Mateo 6
6
Kufiima uwiila
1“Lolini niingo; mutachita usiifu wiino apa maaso ya yaantu, kuti yamulole; kuno ndi mwachita ndi fiyo, mutalupiiwa unnambu kuli So wino wa mwiyulu. 2“Ichino weemwi, pano ulufiima amawiila, utachuuma imbila, ndi fino yaufi yakuchita un-ng'anda shaao ishii Leesa nunnsila, kuti yateshiwe na aantu. 3uMwenemo ndumuneena, yaati yapokelela unndambu wao. Leelo weemwi pano ulufiima amawiila, naanti ikasa lyaako lya kuli kamani litachimanya chino ikasa ilya kwiluunji liluomba. 4Uwila waako uwa ufiso; na So wino alulola uku nfiso, alukupa unndambu.
Apa kupepa
(Mk 11:25-26; Lk 11:1-4)
5“Kayili pano mulusaalika, mutachikolana na yaufi, kuno weene yakuunda ukusaalika aangi yimiliile un-ng'anda shii Leesa nu masansa ya sila, kuti yaloleke na aantu. uMwenemo ndumuneena, fino yati yapokelela unnambu wao. 6Leelo weemwi, pano ulusaalika, ingila un-ng'anda unkasi, na ndi wayaala undyaango waako, usaalike pali So uku ufiso; na So wino alulola uku ufiso, alukupa unnambu. 7Neemwe ndi mulusaalika, mutachi laoka-laoka, ndi fino akulukuwa; kuno yao yakulweleengula, fino yampulikikwa uku wiinji wa maswi yao. 8Ichino mutachikolana nayo; kuno So wino amanyile chino mulusita naanti muchili munndoombe. 9Ichino mwemwi musaalika fi:
‘Tata witu wino alu umwiyulu.
Ishina lyaako liteshiiwe.
Uweene waako wiise.
10Finukasi fiombeke,
pano apaasi ndi fino umwiyulu.
11Utupe ichakulya chiitu chi leelo,
12Utweelele amaifyo yiitu,
ndi fino neeswe kweene twelela yano yatuifya.
13Utatutwala um-mazosyo,
leelo tukulule nUnjipe.
14“Kuno ndi mwelela antu yano yamuifya, na So wino uwa mwiyulu alumwelela nemwe kwene. 15Leelo ndi mutalwelela antu yano yamuifya, nanti So wino atalumwelela mwemwe kuifya kwino.
Kuizilizya vyakulya
16“Kaili pano umuizilizya, vyakulya mutachikolana na yaufi, yano yakunyepa ichikole apa maaso yao, kuno yakuufisa ku maaso, kuti yaloleke na antu fino iyaizilizya vyakulya. Mwenemo, ndumunena, fino yaati yapokelela unnambu wao. 17Leelo wemwi pano ukuizilizya, upakale amafuta ku ntwe, ufulale uku manso, 18kuti utachiloleka ku yantu, fino ukuizilizya, leelo So wino ali uku nfiso; na So wino alulola uku nfiso, alukupa unnambu.
Ifyuma mwiyulu
(Lk 12:33-34)
19“Mutachi uwikili ifyuma kuno ukuushi, kuno impese ni ngalawa fikulonoona, na ifi yakufuna nu kwiiya. 20Leelo muuwikili ifyuma umwiyulu, kuno kusulononeka chimwi uku mpese naanti ngalawa, naanti aivi yasufuna naanti ukwiiya.
21Kuno pano pali ifyuma fyaako, apano paluwa nu mweeso waako. 22Ikosho lya mwiili ilisho; ndi iliiso lyaako liswefile, umwiili waako wooshi uluuwa nu mwengelela. 23Leelo iliisho lyaako, ndi lyononeka, umwiili waako wooshi uluuwa ni chaanda. Ichino umwengelela uno ulimo muli weewe, ndi wawa ichaanda, ichaanda chiyo ichikulu nkaani.
24“Kusi uuntu wino angaombela ayeene yaili, kuno alutuwa weenga nu kukasama weenga; naanti ukulemana na weenga nu kusuula weenga. Mutangi muombele Leesa ni fyuma.
Kuchuulila
(Lk 12:22-31)
25Chaleka fiyo ndumuneena, mutachi chuulila amikalo yiino, mulye chaani naanti munwe chaani, naanti imyiili yiino, mushwaale chani. Chene! amikalo yatalushile ichuulya? Nu mwiili utalushile ifya kuswaala? 26Lolini ifyuuni fya mwiyulu: fisulukomela naanti kusakaata, naanti ukukôsha un-ntaanta; na So wino uwa mwiyulu ukulufilyiisha. Cheene! mweemwe mutalushi nkaani fiyo? 27Uwiini pali mweemwe, wino, ndi wauchusha, angauluunja utali waakwe naanti ikasa lyoonga? 28Ni ifya kuswaala, uku chaani ukufichuulila? Mwelengule ingala sha nchuundu, fino sikulumela. Sisuomba unndimo naanti ukupiliinga. 29Neene ndumunena, fino naanti Salomoni um-ukulu waakwe wooshi, ataswiite niingo wi limwi pali yeneyo. 30Ali ngi Leesa, wino akuluswiika fi amasote ya nchuundu, yano yalipo ileelo, ni iyulu yasumbwa umwiluungu, Cheene! atalulusha nkaani ukumuswiika mweemwe mwe ya usumilo uche? 31Ichino mutachi chulila, ukuti: twandya chaani, naanti: twanwa chani, naanti: twanswaala chaani?
32Kuno ifiintu fi fyooshi akulukuwa yakulushita; kuno So wino uwa mwiyulu amanyile fino mulushita fiyo fyooshi. 33Leelo icha ntangulo mushite uweene waakwe ni chumi chaakwe, na fyooshi fiyo mulongeshiwa. 34Ichino mutachi chulila ifya uwaanda wi yulu, kuno waanda wi yulu uluuchulila ukola; kuno chila waanda ukuulwisa nuyiipe waakwe.
Právě zvoleno:
Mateo 6: FNT1988
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
New Testament in Fipa © United Bible Societies, 1988. Bible Society of Tanzania.
