. U lii di hel di birgi daa, zumbizi ra du a daŋa u nyuu. Gunnɛ Kɔraawiizi Kora ge du.”
Yiisi sɛɛlii wia
(Mat 13:33)
20U kaa kuari pɛɛzi baa, “Ii zum gunla Kɔraawiizi Kora n kaa duaa? 21Kɔraawiizi Kora ɛɛwɔɔ lugɔ yiisi haaŋ bɛl n kpawɛɛ du sau ni. Sau la kannɔɔ, ka yiisi la wer fuu a maa.”
Dominuujiga wia
(Mat 7:13-14, 21-23)
22Yeesu kaa izi kpa Jɛrusalɛm ŋmɛnɛɛ ra gaagi boljigzi ni bolzenaa di ra bagli nɛra. 23Nɛbɛl pɛɛzuu, “N Dɔɔri, banla Kɔraawiizi n niŋ lɛɛ la, ba wàá du kaŋ gɛɛ?”
Yeesu ŋɔ nɛra la be, 24“Ií ɔɔ ɛɛ ania ga dominuujiga ra zuu. Ií gil n ŋɔ ii be. Nɛkpila danna nyiŋŋi bá zuu de, ka zuu huhzi. 25Di diahiŋ wa izoo lau dominua tɔ, ka ii ba wa chi bossee ra lɔ, di ŋɔ, ‘N Dɔɔri, pilli ya zuu.’
U daŋ ŋɔ ii be, ‘Maa ia zummɛ gɛɛ lee ii liiyɛi?’
26I danna ŋɔ, ‘Yaa nii maanii faa du de ra di. I faa du yaa ŋmɛnizii di ra bagli yaa.’ 27Ka u daŋ ŋɔ ii be, ‘Ií gil n ŋɔ ii be. Maa ia zummɛ. Wichɔgɛɛraa ii maa. Ií lii n be.’
28Di ii wa na Abraham, Aizik, Jekɔb ani Kɔraawiizi dɔgtɛɛzi la maa n zuu Kɔraawiizi Kora biini ka iawaa ta bossee la, ii danna wii di ra hee ii nyina. 29Nɛra daŋ lii wiifurii, wiicholii ni wiifurii nomɛɛl ani nodig wiikakagni ba, bá wa di diuzenaa Kɔraawiizi Kora biini.#Mat 8:11-12
30Ií zum lugɔ banla n tɔ har di ra di bichaluu filaŋkennaa, ba daŋ bir wa lɛɛ see gaa di nabɔmuu. Ka banla n faa ra di nabɔmuu ba ni la bir la har ga lɛɛ bichaluu la ra di.”
Gunla Yeesu n nɔŋŋi Jɛrusalɛm wia
(Mat 23:37-39)
31A saŋa Farisizi baŋhina ba Yeesu be wa ŋɔ, “Lii ɛŋ, Hɛrɔd ra nyiŋŋi i kpuirɛ.”
32U ŋɔ ba be, “Ií la nɛdatti la be ga kaluu, dí n daŋ du de zinaa ni kɛrɛ, di ra duŋŋi tinnanchɔgaa nɛra ni, di ra chaa baa. Ka hɔpizaa ahorohiŋ á tuŋ. 33Ka n daŋ haa du de ra vol hɔpizaa ahoro, dikuubɛɛwiai, Kɔraawiizi dɔgtɛɛ maa waa bɔduma ra siu di Jɛrusalɛm lɛi.
34Ee, Jɛrusalɛm hina! Ɛrɛɛ ii ɔɔ ra kpuuzi Kɔraawiizi dɔgtɛɛzi di ra lɔɔzi banla uŋ hummɛ tɛɛ ia la bia gunnɛi? Gunla zaniina n ɔɔ chaali u biizi ra du u keeri biini la, gunnɛ n ɔɔ faa ra nyiŋŋi n chaali ia n be, ka ii waa sɛɛwɛ ii ba n be. 35Ií na! Ii diini birgi diiwoonii. Ií gil n ŋɔ ii be. Ii wàá ka naŋ di haŋ chi zinaa guŋŋ ga hel a hɔl la iin niŋ kaa naŋ minna ba la, di ŋɔ, ‘Unla n kpa Kɔraawiizi sɔŋ ra ba la, nuu sumaa!’ ”#Yira 118:26
Dewis Presennol:
Luuk 13: vag
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.