Fartottit hi Abittot 5
5
Xananiya kee Saffiira
1Xananiya akko yarhxin xiyawti kaa numa kin Saffiiraalih ishi dhage yeebexe. 2Kaa numa aarhiguk lel amaa mibxiiko geye solaadiiko garo isheh akko racsiiteh, garo bisa baaheyaako amaa fartottitti gerille oobishe. 3Bithroos lel: “Xananiya, Quddus kin Ufayih nifille zirabbitto kee dhaget mibxih solaadiiko garo racsitto Sheethan aaginah afcaado kok yemege? 4Amibbixekkah anuk kum kuuk mitine? Timibbixek sarrah lel amaa solaadi ku gabadde makini tinem? Ta ciyyo ishi afcaadodde aaginah texeesebe? Alle zirabbitteh tanitom xiyaw maki Yalla kibah” akko yerhxe. 5Xananiya ta waani yoobbe gedda, radeh rabe, inkoh tayim yoobbe mara lel naba gilix ten yibbirhe. 6Gombole lel yemeetiinih kaa yiknizinyaako kaa beyeenih kaa yoocogin.
7Wuli adooxa saaca takkemko sarrah lel kaa numa tekkem aarhigekkah orobte. 8Bithroos: “Iski yoh warish, sinni dhage tayidhdhah kinniho teebexiinim?” akko yerhxe. Saffiira lel: “Yoo, tamayidhdhah kinni” akko terhxe. 9Bithroos: “Maddari Ufaye tacakkanoona aaginah tiya tekkiini? Ubul, ku bacla yoocoge mari carafalle yanin, kotta lel adde katayshoona kinon” akko yerhxe. 10Akkanih kaa gerille raddeyaako lel rabte. Amaa gombole oroben gedda rabteh akah sugte, usun lel tee beyenyaako tee baclahi ribille tee yoocogin. 11Umbuka kaniisa kee tayim yoobbe mara inkoh naba gilix ten yibbirhe.
Yekke mango ishaarar kee bexsishsham
12Xiyaw fanadde mango ishaarar kee bexsishsham fartottitti gabah tekke. Inkoh afcaadooko tiya yekkiinih lel Suleymaan gabalalle akattuk yinin. 13Xiyaw mangum ten xishmatak yinin, aki maraako laakin tenadde yangalo yidbileti miyine. 14Maddarah teemene mango labha kee sayyo lel mangah tenadde ossiimak yinin. 15Bithroos tillaabak kaa silal garolle rado ciloh lel laxuttem gantah barella kee siidalle yaaqhuciinih baahanyaako shawaaricille oobishak yinin. 16Yerusaalem lamma galelle geytima daafofko lel mango xiyaw laxuttem kee najaasa-le ufayitih tindhibbirhem baahaanah amiituk yinin, usun lel inkoh urak yinin.
Fartottitti madhdhuwa kee feteexo
17Kado, amaa naba shekh ugute, inkoh kaalih tinem (amaa Tsadduuqhiim diin filci) lel nabaatih ashshiinen. 18Amaa fartottit ten yibbirhiinih shacabti xabshedde ten yixbishin. 19Maddari malaykatti laakin bar yemeeteyaako, amaa xabshih caraf faakeh, irolle ten yeyyeeceyaako: 20“Aduwa, tamaa maqhdas caredde daw-terhxiinih ta Aniinat waani warroysha” akko yerhxe. 21Usun tayim yoobbiinik sarrah dhaxiineekah maqhdas caredde orobenyaako yaydarasoona erherhishen.
Kado amaa naba shekh kee kaalih tinem yemeetinyaako, amaa arabat akotta kee Israa-eel naba marah rakhbeh akah deecimen. Amaa katattaynit baahoona lel arabat khaddamte amaa xabsheh faren. 22Amaa arabat khaddamte amaa xabshe gufen gedda lel ten migeyinnooniiki foyyak gaxeenih: 23“Amaa xabshi yimshiggitheyaako alfiimeh, amaa xabshi dhawrhen lel carafalle daw-arhxuk noh sugen. Fakne gedda laakin walaa inketta adde migeyinnino” yerhxiinih akah warishen. 24Kado amaa maqhdas carih dhawrheenitti manabotta kee sheekhat manabottit tayim yoobbin gedda: “Tayim ayim kinni?” yerhxiinih cibrah raben. 25Wuliti yemeeteh lel: “Ubula, atin xabshedde hayten xiyaw maqhdas caredde daw-yerhxiinih xiyaw aydurusuk yanin” akko yerhxe. 26Sarrah amaa maqhdas carih dhawrheenitti manabotti arabat khaddamteelih yedeeyaako ten baahe. Xiyaw dhayit alle cidaanamko mashshiitemhi sabbatah lel ten baahem xaylah kuuk miyine.
27Ten baahen gedda lel arabat nifille daw ten ishishe. Amaa naba shekh lel tahe arhxuk ten essere: 28#Maatiyos 27:25“Ta xiyawtih migacalle taydurusiinimko sirii ginah sin neemereh nine. Taykinna lel umbuka Yerusaalem sinni aydarasah temegiinih, ta xiyawtih biilo ni bukakke haytoona farhak tanin.” 29Bithroos kee fartottit laakin: “Xiyaw naabbemko Yalla naabbo nolle tane. 30Tamaa atin masqal camiddakke takarteenih tigdifin Yeesus, ni abbubhi Yalli rabaako kaa uguse. 31Israa-eelih tooba kee zambi xabbot yaxaw ciloh Yalli Dhisheena kee Gargeereenah ishi mizgi gabooko hayeh xaf kaa isheh yane. 32Nanu tayimhi shohoda kino, Yalli kaa yaabbe marah yoxoyeh yane Quddus kin Ufayi gantah shaahid kinni” yerhxiinih alle yedebbin.
33Tayim yoobbin gedda yuxurtumiinih ten yagdafoona farhen. 34Yakko kibah, arabadde wuli sercat mudarris kin Gamli-eel akko yarhxin Faarisiiti, inkoh xiyaw xishmattaya, arabadde uguteyaako amaa xiyaw dago waqhteh irolle ten yayyaacoona amre yoxoye. 35Akko yerhxe lel: “Israa-eel xiyawo, ta xiyawak abtoona farhak taniinimih atin sinneh zeelita. 36Tayek basoh Tewudas akko yarhxin xiyawti: ‘Anu naba tiya kiyo’ yerhxeh uguteh yine. Affara bool xiyawtiya takkem lel kaa kataynih yinin. Kayya kaa yigdifin, kaa katattaynit lel faax-yerhxinyaako yeleyin. 37Kaa sarralle, tamaa xiyaw loolasti waqhtedde Galiilaati Yahuuda uguteyaako xiyawko garo kaa katawna xaylishe. Usuk yakkeedo rabe, kaa kataytem lel inkoh faax-yerhxin. 38Kado lel sinah warishak aniyo, ta xiyawko mirix akko erhexa, ten xaba, amayim lel ta xagara hido ta ciyyo xiyawko tekkemko dumto kinamhi sabbatah kinni. 39Yallaako tekkemko laakin ta xiyaw taylawna dhictoona makitiini. Akke wayemko, Yallaalih angaacuk sinne geytoona kitin.” Amaymih kaa fawo kabbaaten. 40Amaa fartottitih addadde akah deecimenyaako, ten yootokiinih Yeesus migacalle waanishaanamko ten yeemeriinih ten dhirhiyen. 41Usun laakin ta migac hi sabbatah umaani yattaqhaco dhiica mara yekkiinimih amaa arabaako xedenak yewcin. 42Max-yeenim lel maqhdas care kee care careh hel-arhxuk Yeesus Masiix kinam yaydurusiinim kee mece ware yaybissiriinim mixabinnooni.
Právě zvoleno:
Fartottit hi Abittot 5: SCC
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
©2024 Wycliffe Ethiopia