Genesis 8
8
1Ba Bangara sa noyne velini Noa no taba oyra pita peru no oyra pita ka kapo soy ka kuo una oye te vaka, no oye sa vame keike vovosele sa vesele vodu ni te lua, no luka sa tamakoqese. 2Oyra malavuala te kuolo lata no oyra poranae bi ni rani ka kukupana, no moyqa sa suru me te rani sa nudo, 3no luka aba sa tamakoqese juolo te vodu ni te lua. Te beibeitoa keikeubi loymangulu tava luka sa zo juolo, 4no te vamanovetua tava te vavetua ukene vaka sa tongunu te oyra supu ni Ararati. 5Luka aba sa tamakoqese juolo sa doka te vamanoa ukene, no te tava kinakae vamanoa ukene boytua doyra oyra supu ka takabula me.
6Sa paqolo soypa vatingulu tava, Noa sa deke porana sa joyjuni moyna te vaka 7no sa peqani la keike qaqava, no oye sa reri leilomo la me sa doka te sada luka sa kava sua te sarapokae vodu ni te lua. 8Sinani Noa sa peqani la keike kokoru me utini sa voy tamakoqese juoloa luka te sarapokae vodu. 9Ba kokoru kama mia vo ka ngoyni me tongunua; si oye sa vele napu me te kue Noa te vaka bati luka aba sa sapene sarapokae vodu ni te lua. Oye sa kajara ni la koyrisi no sa pale poka velini me kokoru te kue tani te vaka. 10Oye sa peri napu vele vetu tava no sa peqani noypo la kokoru sa kesini vaka. 11Sada kokoru sa vele napu me te viluvilu, aravakima oye sa lube toyro me voyrangae azu olivi aba sa keto meto! Sa voy ta oye, Noa sa utini luka sa toto tamakoqese te vodu ni te lua. 12No Noa sa peri napu vele vetu tava no sa peqani noypo la kokoru, no te sada goyti kokoru kama vele napu mevo te kue oye.
13Te tava kinakasuae ukene kinaka Noa sa unomoubi keike avea, Luka sa kanoro beito te vodu ni te lua. Noa sa deke kesini poranae vaka, aravakima! oye sa mia lua sa kava. 14No te vakarabeite- vetua tava te vakeria ukene vodu ni te lua sa kava beito to.
15Sa voy goyti Bangara te kue Noa, 16<<Noa, Juolo kesini vaka, re no mo quolekutae no oyra tomuleike no oyra doyra quolekutae. 17Mo koype vajele taba oyra pita peru te taba adoa doyra ka kou una amo re te vaka- oyra roroko, oyra pita pupura ka kapo, no tabae doyra oyra pita tu ka qaqara te lua-soy oyra moyra ngenge puka no vere vataba no zadava te vodu ni te lua,>> sa voy Bangara.
18Sa voy ta oye Noa sa juolo, sa koype oyra toytuleike no ona quolekutae no oyra quolekutae te oyra toytuleike soy. 19Taba oyra pita peru no taba oyra pita pupura ka kapo, no oyra pita tu ka qaqara te vodu ni te lua no taba oyra roroko ka juolo kesini me vaka, oyra keike ado ka keike zo ka rokisini oyra keike adoa soy.
20No Noa sa joyjuni keike sara taboyna moyra vazaka ni Iaova, no sa pale kavia oyra pita pupura ka dalo no oyra roroko ka dalo, no oye sa kea ona vavakatu katunuro te sara taboyna. 21Iaova sa soyko nanabu noyia no oye sa voy te pongoa: <<Aro kama voy qo doynguni noypo vele lua te jaju roka boysi sa joyjuni, pitaulomo oyra nanana te pongoa sa zaqala toto te sosoa. Aro kama voyqo vaupu vele taba oyra pita ka pale tu, sa seva aro ko joyjuni te sada goyti.
22<<Te ngavae sada vodu ni te lua sa kuo,
Sadae titiba no sadae papala,
Sadae lulumu no sadae voyla,
Sadae bole no sadae sokoro,
Sadae tava no sadae kose
Kama voy doyra nudo>> sa voy.
Právě zvoleno:
Genesis 8: BAA
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2024, Islands Bible Ministries. All rights reserved.