Louka 13
13
Moukenn t'maro čilačo drom!
1An ko tsiro van menshe pash o Yezouseste, oun penan leske kol morshendar dran o them Galilea, kay an o Debleskro baro kheer firhen o Debleske maran. Oun o Pilato maras kol menshen. Oun o menshengro rat oun o firhengro rat vas lauter khetne.
2Koy penas o Yezous ap lende: “Oun kanna poučenn t'mer mandar: His kol menshe čilačeder har kol vavar an o them Galilea, kay van yon yaake maredo? 3Na-a, penau me t'menge. T'mer te moukenn gar t'maro čilačo drom, oun djan ap o Debleskro drom, palle venna t'mer lauter ninna yaake maredo.
4Hoy hi kol menshentsa, kay ko baro kheer an o gab Siloah ap lende peras oun yon meran? Hi kol menshe čilačeder har kol vavar an o foro Yerusalem, kay koy djivan? 5Na-a, penau me t'menge. Te moukenn t'mer gar t'maro čilačo drom, oun djan ap o Debleskro drom, palle venna t'mer lauter ninna yaake maredo.”
I faygetikro rouk
6Oun o Yezous penas lenge laba, kay i khatedo čačepen dren hi. Oun penas: “I morshes his i faygetikro rouk an peskro baar tardo. Oun yob vas boud kope, oun rodas fayge ap ko rouk oun hatsas kek. 7Koy penas yob ap koleste, kay dell garda ap ko baar: Triin bersha vom me kanna kay, oun rodom fayge ap kava rouk, oun hatsom kek. De les tele! Ko rouk hi čičeske kate tardo. 8Penas o vavar: Ray, mouk les kava bersh tardo! Me hadau i phoub troul koleste pre, oun čivau grayengro foul troul leste, te vell lo feteder.
9Oun te hidjrell ko rouk an o vavar bersh fayge, kova hi mishto. Te hidjrell lo či, de les tele!”
O Yezous krell i djouvyat sasto ap o Debleskro dives
10His i Debleskro dives, koy his o Yezous an i biboldengri kangri oun penas i menshenge o Debleskro lab. 11Mank kol menshende his i djouvel, koya his deesh-te-orhta bersha nasselo. I beng, kay an late vas, kras lat bango. Oun yoy nay hadas pes gar pre. 12Har o Yezous lat dikas, das yob lat pash peste gole, oun penas ap late: “Romniya, tou hal kanna sasto.”
13Oun yob čivas peskre vasta ap late. Koy hadas pes li pre, oun sharas o Debles.
14Koy rhoyras pes ko pralstouno an i biboldengri kangri, kay o Yezous koy djouvyat ap o Debleskro dives sasto kras. Oun kova penas ap i menshende: “Mer hounte boudras shob divessa. Avenn an kolla divessa, te moukenn t'men sasto te krell, oun gar ap o Debleskro dives!”
15Penas o Yezous ap koleste: “T'men hi douy djia! T'mer krenn har te krans kek boudi ap o Debleskro dives. Hakeno t'mendar pandell peskri groumni oun peskri esla tele, oun anell len pash o pani ap o Debleskro dives. 16Kate hi kay djouvel, kay patsell ap o Debleste yaake, har o Abraham kova kras: Oun yoy his deesh-te-orhta bersha o bengestar pandlo. Hoske te vell li gar ap o Debleskro dives sasto kerdo?”
17Har yob kova penas, ladjan lauter, kay rhoyedo ap leste his. Oun kol boud vavar, kay kote tardo hi, his barhtelo pral ko tselo raylo koova, hoy o Yezous kras.
O senftikro djob
18Koy penas o Yezous ap lende: “Me penau t'menge kanna, har kova hi, te dell o Devel i menshen pash peste gole, te djan le ap leskro drom.
19Kova hi yaake: I morsh čivas i tikno senftikro djob an i phoub. Oun dran ko tikno djob vas i baro rouk. Oun i čirkle djivan ap leste.”
O shoutlo yarro
20Oun o Yezous penas pale: “Me penau t'menge kanna, har kova hi, te dell o Devel i menshen pash peste gole, te djan le ap leskro drom.
21Kova hi yaake: I djouvel las i tikno kotar shoutlo yarro, oun čivas les mashkral an i baro čaro parno yarro. Oun ko tikno kotar shoutlo yarro kras ko tselo yarro shoutlo.”
O voudar djipaske
22Oun o Yezous djas doureder ap ko drom, hoy djas an o foro Yerusalem. Oun yob vas an i gaba oun i forya, oun sikras i menshende o Debleskro drom. 23Oun i morsh poučas lestar: “Ray, pen menge: Lell o Devel boud menshen an o bolepen, te djivenn le pash leste?”
24Oun o Yezous penas pale: “Krenn lauter, te djan an ko tikno voudar dren! Me penau t'menge: Boud kamenn an ko voudar dren te djal. Oun hayvenn kova gar. 25Te stell o ray pral o kheer pre oun krell o voudar pandlo, palle han t'mer vin tardo, oun t'mer denn gole: Ray, kre menge o voudar pre! Oun ko ray penella: Me prindjrau t'men gar. 26Koy penenn t'mer: Mer rham oun piyam touha. Oun tou penal menge o Debleskro lab ap i dromma an mare forya. 27Koy penell yob ap t'mende: Me prindjrau t'men gar. Djan mandar, t'mer čilače! 28Te han t'mer vin tardo oun dikenn, kay o Abraham, oun o Isaak, oun o Yakob, oun kol tsele Debleskre rakepangre pash o Debleste an o bolepen hi, rovenn t'mer. Oun t'mer dandrenn i danda i doukatar khetne.
29Dran hako them venna i menshe pash o Debleste an o bolepen khetne, oun beshenn pen tele, te rhan le.
30Oun boud, kay kanna palla tardo hi, kolla hi ap ko dives glan tardo. Oun boud, kay kanna glan tardo hi, kolla hi ap ko dives palla tardo.”
O Herodes kamella o Yezouses te marell
31Ap kava tsiro har o Yezous kova penas, van Farisarya pash leste oun penan: “Dja touke! Khate tout! O Herodes kamell tout te marell.”
32Koy penas o Yezous ap lende: “Djan oun penenn ko čilačo morsheske: Kava dives oun taysar tradau i bengen vin, oun krau i menshen sasto. Oun pal triin divessa hi miro tselo koova kerdo. 33Kava dives, taysar, oun o dives koy pre hounte djap miro drom, te vap an o foro Yerusalem. Kova djal gar, te vell i Debleskro rakepaskro vin glan o foro Yerusalem maredo.”
O Yezous rakrell pral o foro Yerusalem
34“T'mer menshe an o foro Yerusalem! T'mer maran o Debleskre rakepangren, oun dan kolen i barrentsa moulo, kay o Devel pash t'mende bičras. Boud kope kamom t'men pash mande te lell, te dap garda ap t'mende, har i karhni ap peskre ternende garda della, oun lell len tel peskre phora. Oun t'mer kaman gar. 35Doleske moukell o Devel t'maro foro oun dell bouder gar garda ap leste. Oun me penau t'menge: T'mer dikenn man yaake rah bouder gar, bis te vas ko tsiro, kay t'mer penenna: Sharedo vell kova, kay hi o Deblestar bičedo!”
Právě zvoleno:
Louka 13: Sint-Man2024
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
