1 KORINT 1
1
1Jisu Khrista amüsüh-thsangyurü thsüpü Thrünpuh lümkhinü ajikhi Paul, tüsho isa keoniorü Sosthena kilimnü,
2 #
Yunir 18.1
Korint ching lakhi Thrünpuh borü, arü tüsho isa Atungpuh Jisu Khrista mung jikhi dangpung aban ching alala lung amüsührü thsüpü rukhüh jikhi Jisu Khrista ching tsangkhitrü kilim:
3Isa Abuh Thrünpuh tüsho Atungpuh Jisu Khrista kilimnü nüsa kilim amüthsüm tüsho mungtsü lashang.
Khrista ching Müngühmühi
4Khrista hode nüsa kilim jihkhi Thrünpuh amüthsüm dünkheak kamruhroro inü nüsa thsungkheak Thrünpuh kilim makshe jihchoh. 5Tümüde Khrista lung arihkhi ching, thiyutha tüsho mükheahmudu bede lüpdükhi ching nüsa alarü kamdo. 6Khrista dünkheak thiyusheak nüsa kheak düküngde kamshih, 7junangde isa Atungpuh Jisu Khrista amikheak akhiukpü nüsanü aleangkhi ching me thsambah tümü ching she nüsa muzholüm; 8apinü akheam khiungde nüsa kümbah, junangde isa Atungpuh Jisu Khrista nimung ching nüsa amülim mülade alabah. 9Api tsührü isa Atungpuh Jisu Khrista arihako ching nüsa jikhi Thrünpuh ju thiyuro ah.
Borü ching Achamnakbo
10Keoniorübo, nüsa alala arihakode nüsa bolung achamnak mülapü tüsho lümkhi rukhüh tüsho zanzhak rukhüh ching arihakopü inü nüsa ki tuthsukchoh. 11Tümüde I keoniorübo, nüsa bolung rukachihkhi lah de Kloe yamkhün mihtsürünü I ki thiyusheak jihdo. 12#Yunir 18.24Inü athakhi amütsan ju a nüsa mihbüm abannü hade thachoh, “I Paul ruyanrü ah,” yungsho “I Apollo ruyanrü ah,” yungsho “I Kephas ruyanrü ah,” yungsho “I Khrista ruyanrü ah.” 13Khrista ju chamnaka la de? Nüsa thsungkheak Paul yümkihkhea shi? Yungsho Paul mung ching nüsa baptikhea shi? 14#Yunir 18.8; Yunir 19.29; Rom 16.23Krispa tüsho Gaia kheak hode inü nüsa sheshe mübaptikhi Thrünpuh kilim makshe jihchoh; 15jude yungkhülaa nüsa ju I mung ching baptikheah de khürünü athabah. 16#1 Kor 16.15(Inü Stephana yamkhün she baptijihdo. Ju hobah inü khürü baptikhi mümükheah.) 17Tümüde Khristanü baptipü I thiyikhi yung tüshe thiyusheak-atsü thsangyuthsangrapü ah, tüsho lümlung yu bede yung, jude yungsho Khrista sangkim wu akeangkeang kambah.
Khrista ju Thrünpuh Wu tüsho Lümlung
18Tümütüsho dükheakde alarü ki sangkim yusheak ju makhakhi, tüshe isa khümkhita larü ki a Thrünpuh wu ah. 19Tümüde ha thrüta lah,
“Lüm larü lümlung inü adükheakshihbah,
tüsho rük larü rükri duhmüabahshihbah.”
20Lümlung larü mihtsürü küching la? Mükheahmudurü küching la? Ha lün ching atsangachihrü küching la? Thrünpuhnü alomi lümlung makhashihkhi yung de? 21Tümütüsho Thrünpuh lümlung ching, alominü arü lümlung hode Thrünpuh mümükheah, tüshe akinrü khümkhitpü isanü thsangyuthsangrakhi makha yu hode Thrünpuh asühshih. 22Tümüde Jihudarünü amütsanbo kheangchoh tüsho Greekrünü lümlung yimchoh, 23tüshe isanü a Jihudarü ki jingmükhebe tüsho khiungkerü ki makhakhi, Khrista yümkihkhi thsangyuthsangrachoh, 24tüshe jia larü Jihudarü le Greekrü chido kilim Khrista ju Thrünpuh wu tüsho Thrünpuh lümlung. 25Tümüde Thrünpuh makhakhi ju mihtsürü lümlung kheaknü lümlung labe, tüsho Thrünpuh yiuhyiuhkhi ju mihtsürü sühmüh kheaknü adüküngbe ah. 26Keoniorübo, nüsa jikhi lümakheahang; alomi münchi yande nüsa ahihkhüh lüm larü yung, wu müla, lalim atsü chingnü zübekhi yung; 27tüshe lümlung larü achihshihpü Thrünpuhnü alomi ching makharü mokhit, sühmüh larü achihshihpü Thrünpuhnü alomi ching ayiuhyiuhrü mokhit. 28Alominü adungto ah de alümkhi thsümünimpü thsüde alominü khenoa tüsho bahyuka, tüsho tümü mükam de alümkhi Thrünpuhnü mokhit. 29Junangde mihtsürü shenü she Thrünpuh miki mükükheang. 30Api ju Thrünpuhnü isa lümlung, isa thiyuro-lungki, atsangkhitrü tüsho rhokhitrü kamshihbuh Jisu Khrista ching nüsa rhangdung limro ah; 31jumonü ha thrüta lah, “Shepü kükheangchonü, Atungpuh lung kükheangshang.”
Dewis Presennol:
1 KORINT 1: YIMCBSI
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.