Luka 21
21
Fai i Mbor tima Remet Motus
1Yeso ha' hai fit ɗing ngga' ima som ramwayat si fati cefaf ta kyel ima si shwai cef ta ta Wur i DeeƁwe. 2Unai ɗing mbor mujyel nin tima re amet motus ti yes, ti shu kunggwang i cef apil ta. 3Unai Yeso ni, “I laksu mwawei, fai ima mbor mujyel moti ti fa ɓin i anggumi ɗufali shak. 4Shak ɗufal mii si fa ta saa ti hyang ima si mati. Shak ta andi, yit mbor moti ti zan aɗeng ima ti mati i cwa amet, ti fa ya.”
Kofiti i Nggwe' i Naya
(Mat 24:1-2; Mak 13:1-2)
5Shini sin findel tasi mangga' i Wur i DeeƁwe, hu ngga' ima shus malem ta ti afyai muɗesani hu musut i malal ima si fa ɓurti DeeƁwe. Unai Yeso ni, 6“Ɗamam ima hu ɗingi mii, myan si yes ima afung nin ma wa mute tasi nin hai kwa, ɓurti si wa nggwalaniya shak.”
7Unai si lul ta Yeso si ni, “A Makofiti, mii ɗamami si wa mufur a tami ya? Ami ma wa kofi nyai mwash myan i ɗamam mii si fur ya?”
8Unai Yeso ni, “Shingat hun, ka ɗeng dangu kwa. Ɓurti ɗufal hyang si wa yes ti asum amen, si ni, ‘Ayin,’ hu ‘Myan si ndok.’ Ka hu kolfai asussi kwa. 9Myan ima hu hal mangga' i ɓwol yis mufur ti kikyali, hu puɓwarai, ka hu mwen kwa. A kpang ɗamam mii si fur tawe, ɗak ambit i nayai yes, shak ta andi anggwe' i tuu ru kwa.”
10Unai cu wei ti laksus nyai, “Wufen si wa zan ti ɗiyai ti wei, kaitat si wa zan ti ɗiyai ti wei. 11Si wa masti aro i fisha ti fwashash, hu hwem, hu mwatanan mafwashi, si wa mufur ta kikyal hyang. Si wa masti ɗamam i myanat hu mbayai i ɗamam i shok na fo ta fit.
12“Kaciwa' ɗamam mii si fur fisha, si wa ka'su, si fa ɓa si kofu ya. Si wa kolsu ta wei i mareha hu wur i mano', si kolu ta mabel i kaya hu som i kunggul i mashwa, ɓurti asum amen. 13Mai ma wa ɓwaisu fisel ima hu lakus Muro Maɗesi. 14Shak ta andi, no' hun mulwat ya, ka hu tirim ti ngga' ima ɓa hu fwang hihai amu ta kwa. 15Ɓurti i wa fasu findelal hu piris ngga' ima andek ta saa ti som ima si ha' ti wei ti hun, si wa shang ti ngga' ima si mas uɓet ahun si ɓwingil ti hun kwa. 16Hu deemu, hu nasu, hu shunu, hu gung amu, hu myayu si wa fa su fai, si wa for ti shini amu. 17Ɗufal shak si wa tu ɗanggwya ɓurti asum amen. 18Shak ta andi, andek ta saa ti sya i hai amu ti wa ɗafot kwa fweng. 19Mute mangra ti njeng ti wa kinsu wisti mupwet.
Yeso Findel Tasi Mufur i Yerushalima
(Mat 24:15-28; Mak 13:14-23)
20“Na hu ɗing som i ɓwol sin nggar ti Yerushalima ya, hu shangi nyai mufur amet kat ndyong. 21Som ima si ta wii Judya si tital wa ɗafyai wi, ima si ta wii i mbai i mashwai, si rangya, ima si ta ya, kan si rang ta ashwai kwa. 22Ɓurti myan i tot ti ɓur, ɓurti ɓa shak ɗamam si hya ta ngga' ima si worong ta. 23Mwe i arof ima si ti harai, hu ima si ti fe ta masas tasi myani! Ɓurti shum manjengi ma wa yes tasi ta'i hai, hu futut i DeeƁwe ma wa yes ta si ɗufal mii hai. 24Si wa fwaran ti shini ames ya ti awal, si ka'us mano' si kol ta ramam wi shak. Ramam si wa tindak ti Yerushalima ya, yes hya i myan i ramami.
Muhumkyel i Al i Maɗufal
(Mat 24:29-31; Mak 13:24-27)
25“Ɗamam i shok na fo si wa kof si ɓwe hai, hu ture, hu ɓyar. Na naya, ramam si wa wis ti tirim manjengi hu myanat ɓurti nzeret hu wangan i yiir. 26Ɗufal si wa fwaran ɓurti myanat, si wa muro na lo'a' ɓurti ɗamam ima si yes na naya, ɓurti ɗamam ima si ta fit si wa gicik. 27Tasi myani, si wa ɗing ti Al i Maɗufal yis yes ta si ri' ti mbaitati hu njeng i cinjangat ames. 28Myan ima ɗamam mii si lang mufur fisha, luk hun fit hu te mangrai ndere, ɓurti abum amu kat anggasi.”
Shangi si Yit ti Makambong Hai
(Mat 24:32-35; Mak 13:28-31)
29Yeso lakus findel i kaani mai ni, “Ɗing hun gung ti yit i makambong, hu anggum i yitati. 30Myan ima si lang sati mwal, hu wa ɗingi ti haisu hu shangi nyai fu ti kat ndyong ndai. 31A andi hwak, myan ima hu ɗing ɗamam mii, hu shangi kaitat i DeeƁwe kat ndyong.
32“I laksu mwawei, waya mute ti wa mulang ta kwa, a kpak shak ɗamami si fur fisha tawe. 33Fit hu fisha si wa mulang ta, shak ta andi, findelal amen si wa mulang ta kwa fweng.
Taɓak i Shingat i Mute
34“Tehun ti shingat, ka hu fa naya mulwat amu, fota mute i zuruk, hu woti likit, hu tirim i naya. Na hu masi andi, mweni ti wa ka'su kaciwa' hu shangi. 35Ɓurti ma wa mufur ta si shak ɗufal ima si mana naya. 36Ngang tehun ti shingat ndere, hun fwal ti DeeƁwe ɓurti ɓa hu pwet na saa ti shak ɗamam ima si wa mufur fisha mii, ɓa hu wis mute mangra hwak ta wei i Al i Maɗufal.”
37Ngang Yeso makofiti ta Wur i DeeƁwe, na ango ti mas u lang ya u wis ta Fwere i Yitat i Mbar ɓa u rak. 38Tamwen ɗufal shak si ɗyakan yes ta Wur i DeeƁwe ɓa si hal aɗeng ima ma laki.
Právě zvoleno:
Luka 21: AlisIRonNT
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© Wycliffe Bible Translators, Inc. and © The Nigeria Bible Translation Trust 2018
