Mateo 21
21
Kwingila Yerusalemu
1Avija vuwakwenhukile Yerusalemu na kuvika Betfage muna digongo ja mizeituni, Yesu kawatuma wanahina wabili yowalongela, 2“Gendeni mvike ikibuga kija kimlolani, mhunde momona mhunda yafungigwe, na mwanage mhunda hamonga; wadoholeni mngalile! 3Kamba munhu yahamuuzani mbuli, longeni, Mndewa kawalonda wano; mhunde komwinghani.”
4Gano gose gagalamka, giladi divikizwe Longa dilongigwe na mtula-Ndagu yolonga:
5“Mulongeleni biti Sayuni:
Lola Mndewa wako yokwiza kumwako,
kahola, na heyo kakwena mhunda na mwanage mhunda,
chana cha mhunda.”
6Waja iwanahina wachola hiko, watenda kamba Yesu viyawalagize. 7Wamgala yuja imhunda na imwanage, wazika nguwo zawo uchana mumgongo, na heyo kakala uchana mmwake. 8Wanhu bwando wazigeleka nguwo zawo mnzila, wayagwe wakanha mitambi ya mibiki, waitambalika mnzila. 9Gaja matinghanilo walongole na waja wali ukisogo waguta nyangi wolonga, “Hosiana Mwanage Daudi! Yatunizwe Yokwiza kwa tagwa ja Bwana! Hosiana kuulanga!” (Hosiana kihindukizo chake: Umtaze Mndewa, hongela!)
10Aluja luyengile Yerusalemu, wambo jose dikala na nyukwanyukwa, wauza, “Yuyo yalihi yuno?” 11Matinghanilo walonga, “Yuno yuyo yuja mlaguzi Yesu Mnazareti wa Galilea.”
Kudingʼaza dihekalu
12Yesu kengila Hekalu, kawawinga wose wakalile woguliza na kugula mdihekalu, kaihindula mibawo ya ukusosokanyila zimhiya za hekalu, na ivigoda vyawo wakalile woguliza iwanziwa. 13Kawalongela, “Yandikigwa, Ngʼanda yangu yokemigwa ngʼanda ya kupulila, bali mweye mwitenda hango ja wabokonyo.”
14Na vimbugumbugu na vimbetembete wamgendela mumuja mdihekalu, kawahonya. 15Bali wakulu wa nhambiko na wana-Nzuma vuwagawene manzonza gatendigwe, na iwana woguta nyangi mdihekalu wolonga, “Hosiana Mwanage Daudi,” wagwa lusango. 16Wamulongela, “Kuhulika wano vuwolonga?” Yesu kawedika, “Ona, hamnasoma, ‘Muna imilomo ya iwana wadodo na vinghele wokonghezwa Gweye kuivikiza nhogolwaʼ?” 17Kawaleka, kalawa kunze ya diwambo, kavika Betania, kawasa kuko.
Mkuyu wodumilizwa
18Avija imitondo viyakalile yochola kukiwambo, kona nzala. 19Kajona biki dimonga ja mkuyu behibehi nanzila, kaugendela; hawene kinhu uchana muja muna imitambi, bali mitepo yeka, kaulongela, “Sikuwoneke mjo mmwako mpaka milongo yose!” Mhunde dikuyu dinyala. 20Iwanahina vuwadiwene, wakanganya walonga, “Vivo vilihi dikuyu dinyala mwanza umonga?” 21Yesu kedika kawalongela, “Ihoko nomulongelani, muhawa na kugoga kuli bule kinghwaso, mosanghana bwando, si kamba hijo ja umkuyu dili yeka, bali muhadilongela gongo dino, Ngʼozoka ukaibwanhe mbahali, josanghanwa. 22Gose gonda mulonge muna ukumpula Mulungu, muhawa bila ya kinghwaso, mogabokela.”
Magweka ga Yesu galawa kwahi?
23Viyamalile kwingila mdihekalu na kukala hasi yowalanguliza wanhu, wakulu wa nhambiko na iwalala wamgendela walonga, “Iyo ndagizi ilihi yusanghanila manzonza gano, na heyo yuyo yalihi yakugwelele ndagizi ino?” 24Yesu kedika kawalongela, “Na niye nomuuzani mbuli imonga; kamba muhanidika, na niye nomulongelani kamba kwa ndagizi ilihi inisanghanila gano. 25Ubatizo wa Yohana ulawa kwahi, kwa Mulungu hebu kwa wanhu?” Wandusa kwiuza wenyego kwa wenyego wolonga, “Tuhalonga ulawa kwa Mulungu, kotulongela, habali hamumtogole? 26Kabili tuhalonga ulawa kwa wanhu, todumba madale ga iwanhu, kilumbo wose wamtanga Yohana yuyo Mlaguzi.” 27Wamwidika Yesu walonga, “Hamvitangile.” Na heyo kawalongela, “Na niye simulongelani ndagizi zilihi zinisanghanila gano.
Iwana wabili wowahuguza Mafariseo
28Bali mokonaze? Munhu imonga kakala na wanage wabili. Kamgendela yuja imwanamkulu kamulongela, Mwanangu, lelo genda ukasanghane mumgunda wa mitongoni! 29Kedika kalonga, Nochola, Mndewa; hacholile. 30Kamgendela yuja Magati kamulongela vivija, na heyo kedika kalonga, Ndema; kumwande kagaluka umoyo, kachola. 31Mokonaze kwa wano wabili yalihi yasanghane gayalondile tata?” Wamulongela, “Ayuja wekabili!” Baho Yesu kawalongela, “Ihoko nomulongelani, wawila kodi na wagoni wolongola kwingila mundewa wa Mulungu kulongozi wenu. 32Kilumbo Yohana keza kumwenu na nzila ya ihoko, mweye hamumtogole, bali wawila kodi na wagoni wamvumila; na mweye vumgawene, hamgaluke umoyo mumvumile.
Walimi wa mitongoni wehile
33Tegelezeni mzungu uyagwe. Kukala na munhu mwene ngʼanda, na heyo kahanda mgunda wa mitongoni, kauzungulusa konhi, kahimba kolongo da kukamila zinhongoni, kazenga dungu, kaweka walimi, kachola. 34Vikivikile behi-behi kikomo cha umujo, kawatuma nyakadala zake kukuja kwa iwalimi, wakasole uja umujo. 35Waja iwalimi wawagoga nyakadala zake, imonga wamtowa, imonga wamkoma, na iyagwe wamtowa na mabwe. 36Yomana kuwagala nyakadala wayagwe bwando, kubanza waja wa ikilongozi, wawatendela vivija. 37Kimambukizo kamgala mwanage kumwawo yolonga, Kwali womdumba mwanangu. 38Bali waja iwalimi vuwamuwene yuja imwana, welongela, Yuno yuyo muhala tagwa; leka tumkome, tuusole uhalali wake! 39Wamana kumgoga, wamwasa kunze ya umgunda wa imitongoni, wamkoma.
40Avo vondayeze bwana wa umgunda wa imitongoni, ko-watendaze waja walimi?” 41Wamulongela, “Kowakoma vihile waja iwandumu, na muja mumgunda wa imitongoni koweka walimi wayagwe, wondawambwezele mujo muna ikikomo chake.” 42Yesu kawalongela, “Hamnasoma Jandiko vidilongile:
Dibwe diwalemile wazengaga,
hijo digaluka dibwe kulu ja kingolobweda.
Buli dino dilawa kwa Mulungu,
digalamka mnzonza hameso getu.
43Kileka hivo nomulongelani, undewa wa Mulungu wosegezwa kumwenu, wogwelelwa lukolo luyagwe londalulave mujo wake. 44Na hiyo yogwila uchana mdibwe hijo, kobenekabeneka; na yoyose yonda dimgwile, jompasanga lipilipi.” 45Wakulu wa nhambiko na Mafariseo vuwahulike mizungu yake, wavitanga kamba kawalonga hewo. 46Na hewo vuwazahile kumgoga, wawadumba matinghanilo, kilumbo hewo wamona kamba mtula-Ndagu.
Právě zvoleno:
Mateo 21: ZAM75
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
New Testament in Zaramo © United Bible Societies, 1975.
