Nangi̱n Fandubi̱m 4
4
M Biti̱r n ti Yowana a kakku Kwa̱l kabaki̱n
1Wuduwe Fansetiye n ti Wusele we ni̱bu toku Kan Kwamani̱mu n ti Sadukiyam a be fi a di̱Biti̱r n ti Yowana we ki̱swi n chi a yaki̱ fwaan ya̱me. 2Ni̱tu chitu a kaiyan yinang yinang di̱ne fandubu bi̱bi burabi̱mu ki̱miya ni̱bu mi̱nu ko n Yesu a kaban we furu. Ti̱tu ki̱yungdu bi̱bwari̱mu ka kunti̱nuwe furu. 3N chi a tau fandubu bi̱bu a yingen di̱ne di a lenge ka lami̱nti̱ yo ti̱mu ka kwiyade. 4Aya ni̱bu nabwen bi̱bu a nwe ya̱m bi̱li̱mi̱mu a ke bi̱yili̱mu. Ti̱tu a yo ni̱bu bunti̱ki̱mu a bwi kunni yunu.
5Bafi̱nenangeko ni̱bu toki̱mu n ti seli̱bu n ti tikaketi ni̱bu yungku yili̱n Musati̱mu a muran a Wurchalima. 6N Anana tikake fanse we fiko n ti Kayafa n ti Yowana n ti Aleksanda n ti bi̱bu ki̱ma namang n ti fanse wuduwemu. 7N chi a yo Biti̱r n ti Yowana a ti we tibe chi yinu a bi̱u chi ko, “Ti̱fwa ni̱mi̱n, ti̱ma ti̱tu ki̱ni dukan wuren, ti̱madu ki̱ni di̱n wuren?” 8M Biti̱r wu a ri ki̱ni Fi̱ki̱m Kwamame, a yi chi ko, “Tikaketi ni̱bi n ti seli̱bu ni̱bi̱m. 9Ti̱yaliye di̱ne mang ma chi a leletu we ki̱kube wa? Ti̱badu ta yindu yinangu a ya bekanga? 10Ti̱nwe mang fwa chimi̱nu ni̱bu Yisrela, ni wu a ti a kakku change wu, a ya beku a di̱n Yesu Masiya naba Nasa̱rete, wu ta kukan n Kwama a kukutuwe fure.”
11N ki̱n nang wu ya̱m Kwamamu a fwa ko,
“Kale wu ni̱bu muki̱mu a konge,
A ki̱la kau wu a la chi ki̱ni nangi kwange.”
12A ne fi ni ka yaan yuke we ko bayim. We ti̱ti̱niti kwang a ne ni n Kwama a yo wu ni̱bu ka yaan yuke we ka n ke ki̱ne.
13Kangu kwa̱l yilangnu n ti seli̱bu a nwe dukan ya̱m Biti̱r n ti Yowanangu, a ya̱r chi yii. N chi a swaan ko ni̱bu bi̱bu a yim chitu. Yinu a fwe chimi̱n fal ko ni̱bu bi̱bu a no ware n ti Yesu. 14Yo ni̱bu bi̱bu a ku ni wu a no ki̱ka̱la chiye a ti ware n ti fandubi̱be, a bwa chi kangu ka kwila chidangu. 15Yinu n chi a chaku ni̱bu bi̱bu ki̱ni ki̱kure ko a yikami̱n a fi, a kuteng ki̱ku n chi a le ki̱twaya ya̱mu we bwiti chiyu ko. 16“Ni ma ni̱bu bi̱bi yire? N chi a ma chi ka̱ta̱kitu, ni̱bu a ku a ke ti̱n ki̱ni chi we Wurchalima ne kangu ni kwiladangu we. 17Aya di̱ne ke ya̱m bi̱bu a ti̱raduwe, ni wu chimi̱n ki̱tele. N chi a chadu kakku we ki̱ni di̱mwar Yesunu.”
18Yinu n chi a yal fandubi̱bu, a wu chimi̱n ki̱tele ko ti̱ chadu kakku we ki̱ni di̱mwar di̱du a di̱n Yesunu. 19Aya n Biti̱r n ti Yowana a yi chi ko, “Ti̱ma ti̱kuran we yi chiyu, a le we di̱Kwama nang bunti̱ ya̱m chimu, ni̱n du Kwama?” 20A mwintuwe nenang du fwaku chi ya̱r yiitu nang ku nang nwe ti̱ni tu.
21A kutengu n chi a wu chimi̱n ki̱telengu a du chi a yikan. Di̱ne ka n chi a yiko chi ma ti̱kan chiye, ka kuke ya̱m. Di̱ne n kawure ki̱dela Kwama. 22Ni wu a be a wa̱re chi ka̱ta̱kiye, swa̱tu kitu a la wantaana.
Ni̱bu bunti̱ki̱mu a bau runi ki̱ni twa̱ba̱ku
23Yinangu ni̱bu a mar chiyangu, m Biti̱r n ti Yowana a ki̱latuwe ni̱bu chimu yinu a fwa chimi̱n chitu a fwetu kwang yinangu tikake fansetiyu n ti seli̱bu a ma ki̱ni chiyangu. 24Yo n chi a nwe, a dela Kwama yinang yinang ki̱ni twa̱ba̱ bune ko, Tewuduwe, mun nang wu mwang yo ti̱mu n ti dii n ti lati yiduyu n ti ka ti̱ti̱le chiye ti̱tu we muretu.
25N fwa ya̱mu n ti tuke chire n Dauda naba nanganmo a Fi̱ki̱m ko,
Wule yo kuuti ki̱ma
ki̱fwiniye?
Wule yo ni̱bu
ki̱ma ka nangi̱n ti̱kusiye?
26Mati̱m ti̱ti̱nimu a do bwi ka ma kun yinu. Tikaketi ti̱ti̱niyu a do bwi ka kuladu n ti Tewuduwe yinu n ti Masiya wu suture ko.
27“Ki̱kumang we bi̱n di̱du m Mai Yiridu n ti Bi̱latu Babuntu a ngaban a ti a fi wiine n ti yikayu kuuti n ti ni̱bu Yisrelamu a ko naba nanganmo n Yesu wu n Kwama a suti wauwade. 28N chi a muran ka ma chitu a dukan mun n ti ki̱ke mo. 29Ki̱ka̱ngu Tewuduwe, da̱ng muli̱ni chitu, ni ka̱bi mwiyu runi ke a ya dukan di̱mwari̱nu. 30Tarre fa̱la̱ng mwangu ki̱be chiyangu, yo chi ya̱r yiitu n ti chi ka̱ta̱kitu a fwe we di̱n naba nanganmo n Yesu wu wauwade.”
31Yo n chi a ri twa̱ba̱ku buniyange, fi n chi a mura mi̱ne a mi̱kan. N kawure we fiko a ri ki̱ni Fi̱ki̱m Kwamam, n chi ki̱ mwa ya̱m Kwamamu a ne tayi we.
Ni̱bu bunti̱ki̱mu ki̱kera chitu a fiwiine
32Ni̱bu bunti̱ki̱mu ki̱ni kwang ti̱kuran chitu a be a fiwiine. Kanang wuwule niye ki̱ya kuli̱n ki̱nu ki̱keradu n ti kal ki̱nu. A ne wu ki̱ma ti̱kiyane we. 33Fandubi̱bu a kun ki̱ni dukan di̱dun, ki̱ma di̱mwaru we kunki̱ Tewuduwe Yesuwangu. N Kwama a dela chi yinang yinang. 34Di̱ne ki̱yili̱n kunkake, a ne nii ki̱kwala chiye we kangu ni̱bu a chau kakangu, bi̱bu ki̱feku ku, bi̱bu ki̱feku loni, ki̱be tibe chi ki̱n. 35N chi ki̱be fandubi̱bu mi̱nedi ki̱n, bi̱ki̱mu ki̱kera ni̱bu mi̱nu yinangu n kawure ki̱badangu.
36Wuka nii we a bi̱ba maka ni̱bi̱mu di̱n ki̱nu n Yusufu a ki̱fi̱ku Lawiyam wu a ti̱m Sayifurus, wu fandubu ki̱yalu ko n Barnaba (ka nang chikiye, wu ki̱kum ni̱bu mi̱n ni̱te) 37A feku wukane kuuko, a be ki̱ni kambi̱ru a ni fandubi̱bu.
Dewis Presennol:
Nangi̱n Fandubi̱m 4: Tula
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2015, The Nigeria Bible Translation Trust and Wycliffe Bible Translators, Inc. All rights reserved.