Nangi̱n Fandubi̱m 5
5
Ananiya n ti Safiratu
1Aya wuka nii we, di̱n ki̱nu n Ananiya n ti nayeko n Safiratu a mi di̱kan kuli̱n chiin. 2N ki̱n a lai bwa wukane laiye, ki̱ni ki̱ke nayeko, a be ki̱ni wuka bale a be ni fandubi̱bu.
3M Biti̱r a yi ki̱n ko, “Ananiya, m ma yire mwang ke Setan a le ni̱r munu, mwang mwe Fi̱ki̱m Kwamamu mi̱n ti̱kwani n lai ti̱kan chi we ka̱mbi̱r kuune? 4Yo no mwang feki̱be, n ke wumonga? A kutengu mwang fekangu a ne ni a yon ko m be ki̱ni ka̱mbi̱re we. M ma yire mwang du ti̱kuran ti̱tu a le ni̱r mune? Ki̱ka̱ngu mwang buti̱bi̱ ni m butu Kwama.”
5Kangu a nwe ya̱m bi̱bangu, n Ananiya a yar we ti̱mu a bwa ti̱n. Tayi a tau ni̱bu a nwe ya̱m bi̱bi̱mu.
6Yinu bwelemu a be a da̱u kwa̱me a sal ki̱ni lwange luke fureme, a ya, a furte ki̱n.
7A kuteng awa yittangu, naye ko a lewe a yimbu chitu a fwetu. 8M Biti̱r a bi̱u ki̱n ko, “A ne di̱kan ka̱mbi̱r we chi ta fekitu kana di̱da?” N ki̱n a ke ko, “Ngo, a neti̱ di̱kan we.”
9M Biti̱r a yi ki̱n ko, a mayire ta ki̱ka yii ti̱swe Fi̱ki̱m Tewuduwe? Da̱ng, ni̱bu bi̱bu a da̱u kwa̱me kwartamomu nang bi̱bu a lame kwa̱r yaka dati̱ wumo.
10Bi̱nabi̱na n ki̱n a yar we fiko, a bwa ti̱n. Yinangu bwelemu a lewe a be kuwangu, n chi a da̱u kwa̱me naye a ya fur ti̱n ki̱dwan n ti kwartako. 11Tayi a tau ni̱bu bunti̱ki̱mu ki̱ni dukan n ti bi̱bu a nwe chi a fweti̱mu.
Fandubu a ma chi ya̱r yiitu nabwen
12Fandubi̱bu a ma chi ka̱ta̱kitu n ti chi ya̱r yiitu nabwen. Ni̱bu bunti̱ki̱mu ki̱ni kwang a muran, a ki̱di̱ng Solomon we takamana kan Kwamane. 13Bi̱kamu ni̱bu a mwibu a le chimi̱n ti̱buwe, a bwin yiko, ni̱bu ki̱ni chi dwiyentu. 14Ti̱nti̱ne, kwartabu n ti nati̱bu nabwen a ke bi̱yili̱mu we di̱n Tewuduwe, ni̱bu bunti̱ki̱mu ki̱suti̱n ka suku.
15Di̱ne nangi̱n fandubitu, ni̱bu a chake bi̱bu a bubuwemu a neti̱loi, a yoran we fantiyu ki̱ni kwa̱mbi̱ri ko ke ki̱wulang Biti̱r a su we di̱chiye. 16Ki̱tuu ni̱be a chire we bi̱nti̱tu a ki̱dire Wurchalima ki̱ni ni̱bu a buraburanemu n ti ni̱bu buri̱n ki̱fi̱btimu. N chi a berani ki̱ni kwang.
Ni̱bu a ni fandubu Yesumu riye
17Di̱ne ti̱te, tikake fansetiye n ti ni̱bu a swe n ti ki̱ni̱mu ka nang chikiye, kwa̱l Sadukiyam, a ma ki̱fwini. 18N chi a tau fandubi̱bu a mar a ka̱nge 19Aya ki̱ni kum, naba di̱tumbi̱re Tewuduwe a be wudu kwa̱ti̱tu we ka̱nge, a chaku chi ko, 20“Ti̱ya ti̱fwa ni̱bu mi̱n we Kan Kwamanu ya̱m ti̱kuri ti̱fwimu ki̱ni kwang.”
21Yo n chi a nwe ya̱me, a le Kan Kwamanu ki̱ni si̱n ki̱miya ni̱bu mi̱n ya̱m Kwamamu.
Yinu wuduwe fansetiye n ti bi̱bu a swe waremu a muran, a yale kwa̱l kabaki̱nu n ti tikaketi Yisrelamu, a tum chitu ko ni̱bu a be ki̱ni fandubi̱bu.
22Aya yo fansetiyu n ti seli̱bu a ya fikonge, a ya a ne chi we mure ka̱nge, n chi a ki̱lawe a be yi ni̱bu ko, 23“Ni̱n ya ka̱nge yi mi̱ti̱bu, yinu ni̱bu ki̱todi̱mu n we fantiyu ni̱bu a yon chiyu, aya yoko nang wude, ni̱n ya a ne ni we mure.” 24Yinangu wuduwe fansetiyeyu n ti sele ni̱bu toki̱me a nwe ya̱m bi̱bangu a kwala chi ka made di̱ne ki̱kur chi ka nabe kutenge.
25A tibu ke, wuka ni a be a fwa chimi̱n ko, “Ni̱bu ta di̱ku a kangemu nang bi̱bu ki̱yung ni̱bu mi̱nu a kan Kwamani̱mu.” 26Ni̱bu toki̱ Kan Kwamani̱mu n ti tikaketi fanseti chiyu a yikan a ya ta fandubi̱bu, a ma chimi̱nebu muli̱n di̱ne n chi ki̱wul ni̱bu ko ke ki̱la kwela chi ki̱ni kali.
27Yo a be ki̱ni fandubi̱be, a yo chi a ti a kakku kwa̱l kabaki̱n ko ke wuduwe fansetiye a ma chimi̱n ti̱bi̱di̱ri. 28Wuko a yiko, “Nang fwa chimi̱nbu ya̱m ki̱ni dukan ko ti̱yungdu ni̱bu mi̱nu ya̱m bi̱bu wenga? Aya ti̱ri Wurchalima ki̱ni yungku changu, ti̱nti̱ne ti̱funti̱ bwi ti̱yi ni̱bu tiko n ni̱n nang ni̱bu nang chi̱u Yesumu.”
29M Biti̱r n ti bi̱kamu fandubu a yi chi ko, “A mwintuwe ne nang du ya̱m Kwamamu we nang bunti̱ bi̱chimu.” 30N Kwama Te tukebi̱ ni̱me, a kuki̱ Yesu wu ta chi̱u a ki̱tiyang bwange we furu. 31N Kwama a ri̱ka ki̱n a yo n ki̱n tikake n ti naba yuke a kang ki̱yilang kang. N ki̱n a ma yiko ko ke a ni Yisrela da a duwe ki̱letiyu a ki̱lawe bwa di̱Kwama ke a ya duku ki̱letiyangu. 32Ni̱n ku ti̱chitu ki̱ni nui ni yinu ni̱n fwadu. Fi̱ki̱m Kwamamu bi̱bu a ni ni̱bu ki̱ma kwa̱mbi̱ri̱mu ki̱fwa ti̱nu.
33Kangu n chi a nwe ya̱m bi̱bangu, ni̱tu chitu a kaiyan. N chi ki̱bbadu ka chi̱be fandubi̱bu. 34Aya wuka naba Farisa we, di̱n ki̱nu n Ka̱maliyel naba yungku yili̱n Musante, wu n chi ki̱ni ki̱n dwiyentu yinange, a kun we kwa̱lu, a yi ni̱bu ko a chaku fandubi̱bu a fi̱lang didiin. 35Yinu a yi kwa̱lu ko, kebu mi̱m ni̱bu Yisrelam. Ti̱ma daan ki̱ni chi ti̱badu ta ma ni̱bu bi̱bu mi̱nde. 36We swa̱ti̱tu a sutu, wuka nii we di̱n ki̱nu n Tudas, a yung yikiyu yinang ti̱kan chi, ni̱bu kulitu wani taana a nabu ki̱n, aya ni̱bu a chi̱u ki̱n. Yinu ni̱bu ki̱ bungti̱n ki̱ni̱mu a yaran. Bi̱ki̱mu ya̱m a fi̱rti̱n a fiko.
37A kuteng kangu, n Yafuda naba Ka̱liliye a kune we ki̱dangu ni̱bu a ma kikangu. A yo ni̱bu a bung ki̱mi̱n ti̱n, n ki̱n ti̱n a be twiyan. Ni̱bu ki̱bunti̱ ki̱ni̱mi kwang a be yaran. 38Di̱ne yiko, ti̱du ni̱bu bi̱bu, ka nangi̱n chitu n ti ti̱kuran chitu ka ti̱kusiye, be ka yarati̱nuwe yinangu a fwe n ti bi̱kamangu. 39Aya ka nangang ki̱ku, nangang Kwamange, a ne ta medu ki̱ni ni̱bu bi̱bu. Ke fal ti̱ya ti̱ma di̱kulanu n ti Kwama.
40N chi a ke ki̱ni ya̱m ki̱mu, a ya, a yale fandubu Yesumu a twalan. N chi a ngau chimi̱nti̱ ki̱kure ki̱da ko a fwadu ya̱m Yesumu we yinu a mar chi ko a yikan.
41Bi̱ki̱mu a chir ki̱ni ti̱mi̱lan we kakku kwa̱l di̱dangu, di̱ne ni̱bu a ku n chi a lwe ka nwe riye di̱ne di̱n Yesune. 42Kanang wuwule diye, n chi ki̱chakakku ki̱ni di̱mwaru, we Kan Kwamanu a Wurchalimanu n ti loniyu n chi a dubu yungku ya̱m bi̱li̱mu ka nang chikiye n Yesu nang Masiya.
Dewis Presennol:
Nangi̱n Fandubi̱m 5: Tula
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2015, The Nigeria Bible Translation Trust and Wycliffe Bible Translators, Inc. All rights reserved.