Génesis 5
5
Cajalcaj sts'umbal Adán
(1 Cr 1.1-4)
1Jich ay te lista yu'un sts'umbal Adán. C'alal Dios la spas te ants-winic, pajal yilel soc Dios te la spase. 2Jtul winic soc jtul ants pastaj yu'un,#Mt 19.4; Mr 10.6. soc la yac'bey bendición.#Gn 1.27-28. C'alal pastajic, Dios la yal: “Ants-winic me ya xc'ot te sbiilique”, xi'.
3Ay lajuneb sjucwinic (130) ya'wilal a te Adán c'alal ayin te snich'ane, Set c'ot te sbiile, pajal yilel soc te state. 4Cha'bajc' (800) xan ja'wil cuxin te Adán te c'alal ayinemix a te Set, soc ay yantic snich'nab, queremetic soc ach'ixetic. 5Ta spisil lajuneb sjucwinic yoxbajc' (930) ja'wil cuxin te Adán, laj bael.
6Ay jo'eb swacwinic (105) ya'wilal te Set c'alal ayin snich'an, Enós sbiil c'ot yu'un. 7Patil cuxin xan te Set juqueb yoxbajc' (807) ja'wil, soc ay yantic snich'nab, queremetic soc ach'ixetic. 8Ta spisil lajchayeb swacwinic yoxbajc' (912) ja'wil cuxin te Set, laj bael.
9Ay lajuneb yo'winic (90) ya'wilal te Enós c'alal ayin snich'an, Cainán sbiil c'ot yu'un. 10Patil cuxin jo'lajuneb yoxbajc' xan (815) ja'wil te Enós, soc ay yantic snich'nab, queremetic soc ach'ixetic. 11Ta spisil jo'eb swacwinic yoxbajc' (905) ja'wil cuxin te Enós, laj bael.
12Ay lajuneb xchanwinic (70) ya'wilal te Cainán, c'alal ayin snich'an, Mahalaleel sbiil c'ot yu'un. 13Patil cuxin xan te Cainán cha'winic yoxbajc' (840) ja'wil, soc ay yantic snich'nab, queremetic soc ach'ixetic. 14Ta spisil lajuneb swacwinic yoxbajc' (910) ja'wil cuxin te Cainán, laj bael.
15Ay jo'eb xchanwinic (65) ya'wilal te Mahalaleel c'alal ayin snich'an, Jared sbiil c'ot yu'un. 16Patil lajuneb xcha'winic yoxbajc' (830) ja'wil cuxin xan, soc ay yantic snich'nab, queremetic soc ach'ixetic. 17Ta spisil jo'lajuneb yo'winic yoxbajc' (895) ja'wil cuxin te Mahalaleel, laj bael.
18Ay cheb sbalunwinic (162) ya'wilal te Jared c'alal ayin snich'an, Enoc sbiil c'ot yu'un. 19Patil cha'bajc' (800) xan ja'wil cuxin te Jared, soc ay yantic snich'nab, queremetic soc ach'ixetic. 20Ta spisil cheb sbalunwinic yoxbajc' (962) ja'wil cuxin te Jared, laj bael.
21Ay jo'eb xchanwinic (65) ya'wilal te Enoc c'alal ayin snich'an, Matusalén sbiil c'ot yu'un. 22Sjoy sba soc Dios te Enoc te la spasbey sc'anjel yo'tane. Patil jo'lajunwinic (300) xan ja'wil cuxin c'alal ayinemix a te Matusalén, soc ay yantic snich'nab, queremetic soc ach'ixetic. 23Ta spisil cuxin jo'eb sbalunlajunwinic (365) ja'wil te Enoc. 24Sjoinej Dios te la spasbey sc'anjel yo'tan. C'ot yorail te ma chicanuc bay bajt', ic'ot bael yu'un Dios.#Heb 11.5; Jud 14.
25Ay juqueb slajunwinic (187) ya'wilal te Matusalén c'alal ayin snich'an, Lamec c'ot te sbiile. 26Patil cuxin xan te Matusalén balunlajunwinic xcha'bajc' soc cheb (782) ja'wil, soc ay yantic snich'nab, queremetic soc ach'ixetic. 27Ta spisil baluneb sbalunwinic yoxbajc' (969) ja'wil cuxin te Matusalén, laj bael.
28Ay cheb slajunwinic (182) ya'wilal te Lamec c'alal ayin snich'an. 29Noé sbiil c'ot yu'un te snich'ane, yu'un jich la yal: “Scaj te la yac' bolobuc sc'oplal lumq'uinal te Diose, ja' ay jwocoltic ta at'el ta jc'abtic yu'un. Te alale ya me yac'botic cux co'tantic”, xi' sc'oplal yu'un. 30C'alal ayin Noé, jo'lajuneb slajunwinic xcha'bajc' (595) ja'wil cuxin xan te Lamec, soc ay yantic snich'nab, queremetic soc ach'ixetic. 31Ta spisil juclajuneb sbalunlajunwinic xcha'bajc' (777) ja'wil cuxin te Lamec, laj bael.
32Ay jo'winic xcha'bajc' (500) ya'wilal te Noé c'alal ayin te snich'nabe: Sem, Cam, soc Jafet sbiil c'ot yu'un.
Právě zvoleno:
Génesis 5: TZOXCH
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Biblia en Tzeltal de Oxchuc y Tenejapa © Sociedad Bíblica de México, A.C., 2001.