Mark 1
1
Ungipaqillgha John‑em Paaptaayestem
1Pinilghiit Ungipat Jesus Christ‑ameng ayuqelghiit, Ighneghaneng Kiyaghneghem piinliqaagut whaten: 2Uuknaliqistem Isaiah‑m igaqegkaqaa Kiyaghneghem whaten pillgha,
“Ungipaghteka kayagtekestaghnaqaqa sivugpeni yataaghqesqelluku tuumkaghqan.
3Kilgaani ma akilghuugaquq whaten,
‘Atanghem tuumnga yataaghqiteggu, taklaghteggullu!’”
4Taana ungipaghta John‑nguuq Paaptaayesta. Kilgaani paaptaayelaghaquqlu ungipaghaquqlu whaten, “Avuteghqellusi, seghleghqennanighlusi paaptaayetek, enkaam Kiyaghneghem seghevulleqiisi.” 5Judea‑ghmiitlu Jerusalem‑eghmiitlu nagasaghtuutkaat John. Enkaam seghleghqelleteng apeghranghatki paaptaayaaqegkangi kiiwegni Jordan‑meng aatqelghiigni.
6John‑em aatkii camel‑em melqwaneng ulimaaghet, meqameng tafsiluni, neghaqelghii locust‑mengllu honey‑mengllu. 7Ungipaqikaq whaten, “Kingumneng yuuk tagiyaghqaaguq aghtughyaghqaanghitaghalghii whangamneng. Whanga sasiinghitunga repall itemtepagningitanka singii. 8Meghmeng paaptaayaaqamsi, iwernga ellngan paaptaayelleqiisi Agleghnalghiigneng Taghneghagneng.”
Jesus‑em Paaptaayellghallu Nanghiiqullengellghallu
9John tawaten aneghsimaluku Jesus kaatkaq Nazareth‑meng, Galilee‑melngughmeng, enkaam John‑em paaptaayekaa Jordan‑egni. 10Paaptaayeneghmeng taaqsatni Jesus‑em tawaninginaq esghaqii qilaget qelpelghiit, Agleghnalghiiklu Taghneghak ukilghiik ellminun dove‑etun ayuqlutek. 11Memllu qilagmeng pikaa, “Ighneqamken, piniqegkamni. Efquqepigtamken.”
12Tawaninginaq Agleghnalghiim Taghnegham Jesus aghulaqestekaa kilgaanun. 13Ellnginaghhaakaq iwerngaqun nuyaalghiit teghikusat tamaantekat. Tamaansimaluku Tughneghaam nanghiiqukaa ketwhell 40 aghneq, iwernga yaqulget aflengakegkaat.
Jesus‑em Nakmikegkangi Estamat Iqalliniightet Maligsaaghteknaluki
14Tagtalmi taakwani kingunganeng John‑em anusimingllallghan, Jesus Galilee‑lluni ungipaqikaq Pinilghiineng Ungipaneng Kiyaghneghtaneng. 15Pikaq, “Pilleghqaq whaa kaasimaaq enkaam Ataneghpagullgha Kiyaghneghem whaa whaantuq! Avuteghqellusi, seghleghqennanighlusi ugpeqiteki Pinilghiit Ungipat!”
16Jesus igleghutkelluku Naayvam Galilee‑m esnengakun esghaqakek maalghuk iqalliniightek siiftilghiik negaghpagmeng. Simon‑enkunguftuk Andrew‑nkuk anglegutkullghiik. 17Jesus‑em pikakek, “Maligtegnenga, apeghtughnaqamtek yugmeng naapsagutesqellutek.” 18Tawaninginaq negaghpatek unilluki maligtekaak.
19Tazingapighqaaghluni esghaghlaataqakek James‑enkuk John‑enkuk anglegutkullghiik, ighneghqek Zebedee‑m. Negaghpagmegneng ilaaghtulghiik angyamegni. 20Jesus‑em esghaqiinaghlukek pikakek, “Maligtegnenga!” Enkaam angyakun unilluku atayek Zebedee, taakutlu qepghaghtenguluki tugukateng, maligtekaak Jesus.
Yuuk Ilumikun Tughneghalek
21Jesus‑enkut maligsaaghtekullghiit Capernaum‑emun kaatkat. Sabbath‑ngughsagu, Jesus synagogue‑elluni apeghtughikaq. 22Nagallghiit saghiighayagutkaat apeghtughillgha, qayughllak apeghtughikaq Kiyaghneghem pilleghqalitellghakun, apeghtughistengistun Liilightuusat pigpenani.
23Taagken yuuk ilumikun tughneghalek iteghluni synagogue‑mun akilghuukaq, 24“Jesus, Nazareth‑eghmii, sangamta qinuyugsikut? Naafqesaghtuuzikuut? Kinanguten liisimakaqa, Yugulighistenguuten Kiyaghneghem akequsaqegkaa kayaglleqniluku.” 25Jesus‑em aghyuuqaa tughneghaq, “Nepngunang, aani yugmeng.” 26Tughneghaam yuuk sayugpagtaghtesluku, araghllagumaghmi aanegkaq. 27Yuget saghiighayugluteng ellmeggneng aapqughaaghutkat, “Una sangaawa? Una apeghtuusaghraghaaguq! Kiyaghneghem aghtughyaghqaanghillghakun uum yugem qelghii tughneghaat aanesqelluki, legan qaatkaat.” 28Enkaam Galilee‑lqaaghaghmi yuget ungipaqnginaamaan Jesus pikaat.
Jesus Naallghuqulghii
29Taagken Jesus aanaghesnaghluni synagogue‑meng, Simon‑enkuk Andrew‑nkuk mangteghiitnun pikaq, James‑enkuklu John‑enkuk maligtekaak. 30Simon‑em sakinga ingaghmeteftuq, puqleghaluni. Legan Jesus kaatuq ungipaatkaat aghnaq qinuyuguniluku. 31Iteghluni aghnaq iiggakun tuguluku nekevestekaa enkaam puqleghangiilluni, kepsiiqunginaamiita pikii.
32Sabbath‑em ighivgaani siqineq tevighyan Jesus‑mun tagiquutkiit qinuyulghiit, tamaakutlu tughneghalget ilumegteggun. 33Qamagtengngwaaghluteng Capernaum‑eghmiit mangtegham manughaani qerngughutkat. 34Enkaam Jesus‑em uglalghiit naallghuquqii allaaghhiinaghneng aqnighneghitneng, aanesquqiillu tughneghaat yulghutet ilungitneng. Tughneghaat sameng pisimangilkangi, qayughllak kinangutanga liisimakegkangat.
Jesus Ungipaqilghii Galilee‑mi
35Salin aghsugniiteghllagluku, Jesus makelluni aanegkaq yughaghnaluni kilgaani. 36Simon‑enkut ilakulghiit ivaghyaghtuqaat, 37naalkesamegteggu pikaat, “Yuget ivanghiighutaqaaten.” 38Yeghlegi Jesus‑em pikii, “Ilangitnun nunat pinaqukut. Ellngitnillu ungipaqiyaghqaagunga, qayughllak tamaaken apalluqluku taginguunga.” 39Enkaam Galilee‑lqaaghaghmi igleghutkelluku ungipaqikaq synagogue‑nni, aanesquqiillu tughneghaat yuget ilungitneng.
Jesus‑em Naallghuskanga Yuuk Leprosy‑lek
40Yuuk leprosy‑lek tagiluni Jesus‑mun manungakun segesqughlluni nangllegsipiglluni pikaa, “Piyukelqegkuvgu naallghutaghtinga ukmangiightesqellunga.”
41Jesus‑em nangllegyagulluku nengugluku saaftutkelluku pikaa, “Piyukelqaqa, naallghuten!” 42Tawaninginaq yuuk naallghulluni ukmangiightekaq. 43-44Taagken Jesus‑em ineghtengngwaaqaa, “Nagataghten, wataghllak kinkut alngunak ungipaategpenaki naallghunniluten whangamnun. Itupill priest‑mun yuvghiighsighyaghtaa. Enkaam aghqerraaghhaaten Moses‑em Liilightuusiita pisqellghistun ipapighqesqelluku yugnun naallghutellghen.” Taagken tawaninginaq aghulaqestekaa. 45Iwernga yugem igleghutkelluku nani alngunak aapghumanginaqaa Jesus‑mun naallghusimaniluni. Taagken kenlanga Jesus alngunak nenun pinaniqaq, qayughllak yulghuteghllaget takwaaqegkangat, enkaam paaghqillghani kiyaghtekaq. Iwernga naken alngunak yulghutet paninang takwaaqegkangat.
Právě zvoleno:
Mark 1: ess
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2018, Wycliffe Bible Translators, Inc. All rights reserved.
