ROM 16
16
Salüm Yu
1Kenkrea borü ching tankihberü, isa keonioberü Phoebe dünkheak inü nüsa kilim thiyumütsan jihchoh. 2Amüsührünü arhimopü thülünkhi ching, Atungpuh mung chingnü nüsanü alibe leangkhiang, tüsho nüsa kilimnü yihnüpü tümüpürü labanü anihbe rungang, tümüde alibenü ahihkhüh kilim tüsho I she rungde arüdo.
3 #
Yunir 18.2
Jisu Khrista ching I lung rukhüh rhimorü Priscilla tüsho Aquila büne ki salüm jihang; 4anenü I rhangdung thsungkheak hahmülang luchoh–I tüsho khiungkerü borübo alalanü ane kilim makshe jihchoh; 5arü yam ching mukhungrü borü ki she salüm jihang. Asia ching akhuh Khrista thsungkheak mulong müthrikhi inü muzhobuh Epaeneta ki salüm jihang. 6Nüsa bolung mürangde arhimobe Mari ki salüm jihang. 7I keoniorü tüsho rukhüh aramrübo Andronika tüsho Junia ki salüm jihang; ane ju amüsüh-thsangyurü bolung amükheahkhi tüsho I müngüh Khrista ching lakheah. 8Atungpuh lung inü muzhokhi Ampliata ki salüm jihang. 9Khrista ching isa rukhüh rhimorü Urbana, tüsho inü muzhokhi Staki ki salüm jihang. 10Khrista kheak thiyuro lakhi Apelles ki salüm jihang. Aristobula yamkhün ki salüm jihang. 11I keoniorü Herodion ki salüm jihang. Narkisa yamkhün ching Khristan keoniorübo ki salüm jihang. 12Atungpuh rhimo ching larü Tryphaena tüsho Tryphosa ki salüm jihang, Atungpuh lung mürangde arhimokhi amuzho Persis ki salüm jihang. 13#Mk 15.21Atungpuh lung adungtorü Rufus, tüsho tsührü nangde I mütrübe abe ki salüm jihang. 14Asynkrita, Phlegon, Herme, Patroba, Herma, tüsho arü lung larü ki salüm jihang. 15Philologa, Julia, Nereu tüsho achi, Olympa, tüsho arü lung larü amüsührü alala ki salüm jihang. 16Amüsüh mün müthsüpkhinü khülangnü khülang ki salüm jihang. Khrista borübo alalalnü nüsa kilim salüm jihchoh.
Akheam Thsangdankhi
17Keoniorübo, nüsa ki thsangyukhi akin-yakzan azhihde achamnak tüsho küpkhuk rhimorü mütsanpü nüsa ki tuthsukchoh; arü kheaknü chamkhiang. 18Tümüde hadürü mihtsürübonü isa Atungpuh Khrista mütankihchoh, tüshe arü buk thsungkheak ah, tüsho arü yu atsü tüsho atsankhinü amülim mülarü mihtsürü mulongbo thsungyukchoh. 19Nüsanü mihyuanikhi dünkheak mihbüm abannü sodo, jumonü nüsa kheak I asühkhinü mide lah; tüshe nüsanü atsü dünkheak inü nüsa lümlung larü tüsho amütsü dünkheak lümlang thsüshihnelah; 20junangde mungtsü Thrünpuhnü nahde nüsa jing khüp Arimri zünakbah. Isa Atungpuh Jisu Khrista amüthsüm nüsa lung laang.
21 #
Yunir 16.1
I lung rukhüh rhimorü Timothinü nüsa kilim salüm jihchoh; I keoniorübo Lucia, Jason tüsho Sosipaternü she ah.
22Ha kihüm thrütbuh, I Tertianü nüsa kilim Khristan salüm jihchoh.
23 #
Yunir 19.29; 1 Kor 1.14; 2 Tim 4.20 I tüsho borü alala yamputungpuh Gaianü nüsa kilim salüm jihchoh. Kiuto rahpung akambuh Erasta tüsho isa keoniorü Quartanü nüsa kilim salüm jihchoh. 24Isa Atungpuh Jisu Khrista amüthsüm nüsa alala lung laang. Amen.
Akheam Mungshi Tamkhüntamnü
25Isanü Thrünpuh kilim müretah jihanü! Jisu Khrista dünkheak inü nüsa ki thiyusheak atsü thsangyuthsangrakhi tüsho ahokhi lün ashang rama lakhi thiyuro amikheak akhiukkhi yande apinü nüsa akin ching düküngde azhipshihpü kuklah. 26Judüalalashe kheakü, wukihrübonü athrütkhi hode thiyuro ju amikheak akhiukshih; tüsho akheam müla Thrünpuh yukhüm hode trükshih alala ki ju mükheahshih, junangde alalanü akinbah tüsho mihyuanibah.
27Alala lümlung labuh, Thrünpuh kilim lang, Jisu Khrista hode lün thsungkheak müretahshang! Amen.
Dewis Presennol:
ROM 16: YIMCBSI
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.