Matthew 27
27
Jesus Aglaaskangat Pilate‑mun
1Unaanguluku qamaglluteng chief priest‑etlu, siivanlleghetlu agghitkegkaat tuqutesnaluku Jesus. 2Enkaam asighqelluku aglaalluku tuunegkaat Pilate‑mun, Rome‑em governor‑nganun.
Judas‑em Tuqullgha
3Uveghpagutistem Judas‑em, liigiksaqminiki agghistet nanqigsimakangat Jesus tuqutesaghqaaluku, qemall avuteghqeghllakaq. Enkaam chief priest‑enunllu, siivanlleghnunllu veghusaghtuqii 30 silver‑et manit. 4Pikii, “Seghleghqumaanga uveghpagutellemkun seghleghqumangilnguq yuuk tuqutesqelluku!”
Pikaat, “Whangkunnun sasiilleqa? Elpek tawaten pilqan!”
5Enkaam Judas‑em miluutkii manit Temple‑em ilunganun. Taagken aghulaqluni qemitkaq.
6Chief priest‑et saghnatkelluki manit pikat, “Liilightuusamnni ukut manit kanaghsaghqaanghitut manilghutaanun Temple‑em qayughllak llivikuusaqegkaagut tuqutusighqaaluteng yugmun.” 7Enkaam agghitkegkaat mani tukfighisiqnaluku nunamun atelqelghii, “Potterʼs Field” lliveghvigkaaluku nakuumiinun. 8Enkaam whavemun kenlanga taam nunam ateliitkaa, “Nunanga Aawem”.
9-10Neghighluku uuknaliqistem Jeremiah‑m uuknaliqutkegkaqii whaten,
“Ilangita Israel‑eghmiit itagnaqegkaqiit angtalangit 30 silver manit, qayughllak sumeghmeggni tawaten akitutkaniluku pikaat.
Taagken taakut manit tukfighisiqegkiit Potterʼs Field‑mun. Tawaten Atanghem qelqaqaanga.”
Jeremiah‑m uuknaliqellgha apeghiightestekaqaat chief priest‑et tukfighaqngamegteggu Potterʼs Field.
Pilate‑em Aapqughaaqanga Jesus
11Tawani Jesus nekevghalghii sivungakun Rome‑em governor‑ngan. Governor‑em aaptekaa, “Jews‑et Umiilkataan?”
Jesus‑em kiimsiqaa, “Elpek tawatenniluku piin.” 12Iwernga chief priest‑etlu, siivanlleghetlu anaggunnighngaatni, sameng pimangitkaq.
13Taagken Pilate‑em aaptekaa, “Nagasikii qamaglluki anaggunnillghit?”
14Iwernga Jesus‑em kiimsiimangilkanga talwa ataasimun anaggunnilleghmun, enkaam governor‑a saghiighayugllakaq.
Jesus Tuqutesnaqegkangat
15Ayumiitanga tamaghhaan Passover‑em Neqenghaghqellghani Rome‑em governor‑ngan itemutaqaa ataasiq anusimingllaghaq yulghutet nakmikegkaat. 16Tamaani pilleghni tamaanteftuq apeghseghuq anusimingllaghaq, aatgha Barabbas. 17Enkaam yulghun qerngughsan, Pilate‑em aaptekii, “Naliq itemutesugesteggu Barabbas nalighmeng Jesus, atilqelghii Christ‑ameng?” 18Pilate‑em liisimakngukangi Jews‑et igleghutistengita aqinakluku Jesus tagitngukangat ellminun.
19Pilate aqumgamaluku nanqigtivigmi, nulighhan ungipaatesaghtuqaa, “Sanaqefqaan taana seghleghqellghilnguq yuuk qayughllak qavanguqegkaqaqa enkaam aghnelqusiq seghleliighusiqaqa.”
20Tawaten pimaluku chief priest‑etlu, siivanlleghetlu aaghqutaqegkiit yulghutet itemutesqelluku Barabbas, Jesus tuqutesqelluku. 21Governor‑em aaplaataqii yulghutet, “Naliq itemutesugesteggu elpesinun?”
Kiimsiqaat, “Barabbas!”
22Pilate‑em aaptekii, “Sanaqsikunꞌngam Jesus atilqelghii Christ‑ameng?”
Kiimsiqaat, “Qaquuraghtestigu!”
23Pilate‑em aaptekii, “Sangan? Sangwaa seghleq pikaqagu?”
Iwernga iglagtaaghalluteng akilghuukat, “Qaquuraghtestigu!”
24Pilate liigikluni alla sapagningisami esghaghluki yulghutet seghleliiqestalghiit, tugulukek aghmigusik uughtuqaq sivungitni yulghutet. Taagken pikii, “Whanga avutngitunga tuqutelleghqaanun, elpesi tawaten pistengngwaaghsi!”
25Yulghutem iingunaghhaghmeng akitkaat, “Whangkuta kingunqullghiini avutngullequkut tuqutellghanun.”
26Taagken Pilate‑em Barabbas itemulluku, enkaam Jesus kagsagmigtesluku tuunegkaa pilluwaghtenun qaquuriisqelluku.
Pilluwaghtet Legasiighwaatkegkangat Jesus
27Taagken governor‑em pilluwaghtengita aglaatkaat Jesus qerngughtaaghvigmeggnun governor‑em mangteghaani. Tawani ilateng qerngughlluki kangllukaat. 28Aatkii mataghqughluki, kavirrakegtagneng atkuyaaghegneng aatesfikegkaat. 29Taagken sikughllugtuqameng avayameng qaghpangllaghluku naasqwakun aatestekaat. Aghenqigneghanllu iiggakun tugusluku unaghsiighwaq, segesqughquulluteng sivungakun legasiighwaatkegkaat. Pikaat, “Quulvaghamken Umiilgat Jews‑et!” 30Taagken qesiquluku, tuguluku unaghsiighwaq naasqwakun anagulqaat. 31Legasiighwaatkenneghmeng apeghiighyamegteggu, atkuyaaghqek mataghllukek ellngan katam aatkii aatesquqiit. Taagken qaquuraghyaghtuqaat.
Jesus Qaquuraqangat
32Aanumaluteng neghllagmeng esghaghluku yuuk, Cyrene‑eghmii, aatgha Simon, qelqaat uyamigesqelluku Jesus‑em qaquuraa. 33Kaasameng Golgotha‑mun (Golgotha whaten pisiiguq, “Yugem Naasqwan Nenga”), 34pilluwaghtet Jesus‑mun tuunegkaat meghesqelluku wine‑a sungaghnilngughmeng akumegkaq. Iwernga naasiighluku meghyunghitkaa.
35Pilluwaghtet qaquuraghyamegteggu, nengiitkiit aatkii ateghtiiraaghutkaqluki. 36Taagken tawani aqumuulluteng kelengakegkaat. 37Naasqwan quulngakun nekegtekaat qaquurallghanun apalluq igaqngalghii whaten, una jesus‑nguuq, umiilgat jews‑et. 38Maalghuklu wayaghniightek qaquuraqagket, aallgha aghenqigneghakun, ilanga saghumigneghakun.
39Yuget naghughlleghhiit, legasiighwaatkegkaat Jesus, naasquteng ufsugusimiita 40akilghuukaat, “Elpek pikaaguten Temple‑a naafqennaqniluku enkaam pingayuni aghneghni nekefneqiggnaqniluku. Kiyaghneghem Ighneqngukangaten elpeneng katam yuguli, qaquurameng ukigi!”
41Tawateghpigaq Chief priest‑et, maligulluteng apeghtughikayugnun Liilightuusaneng, siivanlleghnunllu, legasiighwaatkegkaat, 42“Yuguliiqii ilangi, naqam ellmineng katam yugulipagningituq! Umiilgukuni Israel‑eghmiinun ukigli qaquuramineng enkaam ugpeqnayaghaghput. 43Neghyukngwaa Kiyaghneq, piiquqlu Kiyaghneghmun Ighneqniluni. Kiyaghneghem piyukngukumigu yuguliligu maaten.”
44Qaquuralgutegkenkallu wayaghniightek legasiighwaatkegkaak.
Jesus‑em Tuqullgha
45Taagken qamaglluni nuna mamleghqwaakaq aghneghem qukaaneng kenlanga three‑klaagmun. 46Tamani nani three‑klaagmi Jesus akilghuughllakaq whaten, “Eli, Eli, lama sabachthani?” Whaten pisiq, “Kiyaghnemni, Kiyaghnemni, sangama unisinga?”
47Ilangita yuget tawanlenguut nekevghallghiit nagalluku pikat, “Uum yugem Elijah tuqlughaghaa.” 48Tawaninginaq yuuk ataasiq aqfaquqaq nepsagusimeng. Taagken nepluku quwaalghiimun wine‑mun, unaghsiighwaghqun nekeglluku nengugutkaa Jesus‑mun melugriisqelluku.
49Iwernga ilangita pikaat, “Wiintaku, esghapakaalteggu Elijah‑m yuguliyaghtughnayukagu!”
50Allameng Jesus araghllagluni pegtekakek taghneghagni.
51Tawani pilleghmi Temple‑melnguq safkaaghun, pikegken kanavek piikaq malghughqelluni. Nuna ufsugusan, uyghaget quupaghtaatkat, 52lliivghet qelpeghaghtaatkat, uglalghiitlu Kiyaghneghem yugi tuqulaghaatkaayalghiit unguvaghtuutkat, 53enkaam lliveghmeggneng aanleghaatkat. Kingunganeng Jesus‑em unguvaghtellghan aglaghtuutkat Agleghnalghiimun Neghllagmun, tawani yulghutem esghaqiit.
54Tawani qaquuraghvigmi, umiilwaaghenkut pilluwaghtekullghhiit kelengakegkangat Jesus, esghaghyamegteggu nuna qapragllalghii, tamaanallu sangwaa piyan, alingruughuteghllakat. Pikat, “Ipapestaaq una Ighnequmayaghtagu Kiyaghneghem!”
55Tamaanteftut aghnalghutet esghapalghiit uyavaneng. Galilee‑meng maligtekaat Jesus kayusiinnaluki. 56Akulngitniteftut Mary Magdala‑ghmii, Mary‑llu naangak James‑enkuk Joseph‑enkuk, Zebedee‑mllu ighneghegkenka naangak.
Llivellgha Jesus‑em
57Whanikuyagu aklungilnguq yuuk aatgha Joseph, Arimathea‑ghmii, maligsaaghtenga Jesus‑em kaatkaq. 58Pilate‑mun piluni Jesus‑em yugusii tungsiqaa. Enkaam Pilate‑em qelghutkaa yugusiq Joseph‑mun tuunesqelluku. 59Enkaangam tuguluku yugusii, nutaghaghllugkun qiipaghakun iimgutkaa. 60Taagken llikaa ellmi lliveghraghaghmikun, uyghagrugllagkun laagtestekamikun siklaqumeng. Taagken paaynganun ullghitaghlluku uyghagllak, apeghiighyami aghulaqegkaq. 61Tawanteftuk Mary Magdala‑ghmiinkuk, aallghallu Mary lliveghmun ayuqlutek aqumgalghiik.
Kelengakegkangat Jesus‑em Lliivgha
62Unaamingani kingunganeng Yataghqefigem Aghneghan, chief priest‑etlu, Pharisees‑etlu aleghqughyaghtuqaat Pilate. 63Pikaat, “Yuguniiq, neqamikaghput taana puughtista salin unguvaluni pikaaguq, ‘Pingayut aghneghet atughluki unguvaghteslequnga.’ 64Enkaangam kayagutigu lliivgha kelengakngwaaghesqelluku pingayunun aghneghnun, luuraq maligsaaghtengita yugusii teglegluku ungipaannayukatki yuget unguvaamaniluku. Una iqlengaq seghleghataghaayaghqaaguq sivulighmeng.”
65Pilate‑em pikii, “Kelengakistelguusi, elngaatall kelengakestengngwaaghteggu lliveq.”
66Enkaam lliveghmun aglaghluteng maghqalluku nalluniiqaat uyghak qelpeghhnayukatgu. Taagken qelghutkaat pilluwaghtenun kelengakesqelluku.
Právě zvoleno:
Matthew 27: ess
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2018, Wycliffe Bible Translators, Inc. All rights reserved.
