Matthew 28
28
Jesus‑em Unguvaghtellgha
1Sabbath‑em kingunganeng, aghtaghaghaqaallu sivulighmi aghneghani santillghem, Mary Magdala‑ghmii, ilangallu Mary‑m, lliveq esghaghyaghtuqaak. 2Tawani pilleghmi nuna qapragllakaq qayughllak Atanghem yaqulga qilagmeng ukikaq. Lliivghem paayngan uyghaga ullghitaghtaghluku aqumegkaa. 3Esghaqaaluni nighugpaguullghiistun nighugtutkaghmi, aatkiillu qatelghiit anigustun. 4Kelengakistet yaqulegmeng alingruuqat repall ungeleglluteng, tuqukastunllu lliiqat.
5Iwernga aghnak yaqulgem pikakek, “Alingegpenatek. Liisimakamtek Jesus ivaghaqaghtek, qaquuraqaayalghii. 6Whaanneghituq; unguvaamaaq pinaqnilleghmitun. Tagitek, esghaghyaghtughtegnegu lliviksaqanga. 7Enkaam ungipaatqaghsaghtughtegneki maligsaaghtengi unguvaamaniluku tuqulleghmeng, agallu sivullgaaghumaaq Galilee‑mun. Taagani esghaghlleqaghsi! Taawa ungipaatamtek.”
8Enkaangam tawaninginaq lliveghmeng aghulaqegkak, alingumaagmeklu quyaghllagumaagmeklu, ketanqusnaq ungipaasaghtuqiik maligsaaghtengi.
9Jesus‑em aliighaghfiklukek pikakek, “Nekeggmelleq elpetegnilli.” Enkaam taakuk aghnak takuluku, itegii nuqneqluki maniguqaak. 10Taagken Jesus‑em pikakek, “Alingegpenatek. Ungipaasaghtughtegneki malighsaaghtenka anglegusiitkanka, Galilee‑munꞌnguq aglaghlit taaganinguq esghaghlleqaatnga.”
11Aghnak igleghsimalukek, lliveghmelnguut ilangi kelengakistet Jerusalem‑emun iteghluteng, chief priest‑enun aapqaat qamaglluku tamaana apeghiiqaq. 12Enkaam chief priest‑etlu, siivanlleghetlu qerngughlluteng agghitkat. Taagken maniliteghllagluki pilluwaghtet, 13pikiit, “Ungipaannakesi yuget, ‘Unugmi qavaasimaluta maligsaaghtengita tagiluteng teglegumaat yugusii.’ 14Governor‑em nagaquumakagu whangkuta aleghqughlleqaghput enkaam seghleliillengnaanghitusi.”
15Kelengakistet mani tuguluku pisqelleghmegestun pikat. Enkaam whavemun kenlanga Jews‑et paninang aapghaqaat Jesus‑em yugusii teglekaqniluku maligsaaghtenganun.
Jesus‑em Aliighvikegkangi Maligsaaghteni
16Tawaten pimaluki, taakut qula ataasiq siipneqluku maligsaaghtet aglaqat Galilee‑mun, naayghamun Jesus‑em pisqellghatun tawaten. 17Esghaghyamegteggu Jesus maniguqaat, iwernga ilangita aygughikegkaat ellngangutanga. 18Jesus‑em takuluki pikii, “Qamaglluni aghtughyaghqaanghilleq qilagmillu, nunamillu whangamnun tagivaqaaguq. 19Tamaaken apalluqluku aghulaqlusi qamaglluki yuget maligsaaghtengllaghteki whangamnun, paaptaayelaghteki Aatghakun Atam, Ighneghem, Agleghnalghiimllu Taghnegham. 20Apeghtuusaqiteki qaatkesqelluki qamaglluki qelghutkanka elpesinun. Elpesinitepestaaghllequnga quunpeng kenlanga kenletghuutellghanun nunam.”
Právě zvoleno:
Matthew 28: ess
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2018, Wycliffe Bible Translators, Inc. All rights reserved.
