Mateo 5
5
Yesu wasunda uku mwamba
(Lk 6:20-23)
1Nawe pano wawine maumba, wakwezile uku mwamba, nga pano wikala, alondeshi yaakwe yaya kunali. 2Wavwanga uku nnomo wakwe, wayasambilizya, waati:
3“Inkata yao apina ya mweeso,
kuna uweene-wa-mwiyulu uwao.
4“Inkata yao ali na malaanda,
kuno weene yalusungulwa:
5“Inkata yao afyaaliike,
kuno weene yalupyaana insi.
6“Inkata yao a ansala nu unsala uku chumi,
kuno weene yalwikuta.
7“Inkata yao yano yalukumbukila,
kuno wene yalukumbukilwa.
8“Inkata yao aya myeso misiifu,
kuno weene yalunnola Leesa.
9“Inkata yao yakupulikanya,
kuno weene yalwiitwa ana yi Leesa.
10“Inkata yao yano yasuumwa uku fya chumi,
kuno uweene-wa-mwiyulu uwao.
11“Inkata yino mweemwe yano mulutukwa nu kusunywa nu kumwifikisha chila iswii liyifu uku ufii, uku ndaandu waane. 12Chimbiini nu kuchimbilila, kuno mululambulwa ichikulu umwiyulu; kuno ifino yayasunyile yakalausha yano yali inkoleelo yiino.
Unsilya nu mwengelela
(Mk 9:50; Lk 14:34-35)
13“Mwemwe nsilya wa nsi; leelo ndu unsilya utakaliipe, ungateela chaani, kuti unone? Chitasiifile kayiili, leelo ukusuumbwa apaasi, nu kulyaatwa na aantu. 14Mwemwe mwengelela wa nsi. Unsi utaangi ufisame ndi uli apa mwaamba apiyulu. 15Na aantu kweene yasulukosha koloboi yawiika un-nyiingu, leelo yakuwiika apiyulu, nga nawe asweefesha yooshi yano yali un-ng'aanda. 16Ifino nu mwengelela wino kweene uswefezye aantu, yalole imilimo yino imisiifu, yalumbaanye So wino wa mwiyulu.
Yesu wafwaanga pa Ntambi
(Lk 16:16-17)
17“Mutachelengula muti: ngisile ukonoona Masuunde nanti yakalausha; awe, ntishile kwiisa ukonoona, leelo ukufikilisha. 18Kuno mwenemo, ndumunena: kufika lino iyulu ni nsi filushila, yota yoonga nanti tonoontwa lyoonga lya Masuunde litalutiina, kufika na lino yooshi yawa. 19Ichino untu weeshi wino waacha onoona isuunde lyoonga inoono pali yao nu kusambilisha aantu fiyo, alwiitwa unnoono nkaani um-weene-wa-mwiyulu; leelo wino aluyaoomba nu kuyasambilisha, wiyo alwiitwa uwikolo um-weene-wa-mwiyulu. 20Kuno ndumuneena, fino ichumi chino, ndi chitalusila ichumi chi yakaandika na aFaliseo, mutalwingila nanti kache um-weene-wa-mwiyulu.
21“Mwapulika fino aantu ya kali yanenilwe: ‘Utachumoola; nu ntu wino wumoola, aluputwilwa undaandu.’ 22Leelo neemwi ndumuneena: fino uuntu ndi waloleela unniina ichilaakali, aputwilwe undaandu; nu ntu ndi watuka unnina, atwalwe apiteengo; nu ntu ndi waati: Chiwila, alutwalwa un-chilinkwe cha mooto. 23Ichino ndi waleeta uwiila waako uku altaale na ku ndi wizukila fino unnyoonko ali niswii kuli weewe, 24ushe uwiila waako apa altale, uye mukapulikane nu nnyoonko, nga pano uweele uwise ufiime uwiila waako. 25Pulikani nu mwanisi waako suwa, pano muchili muli nawe un-nsila, kuti umwanisi waako atiise akutwaale uku Mputushi, nu Mputushi akutwaale uku nsalifi, nawe akuntwaale uku nyololo. 26uMwenemo ndukuneena: utangufume muo nanti kache, kufika na lino wamalila ukulipa ulupia lwa kumaliila.
27“Mwapulika, fino chafwaashilwe: ‘Utachita ifya upuundu.’ 28Leelo neemwi ndumunena, fino untu weeshi ndi walolekesha umwaanachi uku kumkumbuka, watachita ifya upundu nawe um-mweeso waakwe. 29Ni liiso lyaako ilya kwi luunji, ndi lyaleka wanoona, ulifyonkole, ukalisuumbe ukutali neewe, kuno chingakusiipila ichai chaako choonga chilowe, kuleka umwiili waako wooshi, utiisa ukasuumbilwe un-chilinkwe cha mooto. 30Nikasa lyaako lya kwi luunji, ndi lyaleka wonoona, liputule, lisuumbe ukutali neewe, kuno chingakusiipila ichai chaako chonga chilowe, kuleka umwiili waako wooshi usuumbilwe un-chilinkwe cha mooto.
31“Kaili chafwashilwe, ‘fino untu ndi wata unchi, ampe ulucheto lwa kunta.’ 32Leelo neemwi ndumuneena, fino untu weeshi wino wata unchi, ndasi un-ntaambi ya upuundu, angi wannchita ukuwa umpuundu, nu ntu ndi wasaka wino yaata, aongi aluchita ifya upuundu.
33“Kayili mwapulika aantu ya kali fino yaneenilwe: ‘Utachilapa uufi, leelo ufikililishe uMweene ifilapo fyaako.’ 34Leelo neemwi ndumuneena, fino utachilapa naanti wuche; naanti uku fya mwiyulu, kuno aali chisuumbi-cha-wene ichi Leesa. 35Naanti uku nsi, kuno uli pakuwikila amuulu yaakwe; naanti uku Yelusalemu, kuno ali unsi wa Mweene nkulu. 36Utachilapa naanti uku ntwe waako, kuno utanguchite ulunyetelwako naanti loonga ukuwa ulufwi naanti ululuku. 37Leelo amaswi yino yawe Ee, Ee; Aawe, Aawe. Kuno ndi yano yaluta pao aangi yafuma kuli wiwi Unjiipe. 38“Mwapulika fino chafwaangwa: ‘Iliinso kwi liinso, ni liino ukwi liino.’ 39Leelo neemwi ndumuneena, fino mutachipashanya nu njiipe; leelo ndu ntu wino wakuuma itama lya kwi luunji, insenwiile ni lya uwiili. 40Nu ntu wino alusita uku kusongelela nu kutoola inkaanjo yaako, inshile ni kooti kweene. 41Nu ntu wino wakufyengelesha ukupita kilometa yoonga, pita nawe shiyili. 42Wino wakuloomba, mpe; na wino alushita ukukopa, utachimpa inkoonto.
43“Mwapulika chafwaangwa, fino: ‘Ukunde unnyoonko,’ na: ‘Utuwe siluweembu waako.’ 44Leelo neemwi ndumuneena, fino mukuunde asiluweembu yino kweene, muyalombela yano yamusunya. 45Kuti muwe ana yi Tata wino winali umwiyulu. Kuno weene akuluyakosesha ilaashi lyaakwe uku yayifu na asiifu; akululeeta iseemba uku ya chuumi na iyaashi chuumi. 46Kuno ndi mwakuunda yano yamukuunda mweemwe, aangi mwapata chintu wuli? Na yakalifya yi kodi, Cheene! yasuluoomba fiyo kweene? 47Kayili ndi mwandaula anyoonko yatupu, aangi mwachita chaani ukuluta aanji? Naanti antu ya akulukuwa, Cheene! yasuchita ndi fiyo kweene? 48Ichino neemwe muyaane, ndi fino So wino uwa mwiyulu wayaana.
Právě zvoleno:
Mateo 5: FNT1988
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
New Testament in Fipa © United Bible Societies, 1988. Bible Society of Tanzania.
