Louka 11
11
Sike men, har te rakras o Debleha!
1Yek dives, har o Yezous o Debleha rakras, penas yek peskre malendar ap leste: “Sike men, har te rakras o Debleha! Ninna o Yohanni sikras peskre malende, har yon hounte rakrenn o Debleha.”
2Penas o Yezous ap peskre malende: “Te rakrenn o Debleha, penenn: Maro dad, tiro lab vell sharedo. Te vell ko tsiro sik, kay tou o ray hal pral i tseli phoub! 3De men maro hako dives!
4Oun biste maro čilačepen, hoy mer kram! Oun ninna mer bistrah o čilačepen, hoy i vavar ap mende kran. Ma mouk men tiro dromestar tele te djal!”
Mangenn o Debles oun moukenn gar tele!
5Oun yob penas ap lende: “Te hi yekes t'mendar i maal, oun kova djal mashkral an i rati pash leste oun penell: Kamlo maal, pats man triin mare! 6I maal mandar vas pash mande. Oun man hi či an o kheer, hoy nay dau les te rhal.
7Penals lo ap leste: Čava, ma de kek sau gole! O voudar hi klidedo. Oun mire čave oun me hom an o čiben. Me nay stau gar pre, te dap tout čomone te rhal.
8Me penau t'menge: Yob stell pre oun dell les yaake boud, har ko vavares hounte vell. Kova krell lo gar doleske, kay hi o vavar leskro maal. Kova krell lo doleske, kay mangas les o vavar yaake boud oun moukas gar tele.
9Doleske penau t'menge: Mangenn o Debles! Oun o Devel dell t'men! Rodenn les! Oun t'mer hatsenn les. Denn ap o voudar! Oun o voudar vell t'menge pre kerdo. 10Koon mangella, kova lella. Koon rodella, kova hatsella. Oun koon ap o voudar della, koleske vell pre kerdo. 11Mashkral t'mende hi kek morsh, kay dell peskro čaves i sap, te mangas yob lestar i mačo. 12Vitar gar dell kek dad peskro čaves i skorpiono, te mangas yob lestar i yaro. 13Ninna te han t'mer čilače menshe, denn t'mer t'mare čaven lačo koova. Har boud boudeder dell t'maro dad an o bolepen peskro Dourho kolende, kay les mangenna.”
O Yezouses hi i zoor pral o bengeste
14His i dives, koy tradas o Yezous i benges vin dran i morsheste, kay nay rakras gar. Har ko beng dran leste vin djas, nay rakras ko morsh pale. Oun kol boud menshe, kay troul lende tardo his, kran bare yaka. 15Mashkral lende his save, kay penan: “O pralstouno beng das les koy zoor. Doleske nay tradell yob kol bengen vin.” 16Vavar kaman lestar i baro Debleskro koova te dikell, te sikrell lo, kay o Devel les bičras.
17O Yezous djinas, hoy an lengro shero trouyel djala, oun penas ap lende: “Te kourenn pen i bare raya an yek them, palle djal ko them paash, oun i tsele khera perenn khetne. 18Te tradell o beng i vavar benges vin, djal leskri zoor paash. T'mer penan mange, kay me tradau i bengen dran o bengeskri zoor vin. 19Poučau t'mendar: Me te tradau i bengen dran o bengeskri zoor vin, har nay tradenn t'mare menshe len vin? Vell i dives, kay yon penenn t'menge, kay kova gar čačo hi, hoy t'mer pral mande rakran.
20Na-a, me tradau i bengen dran o Debleskri zoor vin. Ap kova dikenn t'mer, kay ko tsiro vas, kay o Devel i menshen dran o čilačepen vin lella, oun leskri zoor mank t'mende hi.
21Te dell i zorelo morsh garda ap peskro baro kheer, oun les hi i rharo an o vast, nay čorell leske i vavar či. 22Yek te vell, kay hi zorleder har yob, oun dell les khetne, palle lell lo leskro rharo krik, hoy leskri zoor his oun lell kova, hoy ko vavar čoras oun dell les ninna i vavarende. 23Koon hi gar ap miri rig, kova hi ap ko vavareskri rig. Oun koon anell gar mantsa i menshen pash o Debleste, kova tradell len o Deblestar.”
O beng, kay pale vella an peskro kheer
24“Te djas i beng dran i mensheste vin, nashell yob an i them trouyel, kay kek djipen hi, oun rodell peske, kay ačell yob nay. Yob te hatsell či, penell lo ap peste: Me kamau pale an miro kheer te djal, dran hoy me vin djom. 25Oun te vell lo pale, hi ko kheer djoudjo oun shoukar.#11:25 O Debleskro Dourho djivas gar an ko kheer. Doleske vas o beng pale. 26Koy rodell lo peske vavar efta bengen, kay hi čilačeder har yob. Oun kol benga djan an ko mensheste dren, oun djivenn an leste. Yaake hi ko mensheha djoungleder har glan ko tsiro.”
I čači barht
27Boud menshe his troul o Yezouseste tardo. Oun har yob kova penas, das i djouvel gole: “Barhteli hi koy day, kolatar tou boldo val!”
28Koy penas lo: “Barhtele hi kolla, kay ap o Debleskro lab shounenna, oun kova ninna krenna, hoy o Devel penella.”
I menshe kamenn o Debleskri zoor te dikell
29Oun boudeder menshe van pash leste, oun his troul leste tardo. Oun yob penas: “Har čilačo hi kol menshe, kay djivenn an kava tsiro! Yon kamenn i baro Debleskro koova te dikell. Oun o Devel sikrell len či vavar har kova, hoy i menshe ninna ap o Debleskro rakepaskro, o Yona, dikan. 30Yaake har i menshe an o foro Ninive dikan, te vas o Yona bičedo o Deblestar, yaake dikenna i menshe an kava tsiro, te vas o Mensheskro Čavo o Deblestar bičedo. 31Ap ko dives, kay rakrell o Devel o čačepen vin pral i tsele menshende, stella ninna i bari rani#11:31 rani rayetsa dran o foro Saba pre. Oun yoy penella, te hi kol menshe čilačo, kay kanna djivenna. Glan i rah tsiro vas yoy dran i dour them, oun vas pash o baro ray Salomo, te shounell li leskre goseve laba. Kava, kay glan t'mende tardo hi, kava hi bareder har o baro ray Salomo. 32Ap ko tsiro, kay rakrell o Devel o čačepen vin pral i tsele menshende ap i phoub, stenna ninna i menshe dran o foro Ninive pre. Oun yon penenna, te hi kal menshe, kay kanna djivenna, čilačo. Glan rah tsiro penas o Debleskro rakepaskro, o Yona, i menshenge an o foro Ninive o Debleskro lab. Oun yon moukan pengro čilačo drom, oun djan ap o Debleskro drom. Kava, kay glan t'mende tardo hi, kava hi bareder har o Yona.”
I čači momeli
33“Kek krell i momeli an, oun khatrell lat, vitar gar čivell lo lat tel i piri. Yob čivell lat pral, te dikell nay hakeno, kay dren vella. 34O mensheskro yak hi har i momeli an i kheer. Te dikeh kokres ap o Debleste, hi kova yaake, har te rhačell koy momeli mishto. Te dikeh ap vavar koova oun gar ap o Debleste, hi kova yaake, har te rhačell kek momeli an kava kheer. 35Doleske penau touke: De garda, te rhačell tiri momeli oun djal gar vin! 36Te rhačell i momeli an o tselo kheer, oun či ačella an o tamlepen, palle hi kova yaake, har te dikenn le i momeli dran hake valya.”
Kova hi gar mishto, hoy i Farisarya krenna
37Har o Yezous yaake rakras, vas i Farisari pash leste oun mangas lestar, te vell yob pash leste, te rhal lo leha khetne. Oun o Yezous djas leha an leskro kheer, oun beshas pes tele, te rhal lo. 38Har ko Farisari dikas, te thovas o Yezous gar peskre vasta glan o rhapen, har biboldengro koova hi, kras yob bare yaka.
39Koy penas o Yezous ap leste: “T'mer Farisarya, t'mer thovenn t'mare khore oun čare vriyal. Oun t'maro dji hi pherdo čorepen oun čilačepen. 40T'mer hayvan či! O Devel, kay kras o tselo menshes, kras ninna leskro dji. 41Denn i čorvelende kova, hoy t'men an t'mare khore oun čare dren hi! Oun či hi t'menge pale-čiddo.
42T'mer Farisarya, hoy t'mer krenna, ko hi gar mishto. T'mer denna o Debleske o deshto kotar t'maro tselo zenlepastar, hoy an t'mari baar hi, oun t'mer bistrenn o čačepen oun o Debleskro kamlepen. Kava hounte krenn, oun ko vavar moukenn gar!
43T'mer Farisarya, hoy t'mer krenna, ko hi gar mishto. T'mer kamenn ap i pralstoune beshepangre an i biboldengri kangri te beshell. Oun t'mer kamenn, te penenn i menshe ap o drom: Lačo dives, mo ray, ap t'mende.
44T'mer Farisarya, hoy t'mer krenna, ko hi gar mishto. T'mer han har i handako, hoy tele an i phoub hi. Oun i menshe djan pral vergel, oun djinenn gar, kay i moule koy paskedo hi.”
45Koy penas i biboldengro čačepaskro: “Sikepaskro, te peneh tou kal laba, praaseh tou men ninna.”
I čačepangren hi douy djia
46Koy penas o Yezous: “T'mer čačepangre, t'mer krenna, hoy gar mishto hi. T'mer krenn i menshenge o djipen pharo. Ko tselo koova, hoy yon hounte rikrenn, hi har i pharo gono ap lengri phik. Oun t'mer rikrenn t'men gar ap kova.
47T'mer Farisarya, hoy t'mer krenna, ko hi gar mishto. T'mer krenn shoukar moulengre khera kolenge, kay his o Debleskre rakepangre. Kolen maran t'mare phoure.
48Yaake penenn t'mer: Ava, mer djinah, hoy mare phoure kran. Kova his mishto.
Me penau t'menge: Yon maran o Debleskre rakepangren. Oun t'mer krenn kolenge i moulengre khera. 49O Devel djinas kova. Doleske penas lo glan i rah tsiro: Me bičrau mire rakepangren oun mire bičepangren pash lende. Oun mashkral lende hi save morsha, kay venn lendar maredo, oun vavar venn palla lino.
50Doleske vell i tseli bibarht ap kal menshende, kay kanna djivenna. Yon oun lengre phoure maran i Debleskre rakepangren, yaake rah har i phoub tardo hi. 51O Abel vas maredo glan i tsele vavar menshende. Pal leste maran le vavar menshen pale te pale. Pal lauterende vavarende vas o Zakari maredo. Kova vas maredo pash i sasterni rhačepaskri#11:51 sasterni rhačepaskri sasterno altaro an o Debleskro baro kheer. Čačepah, me penau t'menge: I tseli bibarht vell ap kal menshende, kay kanna djivenna.
52T'mer čačepangre, hoy t'mer krenna, ko hi gar mishto. T'mer lan o klidepaskro krik, hoy krell o voudar ap o Debleskro drom pre. T'mer djan gar ap ko drom. Oun kolla, kay kamenn ap o Debleskro drom te djal, moukenn t'mer gar koy pre.”
53Oun har o Yezous djas peske, lan les i čačepangre oun i Farisarya rhoyedo palla, oun poučan zoreles lestar boud koova. 54Oun yon dan yak ap hako lab lestar, te nay taprenn le les leskre labentsa.
Právě zvoleno:
Louka 11: Sint-Man2024
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
