Louka 12
12
Ma rakrenn douy čipyentsa!
1Ap ko tsiro van boud zerya menshe khetne, yaake te stakras yek o vavareske ap i pire. Koy penas o Yezous ap peskre malende, gar ap kol vavarende: Denn garda, te rakrenn gar douy čipyentsa har i Farisarya! Kova hi har shoutlo yarro, hoy krell o tselo yarro shoutlo. 2Vell o dives, kay vell kova diklo, hoy kanna khatedo hi. Vell o dives, kay djinell hakeno kova, hoy kanna kek djinella. 3Djinenn! Vell o dives, kay shounell hakeno, hoy t'mer čorrhanes rakran. Oun kova, hoy t'mer pal o pandlo voudar i vavareske an o kand penan, kova penenn le bari golyah ap o drom.
Ma trashenn i menshendar!
4T'mer han mire mala, oun me penau t'menge: Ma trashenn i menshendar. Yon nay marenn t'men. Boudeder har kova nay krenn le gar.
5Me kamau t'men te sikrell, konestar hounte čačepah trashenn: Trashenn o Deblestar, kay les i zoor hi, te vitsrell lo yekes pal o merepen an o bengeskri yag! Ava, kova penau t'menge: Kolestar trashenn!
6Panč tikne čirkle hi glan i menshende gar boudeder moldo har douy beme. Glan o Debleste hi kek lendar bistedo. 7Ninna djinell o Devel kitse balla ap t'maro shero hi. Doleske ma darenn! T'mer molenna boudeder har boud čirkle.
8Me penau t'menge: Koon glan i menshende penella: O Yezous hi miro ray! kolestar penau me glan o Debleskre bolepangre: Yob hi miro.
9Koon man bourhoste della glan i menshende, koles dau me ninna bourhoste glan o Debleskre bolepangre.
10Koon djoungele laba pral o Menshengro Čaveste penella, koleske nay bistrell o Devel kol laba, hoy yob penas. Koon praasell o Debleskro Dourhes, koleske nay bistrell o Devel kol laba gar, hoy yob penas.
11Te anenn i menshe t'men glan i čačepangre oun glan i rayende oun pralstunende, ma darenn, hoy t'mer hounte rakrenna. 12O Debleskro Dourho sikrell t'men ap ko tsiro, hoy t'mer hounte penenna.
O bravlepen krella kekes barhtelo
13Yek kol boud menshendar, kay kote khetne hi, penas ap o Yezouseste: “Sikepaskro, pen miro phraleske, te dell yob mande miro kotar dran ko bravlepen, hoy maro dad menge moukas, har yob meras!”
14Penas o Yezous ap koleste: “Romeha, kova hi gar miri boudi.”
15Palle penas o Yezous ap kolende, kay troul leste tardo hi: “Denn garda! Ma nashenn boud bravlepen palla! O tselo bravlepen, hoy i mensho khetne anas, krell o mensheskro djipen gar braveles.”
16Oun o Yezous penas lenge laba, kay i khatedo čačepen dren hi. Oun yob penas: “His i bravelo harho. Ap leskro kotar phoub vas boud djob baro. 17Oun ko bravelo penas ap peste: Hoy krap kanna? Djinau gar, kay anau nay o tselo djob dren.
18Oun yob penas: Kanna djinau, hoy krap. Me phagau mire khera tele, kay miro djob dren hi, oun krau len bareder. Kote dren čivau miro tselo djob oun o vavar lačo koova, hoy anom khetne. 19Oun me nay penau ap mande: Kova krom mishto. Kanna hi man boud bersha lačo koova o djipaske oun boudrap bouder gar. Me rhau oun piyau oun krau miro djipen mange mishto.
20O Devel penell ap leste: Tou dinelo! Kay rat hounte meress tou. Koon lell tiro tselo bravlepen, hoy tou touke khetne anal?”
21O Yezous penas doureder: “Yaake djal koleske, kay anas peske boud bravlepen khetne, oun hi čorvelo glan o Debleste.”
Ma darenn!
22Oun o Yezous penas peskre malenge: “Doleske penau t'menge: Ma darenn t'maro djipaske! Ma darenn, te vell t'men či te rhal, vitar gar, te vell t'men či an-ripaske! 23O djipen hi boudeder moldo har o rhapen. Oun o mensho hi boudeder moldo har o ripen. 24Dikenn ap i korakende! Yon čivenna kek djob an i phoub, te vell lo baro. Vitar gar anenn le o baro djob dren. Len hi kek khera, kay nay anenn le o djob khetne. O Devel dell len te rhal. Oun t'mer han boudeder moldo har i čirkle! 25Kek t'mendar nay čivell yek dives boudeder pash peskro djipen pashel!
26Na-a, savo tikno koova nay krenn t'mer gar. Hoske trashenn t'mer, te vell t'men gar doha djipaske? 27Dikenn, har ap o zenlepen shoukar bloume baro venna! Yon boudrenna gar, oun krenn penge kek ripya. O baro ray Salomo an peskro tselo raylepen his gar yaake shoukar an-rido, har yek lendar. 28O Devel kras o zenlepen yaake shoukar, hoy kava dives vin tardo hi, oun o vavar dives an o bob vitsedo vella. Kitse kope boudeder dell yob t'men an-ripaske. Har tikno hi t'maro patsepen! 29Ma darenn, hoy t'mer taysar rhana oun piyenna! 30Kova krenn kol menshe, kay prindjrenn o Debles gar. T'maro dad an o bolepen djinella, hoy t'men hounte vell djipaske.
31Dikenn koy pre, te krenn o Debleskri boudi! Oun yob dell t'men lauter, hoy t'men hounte vell djipaske.
32Ma darenn! Kate han t'mer gar boud oun gar an-diklo. O Devel, kay hi t'maro dad an o bolepen, kova kamella, te lenn t'mer leskro bravlepen oun raylepen.
33Bikrenn, hoy t'men hi! Denn kol love i čorvelende! Palle hi kova yaake, har te krenn t'men i lovengro gono, hoy gar paash djala! Yaake krenn t'menge i baro bravlepen, hoy nashrenn nay gar. Kova hi an o bolepen, kay kek čorepaskro t'maro koova hatsella, oun kek kirme les nay pre rhan! 34Kote, kay t'maro bravlepen hi, kote hi ninna t'maro dji.”
Ma moukenn t'mari momeli vin te djal!
35“Avenn hako tsiro mange koy! Oun moukenn gar t'mari momeli vin te djal!
36Avenn har menshe, kay gar sovenna, te vell lengro ray i biyabestar pale! Te dell yob ap o voudar, nay krenn le leske sik pre.
37Barhtele hi kol boudepangre, kay sovenn gar, te vell lengro ray pale. Me penau t'menge: O ray penell lenge, te beshenn le pen tele, te rhan le. Oun yob pandell peske i damdira trouyel, oun hi lenge koy. 38Te vell yob mashkral an i rat, oun yon sovenna gar, hi lengri barht baro. 39Kova hounte hayvenn t'mer: Te djinals kova, kay ap o kheer yak della, ko tsiro, kay ko dre-phagepaskro vella, nay phagals kova gar pash leste dren.
40Doleske penau t'menge: Ma sovenn! Denn yak! Me, o Mensheskro Čavo, vau pale an i tsiro, kay t'mer gar djinenna.”
O lačo boudepaskro
41O Petro penas: “Ray, hi kova, hoy tou kate peneh, menge kokres? Peneh tou kova i tsele menshenge?”
42Penas o Yezous: “I lačo boudepaskro dell mishto garda ap peskro rayeskro kheer, oun sovella gar. Leskro ray das peskre tsele boudepangren an leskre vasta. Oun ko lačo boudepaskro dell lende hako dives kova, hoy len hounte vell djipaske.
43Barhtelo hi yob, te vell peskro ray pale oun dikell, kay yob peskri boudi mishto kras.
44Čačepah, me penau t'menge: Leskro ray dell peskro tselo bravlepen an leskre vasta.”
O čilačo boudepaskro
45“Ko boudepaskro, te penell lo ap peste: Miro ray vell gar yaake sik pale, oun yob dell kol vavar boudepangren dava, oun rhal oun piyell pes mato, 46palle vell leskro ray pale ap i tsiro, kay o boudepaskro gar patsell, te vell yob. Ap yek kopo hi lo koy, oun dell ko boudepaskres khetne, oun anell les kote, kay kolla hi, kay gar ap leste patsenna. 47Ko boudepaskro, kay djinella, hoy peskro ray lestar kamella, oun krell kova gar, kova lell boud dava. 48Koon kova krella, hoy gar mishto hi, oun djinell kova gar, lell gar boud dava. Koon boud o Deblestar las, kolestar kamell yob, te krell lo peskri boudi mishto. Oun kones boud zoor oun gosvepen dino vas, kolestar kamell o Devel, te boudrell lo gomme feteder.”
O čingepen vella ap t'mende
49“Me vom, te vitsrap i yag ap i phoub. Kamoms te rhačals koy yag. 50Glan mande hi i pharo tsiro. Ap mande venna bare douka. Kamoms, te vals ko tsiro pal mande.” 51“Me vom gar ap kay phoub, te lap o čingepen krik. Na-a! Me penau t'menge: Mantsa vell o čingepen.
52Kanna vell o čingepen an i kheer, kay djivenn panč menshe khetne. Triin hi rhoyedo ap douyende. Oun douy hi rhoyedo ap trinende. 53O dad vell rhoyedo ap peskro čaveste. Oun o čavo vell rhoyedo ap peskro dadeste. I day vell rhoyedo ap peskri čate. Oun i čay vell rhoyedo ap peskri date. O romeskri day vell rhoyedo ap o čaveskri romyate. Oun o čaveskri romni vell rhoyedo ap o romeskri date.”
T'mer djinenn gar, hoy djal an kava tsiro
54Pale penas o Yezous ap kol boud menshende, kay pash leste his: “Te vell o bolepen tamlo ap koy rig, kay o baro pani hi, penenn t'mer: Kanna dell brishin. Oun kova vell yaake. 55Oun te phourdell i zorelo dourho dran ko tato moulo them, palle penenn t'mer: Kanna vell tato. Oun t'maro hi čačo. 56T'men hi douy djia! T'mer dikenn ap i phoub oun ap o bolepen oun djinenn, hoy vella. Hoske nay hayvenn gar, hoy an kava tsiro glan t'mare yaka lauter djala? 57Hoske nay dikenn t'mer gar, hoy o čačepen hi?
58Te hal tou an o čingepen yekeha, oun hal leha ap o drom pash o čačepaskro, palle dik, te venn t'mer pale mishto khetne yaake rah, har hal tou leha ap o drom, te nay dell yob tout gar an o čačepaskro vast! Oun kova dell tout an o klistengro vast. Oun kova vitsrell tout an o stilepen. 59Me penau touke: Tou veh gar dran o stilepen vin yaake rah, har tou playsral gar tiri tseli siyaan.”
Právě zvoleno:
Louka 12: Sint-Man2024
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
