Genesis 9
9
Ona vato- arapokitini Bangara te kue Noa
1Sinani Bangara sa manani Noa no oyra toytuleike oye, no sa voy te kue oyra <<mam vere vataba, mam zadava no mam vapoda vodu ni te lua. 2Moyra isini ram no me koyni doyra isi, oyra pita peru no oyra pita pupura ka kuo te vodu ni te lua, oyra roroko te maloykanae, no oyra pita ka qaqara te lua, no oyra koete te masi; oyra ka kuo te koyrisia mina ram. 3Taba oyra pita ka tu no ka qaqara me mina pitanaki. Saseva aro ko koyna ram oyra pita titiba ka tutu, sinani aro ko koyna ram taba oyra pita.
4<<Ba ram moyna to kam oyke oyra pita sa zio aba sa kue madaka tu. 5No ka oye sa vajele madaka tua mina ram aro me vatakani oye, ka pita pupura ba ka pita peru sa joyjuni pita goyti te kue ram aro me vatakani. No ka boysi sa joyjuni pita goyti te kue likae, soy, aro me vatakani.
6<<Ka oye sa vajele madakae boysi,
Boysi me vajele madakae oye,
Bati te nanaziae Bangara,
Bangara sa vaporo boysi.
7No ram mam vere vataba no mam zadava me ngenge puka tabae mina te vodu ni te lua voy mam zadava,>> sa voy Bangara.
8No Bangara sa voy goyti te kue Noa no oyra toytuleike ka kuo una oye: 9<<Mia! Sinani aro ko vadere qo vato-arapokitini te kue ram no oyra sokutu arasumae mina ram 10no oyra pita ka tu ka kuo una ram- oyra roroko, oyra pita pupura no oyra pita ka peru, ka kuo una ram te vaka- tabae doyra oyra pita ka qaqara te vodu ni te lua. 11Aro ko vadere qo vato-arapokitini te kue ram; aqe kama majala vele vo me vaupu oyra pita ka tu; aqe kama majala vele vo me vaupu vodu ni te lua,>> sa voy Bangara.
12No Bangara sa voy, <<Goyti to lalae vato- arapokitini aro ko joyjuni te arakaluboro qu ro no ram no te tabae doyra oyra pita ka tu una ram, me vato- arapokitini te tabae doyra oyra sapoko aba kala kuo me. 13Aro ko vadere qo sipai te toqi, no oye to goyti me lalae vato- arapokitini te arakaluboro qu ro no vodu ni te lua. 14Te sada aro ko sapeneni oyra toqi vodu ni te lua no sipai sa takabula me te oyra toqi, 15Aro me noyne velini qo vato-arapokitini te arakaluboro qu ro no ram no te tabae adoa doyra oyra pita ka tu. Luka kama majala vele vo aqe voy me vaupu pisipita taba ka tu. 16Sada sipai sa takabula me te toqi, Aro me mia no me noyne velini vato- arapokitini me kuo sua tabasada te arakaluboroa Bangara no taba adoa doyra oyra pita ka tu te vodu ni te lua,>> sa voy Bangara.
17Sa voy ta oye, Bangara sa soynani Noa, <<Goyti to lalae vato-arapokitini aro ko vadere te arakaluboro qu ro no oyra taba pita ka tu te vodu ni te lua,>> sa voy.
Oyra Toytu Like Noa
18Oyra toytuleike Noa ka juolo kesini vaka ne, Semu, Hamu, no Japeti. (Hamu ne tamaea Kenani). 19Goyti oyra tulu toytuleike Noa, no te kue oyra ka podoa me oyra boysi taba ka repu vaga te vodu ni te lua.
20Noa, sa boysi zetuni lua, sa toto teba baruea pita vevere ka kelikini qarepu. 21Sada oye sa turepe luka vaini, sa vauzo oye no sa jue sia ona pua no sa bokolo te luoboroa ona toypaka pua. 22Sada Hamu tamae Kenani sa mia qulae tamae, no oye sa soynani keri likae kuru kuo te paqaroyni. 23Semu no Japeti kuru pale keike bubute lata no kuru toyro te avarae doyru; sinani kuru zozototaka no kuru sapene qulae tamae doyru. Oyru kuru viuru veke soy kasi doyru mia qulae tamae doyru.
24Sada Noa sa tavele ona nanana sa vauzo luka vaini oye sa joykava me no sa utini pita sa joyjuni toytuleike sosua, 25sa voy goyti oye,
<<Kenani me pale dango!
Oye me sika te kue oyra sika
Te oyra likae,>> sa voy.
26Oye sa voy vele goyti,
<<Vazakani Iaova, Bangara te Semu!
Kenani me kuo sika te kue Semu.
27Tani Bangara me zeteve ona pasia vodu Japeti;
Japeti me kuo una te ona toypaka pua Semu,
Kenani me kuo sika te kue Japeti,>> sa voy.
28Te rokusua aqe Noa sa tu vele 350 ave. 29Tunurinia ave Noa sa tu sa 950 no sinani oye sa lei.
Právě zvoleno:
Genesis 9: BAA
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2024, Islands Bible Ministries. All rights reserved.