Yuhani 6
6
Pakabucuku ki ta 5,000 ka umawmase
(Matai 14.13-21; Maruku 6.30-44; Luka 9.10-17)
1Kaiana tarathainu ku tangilribatane, ku Yesu ngwavarukuru ubila ki baiyu Galrilri (la si Tibiria ka baiyu). 2La tathathatha ku laumawmase ku twapapalra iniane, asi lwiyane kwini lalasu wadrele ki Yesu sa pawdringai ki macaeme. 3Ku Yesu wamwa lregelrege, la taelre ki lasituini nene ikai kwini. 4Kudra yai lri padalrunga si daruru ki Takilragavane ka lrisi ki swa Yuda. 5Ku Yesu la paswabelenge, si drele ki laumawmase sakelakela mucucubungu iniane, la iya kai ki Pilripi, “Lri muinuta langai ku akaneane, si pakane pakabucuku kai ki laumawmase?” 6Ku taiyaneini kikai kawriva kialrialringau ki Pilripi; ngiathathingalenga ku lrika apangimiane.
7Ku Pilripi la tubalre, “Adravane arakaiyane ku 200 ka gingi langai ku pange, kai lri makakelrete adravane pingitatiiki kane kai laumawmase.”
8Ku tangea ka situ, amani ku agi ki Simune Pitiru ka Anederiu, mwacucubungu si kawriva, 9“Kawvai vavalake wailuku kai lrima ka pange ka mugi si drusa ka kange, ai lri tumane pawkesa apavalavala ki tatha kai ka umawmase?”
10Ku Yesu la pelaela liniane, “Panenea ki laumawmase.” (Kwini taikaiyane yai ububulane.) La nene makanaelre, ku sawvalai sikakathane, elreelre lri ikai ku ta 5,000. 11Ku Yesu la malra ku pange, si kiaseasene, ala apavalavala ki wanene ki laumawmase, ku kange lamialri pia kai apavalavala; la ngisasingikaai ku tadulrwane lini kane makanaelre. 12Sa kanenga kabucukunga makanaelre, ku Yesu la pelaela ki lasitu, “Malra sarubu kwini tedrane ka lapapithipithingane, madha pasawlrawlra.” 13Kwi lalasu la malra sarubu kwini tedrane ki lrima ka pange, amani kwidra la tedrane ki laumawmase, wamalra sarubu, la pasuete ki aku 12 ki karadrare.
14Ku laumawmase wadrele ku pia ki Yesu ku pinangu Twaumasane ka puku, si iya kai, “Kikai umawmase lri tara kamaani kudra lri mukawmasane ka yuginsia!” 15Ku Yesu wathingale liniane ka lri ruthuku iniane, si lri vuutha paatalialalai, la katwase tarungeangeea kiwlrau mulregelrege.
Ngwababelenge ki acilai dadavace
(Matai 14.22-33; Maruku 6.45-52)
16Saka miauawbu, ku situ ki Yesu la kainganai mwa babiabila ki baiyu, 17la ubelenge ki varukuru, si papia balrealreanane kavai Kaperenawme. La kadradrimitinga, ku Yesu la kaina kainganai mwa liniane. 18Ala kiriimu pangicaeme valrigi, si mababikabiki. 19Ku lasitu la kisamula kadrau ki acilai, ikai kau lrima kau eneme ka kunlri ku takatwasane adili, la drele ki Yesu ngubabelebelenge ki acilai kaingananganai papia ki varukuru lini, la kirimu kakiwcu turamuru. 20Ku Yesu la iya kai liniane, “Amaniaku, madha ukuludru!” 21Kwi lalasu la arake iniane pubelenge ki varukuru; la makakaai daruru ki amwane lini kwini Kaperenawme.
Ku laumawmase wasilape ki Yesu
22Sakakaiyane, kudra asuru ikai babiabila ki baiyu ku laumawmase wadrele ikai kwini ku vaeva ku tikiyane ka varukuru; kai lalasu wathingale ki Yesu ala ka kai maredele ki lasitu mubelenge ki varukuru, ngiakakatuase ku lasitu. 23Yakai ku luka piya ku twalai Tibiria ku tatiitiki ku lavarukuru ku yasadra ikai babiabila, amani kwidra yadethe ki takiaseasenane ki Tamatama si apavalavala baai ki laumawmase pakane ku pange. 24Kikai laumawmase sa thingale ala ka kai yakai kwini ku Yesu si lasitu, la ubelenge ki varukuru si papia Kaperenawme silape iniane.
Ku Yesu taleke ki niake
25Kwi lalasu la ikai balrealreanane ki baiyu kidringai ki Yesu, si kivaga iniane, “Sinsi, wakelasu kwigane kai?”
26Ku Yesu la tubalre, “Nau kapatengatengane kawriva, kai silape numi nakwane, kaika ngwalai ku tadrelane numi ki pinangu Twaumasane ka puku, ngwalai sa kane numi ku pange si kabucuku. 27Madha ngwalalai kudra lri tara kaburau ka akaneane kwalri, ngwaladha kwidra lri kainganai ki apalralrawthane panianiake ka taleke kisamula. Kikai taleke amani ku lrika abaadhane ki Lalake ki Umawmase numiane, asi lwiyane ku Tama ka Twaumase patwathingalenga pikai ki kinawmasane ki Lalake ki Umawmase.”
28Kwi lalasu la kivaga, “Lri pia nai ku manemane ala ka amani ku paiyanga ku awngane ki Twaumase?”
29Ku Yesu la tubalre, “Kasalrwa kudra ki sikawluini, amani kikai kudra ani pia ku awnganeli iya ki Twaumase numiane.”
30Kwini lalasu la iya kai, “Laka manemane ku thingalesu pia ku pinangu Twaumasane ka puku, lai lri drele nai si kasalru muswane? Maneemanelringa ku awnganesu? 31Ku cucungulane nai yakai calragulragu kane ku mana, mararaamau ku taiyane ki Sisiu, ‘Ku Twaumase patwalai belenge baai ku taleke si pakane liniane.’ ”
32Ku Yesu amia kai, “Lri tukucingalraku pelaela numiane, ku Musi kai wabaai numiane ku twalai belenge ku taleke#6.32 “ku Musi kai wabaai numiane ku twalai belenge ku taleke” ku wahunyake madu iya kai “ku baai ki Musi numiane, kaika twalai subelebelenge kainganai ka taleke”.; ku twalai belenge ka patengane ka taleke amani ku Ama ka wabaai numiane. 33Asi lwiyane ku patarumara ki Twaumase ku taleke amani kwidra patwalai belenge pulebe, si baai ki yakawmasane ku niake.”
34Kwini lalasu la iya kai, “Tamatama, ala bababaadha naiane kikai taleke!”
35Ku Yesu la iya kai liniane, “Amaniaku ku taleke ki niake. Ku wakela nakwane kai, kai lri kasilrawnga palralrawthu; ku masalru nakwane, kai lri kakadhamenga palralrawthu. 36Ai amianga naku numiane, wadrelenga numi nakwane, la kai numi kasalrwana. 37Sanaka baai ki Ama ku umawmase nakwane lri kainganai mwa nakwane kikai makanaelre. Ku wakela nakwane kai, lri kainaku pasiwlri iniane lutuumane; 38Asi lwiyane ku twalaili belenge kainganai, kainaku ka ngiasasingikai pia ku awngane, pangiamiaku ku kidremedreme kwidra ki siakawlu nakwane. 39Ku kidremedreme kwidra ki siakawlu nakwane yai, kudra baaini nakwane ku umawmase, anika kadrwa ku natangeanga ku mwacilri, si luka taalikaiyanenga ki vai lai pasielane liniane amia. 40Asi lwiyane ku takidremedremane ki Tama yai lri patarumara ku palralrawthu ku niake kwidra ki wadrele ki Lalake si kasalru ku umawmase; ikai ki apalikaiyane ki vai, lri pasielaku papanianiake liniane.”
41Ku swa Yuda amani sa iya kai ku Yesu, “Amaniaku kwidra twalai belenge si mulebe ka taleke”, la kirimu matetenge madrekadrekase, 42“Kikai umawmase kaika amaani kwidra lalake ki Yusepe ka sia Yesu? Wathingaleta ki marudrawdrangeini. Kaiasasane la maka thuru twaladhaku belenge si mulebe iya!”
43Ku Yesu la iya kai: “Madha matetenge madrekadrekase. 44Ana kaika amani kudra siakawlu nakwane ka Ama ka kiamurikai ki umawmase, kadrwa ku umawmase ku lri dulru kainganai nakwane kai; ku wakela nakwane kai, ikai ki taalikaiyane ki vai lri pasielanaku iniane. 45Ku tapacasane ki yuginsia amia kai, ‘Kai umawmase lri kibulru ki Twaumase makanaelre.’ Sanaka kialalra paluludu ki Ama si tarumara ku sabulrwaneini, lri kainganai nakwane kai makanaelre. 46Kikai kaika amia kai, yakai ku aneane ku wadrelenga ki Tama, kathane kudra amani ku twalai ki Twaumase kainganai ka wadrelenga ki Tama. 47Nau pudriadringai pelaela numiane, ku masalru ku umawmase lri ikai ku palralrawthu ku niake. 48Amaniaku ku taleke ki niake. 49Ku cucungulane numi wakane ku mana ikai calragulragu, lamialri pacai; 50ai kudra twalai belenge si mulebe ka taleke lu kane ku umawmase kai lri pacainga. 51Amaniaku ku twalai belenge mulebe si baai ku taleke ki niake; ku wakane kikai taleke ku umawmase lri palralrawthunga kai pacai. Ku lrika abaadhaneli ki umawmase ku taleke amani kai beateli, ka patarwamara pakai ku amalrane ku niake ki umawmase.”
52Ki kikai vaga ikai ki swa Yuda pakialringau madrikidrikisi. Kwi lalasu amia kai, “Ki kikai umawmase lri tumane dulru pakane mitane ku beateini?”
53Ku Yesu amia kai liniane, “Lri pudriadriingadhaku pelaela numiane, alaiyasi kai numi kane ku beate ki Lalake ki Umawmase, ungulu ku eraini, lri kakadrwa ku patengane ka niake numiane. 54Ku wakane ku beateli, waungulu ku eraili, lri ikai ku palralrawthu ka niake; ikai ki taalikaiyane ki vai lri pasielanaku iniane. 55Kai beateli patengane ka akaneane, kai eraili patengane ka awngulane. 56Kudra wakane ki beateli, waungulu ku eraili, taikaiyane ki niakeli adringi, la mialriaku ikai adringi ki niakeini. 57Palralrawthu ka Tama siakawlu nakwane, la mialriaku ngwaladhaku iniane panianiake. Lamialri, ku wakane ku beateli ku umawmase lri ngwalai nakwane si panianiake. 58Amani kikai ku twalai belenge mulebe ka taleke; kudra wakane kikai taleke, lri palralrawthunga panianiake. Kikai taleke kai mararamau kudra kanenga ki cucungulane numi, kwi lalasu wakane, lamialri pacai.”
59Kilakikai vaga, iya ki Yesu sa ikai Kaperenawme ki rarubwane ki swa Yuda ki swa Yuda bulrubulru ki umawmase.
Apalralrawthu panianiake ka vaga
60Takaala ku lasitu ku kialalra ki kikai lavaga, la iya kai, “Makucingalrenga kikai sabulrwane, aneane ku lri maka kilalra pucalringane?”
61Ku Yesu wathingale ki lasituini sa matetetenge madrekadrekase ki kikai, la iya kai liniane, “Kikai vaga kai walrudralrudrai ki salrwane numi? 62Alaiyasi drele numi ki Lalake ki Umawmase lu ubelenge siwlri mwa ki nataikaiyaneini, laika ngitwatumanenga numi? 63Ku wabaai ku niake ki umawmase yai Siri, kai beate kadrwa ku paluludane; kai pelaelali numiane ki kikai vaga amani ku wabaai ku niake ka Siri. 64Ai, ikai numiane yakai kwi kai masalru.” (Ku Yesu wathingalenga ku aneane ku kaika masalru, ku lri kilangai iniane.) 65La iyana kai, “Ngwalai kikai, amianga naku numiane, ana kai twalai ki Ama ku migemi, kadrwa ku umawmase ku lri dulru mwa nakwane kai.”
66Twalai kai, kudra twapapalra iniane ku umawmase takaalra ku matwase siwlri, si kai tupapalranga iniane. 67Ku Yesu la kivaga ki ta 12 ka lasituini, “Kunumi? Lai mialri numi katwase?”
68Ku Simune Pitiru la tubalre, “Tamatama, yakai muswane ku apalralrawthane panianiake ka vaga, aneaneana ku lri ka atupapalrane nai? 69Masalru nai, si la thingale nai muswane ka twalaisu ki Twaumase kainganai ka sanianiyangenga.”
70Ku Yesu la iya kai, “Kainaku ka wapilringa numiane ka ta 12 ka umawmase? Ai ikai numiane yakai kwi tangea kwi aidridringane!” 71Ku taiyane kwini ki Yesu amanimani ki Yuda ka lalake ki Simune ka swa Isekaliwte. Kai Yuda yakai ki ta 12 ka lasitu, amani kwidra kialangai iniane sakabilrilane.
Dewis Presennol:
Yuhani 6: NDV
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© The Bible Society in Taiwan, 2017
All rights reserved
© 臺灣聖經公會版權所有，2017