MAK 15

E Zeriji Jisus na Agba Pɛilat

(Mat 27:1,2,11-14; Luk 23:1-5; Jon 18:28-38)

1Gunu ata ehiu onongbo, nu n-nyarɛ, ne embisegeni Undwa, keeni ajɛmɛ-ụshɛrɛya njɛ ushaura nu uvwungwa dididi, ee umpi Jisus, ee shepi bu ee peni Pɛilat.#Mat 27:1,2; Luk 23:1; Jon 18:28 2Ga Pɛilat unseni Jisus, bɛɛ hiɛŋ, Gabụ suu bɛ shɛ Agwuma Eju?

Ge Jisus jishijɛ bụ, bɛɛ hiɛŋ, Gabụ du bu dumwa iŋ ya.

3Nazhɛ ehiu onongbo petengeni Jisus ashɛrɛya ofwugwo.

4Ga Pɛilat unseni Jisus sasana, bɛɛ hiɛŋ, Bɛ jɛshɛjɛ shɛ ree iyi elele? Hioko iyi ifwugwo nɛ aa bu suyanɛ ụshɛrɛya iwɛ ibɛ.

5Ama ge Jisus jishɛjɛ shɛ bụ iyi elele o, ibɛ po yaa dama Pɛilat.

E tegeni Jisus Nrɛ nụ Ụ'wụ'wụ-ubatanɛ

(Mat 27:15-26; Luk 23:13-25; Jon 18:39—19:16)

6Ga Pɛilat ba shana baa bacɛngana aŋ bụtụ bu ko na ashashɛ ajama umwono-tishi na aka Isene, ubwa shɛ bụtụ na atwa njɛ orogwu iwɛ ubwa. 7Ama bụtụ bu ko namba ee kepi nu umwono-tishi na atwa na bɛrɛ ujasa, aba shɛ atwa na kwụnɛ atwa nu ujasa ata. 8Nazhɛ atwa ofwugwo munji na agba Pɛilat, ee kwuni bu orogwu tɛnda maa ndana aŋ gana na tu ba shana ba ndana aŋ. 9Ga Pɛilat heŋteni aŋ, bɛɛ hiɛŋ, Ihiɛ kwụlanɛ suu maa ma hi bacɛnganɛ Agwuma Eju? 10Iwɛnɛ ti bee mepi maa ni isɛbwɛngwɛ ehiu onongbo shapɛ Jisus pu bwa.

11Ama ehiu onongbo mbiseji atwa ofwugwo maa ga shɛ ga Barabas baa bacɛnganɛ aŋ.#Ugo 3:14

12Ga Pɛilat heŋteni aŋ sasana, bɛɛ hiɛŋ, Imbe tuba ahia jala maa ma nda bụtụ ga ɛhi hiɛŋ Agwuma Ejuu?

13Atwa ata uganɛ sasana, ɛɛ hiɛŋ, Tagana bụ nrɛ nụ ụ'wụ'wụ-ubatanɛ.

14Ga Pɛilat heŋteni aŋ, bɛɛ hiɛŋ, Iwembe kwuŋ poo? Imbe kwuŋ shɛ iyi iwɛ nɛ baa njɛɛ? Ama atwa ata uganɛ sasana duwa, ɛɛ hiɛŋ, Tagana bụ nrɛ nụ ụ'wụ'wụ-ubatanɛ.

15Ama gana na tu ga Pɛilat ba jala maa ndana atwa ata iyi nɛ aa jala, ibɛ po bee becingeni aŋ Barabas. Ama bu kwuci Jisus nazhɛ bee shepi bu bee peni aŋ maa e tegeni bu nrɛ nụ ụ'wụ'wụ-ubatanɛ.

Asaza Njɛ Jisus Asada

(Mat 27:27-31; Jon 19:2,3)

16Nazhɛ asaza zeriji Jisus nu ukpogwu uko na ɛɛ hiɛŋ izeci ubwa, Praitorion, aa suyaganɛ asaza kpaaŋ aa ụlwatagwụ apata. 17Nazhɛ ee urigeni Jisus utogwo uduhwa ushenje, ee pieci esepi adanya aa njɛ udara, ee peteni bu nu uhiuhiu. 18Ee kwuni bu a'walụ, ɛɛ hiɛŋ, Zaacɛ! Tumaka Agwuma Eju! 19Oo po bu bininjidegbe nu uhiuhiu, ee zwegeni bu mecemi, ee kwuzeni bu ni ivwunɛ ibwɛ. 20Aka na te e hwuwi bu asada tɛnda hwɛɛ, ee ushiji bu utogwo ata uduhwa ushenje, nazhɛ ee urigeni bu ya utogwo ubwa. Ee becinji bu maa e shepi bu o to nu ubatanɛ.

E Tegeni Jisus Nrɛ nụ Ụ'wụ'wụ-ubatanɛ

(Mat 27:32-44; Luk 23:26-43; Jon 19:17-27)

21Nazhɛ asaza 'imɛ bụtụ bu ko na ɛɛ hiɛŋ izeci ibwɛ ga Saimon bụtụ bu Saren, na shɛ bishi Alikizanda no Rufos ti bɛɛ zhɛ ujiyo ehilo, maa 'waŋnana Jisus ụ'wụ'wụ-ubatanɛ ubwa.#Rom 16:13 22Nazhɛ ee shepi Jisus no ofwo oko na ɛɛ hiɛŋ izeci ya aba, Golgota, (nɛ ecilo ibɛ shɛ ofwo ukokolo uhiuhiu). 23Apata ee peni Jisus meni mụ tụ'walụ ta afwafwa mu na ee hiŋtetenji ni iyi nɛ ɛɛ hiɛŋ umuru, ama ge Jisus leshiji shi mu o. 24Apata ee tegeni Jisus nrɛ nụ ụ'wụ'wụ-ubatanɛ, oo dwotwogonu tugwuno tu bwa ni icɛcɛ tu'waŋ maa e mepi iyi nɛ bụtụ bụtụ zhɛ ba 'yaga.#Shɛzu 22:18 25I shɛ gana aka ogogo ecinjishi nu usaka ibɛ ee tegeni Jisus nrɛ nụ ụ'wuụ'wụ-ubatanɛ ata. 26Nazhɛ ee 'nyeci iyi nɛ ɛɛ hiɛŋ ge Jisus njɛ, ɛɛ hiɛŋ AGWUMA EJU.

27E tegeni du ashɛrɛ eyebi nrɛ nu bwa, bu ko namɛ geri bu u'ala ubiye ubwa, bu na bi yebi namɛ geri bu u'ala ugwulwo ubwa. 28[Inɛ ɛtɛ i shɛ iwɛ maa Iwɛ ya Agwatana i sɛ, inɛ hiɛŋ, A rɛcɛ bụ na atwa na bweji undwa.]#15:28 Inɛ ɛtɛ i shɛ iwɛ maa Iwɛ ya Agwatana i sɛ: Tɛjɛshɛrɛga tu ko tu zasa buwala ga bu 28. #Ayiz 53:12

29Atwa na a kashaka apata a dumangana du Jisus n-ndumwa mụ wɛ, oo zhingoto ohiuhiu aba, ɛɛ hiɛŋ, Iiŋ, gabụ ga bi hiɛŋ bi zhɛ bo hwuŋzo Umwano wa Agwatana maa meeneni uŋ ijitɛ itɛtu! #Shɛzu 22:7; 109:25; Mak 14:58; Jon 2:19 30Kezhe nụ ụ'wụ'wụ-ubatanɛ ga, maa meme bicinji. 31Gobwonu du ehiu onongbo, ne embisegeni Undwa a nda Jisus asada, aa mama hiaŋnụ, Bibicinji ba anya atwa, na eri shi kaa momo bicingo.#Shɛzu 22:7,8 32Gabụ ga Krast, Agwuma Isrɛl, kezhe nụ ụ'wụ'wụ-ubatanɛ hwuwayɛ go maa ta kwụba maa ta bụ tɛtɛna-rishe. Atwa ata ee tegeni nrɛ nụ ụ'wụ'wụ-ubatanɛ nu bwa, twagajɛ bu du.

Tu'wo ti Jisus

(Mat 27:45-56; Luk 23:44-49; Jon 19:28-30)

33Aka na tu uwaŋna shikeci, tishi tu layɛ nu unyizo kpaaŋ, uuwa i ci geri bu uwaŋna tinyingana. 34Aka na tu uwaŋna nyinganɛ, geri bo ogogo atatụ, ge Jisus uganɛ duuwa, bɛɛ hiɛŋ, Ilai, Ilai, lama sabakitani? (Ecilo ibɛ i shɛ, Agwatana mi, Agwatana mi, iwembe po ebi n jinecii?) #Shɛzu 22:1

35Aka na tu umeseyi uko na ashashɛ atwa na shikekeni apata hwụjɛ iŋ, ɛɛ hiɛŋ, Bwoonu ba suyana Elaija. 36Ibɛ po bụtụ bu ko gezhiji, bee shepi ụhwụŋkwụŋ, bee shiyeni uŋ ne meni mụ tụ'walụ ta afwafwa mu na mi sembi, bee hwuŋteni uŋ nu usanga bininjidegbe, bee peni Jisus maa swa. Ɛɛ hiɛŋ, Ti zhɛ ta kwụba okwo ge Elaija zhɛ ba zhajɛ maa kezhicinje bu.#Shɛzu 69:21

37Ge Jisus uganɛ sasana duuwa, nazhɛ baa dwa ihwungwɛ.

38Nazhɛ ibɛgɛlɛ yo odubo amɛ umwono wa Agwatana bagwụ te kwune ni ihiŋhiŋ tutu uvwi.#Ụban 26:31-33; Ehib 10:19,20 39Aka na tu uhiu wa asaza dipi-yebi na shikeni apata kwụbɛ#15:39 kwụbɛ: Tɛjɛshɛrɛga tu ko ti hiɛŋ, kwụbɛ tu baa uganɛ duwa, baa dwa ihwungwɛ. ti ge Jisus dwa ihwungwɛ gana ga keeni iyi nɛ njɛ, bɛɛ hiɛŋ, Iwɛ-tɛkana, bụtụ ga shɛ ga Yɛu ya Agwatana!

40Eyikwo oko namba apata a na ngbaracɛ Jisus taa dụlụ, ge Meri biyikwo bu Magdala, namba na aba, ti ge Meri bino ba ata Jemis ata gwumwa, no Josɛs keeni Salome, #Luk 8:2,3; Jon 19:25 41anaa na ga 'wa bụ a ndana bụ iyi aka na tu baa namɛ nu Galili, medenji eyikwo anya ofwugwo a na a zhagaga la nu bwa nu Jɛrusalɛm.

E Ni Ru'wo ri Jisus

(Mat 27:57-61; Luk 23:50-56; Jon 19:38-42)

42Aka na tụ ụrụmɛ shɛ, go Josɛf bụtụ ba Arimatia, na shɛ bụtụ bụ 'wụtụ na ashashɛ ajɛmɛ-ụshɛrɛya, na kaa du ba nda ashɛlatụ Cɛnjɛ-ta-tugwama ta Agwatana, zhajɛ. Baa njɛ eshe-hwoo bee zhe pu Pɛilat, baa lụpɛ bụ ru'wo ri Jisus. 43Iwɛnɛ po ụjita ata ụ shɛ ụjita tumama imanga tɛ ɛ hiɛŋ Ụjita-ụhinjanụ vwɛ waŋna beyiko. 44Yaa dama Pɛilat ti ge Jisus 'wi kakayɛ. Ibɛ po baa suyanɛ uhiu wa asaza dipi-yebi, bee unseni bu okwo ge Jisus uwo cebe. 45Aka na tu uhiu wa asaza ata dipi-yebi mbishi bu maa ge Jisus uwo cebe, nazhɛ bee peni Josɛf ru'wo ri Jisus. 46Go Josɛf so tugwuno ti ilinɛn, bee kezhicinje ru'wo ri Jisus, bee pipi ru no tugwuno ta ata ti ilinɛn, bee wecicinji ru nu u'uye na ee hini nu utayɛ uko ụ'wụtụ. Nazhɛ bee jirenji utayɛ uko ụ'wụtụ, bee ubi unu u'uye ata. 47Ge Meri biyikwo ata bu Magdala, ne Meri bino Josɛs kwụbɛ kaa ofwo ata ee ni Jisus.

Právě zvoleno:

MAK 15: RBT

Zvýraznění

Sdílet

Kopírovat